有關脊醫的疑惑...

今日腰骨又勁痛, 於是諗住的起心肝真係去搵個脊醫睇下啦, 上網搵資料, 初時見到有個脊醫既網頁寫得好奇怪, 好強調話脊醫係專業既一門, 並不是西醫裏其中的一個分科... 之類既說話, 我當時見到覺得有些怪怪的, 佢咁強調到底有咩意思呢? 後尾再睇佐多D網頁, 見到有D人話脊醫其實唔可以算係「醫生」, 只是他們在香港安了自己什麼脊醫的稱號, 自稱醫生, 在外國也不是主流醫學. 而勞工法例並不承認脊醫所發的病假紙...

那麼我既腰骨痛問題, 到底應該要去睇邊一種醫生呢? 你地又有無睇過D咩中醫, 脊醫, 骨醫, 推拿, 針炙... 等等等等, 覺得佢地真係有料到, 可以介紹比我呢???

 

又出差返大陸~~

16號星期五GM突然話黎緊既星期一要上大陸個客度開會, 因為個客除佐19號果日係廠之外, 成個11月就會係日本, 要到十二月先會返. 於是就臨急決定星期一上去同個客開會. 本來19號係約佐大和証券開會的, 而家出席唔到, 唯有交晒比老細負責.

今次上去同個客開會既原因, 其一就係個客自從2月後就比唔齊資料我地做accounting, 佢地日本總公司果邊又唔催佢地自己大陸廠, 走黎催我地. 於是我地就上去了解下佢地係咪有咩困難, 睇下有咩幫到佢地啦.

其二就係傾下佢地既發展問題. 由於佢地係一間來料加工廠, 但當地政府開始想取締呢類低技術, 低增值, 低科技既來料加工廠, 政府查賬方面唔會再好似以前咁隻眼開隻眼閉. 我地個客呢間廠既來料加工合約仲有幾年, 但幾年後當地政府仲批唔批就好難講, 搞到個客而家都唔知仲好唔好繼續發展, 所以我地上去開會就係比D可行既意見同方法比個客, 睇下佢呢間來料加工廠將來可以有咩野出路.

同個客開完會唔少得去食埋飯飲下野咁, 之後我地再去深圳office傾陣野就返番香港啦~

2007年11月16日(五) -- BBQ

上星期五放工同班同事一齊入元朗BBQ, 燒完野食之後就上黎我屋企打麻雀, 之後再玩UNO, 玩1毫子1分, 好鬼緊張刺激, 就咁就玩通宵~

下次會搞打邊爐~ Yeah!!

係呢間公司做, (暫時)好開心~~~

梨花園韓國餐廳 -- 態度超差的阿姐

地址: 上環干諾道中119至121號韓國貿易中心地下
電話: 2544-0007

上星期去佐兩次梨花園食飯, 一次係上星期一同兩個同事及GM去食dinner, 第二次係上星期四同同事去食生日lunch.

講真呢間餐廳我都唔係第一次黎, 但上星期遇到個超無禮貌, 態度又差, 超霉氣既阿姐囉, 不知所謂!! 今時今日仲有D咁既服務態度既?! 反而有個講英文我估係韓國人既男侍應就好好多~

食物方面, 貴囉, 星期一晚我地叫佐個4-5人餐, 鬼死咁多肉, 食到個人好膩呀! 同埋果個咁既人參雞湯, 麻麻地囉, 無咩人參味既.

lunch方面, 60蚊一個餐(唔記得駛唔駛加一), 又唔見得好豐富...

如果唔係同事決定去果度食飯, 係我自己決定的話, 我絕對唔會再去囉...

第一次上深圳office

上星期三同GM及老細上佐深圳office, 同GM上去主要係帶我上深圳office打個招呼, 同埋要同上面既公認會計師開個會. 老細上去主要係interview, 因為上面個會計師就黎生, 要請個人番黎.

 

朝早先返office, 等老細搞掂埋D野就同GM一齊出發. 我地大約十點九係office出發, 約十二點幾上到去. 先去佐同上面深圳office同事飲茶, 叫佐好多野食, 味道都過得去. 

 

之後就上深圳office, 同會計師傾佐陣, 跟住老細同GM就開始in人, 我就坐埋係房裏面同佢地一齊in,  哈哈~

 

跟住我, GM同老細就係房度坐下, 等到深圳office夠鐘放工, 我地就成班人去佐食晚飯, 去佐萬象城既火間土食. 火間土個格局同香港既差唔多, 食物都OK啦, 無咩特別好食or唔好食.

 

風花雪月, 飲飽食醉後, 八點幾離開, 大約九點返到黎羅湖.

 

結論係, 今次出差好好玩~~~ 我唔介意返大陸, 同埋同GM上去其實幾好, 佢會講好多野比我聽, 咩題材都會講到, 所以同GM一齊返去唔會悶, 我自己又可以學到好多野~~ 

深圳office reception:

深圳office望出去:

金寶越南餐館 -- 好好味~~

地址: 九龍城衙前塱道23號

上星期六去佐九龍城食越南菜, 我地叫佐五樣野, 樣樣都好好食. 醬爆蝦丸熱辣辣, 裏面D醬又多, 勁好食~

個酸辣粉絲煮蜆湯都算幾多蜆, 不過D蜆都幾韌…

咖喱大蝦都唔錯, D蝦真係幾大隻.

仲有個雞串唔知咩咩, 味道都幾好~

最後個海鮮濕炒河, 我地已經飽到食唔落, 不過我都試佐兩啖, 好好味呀, D汁又正~

2007年11月10日(六) 又影畢業相~

今朝八點幾起佐身, 跟住就叫流沙包同我落元朗公園影畢業相, 話晒流沙包送果紮花仲咁靚, 緊係唔好嘥影多D相先啦~ 今次都影佐好多張, 不過剛剛訓醒塊面都仲係脹脹地, 我又唔識化妝喎, 於是個樣好似怪怪地咁, 最衰就係果幾粒暗瘡!!

影完相去佐飲茶同埋去租佐D漫畫睇. 果套咁既《女生勿進》(台譯《偷偷愛著你》)終於都追完, 我睇到中間都頂佢唔順覺得佢係度拖, 但唔追埋個結局又好似唔甘心咁.

下午流沙包又出佐去做野, 我就係屋企hea佐陣, 跟住出旺角同流沙包會合, 跟住搭車落九龍城食飯, 今次去佐食越南菜.

食完飯又搭小巴落土瓜灣, 因為流沙包代表公司去打工商盃, 佢地今場對住上屆冠軍匯豐, 結果... 當然係輸佐啦, 佢地都未試過齊人練波, 無默契, 輸自己.

跟住就返屋企lu~~

 

 

 

2007年11月9日(五) -- 畢業禮~~

今日請佐假去畢業禮, 無無聊聊坐佐粒幾鐘, 係學校行行企企影佐D相, 跟住返屋企, 大覺訓.

最想講既係... 紮花係咪好靚呢?? 係流沙包送架~~ 最特別既係, 呢次係我第一次收流沙包送既花呀~~~ (無錯, 佢求婚果陣都無送花). 唔知除佐畢業之外, 我仲有無機會會收花呢? 呵呵~~

一葉家 -- 普普通通

地址: 青衣青衣城302號舖
電話: 2856-8674

星期三流沙包係青衣練波練到九點, 我就係公司做野做到八點半, 然後搭東涌線去青衣同流沙包食飯.

我地叫佐五樣野: 肉燥A菜, 蚵仔球, 椒鹽茄子, 咩咩三拼, 同埋火鴨絲伊面. 食物一般, 最想講果個火鴨絲伊面, 成個齋面咁, 唔多覺有火鴨絲囉...

2007年11月4日(日) -- 睇醫生

今日終於都頂唔順, 朝早去佐睇醫生, 跟住返屋企, 唔知係咪食佐藥好攰, 睇睇下電視又係梳化訓著佐.

 

夜晚流沙包又大顯身手整西班牙海鮮炒飯, 好好味呀, 正正正~

 

呢兩日因為唔舒服成日都無做過D咩, 嘥晒D時間, 激死人啦~

 

2007年11月3日(六) -- 病

呢幾日都唔舒服, 我都唔知自己係鼻敏感發作定係傷風, 個人好攰, 朝早同臨訓前就狂包雲吞, 臨訓前就一定鼻塞, 好難先訓得著, 又訓得唔好, 同埋成日不停咁打噴嚏, 好辛苦呀, 訓佐成日, 乜都無做過...

2007年10月31日(三) -- 香蒜雞肉意粉

今日到我煮香蒜雞肉意粉, 估唔到樽蒜粉咁鬼貴, 成三十幾蚊, 其他材料全部夾埋都無呢樽蒜粉咁貴...

2007年10月27日(六) -- 愛心海鮮餐~~

今日老公大顯身手煮海鮮餐比我食, 材料買佐$120, 好豐富呀, 好好味~~

2007年10月26日(五) -- 忙到死, 出街都出佐3次

上星期五, 忙到嘔, 出街都出佐3次. 首先要同個日本客上律師樓簽名, 本來約佐律師兩點半, 咁就叫個客兩點上到黎我offce, 點知個客1點就到佐, 不過咁啱我今日同同事出佐去食蕃茄面, 否則我食飯時間都無埋.

個客個passport no.改佐, 搞到要即刻上D2B上CR, 之後唯有後補交比律師樓.

之後我就返公司, 無幾耐又要落bank.

五點幾個同事終於去完CR返黎, 我又要再去律師樓後補番份D2B比佢地.

八點幾先放工...

鴨仔蒸飯, 好味好味~~

上星期三雖然好夜先放工, 但反正流沙包去佐練波, 我又無學要返啦, 就即管做下師奶去買菜煮飯, 我係百佳買佐隻米鴨仔, 返到屋企用兩把唔多利既刀好辛苦先斬開隻鴨十八碌(鴨鴨對唔住呀~), 求其用調味料撈勻, 跟手浸佐D冬菇同埋撕碎D菜葉, 跟住煮飯, 等D飯開始滾起就將D材料掉晒落電飯煲一鑊熟.

結果係... 唔係太成功, D飯有D煮唔熟, 因為我落材料果陣將D米同材料攪勻,  所以做唔到煲熟D飯兼且收水個程序, 個電飯煲好快就跳掣表示煲好, 但我揭開個蓋睇下, 裏面都仲係生米黎既...

嗚... 於是我就唯有久唔久又攪下D飯同材料, 再按番個煲飯掣落去, 但佢好快又彈番上黎, 來來回回我按掣按佐好多次呀, 嗚, 好白痴...