家甜屋潤甜品館 -- 言過其實, 見識到一間不知所謂既糖水舖, 大家千祈唔好幫 襯!!

地址: 土瓜灣北帝街32號地舖
電話: 2715-2889

終於都知道點解流沙包星期五晚話黎土瓜灣食飯, 原來佢睇星期五既AM730介紹呢間糖水舖, 於是一心諗住同我黎試下, 咁啱間大漠就係正呢間甜品舖對面, 所以就去佐食新疆野. 我地七點幾已經食完飯, 但係見對面間家甜屋潤落佐半閘仲未開, 走去對面睇下先知佢地今日有設備到, 所以要延遲開門, 哈, 又會咁唔啱時候既, 報紙呢日介紹, 佢呢日咁啱送設備黎, 真係倒米, 我見隔離有好多人都講緊睇佐AM730所以專登黎試下. 舖頭外張告示話八點會開, 到八點佢又話要再遲多半個鐘, 咁好啦我地周圍行一陣, 八點半再番去, 佢又話再等多十分鐘, 咁即係幾點開呀? 等到差唔多八點九, 門口都鬼咁多人等緊, 終於都開門.

我地叫佐個報紙有講既鮮果凍丸, 一個痴心太軟, 同一個南瓜棉花糖, 點知後尾話無晒南瓜喎, 又一項唔識做生意, 明知報紙登既話會吸引到人黎, 好心你就做定D準備工夫啦(唔好話我知佢地唔知報紙會今日登佢地間舖呀~!?), 於是我地改薰衣草梳乎里. 個鮮果凍丸先上, 唓... 無咩特別咋喎, 粒丸就大大粒, 但裏面粒生果就骰仔咁細, 味道又無咩特別, 有咩咁大賣點呀?

到個心太軟先精彩, 一上碟, 個心太軟已經爆佐, D朱古力醬流緊出黎, 個阿姐仲話: 「小心呀爆緊啦」. 好野喎, 爆佐既都可以攞出黎賣, 咩賣相都無晒啦! 之後仲成個塌佐落黎, 扁晒, 我當堂黑面. 第一, 你知唔知食心太軟其中一樣開心既就係你親手篤穿佢睇住D朱古力醬流出黎果種感覺呀? 第二, 大佬你仲吹捧自己間舖係乜野曾任職五星級酒店既名廚主理, 你整個心太軟你都預唔啱份量同時間既咩?!! 竟然可以焗爆佢既? 第三, 你焗爆佐都拎得出黎賣, 我完全覺得佢係唔尊重食客囉, 佢過到自己果關又好野喎, 完全係不知所謂!!! 我面黑唔肯食, 流沙包好無奈咁叫人換過. 好啦又再等一輪, 再上另一個心太軟, 我頂呀, 阿姐又係果句: 「小心呀佢爆啦」, 然後D朱古力已經流緊出黎... 唉, 唔止佢爆呀, 我都比你激爆啦! 我都無佢咁好氣, 我「得」佐句話:「是但啦原來呢度D質素係咁架」, 食落, 唔夠好食, D朱古力醬味道唔好. 我樓下許願樹都好食過佢多多聲, 至少唔會爆囉. 我真係第一次見識到D咁既所謂甜品舖.

仲有個薰衣草梳乎里, 可能唔關個甜品事既, 係我食唔慣董衣草既味道掛, 我真係接受唔到, 第一啖攻喉, 第二啖難聞, 第三啖放棄.

係呢度要同流沙包講句對唔住, 我知流沙包知我每日返工都唔開心, 抱住過得一日得一日既心態, 所以我知佢每個星期五都想陪我搵D好野食, 可以做完成個星期既工作好好地咁食餐好既. 我知流沙包同我黎呢度係想氹我開心, 但係就遇著一間咁既黑店. 其實個心太軟一上果陣我已經條氣唔順, 變晒形既心太軟都可以攞黎serve客? 我知我一黑面就會破壞晒流沙包為我安排呢一餐既心意, 我有想過就咁算數, 反正佢塌唔塌, 味道都係一樣. 但係我食野出名奄尖, 如果我真係算數食佐舊咁既心太軟, 我絕對係會背脊骨落囉. 所以... 對唔住呀流沙包, 我無用, 我唔識隱藏我既不滿, 令到你一番心機白費了, sorry呀!!!

呢間咁不知所謂既糖水舖, 你快D執笠啦, 唔好再係度昆人啦, 五星級酒店名廚? 我屁~~!!

(對唔住我呢篇BLOG太過粗俗, 但係我真係好嬲呀~!! )

  

大漠 -- 食物唔錯, 服務幾好

地址: 土瓜灣北帝街27號C地下
電話: 2714-4483

上星期五流沙包神神秘秘話去土瓜灣食飯, 對於我地住元朗既人黎講交通真係幾唔方便(雖然我地係放佐工係尖沙咀出發過去), 流沙包話去食新疆菜, 去佐間叫大漠既餐廳, 果度舖仔細細, 有個肥仔埋黎推介, 幾有禮貌, 服務幾好, 我地叫佐個葱烤餅, 一個荔枝雞球, 一個羊架(肥仔推介五成熟), 一個酸辣海鮮湯. 個海鮮湯超勁辣呀, 不過味道係唔錯, 同埋一碗仔裏面已經落足料, 有魚, 青口, 魷魚, 蟹柳等等; 個葱烤餅有四件, OK; 個羊架真係好味, 我平時唔多食羊, 因為怕羶, 但覺得黎到食新疆菜唔食羊又好似爭緊D, 於是聽肥仔推介叫佐呢個, 果然係唔羶喎, 仲幾好食添; 個荔枝雞球都好得意, 味道甜甜地又酸酸地咁, 幾開胃, 同埋有好多粒荔枝呀, 好食.

係一間用心有誠意既餐廳, 值得一試~~

   

 

好鮮味 -- 物超所值~~

地址: 元朗大馬路

20號係屋企整完電腦再同阿媽食下乳鴿, 等流沙包做完野返黎一齊食dinner, 我地去佐係大馬路元朗廣場對面新開間好鮮味食飯, 我地叫佐兩個小菜套餐: 蝦仁炒蛋同咖喱豬軟骨. 呢度既套餐超抵, 有湯有飯有小菜有飲品, 都只係$28蚊起. 而且佢唔係將貨就價喎, 個蝦仁炒蛋好壯觀, 平時一定係蛋多過蝦, 呢度竟然係蝦多過蛋, D蝦幾大隻, 同埋幾新鮮, 彈牙唔係霉肉果隻. 個咖理豬軟骨都好食, 有好多舊豬軟骨, 正!!

呢間成為我既推介之一, 可以一試呀~~ (希望佢唔係因為新開張所以開頭比D甜頭你, 希望質素唔會隨時間下降吧...)

是次每人消費約$30

2007年1月20日(六) -- 咕哩日

阿媽話屋企部洗衣機壞佐, 於是我星期六果日就返娘家等師傅上黎整洗衣機, 順便搬埋個電腦. 結佐婚之後我自己部腦仲係天水圍, 我無打算搬去元朗, 阿媽就喉住我部電腦, 我個妹就喉住我張書枱. 於是乎我就拎埋流沙包之前係電腦展買既新LCD芒, 由元朗托返娘家, 然後將我部腦由房搬出廳比阿媽用, 換埋個舊大PAT PAT芒, 拖過個拖板再駁埋上網, 全部一人獨力搞掂, 勁呀~ 可幸我都唔係一個淨係識靠男人既機器白痴, 哈哈~~ 不過搬搬枱枱之後腰骨又痛... 嗚~~~ 

匠日本料理 -- 壽司鮮甜好味, 正!

地址: 尖沙咀堪富利士道8號格蘭中心地下G04-G05及地庫
電話: 2369-3939

19號放佐工同幸福少婦去佐行百利同利時, 之後去食飯, 唔知食咩之下於是見到呢間匠就入去諗住試下, 入到去環境都唔錯, 我地叫佐幾樣食物, 包括帶子壽司, 三文魚壽司, 蟹籽沙律, 雜錦天婦羅, 鰻魚炒飯, 北海道薯餅.

個壽司係出奇地鮮甜好味, 勁好食, 除佐日本之外, 係香港好少食到D咁好食既壽司, 絕對唔係通街粗製濫造果隻. 蟹籽沙律方面, 專家幸福少婦就話個沙律都OK好食. 鰻魚炒飯OK, 個北海道薯餅熱辣辣好好味. 唯一令人失望既係個天婦羅, 無咩特別, 碟頭又細, $88得三隻蝦, 一舊魚, 一舊蕃薯, 一舊南瓜, 一舊茄子, 一舊青椒同一條豆類物體, 而且味道普通, 同出面食果D無咩分別, 唔係特別出色, 所以我覺得相比下個價錢算貴.

不過整體而言, 呢度既食物水準唔錯, 絕對值得再黎.

是次每人消費約$150

韓舍韓式烤鍋料理 -- 抵食自助韓燒

地址: 元朗馬田路80號御庭居商場6至7號地舖
電話: 2944-3336

14號晚我地去佐韓舍食韓燒, 因為我同自己講, 係關島返黎之後比自己放縱半個月任食唔keep, 等15號開學先開始再keep過, 所以今晚係節食前最後一日, 流沙包陪我去食餐勁heavy既. 呢度星期日九點前就收$88位, 韓燒+火鍋, 有住客証就九折(即係唔駛加一囉). 其實我覺得呢間野幾好架, 款式種類算多, 蝦呀, 帶子呀都有, 同埋供應都OK, 唔駛同人搶. 不過我覺得呢度既甜品就削佐D, 無咩款, 有果D糕點又唔好食.

是次每人消費約$88

越富閣越南餐廳 -- 一直保持水準

地址: 天水圍嘉湖銀座第二期日比谷211號舖
電話: 2448-2366

13號晚返天水圍同阿媽食飯, 我太耐無去過嘉湖銀座了, 都唔知有咩好食, 所以都係去番越富閣, 我地叫佐個細拼盤, 咖喱羊腩煲, 炒蘿蔔糕, 豬肉蝦片, 炒芥蘭. 我覺得呢間野咁多年黎既水準都唔錯, 所以keep住咁多年黎都會間唔中幫襯下.

是次每人消費約$120

終於買佐褂鞋同買到超值龍鳳被~~ yeah!!

2007年1月13日(六)

今日一朝早就出去做facial, 之後就自己一個人行佐陣元朗, 我終於買到褂鞋啦, $70. 下午返屋企開機洗衫, 本來一向都拎落去樓下磅洗, 從來都唔會開機洗衫, 但係我積佐一堆衫唔可以拎去磅洗, 怕一乾衣就會縮水, 成日話得閒先一次過用手洗, 今日索性開機用冷水洗.

夜晚就去佐天水圍陪阿媽食飯, 食完飯我地行佐陣嘉湖銀座, 而家有裕華國貨做緊展銷, 估唔到呢度都有龍鳯被賣, Casa Calvin被袋連床笠連枕袋, 除佐king size外全部都只係$599, 抵呀~~ 反正龍鳯被都唔會成日用, 唔駛買咁貴呀. 我見雅芳婷果D平極都成千蚊, 真係唔買呀~~~

惱人的前途問題 (上)

最近(其實都唔係最近, 一直都有諗緊)為前途問題煩惱不堪, 因為我快完成為期三年的part-time BBA course, 今年八月便會畢業, 而家諗緊畢業後條路應該點行好. 之前曾天真的想過不如轉去做會計, 原因有二:

1. BBA裏面咁多科(如marketing, accounting, management, economics等), 我最好成績的就是accounting, Corporate Accounting同Managerial Accounting都攞到A+, 其他科只有A或者A-. 同埋讀讀下發覺對accounting有興趣, 鍾意佢1+1=2, 條數balance到or balance唔到就知佢係啱定錯(當然我知現實唔係咁簡單); 最憎management同marketing呢D, 1+1可以=3or4or5... 只要你吹水吹得合理.
2. 成日睇報紙話會計金融界最好景最渴市, 成日聽到話行業加薪20~30%, 覺得呢行好似好有前途.

於是之前天真咁諗不如試下做會計啦, 讀埋conversion programme, 然後完成埋QP成為CPA. 知道如果一轉行人工就一定低, 可能只得7K一個月, 我以為捱幾年就可以平步青雲, 人工三級跳. 但最近上網睇佐好多行內人既意見同經歷, 發覺會計呢行原來都幾悲哀咁, 果D「唱好新聞」其實係膳稿. D大學生爭餐死入既big 4, 人工都只係得10K左右, 仲要每星期工作百幾小時, 未必有OT claim番; 想當年我地HD Japanese Studies畢業, 好彩既同學一出黎都已經11K, 仲要日本公司九成都係5-day work而已同埋多數都可以claim OT. 如果入唔到big 4只係入到local firm, 人工更只得7K~8K. 有D CPA做佐十年八年, 人工都依然唔過20K, 當然我相信亦有些人可以搵到30K以上, 但係如果我真係轉讀會計, 年紀咁大唔可能入到big 4, 如果係local firm做audit呢? 又或者去做commercial accounting呢?? 前途會好嗎?? 我相信不會...

好了,  發完會計夢, 還可以有什麼選擇?? 說實在, 我而家做緊呢家公司, 人工是低, 但有16個月糧, 最低限度年薪有200K以上, 5-day work, 如無意外日日可以準時收工. 但是, 我甘心成世人就做埋晒D打雜既job嗎? 我而家既title係sales coordinator, 每日就係收下PO, 入下PO, 出下貨, 做下boarding, delivery order, 安排下出貨, 覆下期, 追下廠... 說實在一個中五畢業既人都可以勝任, 話就話我識日文, 但係工作上卻用不著日文. 很多人問我為何不轉工, 其實我想轉好耐, 唔轉既原因就係呢度工作清閒, 方便我讀書. 我一早打算畢業後便會轉工, 問題係, 我可以轉份咩野工呢? 我唔想再做番D打雜既行業, 我唔想再做番呢行, 我想搵D可以有滿足感既工作, 但係可以做咩呢? 我想做一些比較專業的工作, 所以才打算轉做會計, 但現在發覺不可行了, 我應該做什麼才好呢? 我想做一行係十年八年內也不會被淘汰的工作, IT前幾年也很好景吧? 但是globalization, IT在香港已不再吃香. 到底在香港應該投身哪一行才好呢? 或者有人會說, 揀邊行都要看你的性格, 睇你鍾意什麼. 但是, 我根本上就沒有什麼鍾意, 也沒有什麼目標, 有些人志願是成為會計師, 醫生, 律師, 他們有明確方向, 知道自己條路應該點行, 但我呢? 在大學選科時根本沒有什麼興趣, 沒有什麼想讀, 也不知道自己將來到底想做什麼; 到畢業了, 也沒有什麼行業想做, 也沒有什麼目標. 只知道HD學歷不值錢, 要繼續進修, 好了, BBA也快完成了, 下一步要怎樣?

日之旺 -- 懶有新意, 但唔抵食

地址: 長沙灣青山道155-181號天悅廣場地下CA5號舖
電話: 2728-6963

12號果日流沙包下午打黎話今晚去深水埗食飯, 因為佢睇到有間食鐵板燒既好吸引, 我今日已經好努力好努力咁做, 但係全日都無停過手, 都係做極都做唔完咁. 流沙包話間餐廳得兩個時段, 一係六點半, 一係訂八點. 本來流沙包訂佐八點, 但係我八點根本走唔到, 流沙包唯有自己一個人去攞佐枱先, 我快極都要八點半先走得, 去到深水埗都已經差唔多九點, 即是說流沙包係餐廳度已經呆坐佐一粒鐘, 其間仲比waiter趕過, 嗚, 對你唔住呀...

黎到間餐廳發現原來我以前都同流沙包黎過, 不過改佐食鐵板燒. 但所謂既鐵板燒我覺得只係個爐唔同佐既韓國燒烤, 韓國燒烤個爐係圓型, 黑色鐵板既; 呢度既所謂鐵板燒係長方型, 平滑既鐵板, 同韓國燒烤咪一樣又係咁燒. 我地叫佐個二人餐, 我覺得完全係呃錢, 二百幾蚊得幾舊雞柳, 兩隻大蝦, 兩條多春魚, 幾舊魷魚, 四隻軟骨餃子, 有個炒飯, 兩粒和菓子既所謂甜品, 完全唔掂, 咁既價錢去食韓國燒烤食到飽死啦, 選擇又會多D. 另外我地仲叫佐個鵝肝添喎, 我的至愛.

我覺得呢度完全唔抵食, 唔好試呀~~

是次每人消費約$160

公司越黎越cheap, 洲際酒店變兜踎酒樓...

2006年1月11日(四)

一年一度既Annual Dinner又黎啦, 但係估唔到, 前幾年一向都係洲際酒店搞, 今年... 真係估唔到一cheap cheap成咁, 唔係酒店都算, 今年竟然係酒樓搞, 仲要cheap到係皇上皇集團, 係中港城既皇潮匯, 唉... 果陣搵酒樓結婚攞酒, 我一聽到係皇上皇集團既根本都唔會考慮啦~~  算啦, 公司旅行都cheap到去澳門咯, annual dinner唔會再係洲際搞都預佐架啦, 只係估唔到一cheap cheap成咁啫, 估唔到呢個新老細咁Xcheap. 我而家仲諗緊去唔去好. 

味吉 -- 唔熱氣唔食

地址: 尖沙咀新港中心地庫Citysuper Cooked Deli

某日OT到十點幾先走, 夜晚去佐新港個food court買飯食, 老公唔係身邊我梗係襯機會買D平時佢唔比我食既野啦, 哈哈~ 我去佐味吉買咖喱飯食, 有兩舊吉列豬柳, 一件魚柳, 一隻炸蝦, 一隻蛋, 一碗面豉湯, 加杯野飲, 都只係$45咋喎, 好抵呀~ 不過呢度D咖喱無薯仔既, 唔制呀~ D豬柳幾好食, 不過D魚柳就有D腥, 好多咖喱汁, 都算幾好味~~

是次每人消費約$45

2007年1月10日(三) -- 好野, 考試全部A到~~

考試成績終於都出佐啦, 由於呢個Sem考三科, 加上又要忙於籌備關島之旅, 所以考試其實唔係準備得太充足, 我好擔心會衰係呢個Sem度, 不過終於都安樂晒, 因為成績如下:

Semester A 2006/07
AC4302       Financial Statement Analysis                  A                 
EF4333A     Fin'l Sys, Markets&Instruments               A-                
MGT4903    Business Strategy                                  A-                 
               GPA:   3.80

最估唔到既係Business Strategy呢科可以A到, 因為呢科係50% coursework, 50% exam. coursework我地要玩個business policy game, 之後交group report, coursework主要就係根據個game既各組名次同個report黎比分, 考試前已知我既coursework係B-, 心諗就算我考試幾好, 拉勻之後個final mark最多咪B+. 點知而家攞到A-喎, 可想而知我既exam應該答得(應該係吹得)幾好(哈哈

), 亦可想而知我一向係幾咁討厭group project, 我覺得group project只會拉低我既分數. 我都等住每年果三千蚊scholarships開飯架, GPA一低過3.7就無架啦.

而家Overall GPA係3.88.

有益甜品

地址: 元朗教育路118號地下
電話: 2476-0792

9號晚去完奶奶屋企食飯, 完全唔飽, 因為D餸比我地帶埋做飯盒之後都無咩剩, 我都唔敢帶兩個飯盒. 返到元朗我地去佐食糖水, 今次唔去表姐, 試下有益甜品, 我叫佐個腸粉雜會有燒賣,  魚蛋, 蘿蔔同雞翼尖, 味道就麻麻, 不過十幾蚊有齊咁多款野食, OK啦. 另外我叫佐個椰汁黑糯米, 食到好飽, 都食唔晒碗糖水, 好滿足~~

三日唔埋兩日就壞system!!!!!!!!!!!!!!

9號果日鬼咁忙, 同事放大假, 我鬼咁多野做, 咁啱星期二又要出貨, 已經忙上加忙架啦. 我XYZ%$#@&^, 我都唔知係公司cheap唔肯花D錢係hardware度, 定係外在問題, 總之個V-SCOPE SYSTEM就成日都有問題, 餐餐D EDI料都要等足大半日先收到!! 頂呀, 趕住出貨呀, 麻X煩, 唔出貨果日又唔壞, 最忙又要出貨果日先黎壞, 無病呀??

由朝等到三點幾都收唔到料, 下午話正常番, 但我D料就唔見晒. 問番IT, 佢地話已經放番晒出黎啦喎, 無野啦喎~ 咁我D野去晒邊呀?? 正PK黎架!! 發生咩事呀?? 唔通要我逐張人手自己入過呀?!!! 後尾搵阿「大家樂」幫手, 佢將D料再load多次出黎先得咋. 真係火滾呀! 我都唔明, 咁大間公司, 三日唔埋兩日就係壞System, 再唔係就上唔到網, 一係就Lotus Notes開唔到, 一係就scan份document要幾個鐘先出到黎, 完全係不知所謂!!! 真係做到爆血管!!! 我都唔知到底係邊個既問題, 我淨係知IT班人日日準時五點半就放工走晒...

金泰釧泰國餐廳 -- 就黎變飯堂

地址: 元朗西菁街好順泰大廈28-29號舖
電話: 2478-9808

無錯, 又黎呢度. 呢度係流沙包以前既Miss開既, 所以流沙包成家人都間唔中會黎食飯. 其實本來我6號果日淨係諗住同我阿媽同流沙包食飯, 不過尋日奶奶打黎佢知道我今日同阿媽食飯, 於是奶奶佢地就一齊落黎元朗食飯勒, 流沙包見我阿媽未黎過金泰釧, 於是今晚就黎呢度食飯. 食過咩我唔詳述勒, 費事好似賣廣告咁, 不過D野好食係真既, 佢地成間舖頭仲用佐好多錢換佐鑽石健康水機(咩唔係一早講佐話呃人哩咩? 點解仲買既...), 連製冰既水都係用鑽石健康水, 唔係水喉水, 勁呀!

不過下次同阿媽食飯應該唔黎呢度食了, 因為通常黎親呢度食飯都會同Miss, 偉哥傾幾個鐘, 悶親阿媽, 所以十點幾我就送佐阿媽去搭車先.

偉哥話肯借架金色BENZ比我地做花車, 不過架車係點我就唔知勒...

蓉苑點心甜品餐廳 -- 好平

地址: 元朗教育路88號寶城洋樓 9-10號舖地下

1月5號加班加到十點幾先走, 因為有個同事黎緊放大假, 要接手佢部份jobs. 流沙包今日要去練波, 所以我地約埋係元朗食飯. 返到元朗都差唔多十一點, 好多舖頭都關門, 天寒地凍我又唔想坐街邊大排檔, 於是近近地去佐屋企附近間蓉苑, 佢係廿四小時營業的. 我地叫佐盅鳳爪排骨飯, 好細盅; 個叉燒腸粉好難食, 不過算多叉燒; 個窩貼幾好, 不過幾多油; 個糯米飯唔掂, 食黎食去都係母親大人煮既糯米飯最好食; 個糖水「芝麻糊燉奶」好嚇人, D芝麻糊好似壞佐咁, 苦既; 後尾佢地肯換過, 我地就要番個普通燉奶, 又OK喎, 好滑溜.

是次每人消費約$27

金龍船海鮮酒家 -- 質素不俗

地址: 荃灣西樓角路一號新領域廣場一樓
電話: 2498-2480

4號果晚去完Sister Wedding我地就去食飯, 因為剛剛係關島返黎, 唔想再食西餐大魚大肉咁, 所以決定今晚食中菜, 流沙包提議去金龍船食飯. 我地叫佐個蟹粉小籠包, 蒜蓉豆苗, 龍蝦蒸糯米飯, 肉丸. 基本上呢餐都算清淡. 味道都算唔錯.

場地佈置選定SISTER WEDDING

2007年1月4日(四)

係關島返黎之後, 又要再積極咁籌備我地既婚禮, 其實我地仲有唔少野未book, 包括場地佈置啦, 租車啦, 花球啦, 印帖啦, 過大禮要用既野啦... 其實係場地佈置方面我一直都無咩心水. 本來堂哥佢地介紹佐間叫Green Deco既比我, 但我上ESD life睇過其他人既comment, 發覺呢間野既操守有D問題, 所以已經完全不在我既考慮之列. 睇ESD既姊妹講有間叫Sister Wedding既好似幾好咁, 於是我一係關島返黎就打電話去預約, 好彩佢地4月7日個booking仲未full, 於是我地今日放佐工就上去佢地位於荃灣既office度睇多D sample, 我見佢地個價錢都幾OK, 係我地既budget之內, 包backdrop連三分一佈置及燈, reception枱連燈, 蛋糕枱, 兩個油畫架佈置, 成個package都唔過三千蚊, 而且佢地D設計又幾靚, 所以就即刻落埋訂勒, 又搞掂一樣野, yeah!!

關島結婚之旅 Day 4, part 1 -- 美人魚號出海睇海豚+潛水

2006年12月28日(四)

我地尋日through吉多book佐美人魚號出海, 每人US$65(睇海豚+浮潛+釣魚), 如果加埋潛水就要US$95. 我知道如果出發前用e-mail同Judy兩公婆book應該會平D, 不過我地黎之前都未決定出唔出海好, 所以無book到. 八點半吉多導遊阿Bill黎酒店接我地去碼頭, 大約半小時船程就去到睇海豚既地方, 好多海豚呀~~ 同埋D海水真係好清呀, 可以望到海底架~ 跟住我地就準備潛水勒, 教練應該係香港人, 講廣東話的, 佢教我地點做反壓, 教佐D水底溝通既簡單手勢, 我地就開始著潛水衣, 戴面罩準備揹樽落水勒.

  

因為我之前有跟流沙包出海玩wakeboard, 同埋都剛剛學識佐游水(雖然潛水唔駛識游水), 所以跳落海果下都唔驚lu, 反而我個妹就係度嗌, 哈哈~ 首先我地要捉住船尾條梯, 浸個頭入水, 練習下呼吸(呢個時候流沙包已經自己落佐海底). 之後就有人帶你出去遠D既浮波度再做呼吸練習. 跟住教練就叫你捉住條繩, 帶你潛落海勒. 初初隻耳仔真係幾痛, 要不停做反壓動作, 但係適應佐之後就無問題. 落到海底我坐佐係D珊瑚上面, 想起身又起唔到, 想企起身又企唔到, 好狠狽耶~ 仲比D珊瑚「界刂」到手添喎, 嗚嗚. 後尾終於識得浮下, 海裏面好多魚呀, 跟住教練派佐D腸仔比我地餵魚, 好多魚游埋黎食呀, 好得意!!

    

八爪魚出現...

我見流沙包同阿偉都來去自如咁, 我就一直捉住條繩, 我嘗試下放開條繩自己游下, 點知又飄走佐, 浮番上水面, 好彩教練捉番我落去. 係下面大約半小時左右就要上番水面lu. 流沙包好勁呀, 一上水個staff就問佢係咪已經有牌架啦? 原來流沙包以前做救生員果陣已經試過潛水啦喎.

全部人上水之後我地就要回航啦, 咁快既...?? 成程大約兩小時左右.

關島結婚之旅 Day 3, part 3 -- 查莫洛夜市 (Chamorro Village)

2006年12月27日(三)

行完禮返到酒店我唔落妝唔拆頭, 諗住就咁去夜市. 我地搭黃色線去GPO, 係GPO轉紫色線去查莫洛夜市. 去查莫洛夜市既車係一架旅遊巴(但架巴士都係Lam Lam Tour既車), 唔係平時搭開既紅色噹噹車, 大約半小時車程左右就去到夜市. 果度話大唔大, 話細唔細, 我地七點半左右去到, 九點半左右要出番黎等車, 因為阿司機叔叔話尾班車係九點八. 仲諗住兩個鐘一定行得晒, 但因為今次我地係全體行動, 唔係分開行, 所以行黎行去都係集中一個area. 我地買佐D串燒食, 有雞串同埋魷魚. 食完之後我地就去買辣椒朱古力, 店主係講廣東話既, 一盒16粒US$8, 買五盒送一盒. 呢個時候已經差唔多九點三, 四, 跟住我記得有網友推介話夜市有D好靚既雞蛋花頭夾, 於是我拉流沙包好快陪我巡一轉, 好快手咁買佐兩個, 跟住都無時間睇其他野, 買完就返車站搭車勒, 嗚嗚... 唔制呀!!~~

第三日就係咁勒.

關島結婚之旅 Day 3, part 2 -- Crystal Chapel行禮

2006年12月27日(三)

WB既人準時一點九黎接我地去Crystal Chapel, 我地先去到WB既salon準備, 我就先set頭化妝, 流沙包就無野做周圍影相. 因為我無咩idea, 所以化妝師就話會幫我化個natural D既妝. 唔, 個妝真係幾natural囉, 個黑眼圈都仲係度遮唔晒; 同埋我本身大細眼, 左眼雙眼皮右眼單眼皮, 我仲expect化妝師會幫我右眼黐膠紙balance番添, 點知佢又無喎, 淨係話用眼線做佐d cheating, 但係好明顯仲係大細眼架囉, 不過整體黎講個妝都算滿意既. 個頭就全部束起晒, 因為化妝師話出面大風, 其實我本來好抗拒全部紮起晒既髮型, 亦唔鍾意梳髻, 因為我覺得自己面肥又大, 紮起驚會顯得更發水面包, 所以之前都鍾意D一定要有D頭髮"dum"落黎既髮型, 但估唔到原來紮起晒都OK喎.

 

 

化好妝set好頭之後我地就入另一間房換衫同戴飾物, 幫我地既assistant係一個日本女人, 幾好人. 然後assistant就同我地係房rehearsal一次, 佢講解陣間行禮全個過程係點既, 一時之間太多野記, 好驚陣間會唔記得晒呀! 跟住牧師會入黎同我地傾陣計, 主要係想比我地relax下, 跟住等多陣, 到佐四點就有人帶我地出去chapel啦. 唔知點解我心情唔算緊張, 反而覺得有D搞笑, 因為我覺得好似拍戲咁, 哈哈. 網上面D姊妹話女高音一唱歌就已經想喊, 但我反而無喎, 只係覺得好新奇好得意, 可能我唔係教徒啦, 所以我完全無果種神聖莊嚴既感覺, 反而覺得幾有趣. 成個過程主要係牧師講野, pray, 交換戒指, 又pray, 點蠟燭, 簽名, 完成. 想講講既係個女高音真係好正, 把聲一流, 我初初行入chapel果陣仲以為係播帶架, 佢唱得好好聽呀~~

  
 
 

行完禮我地同屋企人係chapel裏面影相, 然後新人會落埋沙灘影相. 我估唔到videoman會叫我地對住鏡頭講下心情, 我腦裏面一片空白都唔知講咩好, 反而流沙包就超勁, 很長既愛的宣言, 無NG無食螺絲, 非常流暢, 果然係教書佬, 作大唔駛起稿, 哈哈~~ 早知我一早諗定D台詞先啦, 嗚嗚.

 
      

我地影完相五點, 跟住返番WB salon換番衫執齊D野, 之後就車返我地返酒店, 妝都無幫我落喎, 不過唔緊要, keep住夜晚都可以靚靚影相~