靚靚花花裝飾@舊公司樓下

雖然離開咗PK舊公司, 不過有一批之前影落既相, 都想放埋出黎, 就係我公司樓下既花花擺設啦.

離開咗先夠膽講, 我以前係喺海港城Gateway Tower 6返工既, 我覺得樓下既花花擺設比起其他Tower好似靚D, 同埋真係好欣賞佢地隔一排就會換過批新既, 令大堂加添唔少生氣.

射箭初班

自從喺深圳民俗文化村玩過射箭之後, 突然覺得對射箭有D興趣, 於是就上網搵資料, 睇吓香港邊度可以學射箭, 最後我參加咗一個射箭屬會既初級射箭班.

初級共三堂, 每堂3小時, 學費$250, 其實幾抵玩, 我亦都覺得幾好玩.

不過我既最大難題就係... 怕曬囉!

我平時勁討厭同陽光玩遊戲架嘛, 出陣街我都要帶把防UV遮, 平時做facial又勁美白etc., 你要我企係露天既地方曝曬三粒鐘, 我真係頂唔順呀~~ 一來我真係好怕曬黑, 二來我體力真係受唔住, 我第一日上上吓堂, 竟然無啦啦見暈(唔知係中暑定咩原因), 要即刻坐低抖抖先得, 勁瘀囉...

所以我可能要等到冬天先會再上中級班了...

同埋射箭時做唔好收骨呢個動作, 比條弦彈到的話, 會瘀足成個星期架...

自家製すき焼き (關西風)

すき焼き, 中文譯作壽喜燒, 我喺日本既時候想食但無食過, 因為價錢唔平嘛...

我自製既すき焼き當然係唔地道唔正宗架啦, 食譜同做法我係參考某一套日劇既.

1. 先在鍋上塗上牛油
2. 放上薄切牛肉
3. 在肉上撒上砂糖
4. 再淋上醬油和料理酒

然後將牛肉撥埋一邊, 再依次放入:
1. 大葱
2. 燒豆腐
3. 芋絲
4. 冬菇
5. 金菇

(由於芋絲既鈣質會令肉質變硬, 所以一定唔可以放埋一齊)

(另外我地仲因應個人喜好加咗D菜入去)

關上蓋三分鐘, 食得.


我地總共整咗兩次, 第一次買唔到鮮冬菇, 有D美中不足. 同埋我地只係買咗普通豆腐, 無落到燒豆腐囉... 

不過我地講到明係唔正宗架啦, 哈哈~~  如果大家有其他食譜可以推介一下唷~~

我的自私鄰居...

我隔離屋個單位成日都轉手, 呢期果位鄰居, 我覺得佢地某程度上係唔正常架囉...

佢個單位有鐵閘同木門, 但佢地永遠唔會關埋個鐵閘, 只係將個鐵閘推開一邊就算.

佢地永世都唔會關埋個鐵閘:

聽講管理處果邊都同佢地反映過, 因為佢咁樣將個鐵閘推開一邊就算, 初初巡樓既實Q唔知你地個單位咩事架嘛, 點知你係咪比人爆格架?? 聽聞管理處有叫佢地處理好個鐵閘, 如果你真係唔用個鐵閘的話咪索性拆咗佢囉, 呢度又無規定一定要裝鐵閘. 但結果佢地係一於少理囉...

本來佢地關唔關鐵閘都與我無關, 基本上都唔會點阻到條路. 但佢地成日將D垃圾放係門口, 我就真係火都黎.

佢地都痴線架, 明明後樓梯就喺正佢地單位斜對面, 佢地兩步路就可以一推門入後樓梯掉咗袋垃圾. 都唔明點解佢地硬係要將袋垃圾就咁放喺門口, 有時無論我地係夜晚放工返到黎, 又或者係一朝早出門口返工, 都會時不時見到佢地就咁放袋垃圾喺門口.

後樓梯明明係佢地斜對面兩步路咋嘛!!!:

本來我地忍得都忍, 但某日我朝早出門口見到佢地袋垃圾無封口不突止, 仲見到裏面D垃圾有汁又烏糟, 我真係火都黎呀!!! 大佬呀, 你有無衞生常識架?? 你唔好惹埋D老鼠曱甴黎先得架!!!! 我即刻影咗相然後落管理處投訴!!

但係呢家人真係痴線架, 兩個星期之後, 有晚我放工七點幾返到黎, 我仍然見到佢地放咗兩袋垃圾喺門口囉!!! 不過今次叫做封咗口...

仲有, 前排咪成日落雨既, 我見佢將把縮骨遮就咁放喺走廊地下, 初初我以為佢嫌把遮仲濕, 所以唔收番入屋住啦... 點知, 呢把縮骨遮喺走廊地下已經成個月咁濟, 佢仍然係原封不動無郁過囉... 

把縮骨遮真係可憐...:

變態架, 咩人黎架!!

最後一年既免費週年紀念晚飯@聘珍褸

不知不覺, 結咗婚已經五年. 今年已經係最後一年食酒樓送出既結婚週年飯.

今年我地去咗荷里活廣場分店食. 由於我地唔想食翅, 所以無叫套餐, 散叫咗幾樣野就算.

如果我地擺酒既尖沙咀聘珍樓未執, 我真係諗住即使來年已經再無免費週年飯食, 我地都會自費去食飯慶祝. 但可惜尖沙咀聘珍樓都已經執咗好幾年, 下年既週年紀念飯我地應該會去其他地方慶祝, 唔會再去聘珍樓了.

不過因為未試過喺聘珍樓飲茶, 今晚八卦睇完佢張點心紙之後, 好想搵日去聘珍樓飲個茶囉~~

2012年4月9日(一) -- 塔門一天遊

4月9日, 復活節最後一天假期, 我地去咗塔門玩.

有friend揸車, 佢預早申請咗禁區紙, 我地先去咗黃石碼頭, 然後喺果度搭快艇過塔門.

途中先去個friend既老細既魚排參觀吓先:

離開魚排, 繼續坐快艇前往塔門. 到達後我地去咗天后古廟.

跟住我地去咗食海膽煎蛋公仔麵同埋冰鎮奶茶, 好味道~~

食完公仔麵, 我地喺塔門周圍行咗陣.

行一陣又食飯, 黎到塔門梗係食海鮮啦~~

食完lunch繼續行, 我地往疊石既方向出發.

遠處果舊就係疊石啦, 讀過地理既都知係因為風化而形成架啦:

冰菠蘿:

離開塔門回到黃石碼頭後, 我地見時間尚早, 而且反正有禁區紙, 所以我地就去埋萬宜水庫行吓~


唔記得咗係東壩定西壩.

我地好白痴咁扮那些年: