泰國曼谷芭堤雅5天之旅 -- 後記

今次去泰國我地係跟康泰去, 如果唔計細細個同屋企人跟旅行團返大陸旅行, 計搭飛機出國既話, 呢次可以說係我第一次跟旅行團去旅行. (我每次去日本一定係自遊行, 之前去台灣, 關島都係自遊行)

好多人問我今次泰國之旅好唔好玩, 我既答案都係「OK啦, 普普通通啦~」, 有時我覺得自己既要求幾高, 無論係工作時既要求, 對人既要求, 甚至對玩既要求都好高, 稍有少少不稱心不如意唔啱心水我就好容易會唔高興黑面唔滿意. 所以我覺得同我去旅行既人某程度上都會幾掃興. 就好似今次去泰國咁, 我都有好多唔滿意既地方, 少如架旅遊巴個咪有少少問題, 我地又被安排坐到最後排, 根本聽唔清楚個導遊講咩, 至到個團多細路我唔多鍾意, 大至間酒店核核突突等, 都令到我覺得今次既泰國之旅唔太好玩.

同埋經過呢次之後, 我都係唔再係旺季去旅行勒, 我地今次呢個團既團費平時二千蚊有找, 但聖誕去就要成三千蚊, 住埋D cheap爆酒店. 如果三千蚊團費係平時去泰國既話, 我相信一定會住好食好好多囉. 同埋長假期去一定係多細路多一家大細去, 我真係唔多鍾意細路喎, 我只係會覺得佢地好煩好嘈. 同埋呢次聖誕去泰國, 係勁塞車囉, 真係塞到阿媽都唔認得, 耽誤佐好多行程.

本來我地諗住農曆年去韓國旅行, 但旺季去團費又貴又唔抵, 都係無謂去啦... 同埋今年開始要派利是, 無啦啦多筆開支, 好窮呀, 嗚... 所以我地下次既旅行地點應該係歐洲honeymoon(無錯我地結婚成年都仲未去honeymoon), 去歐洲唔知跟邊間旅行社好呢? 係咪跟金怡, 翠明果D好呢? 我地打算六月左右去, 我要豪華團食好住好架~

同埋今次去歐洲我地唔想幫人買野啦, 我地想舒舒服服咁去honeymoon呀, 唔想仲拎埋D咩咩袋既相呀資料呀等等過去, 去到又要花時間幫人搵幫人摷幫人買. 我地想無壓力咁過去輕輕鬆鬆渡蜜月呀~ 其實我唔係咁鍾意去旅行果陣搭單幫人買野, 所以調番轉人地去旅行果陣我都唔會叫人地搭單幫我買D咩.

(流沙包我地今次去honeymoon我唔想搭單幫人買袋呀!)

2007年12月29日(六) -- 泰國曼谷芭堤雅之旅 Day 5

今日係last day係泰國, 朝早我地係酒店食早餐, 跟住就去佐昆你買野既珠寶城, 係珠寶城無無聊聊逗留佐成粒鐘咁濟, 呆坐到訓著. 然後去佐土產店, 我地買佐少少魷魚片椰子糕等等做手信, 跟住就去食飯.

我地食飯既地點叫龍城酒家, 入佐健力士大全, 係全世界最大既restaurant喎, D waiters要踩住roller去送菜. 餐飯無咩特別, 最好食係個咖喱蟹.

食完飯兩點幾三點我地就出發去機場啦, 我地搭六點幾機返香港, 晨咁早就要去機場勒... 去到機場又掃佐堆Boots先走.

上機前檢查, 見到對香港情侶比人搜到成喼行李都係Boots咁濟, 唔比帶走, 個女既係度

2007年12月28日(五) -- 泰國曼谷芭堤雅之旅 Day 4

第四日行程終於出海, 首先朝早我地出發去珊瑚島, 我地玩佐三樣水上活動, 分別係香蕉船(每人300銖), 水上電單車(二人同車700銖)同埋降落傘(三個圈700銖). 水上電單車幾好玩, 好快, 好「櫈」, 好刺激. 反而降落傘就無咩特別, 唔驚唔刺激, 上到半空係飄下飄下咁.

六舊腹肌既流沙包呀~~:

午餐我地都係珊瑚島食, 好差, 米粉, 菜, 無咩特別. 好在有一籃蝦蟹雞翼粟米餐, 有番少少安慰.

跟住我地就返酒店梳洗, 然後就出去食tea啦~ 個tea食咩? 我地去佐食魚翅, 蟹焗粉絲, 同埋椰青燕窩呀, 好味道~ 成個set價值800銖.

之後我地就去佐做SPA, 本來個團係包1小時香薰SPA按摩, 但當然一個鐘做唔到D咩啦, 加錢的話就可以做晒成個療程, 結果我地都加佐1500 Bahts. 呢次係我第一次做SPA, 但係都唔舒服既, 唔知係咪因為我係香港慣佐做全身淋巴按摩呢? 做SPA既過程係先沖涼, 然後就濕蒸, 乾蒸同浸池. 跟住就香薰按摩同去死皮, 之後再沖身, 然後查D牛奶漿上身, 跟住再浸個花瓣浴就做完啦... 都唔relax唔舒服既...

最後我地去食晚飯同睇人妖(自費), 我覺得個人妖show幾精彩喎, 有D人妖真係好鬼靚, 身材又好對腳又長又靚, 真係靚過晒好多女人呀(慚愧...)

好難相信呢個係人妖呀, 咁鬼靚...:

2007年12月27日(四) -- 泰國曼谷芭堤雅之旅 Day 3

今日係我地既結婚(註冊)一週年紀念. 朝早我地又去佐昆你買野既蜂蜜園, 當然我地咩都無買啦~ 跟住我地就出發去芭堤雅, 係途中奇奇怪怪咁食佐餐中餐, 又唔係特別好食.

 

之後我地去佐暹邏大象園騎大象, 餵鱷魚同坐泰式馬車. 原來騎大象都幾辛苦, 因為好「櫈」, 腰骨都痛埋. 不過我地騎果隻大象幾「熱血」, 見象過象, 都幾刺激.

餵鱷魚方面, D鱷魚已經被人餵到無晒本能咁, 成舊雞放係佢頭頂佢都未必會擘大口食.

泰式馬車無咩特別, 速度亦唔係好快. 不過我地坐果架車有隻好得意既狗狗呀~

然後我地去佐一個叫做大富之家(Sukhavadee House)既地方, 係個有錢人起既. 其中一棟building因為有舍利子, 所以唔可以著住短裙短褲吊帶入去, 所以我地要披住件圍裙同披番件衫先可以入去.

跟住我地就返酒店先, 同埋係酒店食埋飯. 但餐飯好唔掂, 一餐好cheap既中菜, 玉子豆腐, 蛋炒蛋, 菜炒菜, 菜炒蛋咁.

食完飯我地又再出發. 本來導遊話呢個團多細路, 成人節目佢就唔介紹啦(依!!! 我對成人節目有興趣多D喎!!). 於是導遊就推介D本來行程無, 但就老少咸宜既節目(當然要自費啦), 就係去Believe It Or Not, 同埋4D電影(又4D電影...), 鬼屋同玻璃迷宮. 最後既結果係... 得我同流沙包及另外一家4口去玩, 其他人全部都唔去(唔去既人就自己行商場). 頂!! 去埋呢D老少咸宜既地方係諗住遷就你地班細路, 點知又無人去. 不如去成人節目好過啦~

之後就返酒店啦... (妖! 真係有D無奈)

想講一講芭堤雅間酒店, 都係唔掂, 一入房就發覺勁多蚊, 兩條傻瓜就係度拍蚊. 個浴缸又畸型, 沖沖下涼D水會沿住個浴缸邊流落地, 沖個涼會搞到個toilet地下濕晒. 我地以為我地間房有問題, 仲諗住駛唔駛要求換房, 點知原來其他團友都遇到同樣問題... 同埋酒店竟然無風筒喎...

2007年12月26日(三) -- 泰國曼谷芭堤雅之旅 Day 2

第二日行程, 我地朝早去佐暢遊湄南河, 跟住落船去睇黎明塔, 逗留佐十分鐘就坐返船回程, 回程途中有餵魚環節, 面包當然要出錢買, 我地無買到, 睇人地餵咪得囉~

跟住我地去佐蛇園, 唔駛問又係昆你買野既地方啦, 我地當然咩都無買, 但餐餐去到呢D地方, 佢都講到佢地既藥好似神仙水咁, 乜都醫到, 係咁勁既話呢個世界唔駛醫生啦.

之後我地就去佐號稱全亞洲最大既Central World, 我地係裏面既food court食飯, 每人有200 Bahts budget, 我地呢餐飯兩個人共用佐大約HK$100.

然後導遊就話有興趣既人可以跟佢去四面佛, 無興趣去既人就係商場shopping, 因為四面佛距離商場好近, 行十分鐘左右就到. 我地一場黎到泰國, 梗係要到四面佛睇下啦, 不過我地無拜, 流沙包係基督徒當然唔會拜啦, 我亦都無咩興趣拜, 只係參觀下就走, 之後我地就返番Central World行商場, 唔駛問梗係有買Wacoal同Boots啦~~  

跟住我地就去佐全曼谷最高既地方食飯同睇夜景, 去到又係食buffet, 真係食到厭, 仲要係自費, 價錢都唔平, 差唔多都要每人兩舊水港幣. 我都無食到D咩, 我黎到泰國係想食D特色野地道野呀, 連續兩晚都食buffet, 真係無咩胃口.

食完飯我地就上八十四層睇夜景, 上到去幾特別, 果層係會三百六十度咁自轉, 同埋只係隔住個鐵絲網, 比起其他D乜塔乜塔要隔住塊玻璃既感受更深.

食完飯今晚好早就返酒店啦~ 由於行到好攰, 所以我就即管試下酒店既「全身及足部按摩」啦, 800Bahts兩小時都唔平. 但係完全唔掂囉, 個按摩師都無咩出力既, 都唔夠我係香港做全身淋巴按摩咁好力水咁舒服. 同埋個按摩師係由腳掌開始按, 由腳按番上頭, 不過佢無做任何清潔消毒就開始按腳捽腳趾, 之後慢慢按上頭... 我果陣係未沖涼就落去按摩添... 

2007年12月25日(二) -- 泰國曼谷芭堤雅之旅 Day 1

今年既12月25日, 我地又出發啦, 記得上年既今日我地出發去關島註冊, 而今年既聖誕我地就去泰國.

由於早機既關係, 我地六點半就要到機場, 發現同團既全部都係一家大細, 另外有組合係四個人, 分別係兩pair情侶, 只有我地係兩個人既組合. 一團三十人, 有八個細路, 有個仲係坐住BB車, 當堂高興既心情即刻減溫, 因為我唔鍾意細路, 咁多細路一團肯定好嗌同好煩... 同埋咁多一家人扶老攜幼, 領隊當然會照顧佐佢地先, 我既感覺係有少少被人ignore同discriminate咁... 雖然我理解我地兩個後生仔女唔駛人理都識自己顧自己, 但感覺唔好囉... 我覺得如果同團多D後生仔女會好玩D.

去到泰國第一站係去夢幻樂園, 我唔知點解D旅行團仲要黎呢度, 簡直係浪費時間, 個樂園超落後, 好似去佐荔園咁, D機動遊戲又唔掂, 掟公仔果D攤位遊戲又勁多老翻公仔, 我完全唔建議人黎呢度玩.

我地第一餐亦係樂園食, 叫做buffet, 但無咩野好食, 多數係淨粉淨菜, 最好食係碗丸丸米...

夢幻樂園裏面有個叫雪城既地方, 超細, 無特別, 最好玩係滑雪兜囉...

之後我地去佐Siam Paragon既Siam Ocean World同觀賞果個乜鬼4D立體電影. 海洋世界講真我已經無咩興趣再去, 去北海道果陣睇過, 舊年去關島果陣亦去過, D海洋生物已經覺得熟口熟面, 又係果D...

果個4D立體電影, 更加廢到無倫, 完全唔掂, 張櫈係唔會郁, 你只係感覺到椅背有摩打係度震下震下, 有D噴水噴氣效果咁, 完全係嘥時間...

Siam Paragon門外:

跟住我地去佐個叫做Ramayana既地方食buffet, 野就無咩特別好食, 好多都係豬肉炒菜, 菜炒豬肉, 但你唔知佢用既係咩醬料, 味道古古怪怪, 同好多樣辣既野囉...

食完飯我地再去行Suan Lum Night Plaza跳蚤市場, 賣既野無咩特別, 大部份既攤檔賣既野都係一樣, 我地係果度買佐D野食做手信, 但係有D椰子糖買貴佐一倍呀!! 我地臨走經過一間先發覺佢價錢係最抵, 我地之前買既都係買貴佐!!

最後十一點幾先返到酒店, 與其話果間係酒店, 不如話係賓館啦, 設備簡陋, 當然無牙膏牙刷無沖涼液(我地事前都知三星酒店無呢D野, 都自己帶備佐), 無浴缸, 同埋好「嗱渣」呀!! 個洗手盆仲有頭髮係度, 最最恐怖既係, 我第二朝發覺個廁板底仲有血漬係度架, 核突到暈呀! 我月頭先住完超靚超豪華既澳門威尼斯人渡假村酒店, 而家係泰國住間咁既cheap酒店, 真係頂唔順呀!! (係呀, 我係勞騷王呀)