新鮮熱辣@墨魚燒賣: 西歐十國十三天之旅 (2009年)

顯示包含「西歐十國十三天之旅 (2009年)」標籤的文章。顯示所有文章

2009年8月14日星期五

西歐之旅 -- 後記4

歐洲人真係唔鍾意冷氣, D冷氣會開到好弱. 不過我鍾意咁樣, 因為我都唔係太受得冷氣, 我唔可以比D冷氣風吹住個頭. 相反香港人都痴Q線, D巴士/商場/食肆既冷氣鬼死咁凍, office D人又寧願披件外套都唔死去較細D個冷氣, 世界未日真係靠晒你地啦~!!

另外去到歐洲, 領隊不斷同我地講歐洲某D地區既治安好差, 一定一定要好小心自己既財物同証件. 我地慶幸成團都無人唔見野, 但係我地見隔離團就無咁好彩啦. 係阿姆斯特丹我地遇到團康泰團, 大家係同一間餐廳食早餐, 食食吓有個康泰團友發覺唔見佐個袋, 原來佢將個袋掛佐係椅後面, 然後就出去攞野食. 佢都唔係成枱人出晒去, 係有人坐住係度看住D野架喎, 但係一覺唔留神就比人偷佐個袋啦, 所以我係歐洲一定係袋不離身, 就算坐低係餐廳都要攬住.

不過歐洲真係好塞車呀, 我地都嘥佐唔少時間係塞車上面.

而之前我上網睇人話LV要排晒隊, D人做野手腳又慢, 叫佢攞個袋睇吓都慢吞吞咁. 所以我當初無打算嘥時間去LV買袋, 但係去到發覺又唔似網上面所講, 我見D人手腳都唔算太慢, 效率都唔錯. 不過LV既salesperson真係一對一, 如果佢未serve完個客(即使個客只係拎個袋睇緊, 都未決定買), 就算你問佢拎個袋睇吓, 佢都唔會serve你,會叫你搵其他同事幫手.

我既13天歐洲之旅大致上就到此為止啦, 如果大家睇完覺得有疑問, 歡迎留言比我吖~

西歐之旅 -- 後記3

住方面, 慶幸我所住既酒店都好企理, 有D仲超乎想像咁靚添, 不過牙膏牙刷拖鞋真係要自己帶, 酒店唔會有. 沐浴露洗頭水酒店都會有既, 不過都係寧願自己帶啦.

行方面, 由於我地夏天去, 所以夜晚十點幾都未天黑, 所以就算去"夜街"感覺上都唔太危險.

去toilet方面, 德國收費最貴, 要€0.5, 係德國, 就算係餐廳toilet都一樣要收錢, 連M記toilet都要收費架. 其他國家既toilet都只係收€0.2.

同埋歐洲既夏天真係好曬, 我做唔足防曬, 所以黑佐好多呀, 唉...

2009年8月13日星期四

西歐之旅 -- 後記2

食方面, 歐洲D野唔係話難食, 之不過每一日都係咁多肉類, 火腿, 意粉, 薯條... 真係睇見都怕, 我返到黎香港之後, 一個月內都唔想再食西餐.

水方面, 淨係意大利既餐廳唔會有水供應, 通常都要你比錢買; 其他國家既餐廳多數都會有水供應.

另外歐洲同日本一樣, 扭開個水龍頭, D水可以直接攞黎飲, 不過大部份團友為怕水土不服, 所以多數買支裝水飲(因為當地係硬水, 好多礦物質, 有時見到D水會有D白色野), 一支水多數都係€1左右(大約500ml大小), 有時見到€0.7一支, D團友就會"大手掃貨". 不過我同流沙包就完全無買過水飲, 因為我地係香港帶佐好多支水去歐洲, 同埋我有時去到酒店見D水唔係太多白色野, 我會攞黎煲水沖涼茶黎飲囉~

我會提議大家帶個熱水煲去, 買D如竹蔗水, 夏桑菊呢類沖劑去沖黎飲. 而我仲帶埋羅漢果去煲, D羅漢果水大受團友歡迎(因為個個都好熱氣耶)~~

西歐之旅 -- 後記1

呢個歐洲trip我地係跟勝景遊 KUONI, 其實報名之前我都上網做佐好多research, 好多人都話如果去歐洲, 一係跟永安, 一係跟KUONI, 所以當初我只係睇過呢兩間旅行社既行程, 完全無睇過什麼新華, 美麗華果D.

而我見好多人話雖然KUONI價錢係貴D, 但係食同埋住既質素都會好少少, 所以我最後決定參加KUONI.

參加完呢13日既歐洲之旅, 我覺得自己真係無揀錯, 住既酒店真係好好, 有幾間完全係超越佐我當初既expectation.

我最想讚既係我地既領隊兼導遊Bowen, 佢份人真係好nice好細心, 對當地既歷史同景點既認識真係好詳盡, 又識搞氣氛, 我真係搵唔到彈佢既地方. 最佩服既係佢帶團帶佐成十幾年, 我相信佢0係旅遊車/景點所作既講解, 應該都講過幾千次, 但係佢講解既時候, 仍然係好生鬼, 語氣好生動, 唔似得其他導遊, 講解既時候完全係背書咁, 死氣沉沉. 所以真係好感受到Bowen佢果種敬業樂業, 由於我同流沙包好滿意佢既表現, 我地最後一日比領隊小費都比多佐.

呢D postcard係流沙包佢自己整架: