關島結婚之旅 Day 2, part 1 -- 市內觀光

2006年12月26日(二)

我地一拎完行李出閘就有當地吉多旅行社既導遊黎接機, 我地同埋其他係香港同一班機黎既旅客一齊上佐旅遊車, 開始我地既local tour(買任何package去關島都會送local tour, 但其實都要比番US$5/人小費比導遊).

第一站: 女自由神像 (Statue of Liberty)

導遊話我地成日睇旅遊書見到果個古銅色女自由神像已經比颱風破壞佐, 新既呢個係白色. 去到發覺... 嘩, 細座到呀...

第二站: 阿普岡堡 (Fort Apugan)

去到有三碌炮既地方, 流沙包阿姨住係澳門, 佢點都唔肯係呢個景點影相, 因為佢話炮台呢D野澳門都大把啦, 費事影完相返到澳門比朋友睇以為係澳門影既, 哈哈, 好搞笑.

第三站: 拉提石公園 (Latte Park)

導遊話呢D石係以前查莫洛人起屋既基石, 不過而家睇到既只係仿製品, 並唔係真正遺跡. 附近仲有個防空洞, 不過我見好多飛蟲係裏面, 所以無入去睇.

第四站: 西班牙廣場 (Plaza de Espana), 朱古力屋, 教宗紀念像

係拉提石公園行過馬路就係西班牙廣場, 裏面有「著名」既朱古力屋, 但感覺上個廣場無咩特別喎... 再行遠D就係教宗紀念像, 不過我無影到相.

第五站: 聖母瑪利亞教堂(Dulce Nombre de Maria Cathedral-Basilica)

係西班牙廣場再行前D就係聖母瑪利亞教堂, 入唔到去裏面, 我地都係0係出面影下相, 座教堂幾靚~

  

第六站: 情人崖 (Two Lovers Point)

黎到情人崖, 地方唔係好大, 首先睇既係一個由磒石撞落地球, 形成既一個好深好深, 見唔到底既地洞. 然後我地比佐US$3上佐情人崖既瞭望台, 呢度興o係把鎖上面寫上情侶既名字, 然後鎖係欄杆, 就可以永遠幸福快樂, 我地當然有準備到鎖黎呢度鎖啦. 然後嗱嗱臨係瞭望台上面影相, 跟住落番去紀念品店度整個用1仙壓成既情人崖紀念coins, 跟住就趕番上車. 點知怱忙得濟, 竟然唔記得同個鐘影相同敲鐘呀!! 嗚嗚, 激死我啦~~~

之後導遊就車我地分批返酒店check in勒.