關島結婚之旅 Day 3, part 1 -- GPO shopping

2006年12月27日(三)

酒店樓下沙灘

今日係我地行禮既大日子, 我地要一點九返番酒店lobby等WB既人黎接我地. 我地一早就落去食早餐先, 個早餐buffet都算多野食架啦, 起碼都有野啱食, 都食得飽. 食完野我地搭黃色線出發去GPO, 因為十點先開門, 所以我地係門口等佐陣. 入到去就各自分頭行動, 我同流沙包先去佐Levi's outlet, 我鍾意D比較貼身同著出黎睇落會修長D既牛仔褲, 但關島果度就好多鬆身既款, 但係見咁平唔買咪好蝕? 於是最後買佐條價值US$9.99既, 黐線架, 一條Levi's唔駛港幣一百蚊(當然唔係好新款果D啦), yeah!! 跟住我地去佐睇NIKE, 流沙包買佐頂冷帽. 然後我地就去睇鞋, 流沙包買佐對Dr Scholl's既拖鞋US$19.99, 我就買佐對Converse波鞋, 好過份架明明個架上面寫住US$19.99我先會買咋麻, 點知比錢果陣係US$34喎, 激死呀! 如果早知係US$34我就一定唔會買啦, 我係諗住US$19.99咁平先買咋麻.

之後入佐NINE WEST睇, D鞋折佐好多, 但我根本唔識著高踭鞋既, 得個睇字無買到. 跟住就去佐間舖頭掃衫, D衫唔係咩名牌, 價錢都只係十幾廿蚊美金左右, 但係D款都OK, 同埋佢寫住係made in USA架喎, 唔知係咪真既呢? 我買佐起碼四件, 流沙包話我好瘋狂喎, 話我係日本果陣都唔係咁既(目標唔同麻, 係日本我諗住掃名牌, 但都睇唔啱心水, 唔係真係好鍾意梗係唔買啦, 咁貴; 相反係關島我都無打算掃名牌, 見D衫咁平只係百幾蚊港幣, 咪有理無理掃佐先囉~). 

之前成日聽人講必去Ross Dress For Less, 話好多平野賣好抵. 我當然都有去啦, 不過去完覺得呢度係嘥時間, 佢裏面真係成個雜貨攤+夜冷舖咁款, 係「雜北lung」乜野都有, 衫褲鞋內衣家品床單玩具... 好多野賣, 但係真係好亂, 同埋D野好殘好舊咁款. 我都有嘗試過搵下有咩平衫平褲, 都係裏面搵到有Levi's既牛仔褲同Polo衫既, 不過D褲又係超大碼, 如果適合東方人slim D身形既size, 係得好少款可以揀囉. D Polo衫個款又唔靚, D料一望就知道係cheap野, 仲made in一個唔知咩鬼野既國家, 價錢仲要唔係特別平喎. 所以係Ross Dress For Less我咩都無買.

行下行下差唔多一點, 係時候食D野跟住返酒店準備, 於是我地就去佐GPO food court食飯, 跟住我同流沙包就走先. 點知等極都無車, 好忟憎呀, 差唔多等佐四個字先有車, 屋企人施施然食埋野行多陣出黎同我地搭埋同一班車返酒店, 激氣呀! 與其出黎巴士站都只係呆等, 早知頭先就唔駛咁趕, 係商場行多陣添啦!!