前幾日睇到佢既廣告, 見到個肥仔坐喺地毯上面跣吓跣吓咁, holy cow!! 真係十萬個低B...
如果要比錢買外國既遊戲版權, 英國既THE MILLION POUND DROP LIVE好睇好多啦吓話??











3月18日, 我同流沙包去咗會展睇卓韻芝棟篤笑, 我真係非常非常之後悔買咗飛黎睇.
我未試過睇棟篤笑係成晚都無笑過架囉, 內容勁膚淺勁無聊, 係度扮同性戀人士既動靜, 扮俞琤, 連自己阿婆都搬埋出黎, 我真係完全唔覺得有趣囉.
尤其是嘉賓環節, 我地果場既嘉賓係黃德斌, 我根本都唔睇香港既垃圾電視劇集, 對於黃生我真係一D興趣都無, 加上阿芝同佢既對話都唔知up乜, 講埋D咩野點樣搽cream, 又話咩自拍, 嘉賓要被阿芝摸胸… 做咩啫? 用黎攝時間呀!!?? 悶到我打住喊露咁去咗個toilet.
去完toilet返黎, 我同流沙包講不如走囉, 反而係流沙包話既然都買咗飛, 咪睇埋佢囉.
我唯有拎部iphone出黎自娛… 好辛苦捱到完場, 都未等到阿芝謝完幕, 我已經急急腳鬆人.
今晚真係嘥錢嘥時間, 仲要門票係$380咁貴, 早知攞D錢去睇多套舞台劇好過!!
作為消費者, 我又再嗱野… 今次係團購服務. 舖頭名叫Beauty Pro, 喺尖沙咀同銅鑼灣都有分店.
http://www.beautyprohk.com/website/index.html
2011年8月1日, 我喺Groupon以$988買咗Beauty Pro既8次”全身淋巴人手推拿”及8次”面部骨膠原保濕防敏護理”. 係2011年9月1日接受咗第一次服務.
對方規定所有療程需要半年內完成, 逾期作廢. 我發覺間美容院有取巧成分囉, 感覺受騙, 詳情如下:
1. 我買既服務有兩種, 分別係人手推拿同面部facial. 美容院規定每次致電預約, 每一次只能夠預約一個BOOKING; 即係要完成咗已預約既BOOKING後, 先可以再致電預約下一個BOOKING. 但問題係, 每一次當我完成一個BOOKING後, 已經即刻致電想再預約下一個BOOKING, 但每次都要隔起碼大半個月至1個月時間先可以BOOK到下一次; 咁試問我點可能喺半年內完成16次BOOKING?!!
2. 除了規定每完成一個BOOKING後先可以再另約下一次BOOKING之外; 每一次BOOKING都規定只能做兩parts服務, 即是每一次BOOKING可以做兩parts人手推拿; 或一part推拿再加一part面部facial; 但係每一次預約, 對方都話full咗, 只可以做到一part服務, 根本約唔到兩parts服務. 但係我有時去到美容院, 都唔覺有其他客人喺度, 而佢地既美院師都只係坐埋一邊, 無乜工作做緊.
到最後, 我既療程已經喺2012年2月29日到期, 而我只不過完成咗3次面部facial同埋6次人手推拿而已, 剩低既7次療程已經作廢囉!!!
講番佢地既服務, 真係好唔掂, 先講人手通淋巴, D阿姐手勢好唔得, 每先上到去, 都係唔同既阿姐幫我做, 六次裏面, 只有一個阿姐叫做手勢好D, 真係按到到位; 其他果D阿姐, 有D就一味死力按唔啱位, 一D就好似R痕咁一D力水都無. 再講果個所謂骨膠原facial, 原來唔包修眉又唔包針清, 要包埋既話要另加$100一次. 個facial只係搵部導入機求其喺面度碌吓, 真係嘥晒我D時間!!
呢間黑店, 大家真係要小心.
某個星期, 澳門有個同事過咗黎香港, 於是我地一齊去咗海港城間鴻星飲茶.
我地貪得意嗌咗D公仔形狀既創作點心, 睇佢張餐牌, 個形係幾得意架麻, 點知黎到之後, 個樣貌完全貨不對辦既…


比大家睇吓個餐牌對比吓:

另外, 某日係公司用隻膠杯斟熱水, 個膠杯竟然自動爆開咗喎…?!




隻膠杯係喺SOGO新買架, 只係用咗幾個月咋, 竟然咁鬼化學, 咁就爆開咗…
隻杯仲要係我喺pantry斟完水, 行到返自己個座, 將個杯擺低係枱面無耐, 佢就突然”咔”一聲自爆勒, D水即刻流到成枱面都係. 好彩我果陣無咩重要文件喺枱面啫, 同埋好彩呢杯只係清水, 唔係咩咖啡華田啫, 否則我成張枱D野同埋D文件唔駛要啦!!!
真係未試過用膠杯用到爆杯架… 飲水機D水可以有幾熱啫?? 隻杯我又從來無跌過無大力踫撞過, 咁鬼渣架隻杯…
順帶一提由於我呢隻只係膠杯唔係玻璃杯, 佢爆杯果吓”咔”一聲, 無打爛玻璃杯既聲音咁動聽, 亦都無碎片比我排靚靚, 無得細心欣賞, 寫唔到二百字抒情文, 我唔駛五分鐘就清理咗現場. 事後只係唔忿氣隻新杯咁快就爛咗, 寫咗呢二百字勞騷文.
有時諗唔到去邊 都會間中去吓大家樂, 但係大家樂真係越做越衰, 越做越賤, 越做越cheap.
幾個月前既某日 下午茶時段我叫咗個叉鴨瀨粉, 連飲品都要成$24定$25.
先講D叉燒, 真係好佩服佢地既切法同埋擺法囉, 佢每一舊叉燒都切得好長好濶, 從上面睇你會以為舊叉燒好大舊; 點知一夾起, 原來係勁幼架囉!!! 真係離晒譜呀!!!
再睇埋碗裏面既燒鴨真係把幾火, 四舊有三舊都係皮連勁大舊肥膏痴住D骨, 根本都無肉食既, 有無搞錯呀?!!
我真係按捺不住, 成碗野拎番去counter投訴, 佢地話換過碗比我; 挑! 換完返黎果碗咪又係咁樣, 得一舊係有肉架咋, 其他果三舊都係皮同埋肥膏黎!!!


我決定唔會再黎大家樂食飯! 真係太刻薄, 廿幾蚊個下午茶又唔係平, 份量勁少, 食完唔飽又谷氣, 我食過第二間無咁嬲!!
我想講, 一個產品/牌子要成功, 除咗佢既產品質素, 價格定位, 市場推廣, 廣告攻勢之外, 班sell屎pro唔pro都係好緊要架囉!!!
我喺海港城返工, Harbour City Office Club間唔中都會send D e-mail黎, 話而家海港城某個牌子做緊promotion, 可以憑e-mail去拎D samples.
我呢D貪小便宜既OL, 當然會去拎呢D samples黎試吓啦~
但我想講, 我去得拎你D samples黎用, 係表示我願意花時間去了解你既產品, 而家係我比機會你, 而唔係我黎向你行乞呀!!
有D牌子既sell屎真係好好既, 好似之前去拎Clarins既samples咁, 個sales會解釋清楚個產品點樣用, 仲示範埋個手勢添.
有D牌子既sell屎, 就算無解釋隻產品點用, 都會至少講一句 “我地今次送番個XX修護晚霜比你試吓”.
最最唔掂既係雪花秀既sell屎, 不知所謂, 我都已經唔係食飯/放工果D勁多人既時間去, 果次我去到出示張e-mail話我想黎拎samples, 佢個sell屎就咁拎咗我張e-mail, 連“請等一等”都無一句; 然後轉個頭拎個sample埋黎, 就咁離遠”對”過黎比我, 完全無介紹無表情乜都無.
喂, 我而家唔係黎問你施捨呀!!! 就算我用完你雪花秀個sample, 覺得你隻產品係幾咁掂幾咁好用都好, 我都唔會去幫襯你囉!!!!
我唔該D公司, 真係想你旗吓產品大賣, 至少都訓練一下你自己D sell屎先啦.
唉, 我都係開咗個新既YAHOO BLOG... 網址如下:
http://blog.yahoo.com/chloechiu
因為我都係唔捨得YAHOO既BLOG友, 搬咗過去BLOGSPOT之後, 好似無晒朋友咁.
再者, 如果我去大家既BLOG探你地, 我都要開個account先可以留言比你地架...
就係咁, 我"屈服", 開咗個新既YAHOO BLOG.
但我始終覺得YAHOO BLOG遲早會執, 所以BLOGSPOT我會繼續用, 就即管試吓兩邊同步UPDATE啦~~
咁多位BLOG友, 大家搬BLOG搬成點呀?
我決定搬返去呢度啦~
http://chloechingching.blogspot.com
其實我未喺YAHOO BLOG寫BLOG之前, 我已經喺BLOGSPOT寫開BLOG架啦. 不過後尾見YAHOO BLOG好似吸引D, 香港人流又高D會多人睇D, 所以2006年果陣搬咗去YAHOO BLOG.
估唔到黎到2011年, 我又搬返黎呢度啦~
相信用開YAHOO BLOG既朋友都知道, 佢地一向都唔穩定, 有時寫完一大篇野, 可以夠膽死POST完唔見晒; 多垃圾留言; 最近仲要無啦啦話UPGRADE, 雖則話係UPGRADE, 但實際上就係明升暗降, 好多升級咗既BLOG友都話FUNCTION少咗好多, 非常唔好用, 留言又無晒表情符號etc.
有傳聞話YAHOO根本就想摺埋個YAHOO BLOG, 不過因為YAHOO BLOG有唔少用戶, 驚到時會引發民憤, 於是就搞埋好多小動作, 包括間唔中就SYSTEM唔穩定, 想你地班人自己走.
到而家佢話升級, 話就話咩可以同世界其他地方既YAHOO BLOG聯繫, 實際上就係香港YAHOO要放棄HK BLOG呢個平台, 唔再理囉~
所以就算我唔係因"13歳用戶"呢個問題而升級唔到, 我都會搬架啦. 大佬你而家就話升級啫, 點知你遲多兩年會唔會連成個BLOG都摺鬼埋呀?? 大家都知YAHOO咁多年黎摺咗唔少野架啦, 包括YAHOO ALBUM, YAHOO VIDEO etc. 我相信佢摺埋YAHOO BLOG都係遲早既事囉!!
就係咁, 我最後都係決定搬返去BLOGSPOT啦, 希望大家繼續捧場~~ BLOGSPOT我SET咗任何人都可以留言架, 即係大家唔使專登去開ACCOUNT都可以隨便留言, 你地可以係"發表留言的身份"求其揀"NAME/URL"之類, 直接打入你地自己想顯示既名, 就可以留言架啦~
另外如果你地都搬咗BLOG, 話聲我知, 比埋你地BLOG條LINK我呀~~ 我得閒會黎探你地架~~
我本身係零食物語會員, 前排睇報紙見到話出示會員卡就可以獲精美禮品一份.
於是某日經過零食物語就入去拎禮品啦, 我諗住會係D食得既野, 點知…
個店員拎咗隻CD出黎, 吓? 咩黎架? 劉子千? 乜水呀??
就係咁, 我屋企無啦啦多咗一件垃圾…
呢隻咁既碟, 成隻"番梘"咁, 同埋劉子千係邊位呀? 太子仔呀? 否則間公司點解無啦啦倒D咁既錢入鹹水海呀??
好彩我果日只係順路經過去拎, 如果係專登去既話, 真係火都黎.
我同流沙包兩個人既收入唔算好多, 叫做比上不足, 比下有餘. 但如果同流沙包既細佬妹比較, 我地兩個人要算係低收入人士.
流沙包屋企人咁本事, 本來係一件值得開心既事, 起碼唔會發生果D屋企人唔生性 成日要做阿哥既擔心/接濟之類既事發生.
不過從另一面睇, 亦都成為我既壓力.
好似某日咁, 流沙包妹同佢阿媽鬧交, 佢細妹鬧鬧吓突然間燒埋我地果疊, 佢問我奶奶"阿哥(指流沙包)過年比幾多錢你吖! 你講吖!!"
我知, 你比咗幾千銀奶奶過年; 我同流沙包只係比咗少少錢, 唔及你咁多...
但問題係, 流沙包妹同妹夫既收入, 係我同流沙包既2~3倍. 如果我地好似你地咁搵十萬八萬一個月, 你估我地唔想比多D錢屋企人嗎?
最慘既係, 流沙包屋企人成日有意無意咁話流沙包孤寒, 比家用係最少果個etc. 雖然我知有D說話佢地係講笑咁講, 但我聽落真係唔係太舒服...
流沙包雖然係長子, 但其實佢同佢細佬妹既年紀只係差一, 兩年, 事業上既發展唔會比佢細佬妹更優越; 加上流沙包只係一個教書佬, 月薪有幾多 佢地細佬妹都心中有數; 而佢細佬同佢妹夫做sales, 仲係大公司既高層, 我同流沙包兩個人夾埋搵既錢都唔及佢地一個人既收入. 佢妹夫加人工加五千蚊果陣; 我喺舊公司只係加得五舊水人工... 我真係唔明點解佢屋企人成日會搵我地黎同佢地比, 會成日話流沙包比得果少少家用、話流沙包唔肯買張三千幾蚊既床仔比外甥係孤寒、話流沙包喺X'mas party又買生蠔又買刺身係轉性... 就算呢D說話只係講笑咁講, 我聽到真係好唔開心. 我真係想講"我同流沙包唔及你地搵咁多錢, 我地有時真係無能力付出咁多"
有時大家睇我個blog或者FB, 好似見我地成日食好野, 去旅行咁. 但我地返工, 讀書, 進修咁辛苦, 有時只係想間中食好少少, 去旅行relax吓啫... 唔通我要死慳死抵儲錢交學費 喺屋企捱公仔麵果D相都擺埋上網比大家睇咩... 講真吖, 佢細妹/佢細佬女友揹緊既手袋, 以我成個月既人工可能都未必買到. 而我亦都未做到好似佢屋企人咁可以閒閒地幾萬蚊買個手袋/買隻錶...
我曾經係韓國旅行時買咗D護膚品返黎, 其中一支晚霜, 我明明新開黎用無幾耐咋麻, 有咩理由咁快就用晒...?
於是我打開裏面睇吓, 咦, 個樽好乾淨喎, 我用到一D殘餘物都無...?:
咪住先, 個頂部有個漏斗形既物體既?:
睇清楚, 我頂, 原來成支cream咁大個樽, 但D cream得個漏斗咁少既容量??!!!:
我插隻手指入去篤咗兩吓, 個"漏斗形容器"比我篤落咗少少, 有無搞錯呀? 咁都得!? 咁大個樽但D cream只係得少少, 比個死人包裝呃咗添!!! 等我仲以為咁大支有排用!!!!:
真係火都黎呀, 我記得支野維番港紙好似最少兩舊水架喎!!! 真係離晒譜!!! 如果大家去韓國有緣見到呢支野, 千祈唔好買呀! 又吾係好用喎!!!
未去日本之前, 我都有係香港收睇即時日本電視節目, 靠既係Keyhole. 但有睇開Keyhole既人, 都知佢既質素有幾"高", 佢個畫面好鬼細, 畫面D字根本好難睇得到. 想拉大個畫面? 唔係唔得, 一拉大咪成個畫面矇晒, 起晒格咁囉...
自從係日本返黎之後, 我一直想搵方法收睇日本電視, 早前買咗個叫做ZiZiplayer既USB物體, 只要插入電腦, 就可以收睇到幾個日本/韓國電視台.
初初都幾好既, 但係最近, 成日都睇唔到囉... 開個畫面出黎, 睇唔夠兩分鐘, 就會無啦啦disconnect, 之後你不斷咁嘗試再connect, 佢就淨係出"channel searching"呢個字, 一係就等成粒鐘都connect唔到, 一係就不斷彈出"please retry again", "fail to connect selected channel", 總之就根本無辦法再睇到, 真係激死我啦!!!!!!
大嗱嗱成二千蚊買舊咁既垃圾, 根本都睇唔到既!!! 而家我都係睇番Keyhole既起格畫面, 好嬲呀!!!
自從油牆假期開始玩煮飯同整餅之後, 我每日都會上網搵不同既食譜. 係搵既過程當中, 發覺天下文章真係一大抄.
好多時係唔同既網站, 人地既blog, 討論區等等, 發覺好多食譜都係一模一樣架喎, 有時連錯字, 別字等等都照copy可也.
我覺得你參考得人地既食譜去整, 就應該尊重番人, 應該將你食譜既出處post埋出黎囉. 就算你所抄既食譜來源都未必係原創食譜, 可能佢都只不過係照抄其他人, 但我覺得你都應該post埋人地條link出黎囉...
就好似你讀書做project果陣, 如果引用咗人地一句半句說話, 你都要quote番係參考咗邊度啦吓咶? 你而家成個食譜copy人地當做自己, 都唔講番quote自邊度, 港人就係咁唔尊重知識產權呢樣野...?
(我唔係比人抄食譜, 何況我D食譜都只係參考人地, 我只係覺得D人好唔應該啫)
我而家成個人hea晒, 唔想再讀書啦~ 但係就到流沙包讀勒... (流沙包話過我地唔可以兩個人同時讀書, 否則間屋應該無人理, 家務完全無人做)
即係呢... 一個人不斷進修, 咁有上進心, 我係好欣賞, 之不過...
流沙包已經有兩個bachelor's degrees(CityU, CU), 一個master's degree(CU), 而家仲要讀多一個master(CU), 家陣每個星期都要返2~3日學, 唉...
而我呢, 有一個higher diploma(Applied Japanese Studies@CityU), 一個bachelor's degree(BBA@CityU), 一個post grad dip(PDPA@CU)(日本返黎後好hea, 而家我連讀多一年拎埋個master都唔想讀)...
我計過, 如果我地兩個人D學費全部加埋晒, 應該可以買多層樓比到首期囉...
講真, 學術上既進修我真係唔想再讀啦; 廚藝上既"進修"都仲有D興趣既, 哈哈~~
我轉型做C9之後, 對於價錢呢D野就更加敏感.
我通常買野都係去PK, 因為成日試過被收多佐錢, 所以我而家買完野一定會即時check單. 我發覺超市有時真係好老土, 我試過"被呃"既例子有:
1. (試過N次) 好多時佢個label標明某個價錢, 但比錢之後發覺佢收貴佐囉... 我知可能係佢D價錢牌未update得切, 或者電腦未改得切. 但如果唔check單, 咪白白比貴佐?
2. (又唔只試過一次) 有時同一樣貨會分別放係兩個不同位置(唔係附近, 唔係同一個貨架的), 明明件貨一樣, 但價錢係會唔同架囉... 比錢後check單發覺佢收佐貴果個價錢, 我同個收銀講, 有時D職員去番貨架check價錢check唔到平果個, 反而問番我件貨係邊度拎...
3. (最近中佐兩次招, 好激氣) 有兩件唔同牌子既貨, 明明右面件貨下面個價錢牌係$10, 左面件貨下面個價錢牌係$8, 於是我就拎左面$8果件貨啦, 點知比錢果陣佢收佐我$10, 於是我比完錢之後入番超市, check清楚個價錢牌啦. 我先發覺佢件貨同個價錢牌對調佐囉... 真係好鬼老土架, 原來左面件貨下面$8個價錢牌跟本就唔係呢個牌子, 真正$10果個價錢牌放佐係隔離囉(有次仲離譜, 件貨既真正價錢牌係放佐係隔離再隔離再隔離件貨果度囉)!!! 或者你會問係咪其他客無手尾擺亂佐呀? 我可以答你絕對唔係囉, 因為貨架埋面D貨都係照咁樣擺法架~ 我覺得真係超級老土囉, 趁人睇少兩眼就呃人買佐件貴貨!!! 下次真係要價錢牌上逐隻字睇清楚, 再對比埋手上件貨既牌子, 重量, 名稱先好比錢呀!!!
其他老土野包括:
1. 個價錢牌成日雞乸咁大隻字寫住破底價, 但個價錢根本無平過囉...
2. 所謂既特價, 只係平時"正價"時特登標高個價錢, 所謂既"特價"只不過係回復番佢正常既價錢囉...
3. 有D特價野, 價錢都唔算平, 但"特價"果陣, 只係平佐一毫子咁大把囉...
最近最激氣既野:
就係個焗爐囉, PK買要$402, 點知實惠賣緊$299咋!!!!! 豈有此理, 下次我會格清楚價先買, 總之而家超市D野越黎越貴, 有時反而7仔萬寧果D仲會平D囉...
呢幾日, 脾氣勁差, 心情勁down.
自從星期一發生馬尼拉慘劇之後, 心情一直沒有舒展過.
我知自己M到前會勁忟憎, 但呢幾日成個人好似癲佐咁, 獨自一人在家都會對住D死物咆哮.
再加上我真係好討厭果隻爛鬼流沙包.
我已經講過N次, 唔鍾意佢同D學生咁close!!!!
人地學生今日做過咩, 同邊個係邊度食飯, 幾時去邊度, 關你乜野事呀? 成日來來回回send埋晒D咁既SMS, 我真係眼火爆呀!!!! 我覺得呢D咁既SMS係情侶之間先至會做架咋??!! 果隻流沙包話呢D係閒話家常喎!!! 就算佢有時同我落街食飯或者去超市買野, 條友都會拎部電話出黎唔知SMS定Facebook緊, 總之一有時間就對住部電話係咁篤篤篤, sorry囉, 我阻倒你囉, 阻住你同D學生"閒話家常"囉!!!
我唔知呢一代既教師係點樣, 自己既手提電話, Facebook, MSN都比埋D學生, 條友仔已經差唔多每晚都有野做, 每晚成十點, 十一點先返黎屋企. 返到黎屋企第一時間係開電腦囉, 然後不停咁同人MSN, Facebook. 我覺得自己似同屋主多D囉. 咁又係, 我都已經係一件C9扒啦, 比我都寧願上網對住D十零歳既妹妹仔啦!
有時佢D學生打電話黎, 我係側邊都會聽到佢地講咩, 我聽到D學生會話"好掛住你呀!", 我嬲係咪好正常呀?? 有時又會見到佢D唔知send比邊個既SMS寫住話"很想念你!", 我發脾氣係我太小器嗎? 得! 第時我同男性朋友一日幾廿個SMS噓寒問暖, 係咁話好掛住你, 日日send埋D無聊SMS講大家今日要去邊, 要做D咩, 幾點會返屋企之類果陣, 你都唔好過問我!!
講真, 如果以前唔係發生過唔止一次既不愉快事件, 我都唔會將呢D野睇得咁重. 如果之前唔係發生過D唔開心既野, 以上所述, 我可能都會覺得呢隻流沙包係一個比較關心學生既阿sir囉. 但講真, 自從不愉快事件發生後, 我已經唔係100%信任佢. 每次見佢收/send SMS or MSN, 我心裏就忍唔住問"邊個黎架? 你同佢咩關係呀? 學生? 真係學生?", 我真係好辛苦呀, 我無辦法擺脫到我既心理陰影, 你話我成日亂諗野?!! 如果你唔係做過D咁既野, 我而家駛成日亂諗野??!!!!! 呢D完全係你一手造成架!!! 你之前應承過我既野有照做嗎??!! 完全係得個講字!!! 我睇吓幾時自己頂唔順谷爆既時候, 唯一既解脫就係同你離婚!!! 我唔想好似潑婦罵街咁, 儲埋隔幾個月就頂唔順發作, 又拎番呢D野出黎嘈呀!!! 又或者等我死L佐, 就無人再阻住你啦!!! 咁樣你滿意啦!!
而家暑假, 做教師既唔係應該都有D假放既咩? 我知佢忙, 好多兼職, 又好多野要練習. 但呢個七, 八月, 佢每個月都有時間同人遊船河3, 4次, 但就無一日空閒可以全日陪我囉. 呢個暑假裏面, 八月開始我已經油牆中啦, 但我地完全無一日係一齊出過街玩囉. 佢有時週末晚返倒黎同我食飯, 我已經要覺得好恩賜架啦, 妄想話佢可以陪我去行街睇戲食飯啦!!!