2005年12月28日(三)

話咁快就放完聖誕假, 總結如下:

23號放佐工入元朗去佐個舊同事屋企BBQ.

24號首先落佐屯門食lunch, 然後出佐尖沙咀行下街, 買佐千幾蚊護膚品, 順便夾硬拉佐senpai佢做皮膚測試, 佢皮膚既水份竟然仲高過我, 佢有成62%, 我都係得46%... (睇黎我要勤力D敷mask先得). 跟住去City Super買佐D鵝肝, 意大利雲吞諗住聽日整我地既聖誕大餐. 今晚我地去佐海都食中菜, 費事聖誕節比人掠到一頸血~~

25號我地留係屋企整聖誕大餐, 頭盤係蒜蓉包, 奇異果伴鵝肝同鴨胸, 主菜有原隻菇菇及意大利雲吞, 甜品有樹頭蛋糕加雪糕. 好好味~~

26號返公司加班, 兩點三返到去, 搞到夜晚十點半先走得, 今個月又爆佐OT.

27號係屋企打機同上網搵北海道旅行既資料.

今年我送佐地鐵股東果架迪士尼水晶列車(上網高價收購)比senpai, 佢就送佐AIGLE既風褸同抓毛外套比我, 去到北海道可以著, 唔駛著羽絨咁臃腫(況且我本身都無羽絨褸).

剛剛出佐B仔, 都係2.5倍, 有錢去旅行了~~

今個月係咁食食食, 肯定肥死...

2005年12月23日(五)

尋晚返senpai屋企做節, 做完節之後我地玩射龍門, 好緊張刺激呀, 我都係第一次玩, 最後嬴佐二百幾蚊呀, 好開心~~ 伯母係大嬴家.

本來senpai係學校既聖誕party拎佐好多包薯片返黎比我, 不過比民民同Clara搶晒, 哈哈~ 不過嬴返黎既錢可以買好多薯片囉~

2005年12月22日(四)

我公司班同事, 唔知係鍾意晒命定真係咁有錢, 成日都話自己賺錢又賺佐幾多. 今日又聽到某同事賣樓又賺佐五十萬(注意我用「又」,因為之前已經聽過佢地買樓又換樓, 一轉手又賺幾十萬); 之前又聽到某某係pantry話:「果日check下戶口發覺無啦啦多佐五十萬, 原來?豐升佐咁多, 我都無理過佢好耐...」; 有時又聽到某同事話:「我聖誕去澳洲旅行呀, 我驚間屋咁耐無人係度會比人爆格呀~ 咩呀, 我屋企好多值錢野架, 淨係部Plasma都幾萬銀啦~」; 有時真係頂佢地唔順, 有陣時唔係我八卦去偷聽人地講野, 而係佢地呢D野都係lunch食飯時係pantry大大聲咁講, 真係唔知佢地係晒命定想點. 真係唔明, 炒樓真係咁容易? 成日聽到話轉過手又賺幾廿萬, 跟住又成日話去旅行, 一年可以去成兩, 三次.

頭先老細係大陸打比我, 問我廿六號果日得唔得閒返公司, 因為果日有貨要出, 但負責既同事已安排佐去旅行. 我見果日反正得閒, 所以應承佐會返公司加班呀(唔好以為我貪OT呀, 我公司OT得廿個鐘, 我已經OT佐十五個鐘, 今個月又爆硬OT了). 如果你地果日行開出黎尖沙咀既, 就黎探下我哩~~

2005年12月21日(三)

尋晚去佐教育路間一番食飯, 我覺得幾好喎, 味道唔錯, 又夠大份, 價錢又唔貴, 食到好飽, 仲食剩可以留番今日帶飯添喎~

Lunch去ATM?錢, 排前面個女人竟然唔記得拎錢就咁走佐去, 如果比著係你你會點? 自己拎佐D錢走? 定會叫住個女人? 你估下我會點做?

2005年12月19日(一)

我終於都解脫啦, 因為終於都考完試, 不過我就擔心呢個Sem拎唔到schlorship啦, 因為呢次考試真係無咩時間溫書...

開心既係我地既北海道之旅終於都confirm到機位啦, 好開心~~ 係時候要組織下D行程了. YEAH! 有無人知層雲峽同網走有無D露天風呂付客室呀??

有樣野好想講, 其實我覺得香港既冬天都係凍極有限0者, 明明都仲有十幾度, 就已經發出寒冷天氣警告, 有無誇張佐D呢?? 我件羊毛內衣今年內一次都未著過, 但我見D人十幾度就已經著羽絨, 真係好鬼誇張喎... 係香港十幾度就要出動羽絨, 咁佢地去外國旅行零下十幾度果陣應該著咩呀?

2005年12月10日(六)

今日係senpai細妹結婚既大喜日子, 我地一朝早七點半就要落到屯門, 然後就係坐, 等, 食, 坐, 等, 食... 由朝早七點半坐到下午三點先上車出發去酒樓, 其間食過西餅, 食過乳豬, 睇過報紙, 化過?, set過頭, 落樓飲過茶, 睇過玩新郎... 我有時好白痴咁諗, 第時自己結婚唔可以戴眼鏡, 咁張結婚相咪會好醜樣囉?? 唉, 面又肥眼又細... 不過化?果個人竟然以為我得二十?, 開心死. (但係我智商都係得二十?)

去到酒樓我負責坐門口接待, 由下午四時多坐到晚上九時, 終於都有得食lu~ 因為我同阿娟(senpai細佬個女友)未過門, 所以伯母話我地唔可以坐主家席喎, 其實我都預佐既, 好彩振宇佢黎飲坐我隔離咋, 否則我實悶死佐. 有時睇見佢地結婚原來咁煩咁多野搞, 都有諗過自己結婚果陣不如唔擺酒, 不過我知道阿媽一定會殺佐我, 同埋一世人都係得一次, 我諗果日即使煩D都可以接受既, 不過如果屋企多兄弟姐妹既話, 咁就慘囉~

2005年12月9日(五)

今日我請佐AL, 因為今日係senpai碩士畢業既大日子, 所以我朝早出深水po接senpai放工, 然後一齊入中大. 因為聽日senpai個妹結婚既關係, 佢有好多大陸親戚今日都黎佐香港, 所以今日有好多人同senpai一齊影畢業相, 好熱鬧呀~

影完相之後senpai就返學校開會, 而我就要返番公司, 因為有好多蘇州C等我返去處理, 四點幾返到公司, 差唔多成七點半先走得... 激死人. 上個月已經爆佐OT架啦, 而家又要放假都要返公司, 好蝕啊~~

夜晚senpai黎接我放工, 然後一齊入屯門食飯, 夾埋佢地D親戚延開佐兩圍食飯, 好好味~
今日見識到NEC果部好薄好薄既電話, 好輕好薄, 好正呀~~~ 點解呢個世上會有D咁好既老細, 會請下屬去旅行, 送最新款電話, 結婚送大大禮既?? 我覺得呢D咁好既老細, 比要搵一個專一既男友更加更加難... senpai個細妹兩樣都搵到, 好厲害啊~~

2005年12月8日(四)

我呢個墨魚燒賣日記, 睇黎應該改做墨魚燒賣週記(或者雙週記)了...

呢兩個星期簡直好似係地獄咁, 我同事係12月1日放假放到今日8號, 我每日返到公司, 自己本身既工作都未做, 就要做佐放假同事既工作先, E-MAIL都唔得閒覆, 飲水同去toilet既時間都無, lunchtime都仲係坐係位做緊野, 日日都要OT; 最慘係我下個星期就要考試了, 但係根本無時間溫書, 有時返到屋企成九點幾十點先食飯, 食完飯倦到死根本連溫書既心情都無, 我都唔知點去考試. 12月1號果日我本來要返去上最後一堂CB聽考試既事, 但係果日係公司根本走唔到, 到佐十點半頂唔順先放工, 成晚仲要未食飯, 只係行去巴士站途中買佐個面包上車食就算, 果晚搞到好胃痛... 不過總結黎講, 我覺得學多樣野都係好事黎既~

循例都寫番低呢個幾星期既事先:
1. Senpai佢又靜雞雞放佐兩千蚊落個家用箱到, 不過呢排叫外賣我都係用番自己錢咋~

2. Project Runway終於都做晒, 呢類節目除佐比賽淘汰果種緊張刺激好睇之外, 人性既一面仲好睇; 有D人為佐嬴真係咩都做得出, 本來我覺得卡娜一直表現都好好, 但最後因為鞋既問題, 我覺得佢好奸狡, 合約都寫到明唔准接受贊助都仲要死拗. 所以最後我希望肥仔杰會嬴, 因為佢既design真係幾特別, 同埋佢唔似得Wendy同卡娜咁用過D咩野手段去達到目的, 所以我覺得佢係嬴得實至名歸.

3. America next top model都好好睇, 不過我實在唔明杜雁點解咁遲先會比人淘汰, 美國人眼中佢呢D叫「豐滿」? 佢簡直係一個肥婆啦, 咁既身型都可以做Model? 可以入到圍我都覺得好神奇. 我覺得下一個出局既應該係果個LES.

4. 我地終於去佐東瀛遊訂佐package, 但係仲未confirm到, 係waiting list... 希望快D有好消息啦~

5. 由於呢份工都唔駛用日文, 我發覺我既日文程度已經跌到落谷底; 果日用日文覆番個日本人, 我發覺自己連轉型都唔記得點轉, 我竟然唔記得辭書形係mu字尾既話, 轉做te形應該點轉(係咪n de?). 睇黎我讀佐三年日文原來都係讀C片... 好?...

6. 我真係越黎越唔鍾意呢間公司, 但又唔知自己出到去可以做得D咩.

2005年11月27日(日)

今日一朝早陪senpai出佐牛頭角, 因為佢班囡今日打冠軍賽, 但可惜最後只得亞軍. 然後我地就馬不停碲咁落佐CityU, 因為佢要做大專杯既球証, 所以我就跟埋去睇下, 但係睇睇下覺得悶, 所以就去圖書館借佐本Management Science黎溫. 跟住等senpai做完野我地就去佐又一城食意大利菜, 跟住就返屋企lu~

2005年11月26日(六)

呢個星期實在太辛苦啦, 日日都唔夠訓, 今日一放假, 我就訓到三點鐘先起身, 好變態, senpai佢都做完野返黎lu. 跟住我地就去佐食tea, 然後去百佳買佐D壽司, 刺身, 前菜等等, 返屋企再煮冷面, 今晚晚餐好豐富呀~~

2005年11月20日(日)

呢兩日我簡直係香港一日遊, 尋日好難得地senpai佢竟然無工作係身, 所以我地朝早先去飲茶, 下午就搭纜車上山頂, 好開心, 因為我未試過搭上山, 然後係山頂行佐陣山(真係行山架, 我行佐2000M既山頂徑). 跟住就諗住去白石食飯, 因為senpai有個同事話果度有間好靚既餐廳, 但點知去到執佐. 於是我地唯有出番沙田食飯(的士錢來回成舊水:p), 跟住就搭車返屋企勒.

今日20號我就11點要入到科大, 因為有個friend master畢業, 約佐入去影相, 好鬼遠呀! 影完相之後就入屯門上佐個friend既新居, 跟住我就返屋企沖涼洗頭, 諗住再落良田睇senpai班女仔打friendly, 不過一沖完涼就懶得再出街, 結果係屋企睇電視. 好開心, 因為好耐無坐定定咁睇過電視, 今晚睇佐全美模特兒大賽, 睇佐MIB II, 好好睇呀~~

2005年11月18日(五)

平時星期五可以準時走, 但而家連星期五都要OT, 好可憐... 今日同senpai入佐三聖食海鮮, 好開心~ 因為我未去過果度食, 好好味好滿足呀~!! 辛苦佐成個星期, 終於有餐好既食, 真係感動~

2005年11月17日(四)

人唔通黑起上黎真係事事不順?? 今日又要返去上果堂廢堂, 今日全堂都係presentation, 有四組present, 本來呢D咁既堂我就一定唔會返架啦, 但因為我地果組下星期要present, 所以約佐要返去傾project. 搞到成十點先走. 放佐學我如常去又一城搭小巴去西鐵站, 但係今日條人龍鬼咁長, 原來有兩架小巴今日要去政府驗車, 聽日先出得番黎. 第一架車我係第十九個上唔到車, 第二架車竟然黎架10M, 唔入西鐵站我唯有又呆等, 等到第三架車先上到, 足足係小巴站等佐四十五分鐘!!! 返到屋企已經係十二點半, 痴線架!

2005年11月15日(二)

今日偷佐半日假, 因為我下午要去醫院覆診, 於是唯有好「不負責任」咁留番平州D單比Carol自己入番, 睇完醫生就直接返屋企唔返公司.

雖然放低佐公司既野, 但就要準備24號presentation既野, 根本都無時間休息.

2005年11月14日(一)

今日逃學, 因為senpai個妹今日過大禮, 佢阿媽提佐幾次話今晚想兩家人一齊食餐飯, 所以最後走佐堂. 不過好搞笑, 話就話一齊食餐飯, 但係去到卻係兩家人分開兩張檯坐, 無咩交流喎... 雖然人多真係唔可以坐埋同一檯食飯, 不過我就覺得無佐一齊食飯呢個意思囉...

2005年11月13日(日)

今日陪senpai佢去深水po運動場, 因為佢班學生參加佐咩野油尖旺區陸運會, 我地坐到佢班學生玩完晒D賽事先走. 然後我地去佐西九龍行佐陣食埋飯, 跟住仲去佐松記食埋糖水先返屋企.

2005年11月11日(五)

呢排完全係忙到無停手, 我連日記都好耐無update過:

今日我上佐大陸廠, 鬼叫上面班人又整佐D麻煩野出野, 所以今日要上去開會. 個會就開佐一陣0者, 但係我上到去都仲要執埋D係香港未完成既手尾, 最慘係上面唔係自己地頭, 電腦又慢, 開個MAIL都要幾分鐘, 有時仲要hang埋機, scan完野又唔似香港直接send去mail, 要去個唔知邊度既server搵番落黎, 電話又打唔到, 打得通時又話lunchtime, 一係就對方唔係位搵佢唔到... 總之就係好鬼?!! 個個都問我仲咩星期五上去, 話過關好多人架, 其實我夠知星期五要出貨, 我自己係香港都鬼死咁忙啦, 因為今日要返大陸既關係, 我尋晚要加班到夜晚十二點半先走得呀!!! 但我老細話星期五方便佢麻, 結果我今日係上面都係忙到??轉. 本來上大陸可以三點幾四點就返落黎香港, 但係我到四點鐘都解決唔晒D問題, 好驚五點都走唔到, 因為大陸廠五點就放工, 到時無理由得番我一個係上面掛??? 同埋五點可以跟佢地廠車走麻. 幾經辛苦先趕得切剛剛好五點搞掂晒D野...

上到車, 公路又塞車, 星期五過關又多人, 最後七點幾先返到黎香港! 我本來諗住如果順順利利開完會三點左右就走架麻, 而家搞到七點先返到落黎...

2005年11月7日(一)

呢個星期開始更加忙, 因為公司有個同事12月3日結婚, 會放兩個星期假, 呢段期間我就負責佢部份工作, 由於我無呢方面既經驗, 所以今個月要開始學, 一路學一路做, 但係因為我以前未做過, 又驚做錯, 所以做得好慢.

今日一朝早logistics班人就叫佐我老細入pantry傾野, 原來係關於我負責間廠星期五落唔到貨落黎單野, 人地做晒文件約晒forwarder book晒flight, 無貨到既話invoice又要改過, 麻煩到好多人, 所以logistics就星期一返工就向我老細投訴, 於是老細就話星期五要上去大陸同班友仔開會, 了解下發生咩野事, 同埋第時可以點樣安排好D, 所以我今個星期五要一個人返大陸. 我老細話Winnie(logistics department經理)佢話我成日無feedback喎, 呢隻死貓真係食得我背脊骨落, 因為根本大陸有咩事發生, 都唔通知我既, 星期五果晚無貨到, 我根本完全唔知, 唔係我唔想feedback, 而係根本無人通知我... 我諗以後每一次送貨落黎我都要半夜三更打電話去warehouse問下D貨到佐未, 跟進下feedback下先得~

2005年11月5日(六)

今個星期六日senpai要入camp, 所以我就做下自己野, 星期六一朝早起身同senpai食早餐, 跟住就拎衫返屋企, 係屋企打佐陣機, 然後落元朗剪頭髮, 之後行元朗買佐D?所用品就返屋企. 返到去睇DVD, 睇佐套絕世好賓, 上佐陣網, 然後就落去做GYM, 做完GYM買糖水返上去食, 又再睇多套神經俠侶(兩套戲都幾好睇, 好搞笑~), 然後就沖涼玩磨砂, 跟住再上下網, 搞搞下成四點幾鐘先訓.

2005年11月4日(五)

好激氣好激氣! 而家我唔得閒係屋企開機洗衫, 多數都係阿媽開機洗... 唔知點解成日都有衫甩色, 染到我其他衫一撻撻!! 通常第一次買返黎既衫都應該自己手洗睇下會唔會甩色, 然後第二次先掉落洗衣機洗架麻, 尤其是係D深色衫添; 但我個妹成日唔理咩衫都掉晒落洗衣機, 我自己開機洗衫既話我一定會將佢D衫揀番出黎叫佢自己手洗番, 但阿媽通常就會一齊洗埋(註: 我個妹係絕對從來唔會自己開機洗衫的!), 搞到D衫甩色, 最激氣係我唔太鍾意/係屋企著果D訓覺衫就無野無染到色喎, 反而我好鍾意好鍾意果D就染到一撻撻喎, 都唔係第一次架啦!!! 好?呀!!! 點算呀?~ 大家知唔知有咩辦法可以將染到既色整甩呀??? 我真係好激氣呀!!! 餐餐都係咁, 唔鍾意果件都唔蹂躪既?!!!

2005年11月3日(四)

公司有個IS比人炒佐, 唔係話日本公司唔興炒人既咩? 炒佢既原因係佢比客投訴同埋呃OT錢. 但聽聞真正原因係佢亂搞男女關係同埋勁比人篤背脊喎... 等我分PL果陣見佢無開電腦仲以為佢放假添, 原來已經比人炒佐...

我剛剛先知原來自己個妹轉工轉到去洲立電影公司果度做, 聽佢講有時會有首映戲飛添, 不過唔知佢呢份工又可以做幾耐呢?

我已經暫定明年既1月27日至2月5日會去日本10日, 行程大約如下:

1月27日 出發往北海道
1月28月 北海道
1月29日 北海道
1月30日 北海道
1月31日 北海道
2月1日 由北海道往箱根, 住溫泉溫店
2月2日 東京, 住池袋HOTEL THEATRE酒店
2月3日 東京, 住池袋HOTEL THEATRE酒店
2月4日 東京, 住池袋HOTEL THEATRE酒店
2月5日 回程

我地而家淨係定佐日子, 其他如搵邊間公司既PACKAGE, 酒店, 行程之類全部都未定, 所以如果大家呢幾個月睇到雜誌, 上網, 朋友介紹等等見到有關北海道/東京/箱根既好介紹, 例如平價酒店/機票/套票/好去處/好地方/必食舖頭等等, 記得話聲我知啊~~~

2005年10月30日(日)

終於都quiz晒, 好開心~! 下午senpai又要去牛頭角帶隊, 我跟埋一齊去. 然後我地去佐德福行街, 先去佐冒險樂園玩掟彩虹, 比我掟中佐最細藍色果格大?, 拎佐隻好大既公仔走, 好開心! 然後去佐IKEA買佐D廚房用品.

夜晚我地落尖沙咀東海食大閘蟹, 好開心啊! 成世人第一次食大閘蟹咋~ 初初食小籠包, 佛跳牆果陣都好地地, 一上大閘蟹就出事哩. 熟悉我既人都知我係好怕海鮮類生物架麻, 連未煮熟既蜆都唔敢掂既. 但我一向係怕未煮熟果D, 煮熟佐果D我就唔係好怕架麻~ 但係D大閘蟹一上我就覺得好驚啦, 可能一向食蟹, D蟹都係砍開晒一件件, 無佐個「蟹樣」我就唔怕喎, 但係大閘蟹成隻上, 佢放係檯我就覺得好恐怖啦, 唔敢用手去掂呀, 最後都係senpai佢幫我拆開一件件比我食, 真係好對唔住呀! 又係我自己話要去食大閘蟹既...

2005年10月25日(二)

唔知點解星期日既日記會重覆POST佐兩次既? 咁0岩呢兩篇都分別有comment係度, 所以最後決定都係唔delete任何一篇了~

阿Sa, 我連續呢兩個星期六都要返Cityu quiz呀, 嗚嗚, 都無時間玩, 嗚嗚~~~ shopping? 我要儲錢出年農曆年去北海道呀~ 嘻嘻~~~

KAKA, 係啦, 你男友都成日返大陸, 你睇實D佢添呀~~

今個星期六要返去quiz management science, topic係linear programming同埋project management, 我尋日先開始溫書, 好驚呢科會死呀! 睇黎我今年既schlorship都係無望了... 因為果科consumer behavior一定累事!!

2005年10月23日(日)

今日senpai佢要去做球証, 所以我又自己一個人係屋企. 其實我初初識佢果陣已經知道佢係一個好忙既人, 星期六日都無假放既, 一係就去比賽, 一係就去帶隊, 一係去練波, 一係去教波, 一係就做球証, 有時可能係學校既家長日要返學... 其實我明白架, 佢咁忙碌為咩0者, 都係為佐養妻活pi, 令我可以有一個更舒適既生活環境, 令大家有更好既將來. 佢係去做野搵錢唔係去玩, 所以我唔應該成日因為佢要去做野唔陪我而鬧情緒, 即使我因為佢要去做野而唔開心, 我覺得都唔應該抱怨, 因為我覺得自己因為咁而唔開心已經好唔0岩, 佢去辛苦做野果陣, 其實我係舒舒服服係屋企享受假期; 我仲要成日講埋D有骨有隱喻既說話, 真係好對唔住啊~! (雖然其實我只係講笑, 唔係認真). 而且如果我男朋友係D成日唔做正經野掛住玩掛住陪我既話, 我又唔會要D咁既男朋友喎, 因為男人應該以事業為重麻~ 其實我知道佢同我一齊之後, 佢應該都已經推掉佐唔少工作, 盡可能都抽時間去陪我; 或者自己私底下已經盡量將工作時間安排妥當, 安排好之後才輕描淡寫咁話我知結果, 但其實佢背後已經做佐好多野去遷就; 而且即使當佢做緊野果陣, 只要有時間, 佢都會打個電話比我. 不過可能我呢排受親戚影響, 所以心情都唔太好? 而且連續兩個星期六都要返學校quiz, 我每日lunch, 放佐工同星期六日就不斷狂溫書, 個人變得好悶悶不樂... 所以當senpai呢排要去做野果陣, 我會變得好唔開心覺得好寂寞... 希望過埋呢個星期六quiz完我會正常番哩~~

夜晚我地落佐樓下間「日本燒烤」食自助餐, 呢個價錢算係咁哩, 或者下次同阿媽黎食先~~

2005年10月23日(日)

今日senpai佢要去做球証, 所以我又自己一個人係屋企. 其實我初初識佢果陣已經知道佢係一個好忙既人, 星期六日都無假放既, 一係就去比賽, 一係就去帶隊, 一係去練波, 一係去教波, 一係就做球証, 有時可能係學校既家長日要返學... 其實我明白架, 佢咁忙碌為咩0者, 都係為佐養妻活pi, 令我可以有一個更舒適既生活環境, 令大家有更好既將來. 佢係去做野搵錢唔係去玩, 所以我唔應該成日因為佢要去做野唔陪我而鬧情緒, 即使我因為佢要去做野而唔開心, 我覺得都唔應該抱怨, 因為我覺得自己因為咁而唔開心已經好唔0岩, 佢去辛苦做野果陣, 其實我係舒舒服服係屋企享受假期; 我仲要成日講埋D有骨有隱喻既說話, 真係好對唔住啊~! (雖然其實我只係講笑, 唔係認真). 而且如果我男朋友係D成日唔做正經野掛住玩掛住陪我既話, 我又唔會要D咁既男朋友喎, 因為男人應該以事業為重麻~ 其實我知道佢同我一齊之後, 佢應該都已經推掉佐唔少工作, 盡可能都抽時間去陪我; 或者自己私底下已經盡量將工作時間安排妥當, 安排好之後才輕描淡寫咁話我知結果, 但其實佢背後已經做佐好多野去遷就; 而且即使當佢做緊野果陣, 只要有時間, 佢都會打個電話比我. 不過可能我呢排受親戚影響, 所以心情都唔太好? 而且連續兩個星期六都要返學校quiz, 我每日lunch, 放佐工同星期六日就不斷狂溫書, 個人變得好悶悶不樂... 所以當senpai呢排要去做野果陣, 我會變得好唔開心覺得好寂寞... 希望過埋呢個星期六quiz完我會正常番哩~~

夜晚我地落佐樓下間「日本燒烤」食自助餐, 呢個價錢算係咁哩, 或者下次同阿媽黎食先~~

2005年10月22日(六)

senpai今日一朝早就出佐去帶隊, 下午又要帶學生去參觀科學館. 而我就係屋企溫書, 因為今晚要返學校quiz. 一個鐘頭60條MC, D問題好鬼難, 如果0岩得七成都應該好好了... 都係果句: 我真係好唔鍾意marketing呢科呀~~~ 尤其是果個miss, 不知所謂!

quiz完就落尖沙咀小肥羊同senpai班同事打邊爐, 我地包佐間房, 有最低消費, 每人埋單要成$225, 好貴啊, 我食佐好少野而已, 同埋... 我覺得無咩特別咋喎, 點解成日都咁旺場同咁出名咁既?? 打完邊爐跟住去飲野, 本來去佐諾士弗台間SAVANA, 但我唔明點解D人會鍾意去D咁嘈既地方飲野既? 有隊band係度唱歌, 嘈喧巴閉, 完全傾唔到計, 我真係好憎呢類咁鬼嘈既地方, 究竟呢D地方有咩咁好去呢? 所以我地最後改佐地點去尖東間3X bar, 開佐間房, 飲到十二點幾就走. 不過我想問究竟香港有無D咩地方好似妙手仁心班醫生放佐工去果間bar咁架? 起碼靜D無咁嘈呀~

飲完野佢地有幾個同事又黎西部大開發, 返到元朗我地繼續打機同玩大富翁, 我行最尾所以只係買佐一塊地同一間乜鬼水務局, 最早破產可以早D去訓覺 :P, 佢地好似玩到成凌晨五點先訓覺~ 突然間有D懷念以前玩果隻電腦既大富翁, 即係有阿土仔, 錢夫人等主角果隻game~

2005年10月19日(三)

尋晚陪senpai佢去比賽, 但今次唔係排球, 今次係足球. 我地六點幾就落到葵芳, 食完泡飯就去行佐陣街打佐陣機, 行下行下又唔覺意買佐幾件衫, 明明話等再特價遲D先買(本來已經七折), 但係到最後都忍唔住買開就買... 去佐PETITE同a.s.t買. 我覺得BESS呢個牌子D衫越黎越師奶, 以前D衫都仲好OL下, 以前D sales都後生D, 唔知點解我既感覺係佢越黎越師奶, 好多款都娘到死, 唔知大家有無呢個感覺呢?

到佐九點鐘佢地比賽, 足球真係好悶啊~ 成日都踢出界既... 我都係覺得排球好睇好多, 可能我自己都鍾意排球, 同埋排球佢地打得勁好多; 足球就... 不過尋晚佢地得九個人踢, 又難怪既~
後尾講講下, 發覺senpai佢係足球, 排球, 手球, 籃球同田徑既球証/裁判; 另外係足球, 排球, 籃球, 體操, 健身, 游水同田徑既教練(我有無數錯呢?), 嘩~ 係咪傻架?

呢排有好多戲都想去睇, 我自己想睇高凶三萬尺, Connie話電車男好睇, 阿Sam話童夢奇緣好正, 果套泥膠狗(我唔記得叫咩名)又好似好得意, 再說一次我愛你又好似好感人, 套套都想睇, 但我自己連續兩個星期六都有mid-term test, senpai佢又鬼咁忙, 睇黎最後應該都係會買VCD係屋企睇. (但屋企仲有好多隻VCD買佐返去都仲未睇喎...)

2005年10月16日(日)

今日晨早六點半就要起身, 因為今日又去玩wakeboard, 我今次終於都成功起到水哩, 好開心呀! 我無諗過呢個運動白痴會成功起到身架, 好開心好開心~~

下午係西貢食完lunch就去佐九龍灣, 因為senpai佢要帶隊, 我又唔想分開, 於是寧願唔溫書都跟埋一齊去. 本來我以為女仔波應該會好悶, 因為我一開始就睇慣D好勁既男仔波, 但係今日佢呢隊真係好勁呀, 大炒對手25比10, 25比X(唔記得幾多分, 總之好低), 個八號好厲害呀, 真係剎波架~

夜晚就返黎同阿媽食飯.

2005年10月14日(五)

今晚係公司同社長搞既farewell party, 去佐紅磡果間都會海逸酒店, 都唔知點解會揀呢間架, 一來地點又遠, D人放佐工要搭的士過去; 二來annual dinner都去洲際啦, farewell party反而去間咁既酒店.

個party係自助餐形式, D食物好唔掂呀, 無樣野好食既... farewell party都估到係一D好悶既場合, 有D無聊人上去講下野, 有D無聊既所謂抽?, 有D無聊既回顧, 有D無聊既大合照, 好彩九點半就完, 跟住就同同事夾份搭的士返屋企.

2005年10月13日(四)

今日下午要去廠商會上個爛鬼training course (上既原因係因為ISO要交貨), 夜晚就要返學校present, 我唔知係太耐無做過presentation, 定係太耐無講英文所以差佐好多, 總之我對自己既表現好唔滿意, 實在太差啦!!

呢堂越黎越不知所謂, 真係每次講書得果40分鐘, 其餘果兩個幾鐘就係presentation, 於是每堂八點鐘break完之後, D人就開始走, 本來五十幾人既堂, 到presentation果陣只係走淨廿幾個坐係度, 坐係度既大部份人, 都應該係等緊要presentation既人, 否則應該都會走埋.

2005年10月8日(六)

星期六我朝早出佐深水po等senpai放學, 因為今日佢學校係新生面試日. 之後我地搭車去西貢滑水, 滑下午一至五點, 好曬啊~!! 之前我都只係坐係艇度得個睇字, 今次唔知點解會夠膽死走去試滑, 落水果下真係好驚呀, 但係玩落真係幾好玩, 不過就撻佐好多次同飲佐好多鹹水...

夜晚我就一個人返入屯門, 因為約佐南官友係小欖BBQ, 傻架, 十六人圍埋燒一個爐? 有無搞錯呀? 比我下次唔會選擇去小欖, 感覺上唔多好.

燒到十點半我就走先, 因為一來食飽佐, 二來滑完水實在太累了. 而senpai佢就滑完水去佐馬鞍山食飯同上佐小強屋企玩, 如果唔係應承佐去BBQ, 我都想跟埋佢地去玩啊~~

2005年10月6月(四)

呢排都唔知做乜, 每日都覺得好倦好倦, 明明每晚都已經好早訓, 十二點就去訓, 都訓到七個鐘頭呀, 但係每日朝早都唔想起身返工, 都仲係覺得好累, 成個人好無精神, 我呢排又無咩體力勞動又無咩壓力, 唔知點解會咁.

尋晚仲要發埋D好累好大壓力既夢, 就係發夢考A-LEVEL既作文, 我仲好記得果幾條題目, 第一題係究竟圖書館應唔應該比人一次過拎幾本書埋位閱讀? 因為D人睇得既都係得一本書, 但係就霸住其他書係身邊, 令其他人失去閱讀既機會. 第二題就係試描述一場足球比賽. 第三題就係試形容及分析Winnie the Pooh及其朋友之性格. 黐線架~ 我成日發D夢都好白痴無聊架, 都唔知點解會夢到呢幾題「考試題目」, 真係好無稽呀~~ 夢裡面我諗極都揀唔到題目, 用佐成個鐘都寫唔到三行字... 訓醒之後個人都仲係好累.

***********************************************************

夜晚睇蘋果日報見到一篇很有意思既文章:

不 知 你 有 沒 有 聽 過 Phil Collins 的 《 Another Day in Paradise 》 ， 歌 詞 蠻 有 意 思 的 ， 你 聽 後 可 能 會 感 恩 一 點 。 女 朋 友 Ｇ 告 訴 我 ， 她 原 本 要 到 峇 里 參 加 的 婚 禮 取 消 了 ， 因 為 新 郎 新 娘 訂 的 酒 店 被 恐 怖 分 子 炸 了 ， 但 基 於 婚 禮 要 延 期 ， 所 以 一 對 新 人 很 不 開 心 。 現 代 人 就 是 不 懂 感 恩 ， 只 想 自 己 ， 這 些 不 開 心 的 人 可 知 自 己 是 炸 彈 襲 擊 的 生 還 者 ， 地 點 和 時 間 ， 地 點 中 了 ， 時 間 只 差 兩 天 ， 如 果 他 們 早 兩 天 去 峇 里 的 話 現 在 都 已 被 燒 焦 了 。

為 甚 麼 一 對 死 逃 生 的 情 侶 會 不 開 心 ， 可 能 他 們 就 是 想 婚 禮 要 改 期 真 麻 煩 ， 酒 店 收 了 我 們 的 訂 金 怎 取 回 ？ 會 不 會 是 上 天 不 想 我 們 終 成 眷 屬 ？ 他 們 沒 想 過 ， 比 起 死 亡 ， 以 上 的 麻 煩 都 是 微 不 足 道 。 真 正 不 幸 的 人 都 不 會 為 自 己 的 不 幸 而 傷 心 ， 因 為 他 們 若 不 是 正 在 珍 惜 此 刻 生 存 的 寶 貴 時 光 ， 他 們 大 概 已 經 死 了 。 我 告 訴 女 朋 友 Ｇ ， 「 你 的 朋 友 太 不 正 常 了 ， 應 該 開 心 的 事 反 而 有 不 開 心 的 反 應 。 」 地 球 上 天 天 都 有 人 死 ， 死 亡 是 何 等 普 遍 的 事 ， 肯 定 比 中 六 合 彩 普 遍 ， 但 這 樣 普 遍 的 不 幸 沒 有 降 臨 在 你 身 上 ， 你 今 天 是 走 運 了 ， 但 人 就 是 愛 牢 記 不 幸 ， 對 幸 運 善 忘 。 比 起 生 活 在 饑 荒 、 戰 亂 和 恐 怖 襲 擊 當 中 的 人 ， 我 們 香 港 人 不 是 每 天 都 在 一 個 比 迪 士 尼 樂 園 更 好 的 樂 園 中 嗎 ？ 人 們 不 知 樂 園 在 哪 是 因 為 他 們 未 到 過 地 獄 。

by 李敏

2005年10月4日(二)

尋日同senpai返屯門食飯, 食完飯佢去上日文堂, 我就約佐L先生拎番隻碟. 無幾耐收到senpai既電話, 原來今晚無堂上, 因為D堂由二, 四, 六全部轉埋過去一, 三, 五, OH~ 又會咁既... 隔佐陣senpai又再打黎, 我正奇怪剛剛收線點解又再打黎既? 原來佢想話我知佢搭果架輕鐵, 明明係507線, 但係顯示版上卻是615P, 突然覺得senpai會係有咩都會話我知, 會同我分享, 個感覺好開心~

今日無意中見同L先生同佢女友影既卡, 嘩~ 佢女友著到... 果D應該唔算係Lolita衫, 因為佢女友著果套係紅色格仔款, 算是Cosplay吧? (但係扮緊邊個?) 我本來睇到都唔敢比咩評價, 始終係人地女友, 直至L先生都話佢女友著得畸怪, 我才夠膽出聲. T先生你就唔掂哩, 你女友著得咁「行」, 你都仲係普通一件cheap cheap Tee加直腳褲, 點襯得起你女友呀? 起碼都應該王子裝扮哩~~~ 不過我非常佩服你地既勇氣, 佩服你女友廿六?都仲敢著呢D衫出街, 我覺得呢D野應該係十八廿二先會玩既0者~? 亦好佩服你有勇氣同佢一齊出街~ YEAH!

2005年10月3日(一)

senpai佢又靜雞雞放佐錢入我銀包, 今次仲要唔係擺係放錢果格, 而係收埋佐去放卡既格度, 嘩~ 千五蚊咁多? senpai話係家用, 佢知我今個月開支大佐, 會出現赤字, 傻佬黎架~~ 我唔會要架~

我決定以後都唔係日記/同senpai講我今個月既財政狀況哩~

今日返去上堂, 好呃錢, 明明一堂tutorial係四十分鐘, 但今晚果堂, 七點半開始, 八點就落堂哩~
但都唔夠星期四果堂consumer behavior呃錢, 三個鐘既堂, 個Miss淨係講得四十分鐘書, 其他時間就安排黎individual presentation, 雖然我知marketing呢科好著重presentation skill, 但係感覺好呃錢, 同埋學唔到野, 每次返到去淨係聽書聽果四十分鐘, 跟住就聽其他同學係度present, present到落堂, 所以我次次一到presentation就會執野走, 費事係度?時間. 我地問番上其他班既人 (唔同人教), 佢地都唔會堂堂花咁多時間黎present既, 我地個Miss真係教得舒服哩~

尋晚又收到學費單...

2005年10月1日(六)

今日senpai一早出佐去滑水, 我懶無跟埋一齊去, 早知senpai佢飲完茶專登早走返黎買野比我食, 我就自己叫外賣哩, sorry啊~

夜晚我地出發去睇煙花, 今年屋苑搞佐個海上煙花團, 有車直接係樓下出發去到觀塘碼頭再上船出海睇煙花, 於是我地加埋senpai同事, 佢細佬+女友, 一行八人一齊去睇煙花. 記得以前細個住灣仔 (果陣灣仔都未有地鐵), 一落樓就可以睇到煙花, 但而家起佐咁多高樓大廈, 係屋企樓下當然已經再睇唔到煙花, 而大個佐之後都無再係香港現場睇過煙花了, 今次第一次同男友係香港睇煙花(之前係澳門睇過), 真係好開心~ 可惜今晚天氣真係好差, 雲厚, 風細, 煙霞多, 好多煙花射到上去根本都睇唔到, 淨係聽到聲睇到煙. 不過唔緊要哩, 我地仲有好多機會睇架麻~

睇完煙花senpai D同事一齊黎「西部大開發」, 上佐黎元朗屋企玩, 如果下次可以開番台麻雀就好勒, 哈哈~~

2005年9月30日(五)

今日我地去番柏寧酒店既RIVA食飯, 諗番起我同senpai三個多月前第一次見面就係0係度食飯, 當時我地仲係師兄妹既關係, 而且又唔算好熟, 所以果時都有D拘謹. 今日舊地重遊, 估唔到我地已經變為男女朋友既關係, 真係世事難料啊~~ 其實有時我都幾相信緣份, 因為一件事既發生, 事前係要有好多好多野同時配合先得. 就好似我同senpai咁, 5月之前我地根本就唔認識, 如果肥仔唔係4月尾飛佐我, 我根本就唔會係五月二號無無聊聊係屋企上網; 即使上網, 我平時根本都唔會理睬一D random入黎say hi既人, 但係因為我剛失戀, 匿埋自己係屋企, 所以咩人random入黎say hi我都會回應佢兩句; 至於senpai果邊, 佢話佢平時根本都好少玩ICQ既, 如果唔係因為份project而要上網, 佢都唔會係果日ICQ, 我地亦唔會認識.

到佐我地係ICQ認識佐, 如果佢唔係我中學時代既師兄, 我根本就唔會同佢講咁多野, 更加唔會比我電話號碼佢, 因為我根本從來唔會比電話網上面識既人, 但因為我地係同一間中學, 所以我無當佢係網上面識既net friend, 我係當佢師兄, 所以唔介意比電話佢. 因為我深信自己間中學都叫屯門區出名既band 1學校, 我地學校出黎既人應該唔會係壞人掛~?

到佐後尾我地雖然每日都會講幾個鐘頭電話, 但係都未見過面, 如果我唔係咁0岩呢個時間可以拆除牙箍, 我根本就唔會答應出黎見面, 因為我實在唔想比人見到我箍牙個豬樣. 到佐我地終於都見到面, 咁0岩senpai學校又差唔多考完試放暑假, senpai自己又剛剛讀完master畢到業, 所以佢可以有多DD時間可以花係我身上; 咁0岩我自己又剛剛完佐SEM B考完試比較清閒, 否則的話大家各有各忙, 我諗我地既關係就唔會發展得咁快~ 所以我覺得, 如果唔係以上既事一齊發生, 我諗我同senpai而家都仲係普通朋友既關係, 甚至乎根本無機會認識.

之前任何朋友問我同senpai點識, 幾時開始, 我都唔肯講, 或者講D唔講D, 係因為我自己都好抗拒係ICQ上面識人, 我怕講出黎大家會覺得我失戀受刺激「淪落」到ICQ識人; 而且我果陣口口聲聲話短期內都唔會再拍拖住, 但係好快就自打咀巴; 更何況我覺得同senpai好似發展得太快了, 自己都有點接受不了, 所以根本唔想同其他人講我既事. 不過我而家唔怕講哩, 因為我地感情已經好穩定, 而且senpai佢對我真係好好, 我相信認識我既人都可以感受得到我既快樂, 你知我份人有D咩都呃唔到人, 咩都放晒係塊面度, 同埋身形同幸福成正比... 所以請大家放心哩, 我可以說, 我找到一個真正愛我, 珍惜我, 懂得照顧我既人哩, 而佢既條件, 亦是我一直想要找尋既人, 我再無以前那些感情煩惱哩, 每一天我都無憂無慮 (除了工作/公司的討厭事), 大家不用再替我擔心了~~

講番食飯, 我地頭盤叫佐個鵝肝四式, 超級好味呀, D味道好特別, 真係唔知點形容, 但係食落好感動呀~ 跟住去佐玩具反斗城特賣場行下, 不過無收穫, 本來想行下其他地方打下機影下貼紙相, 不過我話過要慳D, 同埋senpai佢拎住個蛋糕, 費事要佢周圍行, 所以跟住就搭車返屋企lu~

2005年9月29日(四)

很老土的事/人:

1. 週末先黎打風落雨, 返工既日子卻鬼咁好天.

2. 搭地鐵/輕鐵/西鐵/搭lift等, 裡面既人都未出晒黎, 出面D人已經係咁衝入去迫入去, 都唔知咩叫禮讓.

3. 搭地鐵/輕鐵/西鐵一開門, 就即刻衝入車霸位. 自己霸到之餘仲要霸埋隔離個位, 然後高聲呼喚同伴:「呢度有位呀!」

4. 叫自己D仔女一開車門就衝入車箱幫自己霸位既師奶.

5. 車箱鬼咁多人鬼咁迫, D人仲要成個人挨落條扶手柱, 好似條柱係佢買佐咁.

6. 係車度講電話/傾計硬係要講到鬼咁大聲, 慌死成車人聽唔到你講乜咁.

7. 上電梯既時候企係左手面又唔行, 阻住後面D人, 要企就靠右企啦!

8. 去toilet, 明明有?廁同坐廁以供選擇, D人都可以企上坐廁度去.

9. 三更半夜仲鬧仔/耍花槍. 假期朝早未夠九點就開行HI-FI, 有咁大聲得咁大聲.

10. 繁忙時間鬼咁多人等位食飯, 飲淨半杯奶茶, 係位掛住吹水賴死唔走既人.

11. 人多擠迫既地方仲要食煙既人.

12. 識少少扮代表, 講到似層層, 但係講既與事實完全不符.

歡迎大家提出意見~

2005年9月28日(三)

今日去養和醫院做磁力共振, 私家醫院果然係私家醫院, 一入大堂已經覺得好豪, 都唔似醫院既~

尋日上網搞信用卡積分換禮品, 發覺今個月將會赤字, 因為我戶口既流動資金只係得番$5560.19, 但係十月要交$4305.7既卡數, $260既保險, $100電話費... 即使加埋公司既車費津貼, 即係呢個月得番$1981.49用?? OH~ 點解會咁既? 因為之前係澳門輸佐成千蚊?? 因為之前買護膚品駛多佐$1200? 因為補牙同洗牙又駛多$900?

今個月要慳D先得~

2005年9月25日(日)

今日下午去睇佢地元朗盃最後一場比賽, 結果拎第四. 比賽之後齊齊去打邊爐, 跟住上振宇屋企打麻雀. 我真係唔係好識打最大四番果D牌, 唔識睇又唔知上唔上/唔知點上牌先好. 後尾轉?打最大八番要做牌果隻, 兩舖牌就嬴佐七十幾蚊, 好開心~~ 不過senpai果邊就輸佐二百二十蚊, 都係因為我之前打唔掂輸得多哩.

打完牌都已經十二點半, 因為我D行裝仲係元朗, 所以我話自己返元朗, 叫senpai自己返屯門, 唔駛陪我. 其實口不對心真係搵自己笨, 明明想senpai陪我一齊返元朗, 而我亦知即使我叫佢返屯門, 佢都唔會咁做, 但係我又唔想佢聽日無飯帶, 於是口講就不斷叫佢返屯門; 後尾senpai佢真係話返屯門, 叫我自己小心D (我好愕然啊~), 於是我就一個人自己行去搭的士, 一個傻瓜一路行去的士站, 兩行眼淚一路流落黎 (係咪衰呢? 自己?黎既). 後尾senpai係後面跟上黎一齊上佐的士, 佢話想試下我, 睇下我會唔會留佢, 所以呃我話返屯門, 叫我自己小心D, 跟住行去西鐵站果邊呃我扮返屯門. 諗諗下其實都係自己無聊, 我係度試佢, 佢又係度試我, 我好笨啊, 下次想點咪講囉, 點解成日要心裡面咁諗, 但口講又講相反既野呢?? 我好笨呀~~~ 如果senpai真係自己一個返屯門, 咁我點呢? (但如果佢真係有心想返屯門, 咁我又無謂勉強佢陪我返元朗喎...)

2005年9月24日(六)

好老土好老土! 成日都係weekend先走黎打風, 本來今日明明約好晒下午陪senpai出海滑水, 夜晚就約佐中學同學BBQ架麻, 一切都安排得好美滿... 但呢個死人颱風, 咩都比佢破壞晒啦, 激死人~~

滑唔成水, 於是senpai就下午出佐去教波, 下午我地去Pizza Hut食tea, 然後返屋企同senpai打佐陣Winning 9, 跟住就一齊落屯門, 佢去學日文, 我就約佐中學同學改食中菜.

有好多同學自從中學畢業之後都再無見過, 有D都有成九年無見, 個個見番我, 都話唔認得我, 話我瘦佐好多哩, 塊面尖佐好多哩, 佢地問我點解塊面瘦佐咁多, 我話我整過黎, 佢地無人信... 喂, 我真係整過黎架, 無呃你地~~ 席中有兩個同學都結佐婚了, 時間眨下眼真係過得好快~

2005年9月23日(五)

今晚去佐朗廷酒店地下食飯, 好貴啊, 水都要收錢, 盛惠$48支Evian...

2005年9月21日(三)

今日senpai又做佐件事令我好開心, 真係好多謝佢~ 令我覺得佢真係好重視我緊張我~~

今日senpai要去奧海城交D野比朋友, 於是我就放工搭車去奧海城join佢, 好鬼?, 等果架12號巴士, 等佐四個幾字先有車, 我明明未夠六點就離開公司, 點知要成七點先去到奧海城, 要一小時先由尖沙咀去到奧海城? 搞錯呀! 我天水圍都返得到入去啦~!!!

去到奧海城senpai話係巴士總站, 因為我地要搭66X返屯門食飯, 我又白白痴痴咁唔知個巴士站係邊, 於是由奧海城二期行去一期, 一期又行番去二期, 西鐵站都來回幾次, 去睇地圖, 又無講巴士站係咩位置, 睇出口指示, 又無寫巴士站應該係邊個出口出. 本來senpai話過黎接我, 我又懶醒話唔駛, 我自己行, 點知都唔知行佐去邊, ?晒D時間, 最後去佐維港灣巴士總站 (激死人)... 搞到花佐兩個鐘頭先至由尖沙咀返到入屯門, 真係奇聞.

2005年9月19日(一)

今日未夠七點就醒佐, 去佐刷牙洗面之後, 見無咩野好做, 又再訓過, 訓到十一點先醒. 之後我地去佐飲茶, 然後等阿姨放工?車載我地周圍去, 我地就正式開始今日既澳門之旅, 其實senpai都黎過澳門好多次, 係我今次只係第二次過黎, 所以好多野都好新鮮. 我地首先去佐全澳門最豪既酒店影佐D相, 去佐黑沙海灘, 之後去食豬扒飽, 大菜糕, 買手信, 金沙賭場 (又輸三百啊~~), 去市中心, 大三巴, 然後夜晚去食翅, 之後就搭十點船返香港了...

點解咁快就放完假既?

2005年9月18日(日)

今日又係佢地比賽既日子, 對方又係甲組球隊, 苦戰之下都係輸佐比對方, 今日senpai仲落埋場添, 可惜雙方既實力始終都有些距離, 第三局仲大比數落敗添... 希望佢地能盡快認清自己較弱既地方, 努力改善哩~

之後我地返屯門做節食飯, 然後就搭船過澳門, 佢阿姨黎碼頭接我地, 我地仲可以係澳門睇煙花添喎, 好開心. 然後同表弟一齊去酒吧街飲野, 之後我同senpai就去佐希臘神話見識下, 兩個大鄉里出城, 唔識玩百家樂, 後尾睇佐陣明白佐個原理就膽粗粗去玩, 但係又唔知落注有咩規矩, 好彩無比人打, 哈哈~~~ 玩佐陣輸佐七百蚊, 不過叫做見識過, 幾好玩~~~ 跟住就返阿姨屋企借宿一宵, 不過訓唔慣人地地方, 同埋張床好硬啊, 訓得好差.

2005年9月17日(六)

今日應承佐Connie去佢教會搞既音樂劇, 於是我就同senpai一齊去, 因為senpai其實都係Christian, 反而我唔係. 其實個音樂劇都幾好睇, 又有D笑位, 不過自己真係無辦法融入去果種氣氛當中... 其實我同senpai所有野都算幾夾, 即使唔夾都可以互相遷就包容, 如果要數大家最唔夾最達唔到共識既地方, 首選就係宗教呢方面了. 雖然到現時為止大家相處都沒有因為宗教上既認同而出現問題, 但我擔心日後會唔會因為宗教既原因而出現問題呢?

2005年9月16日(五)

呢輪都唔得閒日日寫日記, 不過我有D野想講:

1. senpai佢星期一神神秘秘咁送佐個Burberry手袋比我, 好開心~~ 多謝你啊~~~

2. 我已經無再飲boots果個5-day plan, 因為完全唔work, 千祈唔好買呀!! 抱歉senpai你D錢掉佐落鹹水海...

3. BODY CHECK拎佐報告, 醫生話我有貧血, 建議我再去詳細驗下, 睇下係缺乏鐵質 (因為我唔食牛肉架麻~), 還是因為我有隱性地中海貧血症 (唔生BB就無事架啦); 同埋醫生話我三酸甘油脂偏低喎, 不過醫生話呢D野, 低就無所謂, 偏高先有問題, 咁我都算係身體健康掛? 不過醫生話我脊骨X佐少少喎, 所以我成日都有腰骨痛, 佢話呢個問題要搵脊醫幫我.

4. 最近係公司做得好唔開心, 又諗過轉工 (不過自己又無料無本事, 搵鬼請...)

5. 星期三同班friends去佐魚一丁食飯, D野幾唔錯喎, 個蟹粥最好食, 食到好飽~~

6. 我到而家都未食過中秋節月餅. (但公司同屋企其實已經有好多盒月餅係度, 有普通月餅, 冰皮月餅同雪糕月餅)

7. 終於出佐summer term既成績, 今次我兩科都A, 第一次嘗試到GPA 4既滋味~ 早知留番呢兩科係Sem A或者Sem B先讀哩, 因為summer term唔計schlorship架喎, 所以下年應該將無咩把握拎到A既科放係summer先讀, 留番D容易拎A既科係Sem A/B讀, 咁就好大機會又可以拎到schlorship麻, 嘻嘻~

2005年9月12日(一)

四月尾, 剛和肥仔分手, 那時的日子不是訓就是上網, 尤其會找一些有關失戀的網頁來看, 用來安慰一下自己. 深雪是我中學時期很喜歡的專欄作家, 失戀那時發現她在she.com有一欄是讓讀者send mail給她請教有關感情問題, 那時我百無聊賴便寫了一封mail給她, 之後我都忘記了這件事, 昨晚見到她回覆了我的mail, 內容如下:

深雪︰

你好，我在 4 月 22 日和男友分手了。

我們一直都很開心，只是有時我覺得我們之間沒有溝通。他是一個將自己的事收收埋埋的人，我時常想和他坐低好好傾一下，因為他很少和我溝通，將自己的事收埋。他說這是他的性格，有時知佢明明有 D 野，但係佢又唔講，於是我便主動問他，問多兩句他就嫌我煩。我只是想關心他而已，但他說他不用人關心。有時佢死都唔肯講，淨係叫我自己諗下，於是我自己諗，但自己諗完得出某些結論，他便怪我亂諗野 ?

我好辛苦，我知男人有時唔會同女友講最內心既感受，但是大家在一起，完全無溝通無交流，難道每天都表面地說今晚食咩呀？睇咩戲好呀？就此而已嗎？難道大家拍拖真的可以不需溝通坦白嗎？

之後他還說我只有缺點，想不到我有甚麼優點，說大家性格不合，話我情緒化，而佢係一個唔會開解人安慰人的人。我知他一直是一個不會取悅人、不會安慰人、我不開心時不會開解我的人，我知這是他性格，我也盡量體諒遷就。我已改掉很多壞習慣，我從不對他發脾氣，他不喜歡我喊，我便盡量不在他面前哭。

但是他最後卻數落我的缺點，但是愛亂諗野、情緒化等等，不是大部份女性的「共通點」嗎？我很辛苦，我知自己很犯賤，他這樣看低我，但我從不恨他，仍然很愛他。我知我不應再想著他，但是我真的很辛苦。

請問我應該怎做才好呢？男人是否都愛收埋自己？若再次戀愛，我要應該怎對待男友才行？關心對方卻被人說煩，我只是問一兩句而已；不聞不問才好嗎？拍拖可以亳無溝通交流的嗎？

Best regards,
Chloe
_________________________

Dear Chloe ︰

我只能說，這是一段無可能開心的關係。
別說男朋友，就算做朋友他也不是好對象。
你問問心，當你交朋友時，你會想交一個看低你、講明只看見你的缺點、兼且收收埋埋自己、不願意與你溝通的人嗎？ 如果你認同交這種朋友是待薄自己的話，交這種男朋友就更可憐、更自虐。
一個連做朋友也無資格的人，就完全不配做你的男朋友。
下次，就找個性格開朗的、欣賞你的、愛與你分享的人做男朋友。
而根本，這只是最基本要求。

http://www.she.com/channels/love/voicesoflove/index.cfm?object_id=0FAE4412-11D7-47FD-86E996E0A42931F9

而家睇番, 真係得啖笑, 一來實在隔佐太耐了, 二來我對上一段感情已經無咩感覺, 好似睇化晒咁. 不過我都係果一句, 每一次失戀後, 我都很感激當初飛我的ex. 和肥仔在一起之後, 我很多謝T先生當初選擇離開我, 讓我可以找到一個有時間觀念, 唔睇波唔沉迷打機, 有目標有奮鬥心的男友 (T先生睇完唔好鬧我, 你都知我果陣成日都係話你呢D野架啦~ :P)

後來和senpai在一起之後, 我更要感謝肥仔當初和我分手, 讓我可以找到一個真正愛我錫我, 懂得關心人開解人, 更有目標更出色的男朋友.

阿鳳曾經同我講過, 我拍拖既次數都係太少了, 應該要拍多幾次拖, 你才會知道自己究竟想要D咩, 咩人先適合自己. 其實佢又講得幾0岩, 每次拍拖, 都覺得對方就是自己想要的人, 覺得對方該可以付託終生吧~? 但當我走出呢段感情後, 我才發現, 那時的我根本不應該會覺得幸福, 假設肥仔他願意娶我, 我真的和他結婚, 我相信婚後一定不會覺得開心, 仍然日日戴住假面具做人, 沒分擔沒分享沒交流... 而家諗番, 真的好多謝佢飛佐我, 否則... 我而家有時會諗下如果我們沒有分手, 我和他繼續一起的話, 將來的日子會怎樣呢? 只要想想都覺得心寒...

唔知道, 將來我有無一日都會「感激」senpai呢?

2005年9月11日(日)

今日又再去鳳琴體育館睇佢地比賽, 我呢排每個星期日都會去鳳琴體育館, 想尋仇既即管黎伏我啦~ 睇佐咁多場, 嬴佐咁多場, 佢地今日終於輸佐, 不過對方係甲組球隊, 輸又好似無可厚非既, 不過如果打果陣完全唔知道對方係咩底子, 唔知原來對方係甲組, 咁唔知會唔會打得好D呢?

第二場對丙組, 唔駛問當然是大比數勝出~

睇完比賽去拎雪糕月餅, 好好彩, 我地拎佐最後一盒~~

今日講過下中秋做咩好, 本來打算週末過澳門, 不過我之前醒唔起原來中秋就係呢個星期, 而家過唔成lu...

2005年9月10日(六)

今日陪senpai佢去西貢滑水, 我呢D運動白痴當然無滑哩, 佢地玩開既都玩到手痛腳痛, 如果我落去玩既話, 我諗我會癱瘓.

不過senpai就係海中心教我游水, 著住救生衣係海中心飄浮又幾好玩喎~~

不過我真係好驚曬黑呀 (雖然我已經好黑, 再曬黑都應該無咩分別, 但衰在我一曬就會黑, 曬黑佐即使十年唔再曬都唔會再白番), 人地話一白遮三醜麻, 我都已經唔係靚, 仲要咁黑...

2005年9月6日(二)

最近越來越覺得, 入不敷支 (入不敷支既問題已經好耐架啦, 不過係最近先漸漸正視下呢個問題). 計番條數, 原來我每個月既基本開支如下:

家用 $4000
儲蓄保險 $1200
保險 $220
助養兒童 $200
電話費 $100
上網費 $162
午飯 $660
車費 $760
facial $200

總數: $7502

仲未計買衫錢, 買早餐錢, 買零食錢, 買護膚品錢, 應酬食飯錢, 返學買面包錢... 等等等等.
是時候要節制下, 唔好再碌咁多卡...

2005年8月28日(日)

今日我地落屯門行佐陣街, 買佐好多立雜野, 然後就搭西鐵落元朗睇佢地比賽, 雖然都估到佢地應該唔會輸, 但係成日都係輸第二局要打第三局既? 我覺得佢地既攔網「厲害」佐哩, 不過我成日聽佢地開會講呢樣野都講佐好耐, 希望佢地會越黎越進步哩~

然後我地去一齊食飯, 我覺得佢地隊波真係臥虎藏龍, 我覺得senpai已經算變態架啦, double degree, 剛剛讀完master又報佐個中大course, 又再報讀日文, 仲話日文只係算「興趣小組」, 其實仲打算讀PhD... 然後原來隊?面仲有一個變態既, 本身已經係master, 黎緊打算讀DBA, 之前既「興趣小組」係學佐?船, 兩個變態佬都覺得而家大學生通街都係, master亦都越黎越普遍, 所以應該要再上一層讀埋個doctor... (我呢D通街都係既「大學生」, 仲要未畢業果隻, 幾時先會追到上去呢?)

今晚食飯既話題係投資理財, 隊中有一個做港島區既地產經紀, 目標係三十?前搵到一百萬, 雖然我同佢唔熟, 但一早已經覺得佢個人好aggressive好有目標. 再睇番自己, 覺得自己好鬼無用, 好似無專長無目標, 事業方面, 都只係一個搵果萬零蚊一個月既小薯仔, 唔慌有得升職, 即使升職, 只係個title會變做supervisor (我以前係舊TDK夠叫做爛鬼supervisor啦, 咁又點0者~), 但做既工作都係同一樣既野... 其實關於前途既問題, 我一直好迷惘, 亦都有問過好多人有咩睇法, 到而家我都唔知自己想點. 只係知道我自己既英文會話同日文都在不斷退步, 因為工作上根本好少機會講.

有D朋友會覺得, 我公司返五日, 又有交通津貼, 一年出兩次bonus, 又有公司旅行, 有免費全身健康檢查, OT有allowance, 生日有錢收等等, 覺得好好, 成日問我公司請唔請人; 我都同意呢度係好好, 我有D同事係出面好多公司做過, 總結都係話我地而家公司既福利係好到顛架(但日本公司係出名好福利架?...)~ 但係度我只係一個好低級既小職員, 工作上無咩發展, 無咩機會咁. 好多同學/舊同事都叫我出去「闖」下, 但係我既藉口就係而家仲讀緊書, 呢份工可以好好咁遷就到我讀書既時間, 成日話兩年後畢業先算, 其實我覺得自己係呢間公司係貪圖安逸, 不思進取...

我都有諗過如果真係畢業之後, 我條路應該點行呢? BBA都係通街都係, 日文又已經退晒步, 又無咩工作經驗 (係舊TDK果兩年幾根本咩都無學過 [其實我自己性格都有問題, 細膽又怕醜, 如果果兩年我放膽D日日同我老細傾計吹水, 我既日文應該會進步神速, 唔駛好似而家咁, D日文仲衰過剛畢業果陣]; 到而家呢間公司都只係收單, 入單, 出貨, 聯絡, 執手尾, 處理蘇州X, 其實除佐日文果部份之外, 中五畢業既都識做哩), 出到去我可以做D咩呢? 或者應該做D咩好呢? 我真係唔知... 有時覺得自己一畢業係咪已經入錯佐公司呢? 我應該入一間細公司, 所有工作都一腳踢, 起碼真係學到野; 入到大公司雖然係福利好, 但係工作上分得好清楚, 你永遠只係識得自己負責果part工作, 即使你想學下其他野, 其他部門根本唔會比你叉隻腳埋去, 學/識既野都好唔全面.

暫時黎講, 未畢業前, 我會好努力咁讀完佢, 要first hons畢業; 另外如果有時間, 真係要溫番下D日文, 有好多基本文型真係唔記得點用點轉型, 我希望畢業果年就去考埋個日文一級.

2005年8月27日(六)

今日senpai都要返學校開會, 我就部署佐幾日, 打算今晚煮飯仔, 比個驚喜佢, 因為之前我考試佢又陪我又照顧我起居飲食, 到我考完試都應該做番D野. 於是我下午趁佢返佐學就落元朗買菜, 然後大袋細袋咁返屋企, 我唔知有無比人呃呢? 買佐兩條紅蘿蔔, 一條青蘿蔔, 要成廿蚊, 乜咁貴既咩? 買條粟米, 細細條又幼, 收我三蚊, 係咪架? 返到去我就收埋D野換過套衫唔比佢發覺我出過街, 因為我知佢放佐工會返一返黎先會再出去練波, 於是我返到黎就係屋企吸下塵.

等佢七點出門口去練波, 我就開始煮飯, 我都係一個煮飯白痴, 只係煲青紅蘿蔔瘦肉湯, 發覺屋企無果D刨皮刀, 於是用刀批皮, 批走晒D肉; 打算整栗子炆雞翼, 唔知點解D栗子煲極都去唔到皮, 我又要用刀仔批皮, 又係批走晒D肉, 一係就整到成粒栗子散晒, 仲要搞佐成個鐘, 結果栗子炆雞翼變佐栗子煲雞翼, 又唔入味, 又落得太多水, 都唔係我想像中果樣野; 然後炒菜, 我都無落水炒, 只係中途cup過蓋焗下佢, 唔知點解永遠炒菜都炒都一pat, 水汪汪咁, 係咪唔可以cup蓋既呢? 但我記得我阿媽炒菜都會cup下蓋, 都唔會炒到水汪汪咁架? 我最滿意都係煎銀鱈魚, 但係其中一條比我煎到甩皮甩骨分佐屍... 結果餐飯我由七點半開始煮, 煮到十點半先搞掂, 好失敗...

今日我仲去佐A-LOOK度配眼鏡, 其實我都無打算今日配, 我只係去換鼻托而已, 但睇睇下又睇中佐副, 我諗住A-LOOK果D眼鏡好平既0者, 最多咪三, 四百蚊, 點知個staff話我唔應該再配玻璃鏡, 應該配纖維鏡, 可以防UA, 防電磁波, 呢樣果樣, 成七百幾蚊; 仲sell一隻deluxe既, 話非球面鏡, 要成千蚊, 痴線架? 最後我揀佐七百幾蚊果隻, 但事後諗番覺得自己好似比人呃咁, 其實對鏡片駛唔駛咁貴架??

2005年8月26日(五)

今日係公司追單追貨追資料追到自己都覺得自己煩.

放佐工我地去中環既Mozart食奧地利菜, 我例牌又係唔多識睇餐牌, 我淨係知有D腸, 有D薯蓉之類, 其他果D都唔知係咩黎既, 睇黎我都要惡補下D英文餐牌用字先得. 我地叫佐個頭盤, 可以形容為炸菇菇, 幾好食幾特別; 另外叫佐兩個main courses, 一個係菠菜餃, 一個係腸, senpai話奧地利都係近德國, 所以都係食腸多. 雖然眼見份量唔係好多, 但係唔知點解都食到好飽.

成日可以去試新餐廳, 好開心~~

2005年8月22日(一)

我飲佐一個月既士多啤梨味, 終於可以轉飲青蘋果味, 青蘋果味好飲好多呀, 真係似青蘋果味的~ 但唔知對我係咪有效呢? 之前士多啤梨味話排毒美顏, 可能我皮膚一向差已經無得救? 我覺得好似無咩分別咁既??

今朝早返到黎公司toilet, 見到其中一格度門竟然甩佐出黎, 厲害~! 緊係哩, D人痴痴地架, 有時鬼咁大力咁?門, 好似度門同佢有仇咁, 有時真係比D人既關門聲嚇死, 關門細力少少都唔怕死呀? 都唔明D人點解下下要出盡力咁?門... 討厭~!

今晚收到稅局既信, 發覺原來有得退稅, 好開心~ 因為我take既part-time degree, 所以可以減免進修果部份, yeah yeah~! (雖然只係退番百幾蚊...) 不過我人工咁低, 即使要交稅都係交果少少錢, 傻瓜佢要交既稅差唔多係我既十倍, 好肉痛... :p

同埋今日check過銀行戶口, 果三千蚊scholarship終於都過佐戶了, 有錢交學費哩~~ 貧苦學生, 嗚嗚~~

2005年8月20日(六)

今晚要返學校考試, 唔係好夠時間答, 寫到手軟, data analysis果part顛架, 條題目得3分, 但你要答3個tables既野, 3分要答成版幾紙, 痴線架~~考完試之後返朗屏等佢地練完波食飯, 今晚食得唔飽, 所以無咩心機, 其實我無發脾氣呀, 只是我係一頭豬, 有得食就好開心; 無得食就無心機. 其實我係知你為我好架, 因為我平時實在太大食了, 完全無節制, 食大晒個胃, 我自己食野都應該收歛下~

2005年8月19日(五)

成日都係咁, 當我好多時間既時候, 工作上就好順利無咩突發事; 但當我好唔得閒無時間果陣, 就麻煩事多多.

本來我今日請佐半日假, 因為聽日又考試, 打算下午返屋企溫下書, 本來十二點半可以走得, 點知到最後兩點鐘先搞掂晒D野走人, 仲要係lunchtime都無去食飯, 繼續係位度做野, 否則我諗三點鐘都走唔到...

第一樣麻煩事就係尋日臨放工有個OS打黎話TMH幫日本做佐個item, 但係未有單, 所以要當sample咁寄比人, 但係收錢就另作安排, 個OS打黎問我應該點樣收錢. 我都係佢打黎話我知呢單野我先知有件咁既事 (大陸班人餐餐都係唔到最後一分鐘都唔通知你, 大安旨意咁, 但到最後一分鐘通知你果陣就話急急急, 咩都要趕住出貨, 痴線架!), 我反問個OS一句: 「呢D野唔係應該日本人自己傾掂數既咩?」 個OS竟然話我知日本人自己都唔知... 0下? 日本人都唔知, 點解我會知既? 之前都無試過D咁既case, 加上佢唔打黎話我知我都唔知有單咁既野, 我又點會知應該點收錢呢? 於是我唯有send mail問大陸D日本人同engineer, 佢地既答覆係唔知喎(我都預佐會咁答), 佢地淨係知將件野送去香港warehouse就OK啦喎~ 收錢既野阿清水話會處理喎. (餐餐都係咁, 你地將D野送晒落黎就好似唔再關你地事咁, OK, 我都預佐幫你地執手尾/幫你地處理D蘇州X, 但唔該都預早通知我一聲呀, 知唔知你地送落黎香港既野就係要我安排出貨架!! 有時連送貨地址都無, gross weight又話唔駛理, 係咪傻架?) 好彩個OS尋日打黎等我知道有件咁既貨要走, 否則「正常」黎講我都係要今日安排出貨先知有件咁既野, 然後又周圍問人件貨應該寄去邊, 當sample寄定當咩野寄... 好在呢D資料我尋晚就已經問清楚晒, 否則今日就要?時間周圍問. (有時仲要唔知問邊個先得, 個個都話唔知)

第二樣麻煩野就係馬拉出貨, 人地話每個禮拜都要400K呀, 都唔知點解生產上成日都話有問題, 好彩今日都有200K比到人, 否則人地停line賠錢我唔知邊個死. 但衰在應承人今日出到200K, 但係今朝早淨係收到87K既單, 淨底果百幾K仲係廠包裝緊, 未有準確數量, 所以大陸班人唔肯入數, 所以出唔到單住喎~ 你比得果87K我有鬼用咩, 走就200K安排一齊走架啦, 唔通一日內分兩個shipment咁無聊咩? 今次仲要direct比個客而唔係送去TDK Malaysia喎, 你唔係要我分開兩張DO做呀?? 我點都要等埋果百幾K單入埋數先可以走. 而且個客急到死(其實係大陸成日跟唔到納期), 希望安排到聽朝早機走, 但係另外果百幾K又遲遲未有單, 搞到我唔知等埋好定做佐果87K好, 一陣等埋晒先做又驚落唔切booking飛聽朝早機; 唔等既話又白白痴痴分開兩個DO? 今日算好了, 點幾鐘就收到另一張單, 平時玩下手要三點幾四點先收到, 咁我就唔駛放假了.

第三樣麻煩野係深圳office今日停電放假, 我應承佐個大陸IS幫佢做DO, 因為趕住星期六要送到個客度, 張單我尋晚已經話急, 問大陸可唔可以開佐先, 點知今朝早返到黎話有問題, 仲係度選別緊(救命呀~), 所以我又一定要等埋呢張單做埋DO先走得. 餐餐都係咁, 一早話明急到死果D, 硬係有問題出唔到黎; 無話急果D就好鬼快好鬼順利咁出到貨, 真係激死人~~

於是我成朝早一滴水都無飲過, 想食幾塊餅乾當早餐0者, 都唔得閒食, toilet完全無去過, 成朝早係位不停手...

2005年8月14日(日)

金雅係台灣放暑假返黎, 我地今日約佐飲茶; 本來明明約好晒, 我都已經一個星期之前約定架啦, 點知最後都係0係我預計之內, 會放飛機果D果然都放晒飛機. 我黎緊17號同20號夠要考試啦, 但食一餐飯要花你地幾耐時間呢?? 相反金雅隻腳受佐傷, 行路好辛苦咁一柺一柺地都出黎同我地食飯... 已經一年都唔知見唔見得到一次架啦, 如果換轉係我返黎放暑假, 想約番D舊同學出黎食餐飯, 最多咪用你地兩/三個鐘, 但連果少少時間都吝嗇既話, 我一定會覺得心淡囉, 這樣算是朋友嗎??

估唔到娟娟同金雅都認得senpai, 金雅仲可以叫得出佢全名添, 果然厲害.

跟住我地過佐置樂去抄data, 食粉仔同豆腐花, 跟住就返屋企, 佢打機我溫書(嗚嗚~~), 然後夜晚就同阿媽去食韓國燒烤, 好飽~ 但比較下我都係覺得阪門店好D喎.

呢輪既生活實在太寫意, 唔係食就玩, 不經不覺又肥番... 最激氣係瘦果陣就瘦係上圍喎, 肥果陣又唔見肥番係果度, 淨係肥係下半身, 唔制呀! 還番果3cm比我呀!!! 乞人憎!!!!

2005年8月12日(五)

尋晚等佢同同事滑完水一齊去食飯, 我地去佐旺角打邊爐, 跟住仲去佐許留山食甜品, 好飽呀!

呢排公司都唔算太忙, 我都可以偷到D時間溫書, 但估唔到我淨係0係公司偷雞黎溫書, 到呢一刻我已經溫晒星期三考既ECON, 好開心, 因為返到屋企就可以睇電視打機, 哈哈~~ 唔知係咪因為summer term既關係呢? 今個summer讀呢兩科, 都話淨係考mid-term之後既範圍, mid-term考過既野就唔駛考; 以前普通Sem A/B果陣唔係咁架麻, 即使mid-term quiz過既野, 到考試都仍然會考架麻~ 所以今個summer好似輕鬆佐咁, 考試要溫既野都少佐一半.

2005年8月10日(三)

呢個星期唔駛返學, 所以日子都好似過得悠閒佐, 每晚都可以返屋企睇妙手仁心, 同埋剛剛買佐部PS2, 而家差唔多晚晚都會打下機, 我都係玩番D舊game, 最近玩緊我的暑假2, 電車GO!, 同埋碌骰仔, 遲D會買捉馬騮3. 我成日好想返到屋企可以打到機, 所以盡量「爭取時間」係公司溫書, 返到屋企就可以有時間打下機, 嘻~~

2005年8月8日(一)

我唔明點解, 一返到黎公司坐低做野就腰骨痛, 痛黎痛去都係果個位, 由中學痛到而家, 都唔知可以點... 奇怪在唔係公司既話, 平時係屋企/出街食飯坐低, 無論坐幾耐, 又唔會覺痛架喎, 係返到公司坐低就會痛咁奇怪既?? 以前以為舊公司張?唔好坐啦; 去到而家新公司, 初初都無野架喎, 仲坐得幾舒服添, 但漸漸一坐就痛, 都唔知做咩...

另外呢排天氣炎熱, 出到街都有好多新驚喜(驚嚇), 正如ii話齋, 有D人背脊好肉過我心口都可以著露背裝; 有D人手臂粗過我小腿可以著小背心; 有D人小腿粗過我大脾可以著超短裙; 有D人分唔到佢前後既可以著低胸deep V; 有D人條腰圍住三條士啤太可以著露臍衫低腰褲... 有時真係歎為觀止~

有一次仲恐怖, 有個應該係自由行既阿姐, 外面淨係著一件白色近乎透明既see through衫, 但?面無打底淨係戴個bra, 佢咁樣有著同無著衫都根本無分別, 離遠都可以睇得清楚佢個bra bra係咩圖案咩款式, 成條parklane既人為之側目...

2005年8月6日(六)

今日星期六, 本來佢話今日無野做, 淨係夜晚去佢舅母屋企食飯, 點知尋日先知原來今日要去睇下個球証班, 佢叫我都一齊出佐去, 本來話去睇一睇就走, 但係一等就四個鐘, 我實在等到發?憎, 如果係平時等都無咩所謂, 但係我就黎考試, 諗諗下如果呢幾個鐘係屋企溫下書你話幾好呢? 所以越等越?, 等佢做完晒野, 我知自己已經黑晒口面, 但係真係好煩燥, 再加上身體問題既困擾, 所以都控制唔到自己既面部表情... 真係對唔住~

2005年8月5日(五)

好辛苦咁又捱完一個禮拜, 終於等到星期五~ 放工之後我地去佐赤柱食飯, 然後返屋企睇電視, 好開心可以睇到少少妙手仁心同尋秦記, 因為真係好耐無睇過電視, 好開心~

2005年8月3日(三)

有時, 真係越黎越頂唔順公司班同事.

或者我地既CASE比較特別, 我和另外七個同事本來是元朗工業村既公司, 雖然同尖沙咀呢度大家都是under同一個集團, 但實質上卻又是兩間不同的公司. 去年十月因為元朗工場要搬上大陸, 所以元朗工業村的同事, 大部份都要跟住間廠返大陸工作, 少部份同事便「分配」到尖沙咀office上班. 我知道當初傾轉公司同接收staff這問題, 元朗和尖沙咀兩班高層傾得並不愉快, 元朗社長希望尖沙咀能接收所有元朗廠的staff, 但尖沙咀當然並不十分願意, 最後, 可能是施捨還是人情什麼的, 最後我和另外七個同事出了來尖沙咀office上班, 其他人都返晒大陸工作.

出了來, 覺得這兒大部份同事都是怪怪的, 很冷淡, 不會打招呼. 記得有一次在lift口和一個同事講早晨, 她的反應竟然是以鼻孔來噴氣並「晤」了一聲便算... 有些則是大家碰面, 我的早晨還未開口, 對方就已經擰轉了臉, 目無表情. 遇上這樣的人, 後來我也不會主動打招呼, 以免再換來一面屁; 當然有少部份同事表面上是nice的, 例如見面會微笑, 會打招呼, 但這類同事數目卻不多.

我的部門的人當然亦很古怪, 大家同事之間很少交談, 工作時間係靜到烏蠅飛過都聽到, 見面唔打招呼, 返工唔講早晨, 放工唔講拜拜, lunch都是自己返埋位食飯, 連其他元朗同事都說我部門的人很古怪, 他們形容我部門的人的形容詞有: 古肅, 精神有問題, 小家, 古惑... 等等.

後來漸漸感到, 尖沙咀的同事覺得我們出了來, 會分薄了他們什麼似的, 好似我地出佐黎, 佢地會蝕底佐D咩咁, 例子如下:

早上八時多, 日子為臨近加人工的月份:
尖沙咀同事A: 你咁早返黎做咩呀, 搏加人工呀? 咩都比你地(指我地元朗人)拎晒啦!!
元朗某同事A: ......

某日, 日子為臨近出B仔的月份:
尖沙咀同事B: 你知唔知七月無bonus出呀?
元朗某同事A: (feel到佢又想踩我地) 咩呀!?
尖沙咀同事B: 咪因為你地出佐黎囉! (但事實上係根本無咁既事, 公司年年賺錢根本唔會無B仔出; 七月我地咪又係照出B仔, 佢咁講係咩意思0者?)

所以大部份同事彷彿對我們充滿敵意般, 有時連工作上還是尖沙咀分番尖沙咀, 我們元朗人分番做元朗人咁. 我知道阿Paul成日開會都比人狂插, 但插佢既人, 平時表面上又無咩野架喎...

本來我一向都抱住與世無爭既心態, 河水不犯井水, 初初係度做野覺得都幾開心; 但漸漸我覺得好辛苦, 變得唔想再係呢間公司返工... 如果有一日我離開呢間公司, 唔係因為我工作上遇到唔開心既事, 因為即使工作上有咩困難我都會想辦法解決, 如果將來我走都應該係我頂唔順呢間公司人事上同制度上既問題, 日本人係管理方面真係唔多掂...

我知道出到黎做野一定係咁樣架啦, 即使我唔係呢間公司做, 去到第二間公司D人都會係咁. 不過我有D懷念以前元朗返工既日子, 人工雖然係低D, 但係比我既感覺warm好多, 諗番起我地以前定期舉行既聯誼活動; lunch係機械房同EDP房吹水傾計/捉波子棋/打機, 係元朗我有好多個可以傾到心事既同事, 但係呢度... 如果你無比人係背後講是非講閒話惡意批評已經好好了, 不要說會和其他同事傾到計...

2005年7月30日(六)

今日是呆等日, 朝早師傅上佐黎幫我地睇TV天線, 因為房?面收唔到畫面, 後尾搞佐一大輪, 發覺原來應該係一個好簡單既問題, 總之最後都解決佐, 而家房?面都有電視睇了, 好開心~ 下午就等Samsung既人上黎睇新買部電視, 等到差不多四點幾先有人上黎, 佢話我地開佐個唔知乜鬼感應器, 所以D色會成日自己自動調較, 因此有影響, 叫我地關佐個sensor就無問題. 之後我就好乖咁做SPSS既功課(其實好想好想打機), 都唔知點解話明group project, 六個人一組, 到最後都係我自己一個人做晒咁濟既?? 又話盡快星期四做好send比我地睇, 點知影都無, 雖然即使佢地做佐, 我自己都會做一次睇下佢地做得0岩唔0岩, 但無理由咁不負責任架麻!! 如果我都唔做係咪成組攬住一齊死先??

之後去佐朗屏等佢地練完波一齊去食飯, 食完飯返到去又繼續做功課, 做到兩點九實在太?, 訓覺Z~Z~Z...

2005年7月29日(五)

唉, 我唔知點解尋晚竟然唔記得較alarm, 今日七點十先起身, 返到公司已經九點三.

難得今個月我一日都無遲到, 點知都係衰收尾既?! 我剛入黎公司果陣, 人事部經理話如果遲少少/間唔中遲一次, 可以叫老細簽番遲到, 咁就唔駛扣勤工; 但新老細又唔知道公司慣例, 想叫佢簽番遲到又問長問短, 來來回回幾廿個mail, 解釋完到最後佢明白整個story之後, 佢意思都係唔多願意同你簽, 咁麻煩以後遲到都唔再要求佢簽番了, 不過代價就係無佐$400勤工... 激死人, 準時佐成個月, 點知最後一日先走黎遲到, 有時真係好嬲自己, 點解會唔記得set alarm架?!!?

本來我之前仲諗住月尾埋數無咩野做, 想今日放病假抖下, 但我見成個月都無遲過到, 到最後果日先放病假扣勤工好唔抵咁, 所以決定都係唔放假, 但估唔到今日唔係因為放病假而扣勤工, 而係因為遲到而扣勤工, 衰D講句早知今日不負責任地放病假算啦... :P

放工之後係LCX同海運逛佐陣, 等senpai教完水, 我地就一齊去佐玩具反斗城買PS2, 跟住就去佐灣仔新鴻基中心既Milano食意大利菜, 好開心啊~~

2005年7月28日(四)

尋日部電視終於送佐黎啦, 好開心~~ 不過就發覺D色彩唔多得, 好唔穩定, 眨下眨下咁, 有時深色D有時淺色D, 所以今日打電話去豐澤問, 佢話Samsung既LCD TV係咁架喎, 一般黎講睇多四, 五日就會正常番喎, 然後叫我打電話去Samsung直接問, 最後約佐師傅星期六上去睇下部電視.

尋晚去佐尖東Regal Kowloon Hotel既L.A.Brasserie steak house食飯, 果度D薯仔沙律好好食呀, 從來未食過咁好味既薯仔沙律, 所以今日返到Cityu都打算買薯仔沙律食, 點知七點十放break果陣去買已經賣晒, 最後買佐個唔多好食既吞拿魚沙律. 不過今日傻瓜又買雪糕等我放學, 所以有雪糕補番數, 好開心~~

然後我地搭西鐵返去, 途中有一個大肚婆上車, 但係無人讓位比佢, 最後竟然係一個老伯伯起身讓座比個大肚婆, 究竟坐係度果D人見到咁樣覺唔覺得慚愧架??!!!!! 係香港既公民教育實在太失敗, 還是香港人實在太自私呢? 我見到咁樣覺得實在很過份, 個伯伯起身之後, 當然亦都唔會有人讓座比老人家啦, 我諗緊係咪應該學全智賢係我的野蠻女友咁, 大聲夾惡咁鬧坐係度既人應該讓座比有需要既人呢??

今日覺得自己有D過份, 傻瓜今日陪我食lunch, 但係唔知點解我今日心情好差, 於是我向佢鬧情緒, 事後諗番我覺得自己好衰, 佢專登黎等我食lunch, 但係我就咁對佢, 真係唔好意思啊~~

2005年7月25日(一)

senpai佢已經放緊暑假, 朝早約佐同事去滑水, 之後上佐其中一個同事屋企玩, 我無暑假放, 當然係放佐工先可以上去. 佢同事屋企係馬鐵?安站, 係一個我完全未踏足過既地方, 感覺上交通唔係幾方便, 都係元朗同天水圍好, 無論去邊度都有巴士直達, 方便我呢D唔鍾意轉車既懶人~~

2005年7月24日(日)

今日senpai要去帶隊, 而我就約佐今日返學校傾功課. 最憎group project, 實在很浪費時間, 仲要同組有個煩人...

之後我就搭西鐵去蝴蝶灣體育館等佢, 然後我地去佐黃金海岸食飯, 好好味, 好滿足~~

2005年7月23日(六)

今日好開心~

今日等senpai係朝早吹完波, 我地就去佐飲茶, 然後去佐碌ling, 我一向玩運動都唔叻, 無球球落坑己經好好, 今日名符其實「誤打誤撞」下都試過一百分以上; 但senpai佢就顛架, 連續三個全中, 我懷疑佢食佐藥~

跟住我地就去佐買泳衣, 因為個個知道佢教水後, 都話我做咩唔趁機會學埋游水. 但估唔到D泳衣可以咁貴, 原價六百幾, 折實後都要差不多五百蚊, 多謝晒啊~

然後我地就去佐豐澤進貢, 我先買佐部MP3機做母親大人既生日禮物; 然後我地今日終於扑鎚買LCD電視, 之前打算不如買Sharp, 最後買佐Samsung, 32吋, 折實後$23800, 加多$88仲可以換多部15吋LCD電視, 好似好抵咁~?

之後我地就返元朗, 我就留係屋企做埋份SPSS既project, 佢當然就要去練波~

今日真的很高興~~

2005年7月22日(五)

今日去佐書展, 因為有免費飛. 自從我告別學生身份後, 我都已經再無去過書展了, 今年去番, 發覺原來夜晚都係咁多人的. 我地只係買佐一本書, 入場都係純粹湊湊熱鬧, 想睇下有無D特別既精品睇下, 因為senpai佢仲有成千蚊書?, 所以即使有書要買都唔會係書展買.

另外我由聽日開始會試飲Detox既5-day plan. 點解我無端端會買黎飲? 事緣係前日我地搭車睇Roadshow見到徐子淇個廣告, 賣到好得好有效咁, 我講笑咁話我都要買黎試下囉, 講完之後我自己都唔記得佐, 點知個傻瓜真係去買佐黎比我試, 我果隻係士多啤梨, 各位姊妹有興趣想知道有無效的話, 就要密切留意住我日記囉, 呵呵~ 我而家既體重係116磅, 腰圍25吋, 有最新消息我會盡快為大家報告!!

2005年7月21日(四)

之前我收到Cityu既mail, 佢話我GPA高過3.7, 所以入佐Dean’s List, 話有張certificate比番我, 因為我唔得閒去拎, 所以麻煩佢地郵寄去我公司, 今日終於收到張certificate, 但唔知有咩用呢? 用黎留念用?? 同埋我都唔知入佐Dean’s List咁又點, 聽senpai講番原來會有?學金.

返到屋企收到Cityu寄黎既信, 佢話因為我入佐Dean’s List, 所以會有三千蚊scholarship比我, 第一次真正體會到咩叫「書中自有黃金屋」.

2005年7月19日(二)

尋晚放工去佐馬沙舖頭幫襯佢買野, 因為佢星期日新店開張我唔得閒到賀, 所以我話今日會去幫襯. 之後同senpai落佐雅蘭地庫食飯, 然後就搭車返屋企~

佢今日係MaBelle買佐隻耳環比我, 係我一直都想買既款式, 好開心~

2005年7月18日(一)

昨晚收到一封信, 係總結番箍牙前同箍牙後既分別, 有日期同埋一些照片, 因為我係箍牙前同箍牙後醫生都有幫我影相, 我正奇怪點解果日上去拆箍都要我坐定定影張相呢?? 原來係為佐做呢份「紀念品」. 睇番未箍牙前個豬扒樣, 唔可以用醜黎形容, 應該用極度醜樣黎形容… 正如我一向所講, 雖然我而家都係豬扒, 但起碼箍完牙, D牙整齊番, 面形好佐, 塊面又無以前咁肥咁腫… 以前既我, 真係慘不忍睹, 有時都唔知我係咪阿媽親生既, 點解阿媽同個妹生得咁靚, 出街比人讚靚; 個大女會生得咁豬, 出街比人嗌豬扒既??

所以我好怕聽到人地話: 「你靚佐喎~」我而家仍然都是豬扒, 但都話我「靚佐」, 咁我以前豈不是要用怪物黎形容?? 呵呵~ 我以前D相, 我唔會再公開架啦, 要?滅晒佢呀, 哈哈~~

同埋我張八達通終於搵得番啦, 尋晚去到戲院搵唔到, 因為果陣已經開佐場, 唔可以入去搵, 阿嬸又話掃地無掃到, 於是個經理叫我留低電話, 搵到既覆我; 其實我都預佐搵唔番, 當唔見佐架啦, 真係估唔到可以搵得番, 好開心呀~!!

2005年7月17日(日)

今日senpai一早要去大興為屯門區學界排球比賽做球証, 於是我就直接去大興體育館等佢, 順便睇佐陣比賽, 感覺上係好得意, 因為係丙組賽事, 所以都係D初中既小朋友打, 無咩組織, 總之但求打得過網便行, 好可愛~

之後我地去食飯, 然後去屯門戲院睇神奇4俠, 套戲幾好睇, 充滿娛樂性同幾搞笑~ 跟住我地就去佐睇MP3同睇LCD電視. 本來打算去碌ling, 但係今日好多人碌唔成, 於是我地就去佐冒險樂園玩, 好開心~

玩完之後我地就去佐買蛋糕, 同上佐senpai屋企坐佐陣, 跟住就去酒樓食飯, 食完飯就上佐佢細妹屋企參觀佐陣, 之後便返屋企了.

去到輕鐵站, 我先發覺我唔見佐張八達通, 應該係頭先係戲院跌佐出黎, 於是返戲院搵, 但係都搵唔到… 我果陣唔開心, 唔係錢既問題, 而係張八達通真係跟佐我好多年. 我係一個好傻既人, 對死物都會有感情, 我會覺得自己對唔住張八達通, 佢跟佐我足足十年, 但我咁大意, 就咁就賴低佐佢唔見佐…
總結呢三日, 駛錢好似倒水咁, 三日駛佐二千蚊…

2005年7月16日(六)

senpai今日下午要去教波, 晚上當然又要練波, 於是我今日自己係元朗行下街, 買佐好多野~ 今日咁0岩竟然係元朗分別撞到阿傑, 阿Ling同Pinky.

2005年7月15日(五)

尋晚返學買佐個薯仔沙律食, 今朝起身覺得個肚有D唔妥, 我都唔明點解自己成日食完沙律就會咁樣… 以前都唔係咁既, 係近呢幾年先係咁樣.

尋晚知道ECON個quiz既成績, 60條MC 0岩得49條, 講真我好唔滿意, 無理由會錯咁多架?! 我明明識做, 仲有時間由頭再double check一次架麻~ 唔開心…

尋晚佢話開完會如果有時間就黎接我放學, 我都唔想佢走黎走去咁辛苦, 叫佢唔駛成日黎接我放學. 但係我上完堂心情唔多好, 一來個quiz成績麻麻, 二來聽到松本先生既丈夫剛剛過佐身既消息… 落佐堂打比佢, 問佢返到去未, 佢話已經返到去… 點知去到西鐵站, 佢無端端出現, 又呃我話返到去既~? 不過我好開心, 因為可以即刻同佢傾下, 心情好番好多~

2005年7月12日(二)

呢排都無每天UPDATE日記, 連COMMENT都再無人留了, 嗚嗚...

但最近真係好忙, 公司既野唔好講; 最近有兩個mid-term test, 連溫書既時間都唔係太夠, 最慘係econ之前溫極都唔明, 到最後問番miss終於都明點解, 原來係自己數學concept唔好, 理解唔到個solution...

忙完兩個quiz又係時候開始著手group project, 好憎好憎group project呀, 可以既話我寧願individual做(即使workload同group一樣), 通常果科要做group project的話我就拎唔到A架啦, 哈哈~ :P

雖然我都唔係成日睇電視, 但我己經好耐好耐無睇過電視了; 以前幾?都好, 返到屋企都會上網睇陣報紙先訓, 而家連報紙都無睇lu; 好想快D可以考完試, 咁就可以抖下(雖然break兩個星期之後又係sem A既開始). 由下個sem開始我唔再take三科啦, take兩科就算了, 因為D courses會越黎越難, 尤其是accounting, 好擔心...

20005年7月9日(六)

師兄今日又要去紅館為大?賽做line judge, 我本來真係好想好想跟埋去睇, 但最衰係今晚要返學校quiz, 所以最後都係留係屋企乖乖溫書. 今晚個quiz比我想像中容易, 我希望可以0岩到八成以上哩. Quiz完之後我就搭西鐵落朗屏, 等佢地練完波一齊去食飯~

2005年7月8日(五)

今日一放工我就搭的士去紅館, 因為今日去睇世界女排大?賽. 記得細細個由中二, 三開始, 我每年都會追睇大?賽, 但係就從來無係現場睇過; 估唔到今年可以有機會去現場睇比賽, 而且仲可以坐係VIP席度睇, 好開心~

最重要可以見到你係球場上面做line judge, 如果唔係你, 我都無機會可以入場係坐VIP席度睇, 真係好開心呀~ 另外見到阿文拖地抹地抹得好辛苦~

2005年7月6月(三)

有時返到屋企覺得仲煩, 無人係屋企既感覺仲relax. 每隔一段時間, 便會又哦, 又埋怨話我地沖涼沖得耐, 話煤氣費好貴… 煩佐十幾年. 我都已經打過電話去問, 原來我屋企果個熱水爐, 如果沖一個鐘頭涼, 一日便要十元煤氣費, 如果乘番六十日, 每期煤氣費交六百元都是正常呀… 但她每次都是那句: “人地屋企四個人, 又煮飯又煲湯又係交幾百蚊煤氣費; 我地得三個人, 唔煮飯唔煲湯都交幾百蚊煤氣費?…” (下刪數百字). 佢有無諗過沖涼既煤氣同煮飯用既煤氣差幾遠呀?? 我諗即使你日日都煲湯煲兩個鐘, 煲足一個月, 用既煤氣都抵唔上你沖一次涼掛??

一係就話我夜晚溫書?晒佢D電, 又係哦足十幾年, 次次都係果段說話… 你話我夜晚掛住睇電視打機?佢電都抵比人話呀, 我溫書咋喎?! 我夜晚唔溫仲邊有時間溫呢??

2005年7月5日(二)

我一向知道師兄佢無論係中大讀psycho定係城大讀電腦都係first hon畢業, 但估唔到佢既GPA咁高, 一個3.85, 一個3.8… 係咪傻架??

雖然我自己既GPA都係3.8, 但我只係part-time degree, part-time既要求一向無咁高, 同埋D同學水平參差, 所以我唔覺得自己3.8 GPA好勁, 只係因為其他同學不是太厲害而已. 反而係中文讀psycho都可以3.85 GPA, 而且你果陣仲係副修數學添, 我真係覺得好顛呀… :P

2005年7月3日(日)

今日又出佐新元中同振宇, 阿Kan佢地飲茶, 然後搭車出荃灣, 今日係最後一場比賽, 本來以為一定嬴緊, 點知最後輸佐比小龍, 只係得亞軍. 不過咁代表仲有進步既空間, 加油呀, 支持你地啊~

之後我地入龍鼓灘BBQ, 阿文亦帶埋新女友黎, 臨走大家係度玩truth or dare, 笑到我好辛苦, 今日玩得好開心~

2005年7月2日(六)

今日出銅鑼灣柏寧酒店食lunch, 然後去佐打機同影卡, 之後行佐陣SOGO就搭車返元朗. 夜晚就同阿媽食飯.

2005年7月1日(五)

放假既第一日, 好開心~ 朝早起身落佐公園跑步, 竟然撞到何達基, 佢話我知自己上佐東週刊, 估唔到而家D週刊真係無聊成咁, 小事化大, 不知所謂, 佢果句說話/果個動作以前對住我地都做過哩, 好小事咋?!

今日約好佐去振宇屋企玩, 我地首先係新元中食lunch, 然後先上佢屋企打麻雀, 今日頭四圈輸佐成百幾蚊, 之後果D雖然有嬴, 但只係嬴幾十蚊, 不過我都唔係旨在輸定嬴, 過程開心最緊要~

今日玩到三點先返屋企.

2005年6月26日(日)

今朝早同佢, 振宇, 阿Kan等人係新元中飲茶, 然後搭車出藍田南睇佢地比賽. 今日對既對手不外如是, 好快就以二比零嬴佐佢地. 但係之後佢要留係度為黎緊既世界女排大?賽作預備, 所以留到六點鐘先走~

跟住搭車返元朗去佐振宇屋企打麻雀, 好開心~

2005年6月24日(五)

六月又係出B仔既日子, 但六月既B仔無十二月果份咁大, 今次有1.5倍, 好開心~ 但成份B仔要黎還錢比EX, 同埋交學費, 根本就已經無錢剩~

TO馬沙bibi: 我唔係唔想去睇戲呀, 但我呢排真係真係好忙呀~ 以前你約我去睇戲我有邊次成日都話黎唔到既o者? 但我剛剛轉佐新老細, 佢要我七月前做起個file比佢呀, 距離七月前只係剩番四日, 我諗實要開OT, 所以我約你七月四號先去睇哩好唔好??

2005年6月23日(四)

今日執番D相簿出黎睇, 我有一本整埋好既靚靚相簿集合佐我由出世至中學階段既相, 同一本01年暑假係日本HOMESTAY及聖誕去日本旅行既相簿, 我發覺果陣真係… 非常嚇人, 而家自己睇番都覺得很眼怨: 肥, 娘, 土, 醜, 豬. 著既衫而家睇番真係好老土, 塊面成個包咁, 又醜樣, 真係好唔掂.

尤其是睇番Cityu畢業謝師宴D相, 真係豬扒之中既豬扒 (雖然而家既我都係豬扒, 但至少無果陣咁肥), 實在太恐怖了, 點解我果陣會夠膽咁出街架??? 我真係想毀滅晒果陣影既所有相, 唔止我自己果D, 仲包括其他同學同我影果D, 真係太核突太醜樣了~! 自己都嚇親自己呀~!!!

2005年6月21日(一)

我公司部影印機間唔中會JAM紙, 果日佢又JAM紙, 咁0岩我同另一個同事一齊係度等緊PRINT OUT, 於是我咪諗住自己搞掂佢哩, 但我估唔到個同事竟然問: "JAM紙呀? 點開0架個蓋??" 聽講我係呢間公司只係做佐半年咋喎, 其他同事大大話話都已經做佐好幾年, 點解仲會連JAM紙點處理都唔知既?? 我連影印機TONER都已經自己換過兩次囉... (雖然換到夾親手指)

又有一次我剛剛入PANTRY, 就聽到A同事對B同事說: "無晒水啦喎." 然後B同事說: "我唔識換喎..." 我係度做佐半年, 換水都已經換過好幾次了, 點解佢地係度做佐幾年, 仲係連換水都唔識換既??

2005年6月18日(六)

今天去佐睇排球比賽, 很精彩. 他們要打兩場, 第一場對手很弱, 輕易而舉就以局數2比0取勝, 他們的扣殺很厲害啊, 一起手對方根本無力招架; 第二場他們對警察, 個個又高又大隻... 第一局他們以23比25輸了給警察; 第二局他們則以大比數25比14取勝; 第三局最緊張, 他們起初落後8比13, 我以為他們輸定了, 但他們一分一分的追上來, 最後以16比14反敗為勝, 很緊張很刺激啊~! 他們嬴埋最後果分那一刻, 實在很高興, 我也忍不住歡呼啊~

之後一行十六人落佐葵芳食飯, 食得很開心, 我不停在笑, 笑到很肚痛~~

今天實在很高興~~

2005年6月17日(五)

今天我第一次去上烹飪班, 今堂學的是砂窩獅子頭(實習)及可樂排骨(示範). 過程很好玩, 而同學則不同年紀都有, 有和我差不多大的, 亦有一些三四十?, 甚至是五六十?的.

導師讚我造的賣相靚, 哈哈~ 每人可以拎食物盒裝起自己的完成品帶走. 之後去佐綠陽新?間北京樓食飯, 其中一味菜就是我剛才整的砂窩獅子頭, 我們係酒樓度開佐個食物盒黎即席開餐, 不知別人會否覺得我們傻, 哈哈~~ 我覺得自己整的獅子頭, 和導師示範所造出來的味道是差不多, 我覺得很開心同很有滿足感~ 我當初還驚會太鹹或是不夠味, 但最後發覺味道很不錯啊~ 很高興~~

2005年6月14日(二)

一切都好像整定般… 估不到今天竟然在學校canteen撞見你. 平時我根本很少會遲到, 即使遲也會六點八, 九便去到課室. 但我今天因為有事, 所以七點才返到學校, 否則平時這個時候, 我一早在課室上緊堂了, 根本不會撞上你. 又咁0岩我行返City果陣講緊電話, 否則我會去佐一入紅門右邊既toilet, 而唔會去canteen隔離既toilet, 如果係咁又唔會撞見你.

當我們發覺對方時, 我們距離已經很近, 想避也沒法避. 我不知你有機會的話會否避開我, 不過我想我不會避開. 見到你後, 我想也沒想, 就好像從前一般, 跳到你面前撓著你, 傻傻的對著你笑. 你對我來說應該是一個很熟悉的人, 但那刻望著你我又覺得很陌生. 我們東拉西扯的談著無聊的三文治, 然後我問你和女友現在怎樣, 但你回答說你沒有女友… 不過怎樣也好, 你這刻有沒有女友我已經沒有興趣再知了, 因為已經和我沒有關係.

2005年6月11日(六)

這個星期很忙很忙, 公司突然多佐好多麻煩事, 我心情也不好, assignment又無時間做, 好像渾渾噩噩的過了一個星期, 也不知自己在做什麼, 好像見步行步的心情.

Sem B的考試成績出了, Statistics拎A, Business System Analysis拎A, Marketing拎B+. Marketing呢科唔駛考試, 淨係要quiz同埋做group project, 所以我最討厭呢類唔駛考試但係要做group project既科, 因為個成績根本唔可以掌握係自己手上, 而且我係極度討厭做group project, 我都係鍾意D考試既科多D.

如果你說我唯一的優點是讀書叻, 你講得0岩呀, 即使考試期間是我剛失戀不久, 我根本不能好好溫習; 即使考緊試果陣, 我也不能專心應考... 但我都可以拎A, 那麼你呢?

目前為止的GPA是3.78.

2005年6月6日(一)

今晚終於有機會去加太賀食飯, 之前果個都曾經有話帶我去, 佢亦有果張AEON既credit card, 但最後都係一次都無去過~

食完飯搭269B返天水圍, 點知係途中壞車, 到最後我地返佐元朗~

我唔知我究竟係做o岩定做錯...

2005年6月5日(日)

真的很喜歡這種寧靜安穩的感覺, 喜歡聽歌就聽歌, 睇碟就睇碟, 傾偈就傾偈... 沒有別人的騷擾, 一種很舒服安心的感覺. 即使大家默不作聲, 都是一種滿足的感覺.

但對不起, 現在我不能答應你甚麼...

2005年6月4日(六)

我今日唔經大腦地講佐D唔應該講既野, 我哭了, 你也哭了, 兩個人哭作一團... 我覺得自己很差很衰, 很不知所謂, 自己都唔知自己想點, 不應該累人累物...

今日本來去朋友係科大既宿舍, 但後尾改佐都係去旺角食飯就算. 我唔知好耐無買過衫定受佐咩刺激, 我好耐都無試過唔考慮價錢就買衫, 今日去bread n butter買佐三件衫, 剛巧其中兩件係買兩件有六折, 所以埋單都只係五百蚊~

以前我好鍾意行旺角中心, 但年紀越大, 覺得果度D衫越黎越唔0岩自己了. 同埋而家完全唔會打算去買D幾十蚊一件既衫了...

最近天氣都陰晴不定, 彷如我的心情一樣...

2005年6月3日(五)

我終於解脫了, yeah yeah!!!!! 好開心呀~~~

今晚去了銅鑼灣柏寧酒店27樓的RIVA食飯, 可以望到銅鑼灣夜景同維港, 好靚啊~ 然後食食下飯見到隔離table(點解呢個中文又係變亂碼)係田北俊喎~ 我好失禮, 個DRINK MENU我淨係識FRUIT JUICE果類囉, COCKTAIL同WINE既名我一向都唔識既… 比我自己叫我一定只係識叫橙汁/芒果汁之類 :P

諗諗下我咁大個都未去過D咁貴咁高級既餐廳食飯(去洲際食飯只係因為公司annual dinner, 唔算哩~), 今晚很開心, 多謝啊~~

我頭先應該估錯佐, 今晚餐飯應該大約九百至一千元吧?? 是不是? 快說!!

食飯前一個人行去約會地點, 無啦啦又有個男人彈出黎, 話搵緊人拍咩眼鏡廣告硬照. 而家D呃人藉口真係層出不窮, 之前我遇過話搵fitting model, 而家話拍眼鏡廣告硬照... 我個樣真係生得咁易呃咩? 我雖然係蠢, 但都有自知之明既, 我咁既扒扒都夠膽話搵我拍廣告? 仲跟足我半條街, 先生你無野呀??

2005年5月31日(二)

今天返工又遲到, 上到元朗公路又塞車, 都唔知塞乜野... 今朝返到公司八點三十二分. 以前我搭七點九果班村巴, 而家我已經改搭七點半果班村巴啦, 都唔知點解返到公司既時間越黎越遲, 以前搭七點半班村巴, 明明八點二, 三就到尖沙咀, 我果陣仲有時間去買早餐; 而家搭同一班村巴, 返到公司有時已經八點半, 都唔知點解.

呢排一係訓得唔好, 一係唔夠訓, 我本來已經好多好多年無飲過奶茶了, 因為我覺得唔健康, 但係最近每朝早成日都要靠奶茶續命(因為我完全唔飲咖啡麻, 奶茶都得掛?). 以後唔好再叫我去果間CAFE食飯, 食餐飯竟然要三小時! 搞到十二點半先埋單, 返到屋企已經兩點幾...

本來今晚唔駛返學, 一早約佐剪頭髮. 但係DAVIS佢地話尋日個阿SIR好唔掂, 於是我地又齊齊改佐去星期二上堂, 而家暫定返二, 四, 希望唔會再改哩~

2005年5月30日(一)

今晚去佐打麻雀, 都說情場失意, 賭場得意, 我地只係打佐四圈, 由六點半打到九點, 最細三番$2至最大八番$64, 我都可以贏到二百幾蚊~ 不過今晚真係幾好運, 有幾舖都係自摸八番, 還有一舖是槓上自摸, 傻傻地...

打完牌之後join埋馬沙一干人等去食飯, 去佐高氏大廈二樓果間cosplay cafe, 果度有漫畫, 棋同UNO等可以玩, 我地一路玩UNO一路等食飯, 果間cafe我都唔知點比comment佢好, 叫個set dinner可以等成個鐘先黎, 我地等到十一點都仲未有得食; 然後終於都等到有野食, 但係佢個份量簡直係超級迷你, 我係女仔就唔駛食好多, 無咩所謂, 但係班男仕全部都食完好似無食過咁, 馬沙仲話個份量仲少過下午茶, 於是之後佢地再去其他地方繼續食, 而我就搭車返屋企勒.

2005年5月29日(日)

嗚嗚, 媽媽太過份了. 最近我是瘦了, 瘋狂的瘦了很多, 但我失戀就是會吃不下睡不好, 第一次失戀我瘦了十多磅, 這次失戀我都只是瘦了六, 七磅而已. 點知媽媽那天對我說: "你看看你! 瘦到連胸部也細了!" 嗚嗚, 這個我也知, 用不著兜口兜面對我說吧?! 嗚嗚... 度過了, 小了3cm啊...

這些也寫出來, 是不是變態了少許~?

2005年5月28日(六)

今日約佐誠誠同"全新郭浚生", 我大約九年無見過郭浚生了, 佢比中學果陣肥佐成個碼, 係街度撞到的話我真係唔會認得佢.

我地約佐十至十二去打羽毛球, 然後去元氣食壽司, 跟住三至五點去仁愛堂打保齡球; 我己經有差唔多兩年無玩過保齡球了, 成日落坑添…

之後佢地就返屋企食飯, 我就自己一個人返市中心行一陣, 本來想SHOPPING的, 但係咩都睇唔0岩, 最後兩手空空返屋企食飯~

今晚難得屋企竟然齊人, 我個妹因為男友要考試, 所以今個星期六會見到佢係屋企.

今日仲見到阿包同MAGGIE, 因為佢地比番張會所證我. 阿包為了接MAGGIE放工, 專登由天水圍楂車出尖沙咀, 就只是為了接MAGGIE放工, 然後再入屯門食飯, 真係羨煞旁人~~~

2005年5月27日(五)

星期五下午係我一星期中最清閒的日子, 於是我爭取時間做下ASSIGNMENT, 發覺4條題目有兩條半唔識答, 點算?? 嗚嗚, 好失敗...

TOBY轉佐新工後, 忙到根本返唔到學, 我都唔知佢點算, NATALIE漸漸成為了TOBY的私人助埋; 而我就一向係DAVIS的私人助理, 負責係佢地返唔到學既時候幫佢地拎NOTES, 點名, 同埋講解番上堂既內容... 之類之類. 有時緣份既野真係好奇怪, TOBY同DAVIS本來係我以前係CITYU讀HDAJS時既先輩, 果陣根本唔熟, 只係因為日本研究呢科一定成日有D咩新年會, 忘年會, 什麼交流活動之類, 所以當初大家都知道對方既存在, 但係就完全唔熟悉; 估唔到畢業後兩年, 會係呢科part-time BBA撞番兩個先輩, 呢科收生成六百幾人, 竟然咁橋第一日上堂我地會係同一班tutorial group"相認"番... 之後我同DAVIS就越黎越熟, 大家搵幾錢人工, 有咩感情問題我都會同佢講... 世事既野真係奇妙. 至於NATALIE, 我係去年九月開學才認識佢, 但係我覺得佢好鬼有義氣, 好好人~

今日下午實在太得閒, 所以我無無聊聊就開始寫呢篇日記. 唔知點解, 每當我失戀之後, 總會有個人係我身邊突然出現, 第一次失戀後出現了肥仔; 而今次失戀則是他的出現, 很奇怪... 但各位放心哩, 我唔會好似上次咁架啦, 今次我一定會睇清楚諗清楚先再做決定, 否則只會好似我同肥仔咁, 到頭來根本都無好結果... 而家我希望能順其自然吧~ 因為我知道, 有D野要黎既時候點擋都擋唔住; 相反有D野要走既時候點挽留都挽留唔到... 就讓時間去幫我吧~ 時間可以沖淡一切, 時間亦都可以証明一切.

2005年5月26日(四)

最近不少人問我為什麼好像開心了不少, JOSEPHINE問過我, DAVIS問過我, CONNIE亦問過我. 我就是這麼失敗, 開心唔開心全部都會擺在面上, 很容易就看得出, 即使我很努力去飾掩自己的不開心, 努力裝作開心無事, 根本都瞞不了人. 相反開心的時候, 別人很容易也就察覺得到.

我近來開心了不少嗎? 對啊, 對比一個月前, 簡直是天淵之別. 原因是什麼~? 自己估啦~~

今日終於都填完張報稅表, 因為去年被遣散, 然後先再簽新CONTRACT TRANSFER過來現在的公司工作, 所以要搵番以前舊公司D糧單... 很煩啊~~

2005年5月25日(三)

師兄, 你好奸茅呀, 竟然在又一城"伏"我? 你在明我在暗, 哼哼!!! 我真的有點嚇親呀~

咁橋我今日又早放工, 平時我無六點都未走, 今日我五點九就走勒, 否則都未必被你"伏"到, 哈哈~

summer密集式咁上堂法真係好辛苦, 無論是體力上還是精神上都很累...

今日廿五號, 收到糧單, 自從四月加了八百蚊人工後, 現在看到糧單的數字, 覺得很感動啊~~

2005年5月24日(二)

今日開始SUMMER TERM, 平時SEM A/B都係返六點半至九點四, 但係SUMMER係INTENSIVE COURSE, 要返六點半至九點十, 好HARSH呀~~~ 我唔知自己可唔可以捱到十一個WEEK呢?

今日果堂係BUSINESS PROCUREMENT PROCESS, 非常沉悶, 我地間唔中傾下DAVIS既日本之旅, 佢買佐幾樣手信比我呀, 多謝晒~ 我都好想去日本啊, 四年無去過了. 不過我下次去唔會再去東京了, 因為己經去過四次, 雖然東京呢個地方去幾多次都唔會膩, 但我覺得應該去D未踏足過既地方. 我都是仍然好希望有機會同另一半欣賞冬天既北海道, 我咁大個人都仲未見過落雪啊~ 真係好想有機會去睇下~

我放學一向係南山村出口走, 然後行去救世軍後面搭小巴去南昌, 今日放學見到學校門口有人係度拍野, 原來係陳鍵鋒同胡杏兒.

師兄順利碩士畢業, OMEDETOU~

2005年5月23日(一)

今天約了朋友柴娃娃去玩塔羅牌, 因為大家都有D煩惱~ 我係第一次玩呢D野, 佢講我某方面既性格又講得好鬼準喎, 搞到我朋友係側邊一路聽一路猛咁點頭... 至於我問佐D咩? 梗係唔會公開講哩~

今日放佐工搭地鐵落銅鑼灣, 唉, 地鐵實在太迫人, 我又比人搏矇... 佢仲夠膽死落車都要跟實我後面, 上電梯時又企係我身後, 借機"HI"下我, 到我出閘果陣我停低摷八達通出閘, 我眼角望到佢原來仲係我身邊, 我突然停低令到佢都突然停低佐, 然後我發覺佢根本唔係出閘! 我之前以為人迫0者, 我都唔想咁多心去壞疑人地係咁不壞好意跟住我, 點知見佢無出閘, 遲鈍既我先知原來自己又比人輕薄... 我看來無得救的了...

今天終於去食到元氣壽司哩, 之前我不斷叫EX陪我去, 因為我真係好想去, 但到最後根本都無去過~ :P

2005年5月22日(日)

今天是22號, 剛好分手一個月...

有時我覺得, 自己好無用...

我由細到大都無經過咩風浪, 我有點像溫室成長的小花, 所遇上的都是一些好人, 好事. 我自問真的很不成熟, 給人的感覺是怎樣也長不大似的. 別人總說, 一個人是否成熟, 是要靠經歷, 人生經驗, 慢慢累積而成的... 但是, 我真的沒在人生經歷過什麼, 我應該怎樣做才好呢?

自少屋企環境已不錯, 我學鋼琴, 屋企願意買琴給我; 中四已經可以去日本旅行, 我從來都不曾為生計而煩惱過...

由細到大, 我的學業都很順利, 我從不覺得讀書是一件困難的事. 小學時, 我總是名列前茅, 名次一定在三甲之內, 學期終總不停上台拎prize(為何有些中文字總會變亂碼)...

升讀的中學是我的第一志願, 是屯門區出名的名校. 升上中學後, 雖然我不是最叻那一批, 但會考有十七分, 順利升上原校.

其實我中四開始便已經出來兼職, 是週末在琴行做店務員. 除此之外我還做過不少兼職, 包括補習, 輕鐵的臨時調查員, SOGO某日式餅店的包裝員, 女青年會的鋼琴老師等等... 但是我所遇到的人都很好, 從來都沒有遇過什麼壞人, 從來沒遇過什麼問題...

我人生的第一個低潮, 要算是A-LEVEL入不到大學; 不過那時其實是自己抵死的, A-LEVEL那兩年, 感覺很?廢, 在同一所中學讀了六, 七年, 突然覺得很悶, 好像找不到人生目標, 對了七年的同學, 老師, 及年復一年的各種學校活動, 我開始成日走堂, 開始懶散... 於是A-LEVEL出來的成績, 是英文D, 中國文化Ｂ, 地理E, 經濟F, 會計ABS;

於是我以自修生名義REPEAT A-LEVEL, 重考後的成績大致上都差不多, 不過經濟由F升上做D, 我那時以為應能升上大學; 怎料最後卻連一個OFFER都沒有. 那時的我簡直覺得世界停頓, 我自閉了三天, 不吃不喝, 然後我對自己說: "個天要玩我, 我偏不能就這麼認輸!!" 於是我迫自己振作, 我甚至想過很多荒唐的方法去賺錢讀書(女仔豁出來的話, 要賺錢也不難); 那時我JUPAS選科是希望能修讀與日文有關的科目, 家人見我這麼沮喪, 也支持我到日本留學. 怎料後來HD的日本研究收了我, 於是我便開始了所謂的大學生活.

入了大學後生活非常愉快, 輕鬆的課堂生活, 完全沒有壓力, 而且結識了第一位男朋友. 只要我肯用心的話, 讀書根本難不到我. 入U讀日本研究之前, 我從來沒有學習過半點日語, 相比起其他入U前已經讀過數年日語的同學來說, 我是比他們遜色的, 但三年來我一直很努力, 每一科不是A就是B; 這科能以DISTINCTION畢業的人數只有五個, 最後我都能以DISTINCTION成績畢業. 日本語能力試方面也通過了二級合格. 除了讀書之外, 我還是城大管弦樂團的SECRETARY, 我盡量去擴闊自己的圈子. 而且我也不斷找東西學, 我學過鋼琴, 學過口風琴, 學過長笛, 學過打鼓, 學過畫畫, 學過韓文, 學過普通話, 學過壁球...

畢業後, 順利地找到工作, 入到一間大公司, 同事們對我都很好, 雖然是非也不少, 但都是一些八婆是非, 無關痛癢, 沒有惱人的辦公室政治, 明爭暗鬥之類... 工作上亦無風無浪... 甚至現在調出了尖沙咀工作, 人工更高, 公司福利更好, 我工作得非常愉快~

然後自覺HD也不夠競爭力, 於是我開始夜晚進修, 報讀了PART-TIME BBA, 所遇到的同學也非常友善, 甚至遇上了以前讀日本研究的師兄們, 成為了同學; 大家一起學習的氣氛非常愉快, 大家有貼士不會收埋, 反而會通知其他人; 功課會MAIL出來給大家互相參考; 上唔到堂大家會幫大家點名, 然後下星期會講解番上堂講過D咩... PART-TIME的大學生活也非常開心, 我遇到的都是好人. 雖然日頭返工, 夜晚返學, 但我不覺得很辛苦, 我現在的GPA是3.8, 我一直都很努力去學習...

所以, 這廿幾年來, 我都是過著平淡, 但安穩的生活. 我知道自己的缺點是不夠成熟, 但是卻不知道怎樣去改進自己. 出來做事後, 更覺自己不成熟: 我不能觀人於微, 別人都說我唔識睇人, EX叫我要估下人地究竟諗緊咩; 我初期在公司不問世事, 相識的同事教訓我"唔得醒水", 不會豎起耳仔留意住四周人的說話, 不會眼看四周留意其他人究竟在做什麼, 在公司收風永遠收得最遲, 自己被人在背後講是講非我也不知道, 這點要多謝JOSEPHINE時時給我提點, 放料給我.

說實在, 好聽點別人會讚你純, 實際上其實你是鈍才對... 我待人處事好像不夠圓滑, 不夠體面, 不夠世界女, 不善交際, 不善辭令. 實際上我又是一個內向, 好靜, 不愛說話, 只喜歡做聆聽者的人. 甚至有朋友對我說, 即使拍拖了也要玩心理耍手段, 不可以完全讓對方知道你在想什麼... 做人處事為什麼一定要這麼複雜? 不可以簡單一點嗎? 我覺得, 只要不傷害別人就可以囉, 河水不犯井水, 有問題嗎? 但是, 不成熟彷彿已成為我的標記, 我應該如何擺脫這個形象呢??

雖然自問我是有點懶散, 有不少缺點, 但我也有努力過, 付出過... 為什麼EX最後掉給我的說話, 是我一無是處; 亳無優點; 若有第三者的話, 我根本無得同人比?

有誰可以解答我呢~~?

(看你假期多無聊, 這麼長, 寫essay嗎?)

2005年5月21日(六)

唔... 怎麼寫好呢? 這一個月, 對我來說, 是相當難捱的日子, 但身邊有不少朋友陪著我, 鼓勵我, 支持我. 我真的很感謝你們, 你們的幫助, 使我感覺好多了.

當中師兄你也是其中一個一直在安慰我, 支持著我的人. 但我一直都當你是一個關心小師妹的一位好師兄而已, 因為你是一位教師, 又是一位christian, 所以我覺得你應該是對任何人都會這麼友善, 我知你是希望我盡快自己諗通, 我從來都沒有想過別的...

你昨晚對我說的話, 其實我真的很感動. 說真的, 從來都沒有人對我說過這些話, 我想任何一個女孩聽到, 也會有心動的一剎, 真的很多謝你~ 但正如我昨晚的回覆, 你只要看看我17號那天的日記, 那就是我現在的答案了 (17號日記所指的那人當然不是師兄你哩, 是另有其人. 你之前有對我說過那樣的話嗎? 哈~). 不是別人的問題, 是我自己的問題, 是我暫時不敢再去相信別人了.

說真的, 我覺得你是很棒啦, 在CITYU讀了COMPUTER的DEGREE, 在中大取得PSYCHO的DEGREE, 現在又在中大讀SPORT SCIENCE, 還是一個排球教練... 你又怎可能會看得上我呢? 哈哈~

但是和你傾計的感覺很舒服, 謝謝你~!

今天在家執房, 番看校刊, 看見師兄你當時PE已經很厲害囉, 全級第二名啊~

****************************************************************

今早去了北區醫院, 但今次不是去覆診, 而是去申請做義工.

上網睇蘋果日報, 頭版有一小格是<李英愛訪港>, 不是吧? 這都是"新聞"?

2005年5月20日(五)

今天約了Maggie食晚飯. 眼見Maggie和阿包拍拖差不多九年, 仍然這麼恩愛, 真的很羨慕~ 是非常羨慕!!

阿包去了公幹, 他們還會傾兩個鐘電話, 又會MSN; 臨上機前, 阿包都會send message或致電給Maggie; 他們又會約埋一齊放假, 然後去澳門玩... 在外人看來, 真難相信原來他們已經拍了八年拖. 如果有什麼模範情侶/最佳情侶選舉, 我一定會推薦他們參加!

我在想, 如果我能找到一個像阿包的男友就好了~ 眼見阿包和Maggie這對情侶, 我自己好像也放下了很多...

2005年5月19日(四)

我已改了SETTING, 現在任何人也可留言, 即使不是MEMBERS, 甚至匿名留COMMENTS也可以啊~

最近一有時間便看書, 首先是買佐本The Da Vinci Code, 挑戰自己睇英文版. 而家係商務買好抵呀, 原價都只係$76(英文版呀), 用匯豐信用卡仲有半價, 折實都係$38蚊, 好鬼抵... 暫時要自己唔借助字典咁去睇, 睇下自己睇得明幾多, 暫時都OK既~

然後睇番晒區樂民d作品, 同埋間中睇下漫畫...

昨晚睇番仙太郎第四期, 講述仙太郎因為不是一隻純白色, 而是有斑點的小兔, 所以一直在寵物店無人問津, 只能眼見其他純白色小兔一隻一隻被新主人帶回家. 仙太郎在寵物店生活得很幸福, 有美味的食物, 有乾草墊著的床, 善良的寵物店主人, 還有新來的小兔同伴, 似乎一直在寵物店生活也不錯吧? 但仙太郎在想: "真的就這樣在這兒長大嗎? 有誰會愛護我, 照顧我, 把我當作親人哩? 在哪裡…" 然後, 斑點小兔終於遇上了會痛錫自己一生的主人阿麥, 自此便成了"仙太郎".

看到這兒, 我突然有少許感觸, 我也不禁在問: 究竟有沒有人願意真正愛我, 珍惜我,在乎我, 痛錫我呢? 究竟世上有沒有這樣的一個人存在呢?? 有的話, 你在哪裡? 若你願意的話, 請你出現在我身邊, 讓我知道你的存在吧~

2005年5月18日(三)

A-LEVEL那段時間, 是我身型最FIT的時期, 可能是因為壓力吧, 168CM高的我, 那時只得一百零幾磅, 廿四, 五吋腰. 那時我買了一條牛仔褲, 25吋腰的, 穿上後非常合身.

後來入了CITYU, 日本研究這一科根本完全無壓力, 功課又少又簡單, 考試亦唔難, 漸漸心廣體胖; 去日本HOMESTAY的那年, 體重上升至135磅, 腰圍28吋. 那條褲當然已經再穿不下了, 那時候改為成日穿裙. 我曾經發誓, 一定要再次著得落該條牛仔褲!!

畢業後因為第一次失戀的關係, 體重在兩個月內跌了十多磅, 變為120磅. 我嘗試穿穿看那條牛仔褲, 但卡住在PAT PAT的位置, 穿不上, 哈哈. 其後因為手術的關係, 再由120磅減為115磅, 我再次穿穿看, 這次勉強可以穿上了, 但是卻扣唔埋鈕拉不上拉鍊.

近來因為第二次失戀, 體重再由115磅跌至110磅, 那天心血來潮再嘗試穿穿看, 這次終於成功了! 非常合身, 因為我現在的腰圍只有24.5吋.

可以再次穿得上該條牛仔褲,我是非常高興, 但卻是因為失戀的原因而消瘦, 值得高興嗎?

昨天我去了覆診, 姑娘也突然跟我說: "最近每見你一次, 你都瘦過一次. 尤其是手術後, 塊面都凹了..."

那天去看年幾沒見過的家庭醫生, 以前我們會戲稱他靚仔醫生, 但今次見他竟變了肥仔醫生, 他說日日都坐, 根本沒時間做運動, 遲D打算放假去減肥. 他也對我說: "你越來越瘦了, 瘦到我差點認不出你了."

回復一百零幾磅一直是我的心願, 但這樣子不受控的消瘦下去, 卻不是我所想的...

2005年5月17日(二)

唔... 我從來沒有想過, 你會說對我有好感... 怎麼可能? 在整古我吧?! 哈哈~

說真的, 我沒有外表, 沒有內涵, 這麼多缺點, 我根本沒有地方值得別人喜歡...

況且, 我暫時不敢再相信別人了, 我不想再一次被傷害...

我不想連累別人, 我不是要找水泡, 亦不應借助任何人去幫我將上一段感情放下, 這樣對對方不公平...

多謝你的好意, 我會覺得是因為你看見我最近如此低落, 如此沒自信, 所以用這個方法來安慰我, 令我可以尋回少少信心...

謝謝囉~ 說實在我今天的心情是好了不少~ 哈哈

但我可以告訴你, 我們是兩個世界的人吧~?

2005年5月16日(一)

蝦餃: 你係咪傻架, 凌晨三, 四點都仲唔訓?

燒賣: 你唔知咩? 我練緊仙麻, 我而家每晚訓得三, 四個鐘, 有時更少; 朝早食兩塊餅乾, 下午食幾粒米, 夜晚完全唔駛食飯... 我就快可以成仙囉~

蝦餃: 你再係咁落去, 唔係成仙呀, 你係升仙呀~!

*************************************************************

我自閉了三個星期, 日日匿埋自己係屋企, 唔想見人, 日日匿埋係房一個人喊, 每日都食唔落飯, 每晚都訓得唔好, 我最新磅數是110磅; 我無時無刻都要自己諗通, 但每日卻困自己在痛苦的回憶當中… 在家”hea”了三個星期, 是時候要振作了, 再這樣下去, 我會越來越恨自己, 討厭自己, 也只會讓人越看不起自己. 之前就是自己太沒用, 現在的我就是要爭氣!!!

補充番呢幾日發生過既事:

原來OT過佐十點鐘就可以搭的士返屋企, 但係我完全唔知道; 等我星期一果晚冒住雨咁搭通宵小巴返屋企, 成兩點幾先返到去...

人地話情場失意, 賭場得意, 我果日竟然中佐我一生人之中最多?金既六合彩. 我由十八?開始期期都買死某兩組?巴, 永不間斷, 但係咁多年黎都唔知有無中過十次安慰?, 就連之後只要中三個字就有$20, 我都無乜中過; 但我果日竟然中佐目前為止最多既?金, 就係中佐4個字, $320, 哈哈~ 係呀, $320呀, 你以為我中佐二, 三?呀?

終於都考完試了, 之後就要搵D野學下~ 學咩? 唔話你知~

*************************************************************

今日同三位型男食飯, 我覺得間餐廳幾唔錯, 環境幾好, 價錢又唔貴~

馬沙小朋友, 多謝你樽LEGO呀~
寶寶, 多謝你D糖呀~ 我上到車睇下個袋, 發覺有好多唔同種類既糖, 果刻真係覺得幾開心架~ 多謝你呀, 無端端要你破費了~
Shinning san, 我真係一個好悶既人黎架, 而且最近我心情很低落, 真係無咩野想講… 成餐飯悶親你們了~

2005年5月12日(四)

或許, 這是最後一篇吧...

當初和他一起的時候, 我就知道他最愛的人不是我, 是她以前的某個女朋友. 我傻傻的認為, 男人心裡總會有一個人, 是最愛最愛的人, 她可能是初戀女友, 可能是追不到手的某某人... 我知道即使結婚了, 結婚的對象也並不一定是自己一生的最愛... 而這個心中最愛, 男人即使要講大話瞞你, 也不會坦坦白白對你交代他最愛的另有其人, 對你說他最愛的不是你. 所以我天真的覺得, 我一早知道他這麼長情, 那我知道我的對手就只有一個, 就是他心裡的她, 而不會是他將來某某女同事, 某某朋友的朋友, 某某vendor... 我實在見到不少例子, 本來大家深愛著對方, 這一刻視對方為一生至愛, 但原來這"最愛"的位置, 只能維持一年, 轉個頭男的見異思遷, 貪新忘舊... 所以我從來都不祈求什麼, 只安守本分地一直佔據著次一等的位置, 我知自己永遠只能在”她”之下, 是有點不甘心, 但我接受.

但原來我這種想法都是極度幼稚天真, 因為最終我都是輸了給別人…

我記得我曾經對他說過, 即使將來我們分開, 也只能是因為”她”, 而絕不會是因為其他人. 他曾經答過”晤”. 估不到到了最後, 我都是敗給了其他人…

其實也不能說是敗給了別人, 實際上我是敗給了自己, 怪只能怪自己不爭氣, 不夠優勝, 不夠好… 但你當初和我在一起的最初, 你就知道我是一個怎樣的人吧?

2005年5月11日(三)

年半前我開始了寫日記的習慣, 但不是寫我自己的日記, 我寫的是我和他的拍拖日記, 我每天都寫, 用電腦記下每一天的拍拖片段, 點滴, 以及我的想法.

當儲了差不多三百六十五篇日記時, 我四圍找尋漂亮的A5紙, 然後將每一天的日記都列印在上面, 跟著找人釘裝好, 這便成了一本世上獨一無二的"拍拖一週年紀念日記", 並在拍拖一週年當天送給他.

送了給他之後, 我從來沒有問過他有沒有看過, 因為我知道, 這麼無聊的玩意, 他是不肖花時間去看, 更何況他一向對我的事都沒有興趣. 別人收到的話或許會很感動, 但對他可能只是多了一件垃圾, 我想他在收了之後, 可能是隨手便收在床下底算了...

這本日記現在會在哪裡呢? 堆田區? 焚花爐? 在哪裡也沒關係吧, 反正它從來就沒有人會欣賞, 它彷彿沒有存在過一樣...

***************************************************

昨晚考完試, 我去了旺角想買點東西, 順便看看馬沙在不在舖頭, 我們一起去吃飯.

我在街上走著的時候, 突然覺得很害怕, 我很害怕突然會在街上撞見他和她, 我不知到時自己會怎樣... 昨晚在街上一面走, 我一面留意著四周的人, 一方面我很想看看那個女人究竟是什麼樣子, 但另一方面我又害怕真的會被我撞上他們... 突然間我有點害拍出街, 我怕會撞見他們親密的在一起, 我怕到時我會崩潰...

2005年5月10日(二)

突然諗到樣野好搞笑, 我們的開始是緣於他找到工作而開始的; 想不到我們的終結是終自他辭職後找不到工作而終結的...

算不算諷刺? 不, 是首尾呼應~ 哈哈~

你啊, 要努力工作啦~

我也會努力做人~

愛一個人是希望他能得到幸福, 若果你和別人是幸福的, 那你就去吧~

佳佳, 再見了...

2005年5月9日(一)

呢個Josephine, 我肥又話我太肥, 現在瘦又話我太瘦, 想點先~? 還說我瘦到似吸毒, 真係比佢激死~

今日開OT開到凌晨十二點半先離開公司, 終於"有幸"成為最遲離開公司果個了, 以前係TMH都未試過OT到咁夜... 熄燈後偌大的辦公室, 對夜盲又怕黑的我, 有點兒恐怖...

下次都係帶定幾舊電入落speaker, 加班時聽下電台無咁靜...

2005年5月8日(日)

蠢材, 你還問落去有什麼用呢? 即使你再問下去, 你得到的只會是一個又一個的大話, 一個個更荒謬, 更難自圓其說的謊話而已...

我明白為何到最後他都不承認有第二個, 因為如果他認了的話, 他便成了衰人, 理虧的人便是他, 有問題的人便是他, 錯的人就是他. 我知他在我面前永遠都要保持著高姿態, 永遠都不能認衰… 所以, 就由我去摃起晒所有責任吧~ 衰的人是我, 有問題的人是我, 錯的人也是我, 好了吧? 就讓我繼續卑微好了.

2005年5月7日(六)

你說我愛亂諗野, 其實有些是有根據的. 但當然我不曾對你說因為我看過你的mail, 指證你明明說心情不好不來見我, 卻對她說最近有她陪伴左右很開心; 知道你很主動關心她, 關心她最近睡得不好, 問她最近在想什麼, 是否想著你, 叫她有什麼問題/不開心call你, 你一定會聆聽, 但我不開心/有問題時, 你有關心過我嗎? 你有主動理會過我嗎? 你從來有send過這樣的mail給我嗎? 只全盤指責我不成熟, 黑面; 見到你說最近沒時間陪她, 最多週末補番數, 錫番... 這一切一切, 我都比過機會你去解釋, 我想問個明白, 但你只是怪我亂諗野, 如果我看見這些mail, 還可以不想的, 那我可以出家去了... 我知check你mail是很缺德的行為, 但我沒有定期去check你, 只是最近你的古怪, 令我想到這個方法, 看見了那些mail, 才追問你是否有第三者, 但你最後還是否認, 還說這些mail是玩下, 你一向都係對其他人好過對我... 我無話可說了. 我只是最後想你可以對我坦白, 但你最後... 還有很久之前看見你mail x小姐說: "你比一切重要". 我其實知道很多事, 內心收埋了很多事, 但是我之前不能對你說明我這樣子知道了, 所以你覺得我亂諗野, 很煩... check你mail是我不對, 對不起, 事到如今我亦不用再向你隱瞞我這個行為; 但你的表現真的令我很失望, 令我對人很失望. 枉我一直是這麼相信你, 信任你! 但你自問, 你又如何待我呢?

我一直愛著你, 你有沒有珍惜過我在乎過我呢? 你有咩都收埋唔肯講, 我接受; 大家完全無溝通, 我有心事不開心都不敢對你說, 我接受; 我每次想和你傾下和你溝通, 你次次都發霉氣, 我接受; 你中英文都不好, 讀書成績也不好, 我願意幫助你協助你; 你不溫柔不浪漫不會乙水人, 我接受; 對我的說話永遠刻薄到死, 好聽的說話一句也沒有, 我接受; 一週年, 情人節, 聖誕節, 一點表示也沒有, 我接受; 你對其他人仲好過對我, 我接受; 你不喜歡我喊, 我喊的時候已收收埋埋, 盡量不讓你知道, 亦盡量忍住不去哭; 你話我唔成熟, 於是我遇有唔開心都不會對你說; 你話我愛發脾氣, 我已經沒有對你發過脾氣, 但你有否想過是你才對我發脾氣? 你話我自大, 覺得自己0岩晒, 但你有沒有想過自己, 你都是覺得自己永遠正確? 我病的時候你不關心我就算了, 還說我扮野; 我剝智慧齒發炎告訴你我要覆診, 你竟嫌我煩; 緊張電腦short佐無晒d珍藏, 但就完全不在乎我和你影既合照無晒; 我send mail給你變了亂碼, 你從不去問我究竟想對你說什麼, 隨手就delete了, 不聞不問; 和你影的卡你keep也不keep一張, 隨手就比番晒我, 還說因為銀包無位; 想你有點交帶, 我都不要求每天通電話, 只想你去哪裡都告訴我一聲, 但你一句心情唔好就成為不致電給我的理由; 我生日那天還要對我發脾氣講分手, 我都沒有怪你; 我為你織頸巾, 大雨的晚上在你家樓下等你, 只想為你送上一個飯盒, 你生日我費盡心思book酒店神神秘秘同你慶祝, 你喜歡做什麼我都遷就你… 但一切一切, 你完全沒有感覺, 一點感動也沒有; 你說我不懂煮飯, 我有嘗試過為你煮飯, 但你卻只有批評; 我緊記你屋企人的生日, 你表妹喜歡hello kitty, 我專登向同學要了她公司所造的hello kitty sample; 你家姐說想試某新日本薯片, 我過幾天就買了回來; 她問你要不要月曆你就覺得人好, 那我年半來沒有為你做過什麼嗎? 我做的連她一句問你要不要月曆這麼簡單的事也及不上嗎? 你對別人可以用溫柔細心的語氣, 你對我又用什麼語氣呢? 永遠只係睇死我, 你一早將我定了位, 我病了返工是為自己交代, 你說我扮野; 連拍過幾多次拖都不肯向我坦白; 你這麼多年還串錯我的英文名; 淨係記著我的缺點, 但你有沒有反省過你自己的缺點呢? 你send給她的mail可以這麼溫柔這麼細心語氣這麼體貼, 但你從來有沒有send過類似的mail給我呢? 有沒有用過這樣的語氣與溫柔體貼對我說話呢?

你到最後什麼也不交代清楚, 分手也不直接向我說一句, 還要透過我的朋友去說, 你這算是什麼意思呢? 你不敢面對我嗎? 最後還說這是小事, 想不到你可以這麼無情無義... 我和你以前的女友比, 真的是比不上她們, 因為她們一早發現你的性格為人, 一早知不對路不再投資不再留戀, 離開了; 而我, 還憧憬我們會有將來, 只要我努力去包容去改變... 但最後我換來什麼呢?

我很無奈, 我一直很努力想去維繫大家的感情, 但你有付出過嗎? 你有真正努力過嗎? 到最後你都是說這就是你的性格, 咁多年黎都係咁架啦; 我呢? 愛哭不成熟時亂諗野就是我的性格, 但我知這種性格不好, 你也不滿意, 我都盡量作出改變, 但你根本無視我的改變, 還反問我你有改過嗎? 你問我有改過嗎之前, 有沒有問問自己, 你到底有沒有為這段感情改變過自己呢?

2005年5月6日(五)

izchan, 你好~ 雖然我不知道你是誰, 但是我很多謝你, 每一天都見到你的comment, 真沒想過我寫的東西會有"讀者", 真的要說聲謝謝你!

今晚和舊同事食飯, 很熱鬧很開心; 但今晚去的地方是以前曾和他去過的地方, 有點兒傷感...

阿賢你個死仔, 我已經瘦到112磅, 25吋腰啦, 你都仍然是叫我肥妹!
阿June結佐婚果然成個feel都唔同晒~
Kenny竟然己經有個六個月大既仔仔, 果陣結婚問佢係咪奉子成婚又話唔係~ 不過佢個BB好肥好得意~
William你而家個髮型好睇好多, 以前果個箭豬頭你都係唔好再剪啦~
多謝阿志你幫我"筆"雪糕, 我知你好努力咁去安慰我架啦~

2005年5月5日(四)

唉, 你實在令我太失望了...

你不會開解人? 但是你卻肯花時間心機去開解其他人...

衰莫大於心死, 到頭來你還是要騙我...

我愛亂諗野? 這都是你造成的!! 而且我不是憑空的亂諗, 我是有證據去壞疑的.

心很痛...

不過你實在令我太失望了, 我相信我很快就可以再站起來!

2005年5月4日(三)

今日收到報稅表, 唉~~ 唔想填, 搵雞碎咁多都要交稅...

今日用佐大半日先溫得一課書: hypothesis testing-one sample.

14號考果科business systems analysis更加唔好提, 從來未溫過...

2005年5月3日(二)

估唔到會收到comments, 多謝各位關心!

呢段日子, 要多謝好多人~

多謝Connie, 多謝你得閒鬧下我, 鬧醒我;
多謝娟娟, 臨時約你食飯你都肯黎陪我;
多謝誠誠, 我14號考完試快d介紹全新郭xx比我識;
多謝湯米, 我果日真係好?唔想出街, 第日再去食雪糕;
多謝馬沙, 不過我會減少煩你;
多謝阿賢, 你的見解真的很到point, 我比你點醒了不少;
多謝Protein師兄, 我應該要比心機向你學習;
多謝阿昇, 你既禮物我會盡快買架啦;
多謝同病相憐的漢仔, 安慰你的同時, 我亦是在安慰自己, 是對自己的一種反思;
多謝GAF的各人, 呢個幾星期有你地關心同支持;
當然還要多謝屋企人!!

2005年5月2日(一)

愛一個人是盲目的, 愛他的所有優點, 愛他的所有缺點... 你從來沒有數落他的缺點, 難道他沒有缺點嗎? 當然不是, 只是你學會欣賞接納, 不去批評, 你會盡量去想別人的優點, 即使那些只是微不足道, 你仍然會當作優點去欣賞; 而不是只想著對方的缺點, 將對方彈得一文不值.

愛情從來沒有對或錯, 但若大家不能坦誠, 不能遷就, 不能體諒, 不能忍讓, 那還談什麼戀愛? 不如乾脆分手吧? 否則結了婚, 也不會得到幸福~

從今開始, 應該找一個懂欣賞你, 珍惜你, 真心愛你的人, 而不是一個緊張那些碟多過緊張和你的合照; send mail給他變了亂碼隨手delete不聞不問; 年多了還會串錯你英文名; 即使你做盡什麼他都不覺得感動; 你從不數落他的缺點, 他卻將你的缺點放到無限大; 你默默接受他心中一直另有最愛, 但他卻時常將你和別人比較的人...

縱使他如何踐踏你, 連分手也不直接對你說一句也好, 你也學不懂恨. 當你真心愛一個人的時候, 無論他如何待你, 你對他的愛都不會變. 變的只是你的心情, 學會放手學會面對學會釋壞的心情. 你仍然愛他, 你會祝福他.

2005年5月1日(日)

最近都睡得不好, 每天六點多便會紮醒; 一星期內瘦了3磅... 上次失戀由135磅跌至120磅, 那今次會由116磅跌至多少磅呢??

這故事我上次已聽過了, 今次也適合再看~
有一天, 一個失戀的人在公園哭泣, 這時一位哲學家走來, 輕聲的問他說: "你怎麼啦? 為何哭的如此傷心?"
失戀的人回答說: "嗚~~ 我好難過, 為何他要離我而去?"
不料這為哲學家卻哈哈大笑, 並說:"你真笨!"
失戀的人便很生氣的說: "你怎麼這樣? 我失戀了, 已經很難過, 你不安慰我就算了, 你還罵我?!"
哲學家回答他說: "傻瓜, 這根本就不用難過啊! 真正該難過的是他, 因為,
你只是失去了一個不愛你的人;
而他卻是失去了一個愛他的人."

2005年4月30日(六)

我的檢討, 希望下一段感情不會再犯上同樣的錯.

1. 我知道自己太愛亂諗野. 其實上一段感情, EX一直瞞著我瞞了多月, 即使我的直覺告訴我他有問題, 他有異樣, 但是他都不肯承認, 還說根本沒有問題, 叫我不要亂諗. 但事實上, 他根本一早變心了, 他之前對我隱瞞不說, 原來只是想過埋三週年紀念日才對我坦白, 我真的很難過, 亦好憎別人瞞我騙我. 我寧願你不再愛我的話一早讓我知, 我也不想像個傻瓜的被蒙在鼓裡. 所以當和他拍拖後, 我一直很害怕會事件重演, 怕他變了又不告訴我, 因為EX和他的共通點就是心裡面有一個最愛的人, 所以當他有什麼異樣, 我便立刻如驚弓之鳥, 憂心他在想什麼, 他越不說我便越亂諗; 即使他說了無野我還是要繼續亂諗, 我知道自己實在太有問題, 只是被人拋棄了一次, 便一朝被蛇咬, 日後連看見草繩都會擔心一餐. 是我不好, 很對不起. 我不應將以前那段感情的包袱加在他身上, 是我對他的不信任, 整天疑神疑鬼, 讓他也越來越覺得我煩厭, 真的很對不起.

2. 我知道自己是沒什麼優點, 雖然我自覺得比從對溫柔了很多, 脾氣收了很多, 用心記著其他人的說話, 記得他的喜好, 他表妹的喜好, 他朋友的名字… 等等. 但是對方不這樣認為的話, 這都不能算是優點吧? 我當初也應承過去改, 例如我應承佐話學煮飯, 究竟我有無真係用心去做呢? 我自己做人好多時都係得個講字, 我話會成熟d, 話會去學煮飯, 話會去改變形像, 話會去改變自己... 但到頭來我有無真正去做過呢?? 我沒有...

3. 我太自私, 很多時都只立在自己的立場看事情, 沒有站在他的角度去看. 只是覺得他作為男友, 為何不會"乙水"女友? 為何不讓女友哭? 為何什麼也不肯說? 為何我不開心就一定是不成熟的表現? 為何約了朋友也不致電給我這麼沒交帶? 為何我黑面就一定是我小器, 他不去想想自己是做錯了激嬲了我才黑面?... 當我這樣只想著自己的時候, 我沒有想過他背後的原因... 我只想到自己, 只想到他這樣這樣我不喜歡, 只想到他作為男友不應該係咁樣; 但是我卻沒有想到自己對他要求這樣那樣, 同樣令他不滿意.

4. 他說我神經質, 其中一個係成日"MEET"自己... 這是有原因, 不過不便公開說.

5. 凡事太依賴, 我不是不懂得自己照顧自己, 只是因為我太需要一個人能在自己身邊, 我怕孤寂, 我希望身邊有一個人, 我有需要時可以立刻搵他. 不願意獨立.

6. 男人多數都不願意開口, 更不會將不如意的事讓女友知道; 但是我只抱著想了解佢開解佢的心態, 便成日問住煩住; 沒有想到他根本不願意說, 我就不應該再問, 我要做的不是打爛沙盆問到篤, 而是給他時間靜一靜, 給他空間.

7. 我太自以為是, 成日覺得自己咁做係對對方好,但係對方可能都唔係想要呢D野... 我太自我, 以為咁諗係好, 亦以為對方都會覺得咁樣係好, 但就無企係對方既角度去諗下... 真係好多好多時只係自己一廂情願.. 其實對方都唔係想你咁樣, 所以你覺得好既野, 佢地覺得都係不外如是... 可能仲會覺得你煩覺得你討厭; 相反你覺得對方對自己唔好既事, 可能佢咁做其實係想你好...

8. 太過遷就對方, 對方想咁我就聽晒對方話, 令到自己太沒性格; 當我有天想找回自己, 不再對對方唯唯諾諾時, 便令到自己好像太多無理要求, 令對方以為我開始不滿意, 開始諸多要求, 開始令人煩厭.

2005年4月29日(五)

我終於知道結果了(其實我早已預計了), 他將他的話對我一個朋友說了, 朋友再轉告給我. 他說我們性格不合, 我太愛亂諗野, 明明他已答了"無"或"不是", 我還是要繼續亂諗; 他說我很情緒化, 而他不是一個會開解別人的人, 他覺得我煩. 我朋友問他到底有沒得補救, 他說: 唔駛考慮, 亦唔需要考慮. 佢說除佐覺得我讀書比較叻D之外, 他說找不到我其他優點... 他說他有看我的日記, 他的結論是, 看完覺得很嘔血, 還叫我朋友去看看, 看完就會知道我是如何鍾意自己亂諗野. 聽了後我很痛, 雖然這一切我也有估計過, 但自己估計與真正聽到這就是事實, 始終有很大分別...

有人說人傷心到最盡頭, 是哭不出來, 我體會到了, 知道真相後, 我一滴眼淚也沒有流過... 是不是哭得出來的話會痛快些呢??

不過大家請放心, 我沒事. 我會振作~

2005年4月24日(日)

今日係百佳見到安德尊, 搞笑~ 咩佢搬佐黎天水圍咩? 個凍肉counter阿姐仲叫安德尊做大王.

今日終於做完佐份marketing plan既assignment, 簡直係嘔心瀝血, total三十頁~

但係之後仲有一份IS assignment等緊我, 五月一日交, 嗚嗚, 連題目都未有時間去解... 份麻煩功課要自己upload上網交, 唔知點解屋企部腦upload唔到, 而家都唔知去邊度upload好, 唔通真係要五月一日星期日返學校CSC upload功課? 好無聊0者~

好耐無食過你煮既麵, 多謝你!!

2005年4月23日(六)

今天全日都在做功課, 只餘下兩天時間, 星期一便要交, 死都要死掂佢...

今日全日都胃痛, 全天吃了數條香蕉, 仍是是胃痛, 唔知想點...

2005年4月22日(五)

越見不到你, 我便越擔心你. 我知道你最近不來見我, 是你心情不好; 但你不肯見我, 卻又常常和那位舊同事見面. 我不知道你究竟想什麼, 你說過你有感情煩惱, 而你這星期的態度突然變得這麼古怪, 我真的很難受. 上一次被拋棄前, 他也是這樣古古怪怪的; 而你最近的態度及那晚ICQ的說話, 竟然卻給我一種似曾相識的感覺...

所以我才會忍不住問你是不是有第三者了? 因為上星期五我們還開開心心的去食飯, 為什麼隔了週末, 你的態度突然一百八十度改變, 而且要避開我呢? 我知你心情不好, 不想影響到我; 但是我作為你女友, 你不開心時我不是應該在你身邊安慰你陪伴你的嗎? 但你總將我拒於千里外, 卻常常和其他人見面. 我知我不夠成熟, 反而你的朋友可以比我更能開解你幫助你.

但我真的很難受, 你的態度令我坐立不安, 食不好睡不穩, 因為我真的很擔心你, 所以我要求今晚能夠見面, 我只是希望大家可以好好地傾一下而己, 起碼知道你究竟在想什麼, 但每次和你傾, 你都越說越燥, 越講越激動, 到最後還叫我不要迫你, 你不想找藉口...

我只是想大家剖開心扉好好傾談, 即使你說我一無是處, 說若果真的有第三者的話, 我根本沒法和別人比較, 我不懂煮飯, 諗野又怪, 又說我神經質, 說別人有既野我都沒有... 你這樣說, 我都沒有不高興, 還鼓勵你繼續說, 但你說講出來又有用嗎? 你說不想嗌交, 這樣無補於事, 所以有好多野都收埋係心, 忍住忍住... 但我卻認為, 嗌下交不是更好嗎? 起碼大家知道對方個心諗咩... 但你話一嗌交一發脾氣, 就會無了...

但相反我也忍得很辛苦, 你什麼事都不對我說, 問你的話, 你老是說: 你自己諗下. 但你卻又時常怪我自己諗野成日諗埋一邊, 自己諗完就當係真. 但係你根本咩都唔同我講, 叫我自己去諗, 我諗完之後自己得出某些可能結論, 你又怪我愛亂諗野, 究竟我可以點做喎?

其實當然我是知道你係鍾意有咩都唔會講, 收埋自己的人, 我以為大家感情久了, 我便能慢慢的去進入你的心, 了解你多些, 所以好多時我都想坐低同你好好傾下. 拍拖初期同你傾, 每次你都唔高興越講越慶, 我以為是自己表現不好, 於是時常希望下次再傾時, 我的表現會好些, 不要再黑面, 不要再喊住和你傾, 那麼你便不會再越講越勞氣, 或者會願意平心靜氣的一齊傾下. 今晚我盡量表現得平靜, 語氣放柔, 不黑面唔准自己喊, 只是希望當大家傾下計咁去好好坐低談一談, 即使你到最後說就當你有第二個, 那一刻我很激動很痛心, 但我都要自己忍住不要喊不要顛... 但原來我是錯了, 我的想法是錯了, 你根本不想講不想讓我知, 但我卻很想你講很想知道你的事, 於是到最後都落得不歡而散的下場.

現在我發覺一直希望能努力去改善的事, 是我們的導火線. 一直以來我都一廂情願以為我只要花多些耐心, 慢慢的大家便能改變箇有的溝通方法, 我也不是要某一方徹底放變, 只是想在兩者之間取個平衡點罷了; 我覺得我們開心時一起開心, 但是某方難過時卻不能一起共同渡過, 只能同甘不能共苦, 我以為這樣子的關係不會長久, 所以當我知道你有不順利不偷快時, 我都希望能攜手陪你一起撐, 但原來我錯了...

我想我不會再騷擾你的了, 希望你快D搵到工, 並祝你以後能幸福快樂, 不要再碰上像我這樣子的煩人.

2005年4月21日(四)

昨晚收到你的mail, 今天總算好過了點, 沒有了透不過氣的感覺...

唔想寫了, 也沒什麼特別事發生.

2005年4月20日(三)

本來你不找我, 我是要自己不去找你的, 以免你覺得我煩...

但是這幾天, 我實在過得很辛苦, 每天都像透不過氣, 食不好睡不安沒精神...

因為你實在太古怪了, 古怪到... 你的態度及對白, 簡直就像兩年前我被拋棄前的情況一樣...

我要自己不去亂諗, 因為你最討厭我自己諗完就當係; 但是我真係無辦法控制自己的思緒, 你的態度就是在避開我似的...

我知道你辭職後, 心情一直都不太好, 若果你只是為前途問題而憂心, 這個我可以理解...

但是你還說有"少許"感情煩惱, 我真的是不明不白. 很想聽你剖析, 但我知你一定不會講, 我再問的話你只會覺得我煩...

我也不知道應怎樣做你才會滿意, 不過我覺得我們真的沒有溝通.

我知道男人有男人的煩惱, 不會隨便讓女友知道, 但是至少告訴我發生了什麼事, 不要讓我憂心又掛心可以嗎?

2005年4月19日(二)

這幾天, 我的心都很痛...

除了心理上的痛, 還有生理上的痛, 好像有些東西在壓著我, 捏著捏著, 很辛苦...

淚都哭乾了, 到底是我做錯了什麼嗎?

為什麼要這樣? 我很痛苦...

2005年4月18日(一)

我不了解你, 因為你從不肯比機會我讓我了解你. 你老早就自己築起了一道圍牆...

我一直很想突破那道圍牆去看看你, 你在圍牆內不寂寞的嗎? 我在圍牆外也會感到孤寂...

我也不是要求把整道牆都拆掉, 只是希望你能開一扇門, 當我知道你不開心, 我可以走進圍牆內去看看你, 抱抱你而已...

當你不需要我時, 我會從那扇門走出圍牆外, 不騷擾你...

只要你願意的話, 我會在圍牆的另一面陪著你走; 即使可能這一生也要隔著圍牆走, 我也願意一直陪你走, 走到盡頭...

或許你希望陪著你走的人, 根本就不是我; 但當你找到你渴望陪你一起走的人之前, 就讓我陪你走走吧.

當你真正找到你渴求和你一起走的人時, 我便會靜靜的自行離開...

2005年4月17日(日)

你知不知道我整天像個傻瓜般呆呆的在等你電話呢? 你約了朋友為何不告訴我?

人家的心情, 你究竟有否體會過?

我一直以為週六日是我們的拍拖日, 但這似乎只是我的一廂情願...

你不來見我也不要緊, 但至少也讓我知道你去了哪裡吧?

你知不知道我在擔心你的呢??