2010年1月16日(六) -- 上野文化藝術科學之旅

今日我一口氣去佐美術館, 博物館同埋資料館, 三個地方都係上野.

我第一站先去佐國立西洋美術館, 本來諗住用ぐるっとパス入去, 但原來今日可以免費入場.

係美術館裏面有一幅作品好吸引我, 所以我專登買佐張postcard:

下一站係美術館後面既國立科學博物館.

因為係虎年, 所以有個同老虎有關既臨時展覽:

最後一站係下町風俗資料館.

2009年1月15日(五) -- 同事飯局

1月15日, 見幾個月無約過同事去食飯, 呢期又悶悶地, 於是約佐15號去食飯啦.

點知咁啱在日BLOG友們又係1月15號有飯局, 嗚, join唔到添... 希望新年飯可以出席到啦~

咁啱我1月15日要出job, 仲要去好遠既國立, JR落車後仲要搭的士先去到個客度. 今日仲要搞埋三十幾人既年末調整, 搞到鬼咁晏先可以走, 返到公司都已經六點半, 點知返到公司, 有同事無啦啦又約我今晚食飯, oh, 點解呀? 點解平時悶悶地無野做無約人果陣又唔見有人約我既...?

今晚同佐兩個同事去食Hawaii菜, 其實嚴格黎講其中一個係舊同事先啱. 呢個舊同事(Mr Y)之前係香港office做佐兩年, 所以我同佢係香港都共事過, 後尾佢要調番日本, 但返佐日本無耐佢就resign唔做了. 而另一個同事(Mr N)就係而家負責教我做野, 係超級好人, 本身Mr Y同Mr N私底下係好朋友, 所以今次我地就三條友去食飯勒.

由於Mr Y佢係美國同香港生活過, 唔算係太典型既日本人, 而Mr N又係超級nice, 所以今晚餐飯講佐好多野, 講佐好多係公司絕對唔講得既話題, 哈哈~~~ 好開心呀!!!

話就話係Hawaii菜, 但好似無咩特別喎... 舊年公司旅行正正去佐Hawaii, Mr N話佢係夏威夷果陣既飲品都唔會搞到咁款, 同埋佢地竟然對把遮仔好有興趣(呢D遮我係香港酒樓既啫喱上面都見唔少啦).

由於其他兩位係男士, 所以一上菜, 我就做主動分菜果個啦, 其間Mr Y佢話"係香港呢D係男士做架呵?", Mr N聽到後覺得好驚奇, 當我分完Mr Y同Mr N佢地果碟, Mr N竟然拎佐個分菜鉗主動夾番比我, 佢話要學吓香港既男士喎, 哈哈, 超搞笑.

講到尾, 香港既女性真係太幸福啦, 如果被喚作港女既香港女仔真係要黎日本工作, 我估真係未必會適應到日本既重男輕女(兜個圈話自己唔係港女?), 你有無辦法忍受到係office做倒垃圾果個吖?  

2010年1月10日(日) -- 體驗日本茶道

之前咪話過我有個客係開和服店, 之前比我係店內試穿和服既.

個客佢學開茶道, 佢之前問我有無興趣去試吓, 我當然話有啦~ (但其實我興趣不是太大... 當係一種體驗啦)

個客話因為今次係新年既關係, 所以茶道老師準備埋lunch, 食lunch連埋茶道, 大約要四小時左右, 而費用係5,000円.

估唔到學茶道要準備唔少野, 我見其他人又毛巾, 又扇, 又"白紙"(我唔知點形容果疊紙, 作用係用黎乘住D和菓子黎食, 同埋食完飯之後用黎抹番乾淨D碗碟), 又膠袋...

入去和室之時, 首先要不停咁向住唔同既擺設拜拜幾次, 而拜拜前要放把扇係自己前面, 我唔知呢個"儀式"代表D咩, 好在我一向無宗教信仰, 如果本身係基督徒的話, 我估佢地未必會肯咁做掛...?

入到和室後大家正座咁坐定定, 我坐佐一陣已經頂唔順啦, 好在老師唔介意, 比我伸直腳坐.

原來大家準備毛巾係當做餐巾咁, 以免食飯時整污糟套和服.

唔止咁少野架, 不過掛住食, 無影相:

而食完飯之後, 大家都要用頭先我講既白紙抹番乾淨碗碟, 而且要包好D骨, 入落自己準備既膠袋, 一陣自己拎去掉.

淨係餐飯都食佐個幾鐘, 但味道真係唔錯.

食完飯休息一陣, 就開始茶道啦. 

 

成個過程有好多儀式, 步驟, 禮儀等等, 我係呢度就唔講解咁多啦.

D茶都幾濃架:

飲茶時食既和菓子, 唔可以直接係碟拎起就放入口架, 先要由碟拎起, 放上我頭先講既白紙, 然後先可以享用.

飲完茶仲有遊戲時間, 我估計佢地本來應該係玩百人一首果類遊戲, 但因為我唔係日本人唔識玩, 所以老師就準備佐另一個遊戲, 就係估字啦.

呢個遊戲係估象形文字, 每張卡上面都寫佐一個象形文字, 而老師一讀個漢字讀音出黎, 大家就要即刻搵番呢個字既象形文字卡出黎.

結果當然係我以大比數勝出啦, 同中國人鬥認象形文字?

有好多淺而易見既答案我都無出手架啦, 費事嬴咁多啦, 哈哈~

而老師亦準備佐禮物, 唔同排名既人有唔同既禮物:

我講既白紙就係左手面果D啦:
 

2010年1月4日(一) -- 勁down的一天...

今日係公司假期既最後一日, 亦係流沙包返香港既一天.

我今日唔止係年初四既樣, 簡直都唔知用乜黎形容勒...

比大家睇吓咩叫七國咁亂(我住既地方就係得咁大咋, 超細):

無法啦, 呢度已經細, 一個人住我都覺得唔夠住, 好多野都唔知放邊好, 於是連雪櫃, 床之類都用埋黎擺野. 流沙包黎住佐兩個禮拜, 間屋好似打完仗咁...

另外post埋係銀山溫泉同白川鄉買既土產(都係用黎送比同事):

呢盒用黎自己食, 一打開, 估唔到裏面幾靚喎:

但味道當然係非常普通啦, 只係一般既蒸蛋糕.

流沙包一走, 我既情緒病又發作啦, 好可憐咁喊佐一輪, 我好想返香港呀(無用鬼)~~~

瘋狂購物, 四日內買佐23件衫一對boots

前幾日咪話心情唔好, 消失幾日既, 但原來有D野真係可以令女性心情好番少少(好番一晚咁多啦), 就係shopping啦~~

前排係原宿Laforet既grand bazar, 我有三日去佐掃貨, 以下係小女子既戰績.

星期五既收穫~~
Brownie bee -- 全場2折, 左面原價7,980円現1,596円, 右面原價6,930円現1,386円:

原價10,290円現2,058円:

Sweet Charity -- 全場3,000円兩件, 下面四件衫連稅只係6,300円:

星期六既收穫~~
Auntie Rosa -- 全場4,000円兩件, 下面兩件衫連稅只係4,200円:

Nice Claup -- time sales時段, 第一件2,000円, 第二件起全部500円, 下面四件衫連稅只係3,500円(當時全場D女好似癲佐咁, 係咁迫係咁推, 通地都係衣架同跌佐落地既衫, 於是D女就喺地下堆衫係咁摷, 好恐怖呀, 仲迫過年三十晚既維園年宵呀!):

其實呢兩件唔係太鍾意, 但如果計500円一件, 是但買佐先啦~. 當時有個台灣肥妹, 買佐三十幾件衫, 同款同色既都買5, 6件, 買佐成萬八円咁濟:

OLIVEdesOLIVE -- 唔記得幾多折, 下面三件衫連稅只係6,195円:

Ehyphen World Gallery -- 左面既500円, 右面既原價4,494円現1,348円:

雖然我唔係太鍾意對boots個款, 但只係1,000円咋, 梗係買埋先算啦:

星期一既收穫~~
星期一係最後一日, 所以係最平既一日(但當然剩低既衫款已經無咁多無咁靚)

Auntie Rosa -- 星期六去都仲係4,000円兩件, 今日去已經係3,800円兩件, 仲有D係1,000円一件添. 呢張相係3,800円(未連稅)兩件:

呢張相係1,000円(未連稅)一件:

VANILLA -- 之前果幾日個價都係企硬, 就算特價都要成五千幾円. 今日我去到時剛剛係time sales時段, 全場1,050円一件, 我即刻搵番幾日前唔捨得買果件衫啦, 但可惜得番黑色, 照殺. 原價7,245円, 特價1,050円:

就係咁, 四日內我買佐23件衫, 1對boots, total用佐35,223円, 即係平均一件只係1,500円咋~~

另外1月17日我大約五點去到表參道, 見到封晒路人頭湧湧咁, 原來有個青森縣既小巡遊睇, 於是shopping前係路旁睇佐陣.