係咪好奇怪點解無啦啦寫個咁既關島後記? 我關島結婚都已經係3年幾前既事啦...
其實係咁既, 我以前寫blog通常都喺公司寫, 仲係開住公司e-mail黎寫, 扮晒做緊公事咁(無法啦, 係TDK果陣鬼咁得閒, 平時多數都無咩野做既). 寫完之後就send去自己yahoo個e-mail, 返到屋企先再copy & paste落去自己個blog.
呢幾日見得閒就清吓我N年未清過既yahoo e-mail啦, 發覺原來有D野我明明寫好晒, 但係一直都未放上blog. 咁寫佐唔好嘥麻... 所以呢篇後記咪隔佐咁耐先面世囉~~
好勒, 廢話少講, 內容如下:
關島真係一個好地方, 去到個人可以好relax, 真係好放假feel. 果度D海水真係好清, 即使D水好深都可以見到海底. 關島真係勁多日本人, 差唔多周圍都有日文指示, 周圍都有人講日文, 所以連當地既店員, 巴士司機等等都識得幾句簡單日文, 日本人既勢力(同財力)真係強大呀! 導遊話日本每日都有12班飛機到關島喎(嗱, 呢個係3年幾前既事). 就連我地搭南部線, 巴士上既講解都係得日文, 雖然話就話有其他翻譯, 但我見巴士上根本就無耳筒, 聽鬼聽馬咩... 同埋果邊D人都以為我地係日本人, 一見到我地就用日文打招呼, 我話我唔係日本人, 對方就話我個樣好似日本人喎(然後流沙包話因為日本人都係眼細細喎, 哼!!)
娛樂方面, 去到關島點可以唔試下當地既水上活動?? 無論係酒店泳池又好, 沙灘又好, 出海睇海豚又好, 浮潛又好, 潛水又好, 我覺得點都要試下既. 雖然我去關島前好驚會曬黑變到賓妹咁返香港, 所以都有諗過唔玩水, 但去到關島唔落水真係枉你話去過關島, 最後我都唔理咁多玩佐先算. 不過好彩我去玩水上活動果日有時會陰天落吓雨, 唔係全日都曬.
購物方面, 我個得GPO一定要去, 反而個Micronesia Mall就無咩特別. 如果無時間只能去一處, 我推介一定要去GPO, 裏面有好多平野買, 首選既係Levi's, 真係超平, 好多牛仔褲都只係US$19.99, 29.99 only, GPO裏面有間Levi's outlet, 甚至有D US$9.99既牛仔褲添喎! 我除佐推介GPO呢間Levi's outlet買牛仔褲平之外, 係Micronesia Mall既Macy's都有個corner賣牛仔褲, 又係好平只係US$19.99起, 同埋果度比較free, 你自己摷啱邊條牛仔褲就拎入試身室試, 試唔啱拎返出黎放番係原位, 唔駛經過店員, 即係你點試, 試幾多條都得, 無人會係你側邊招呼你令你唔自然唔好意思. 不過問題係果度既牛仔褲size都係超大條, 嗱起手條條都係三十幾腰圍, 我都要好辛苦先可以摷到D廿幾腰既啱我著. 反而GPO裏面間Levi's outlet就會多少少廿幾腰的. (3年後既今日, 我想講好多牛仔褲買佐番黎之後, 一路都係未著過囉... 因為我去完關島無耐就轉佐工, 會計師樓返工唔著得牛仔褲呀!)
但千祈唔好係關島買All Stars, 價錢無咩分別. 另外想講去關島行教堂結婚, 同埋親友去 個氣氛真係好好多, 否則全間教堂空盪盪咁真係怪怪地囉...
因為我地請埋屋企人一齊去, 所以呢個關島之旅差唔多駛佐十萬銀, 肉痛...
2010年10月3日星期日
2007年2月15日星期四
上Global Wedding攞關島影既相, 又一肚氣!!
Global Wedding話關島返黎後4~6星期先有相攞(數碼相, 燒落CD), 佢6號果日終於打黎話攞得, 於是我地就即日放工上去拎. 但換黎既又係一肚氣... 首先我同流沙包記得係EXPO落訂果陣問過, Queenly佢話會比番晒D相底我地架麻. 所以我地先一直以為有100張佢執過既相, 另外仲會有所有既相底. 尋晚上到去佢話從來個package都唔包所有相底喎. 結婚既人真係好蝦D架? 餐餐未比錢果陣就乜都應承乜都話有, 比佐錢之後就反口話從來無D咁既事. book酒樓係咁, 而家Global Wedding又係咁. 下次再book D咩真係要學精, 有乜野真係要錄埋音, 少少細節都要好老土咁白紙黑字寫低簽名作實先得!! 專業攝影 Digital snap (100張連光碟) 
佢本身package既資料寫到咁, 再加上當初係EXPO佢都話有, 所以我就以為會攞得番所有相底架麻!!
所有底片燒CD (jpeg) All netgative return in CD (jpeg)
錄影連影帶 Video taking (edited 30min. video covering chapel ceremony)
專貴相簿連21張相[8x12] Elegant Album with 21 @ (8x12)
仲有呀, 我隻碟話就話有104張相(佢仲話104張相已經比多佐我地啦喎!), 但係嚴格黎講得92張相咋, 因為有12張係重覆既: 其中有6張係monotone既相(張相變佐黑白), 同埋有6張大size既相. 問題係, 果6張咁既黑白相, 流沙包用photoshop都識整啦; 果6張大size既相, 全部都唔係我心水揀作油畫既相囉.
不過要讚既係我個攝影師真係掂, D相真係靚, 角度攞得幾特別. 係無助手無反光板無腳架既情況下(不過關島D陽光咁勁, 都唔駛呢D野啦)都可以影得咁專業, 值得一讚!!
講真其實關島World Bride既服務真係幾好, 可惜佢地係香港搵間咁既Global Wedding做代理... 
2007年2月14日星期三
關島結婚之旅 Day 5, part 2 --再戰Micronesia Mall同GPO, 機場
2006年12月29日(五)
成個南部環島遊共三小時, 我地回程係Micronesia Mall落車, 先去food court食lunch, 我揀佐食Burger King, 明明見menu係呢個價錢, 但係點解比錢果陣會貴少少既?? 我地諗緊唔通日本遊客真係會比人收貴D呀!?(個店員以為我地係日本人, 我地明明話要No. 8個餐, 個店員仲拎個日文menu出黎問我地係咪呢個, 我地話係), 原來個日文menu淨係得加大個價錢, 我地都無諗住加大, 就咁就比貴佐勒, 然後得到杯超大既加大汽水... 個包麻麻地好食, D薯條又麻麻地好食, 唔夠熱, 唔夠鹽...
食完飯我地就再分頭行動勒, 我覺得Micronesia Mall呢度唔及GPO好行, 所以係呢度都唔係買佐好多野, 係阿姨佢地犀利, 買佐成11條牛仔褲. 由於我尋晚先買完, 知道應該有$10減, 點知佢地買11條都無discount喎, 於是返去問清楚, 個店員阿嬸竟然一句"sorry, I forgot"就算, 嘩, 每條減$10, 11條就可以減$110啦, 成八百蚊港幣喎, 梗係點到爭取番啦, 後尾先知原來個US$10 discount card唔可以即時用, 要下次購物既時候先用得(即係話尋日個店員好人一次過free比我), 不過咁都應該可以減番$100掛, 搞手續搞佐好耐. 搞完都差唔多四點.
行完Micronesia Mall我地再去GPO, 因為阿姨今朝係GPO睇中佐件褸, 下午返去買. 係GPO逗留佐一陣我地就要返酒店勒, 因為約佐導遊五點鐘黎接我地去機場. 酒店同機場好近, 十至十五分鐘左右就到機場. 之後... 都無咩特別lu, 返香港啦, 嗚嗚...關島行程正式完結. (仲有個後記架~)
2007年2月13日星期二
關島結婚之旅 Day 5, part 1 -- 南部觀光
2006年12月29日(五)
今日上午我地去南部觀光, 搭Lam Lam Tour既藍色線(南島循環線), 原價US$25, 由於我地有free pass, 所以只需補番差額US$15就OK. 我地選擇係GPO上車, 10點半有一班, 未有車前又係GPO行佐陣. 去南部架車係有冷氣的, 我建議大家盡可能都唔好係GPO上車, 因為呢個站係出發南部前既尾站, 我地上到車已經有好多人係度, 所以我地有部份人要分開坐, 而且我地八個人上埋車仲剛剛好坐滿晒, 如果再多一個人都唔知坐地下定全程企足三個鐘頭勒...車上面九成都係日本人(我懷疑除佐我地八個之外其他全部都係日本人), 車上既都係日文廣播, 雖然之前睇單張話有什麼中, 韓等等既翻譯, 我見某些座位都有D可以插headphone既物體, 應該係翻譯機, 問題係... 0係個座位度完全搵唔到headphone喎, 唔通要自備...?? 以我有限既日文, 我隱約聽到個日文廣播先介紹關島既風土人情, 天氣之類, 跟住就講下二次大戰日軍同美軍又點, 然後就介紹下D景點之類. 
第一站: 嘉安崖-太平洋戰爭國立歷史公園 (Gann Point-War In Pacific National Historical Park)
(10分鐘)
唔... 有三支旗杆(分別掛上日本旗, 美國旗同關島旗), 有D炮, 行落去係個細沙灘咁囉...第二站: 西班牙橋 (Old Spain Bridge/Talifak Bridge)
(途經)
巴士途經阿司機叔叔叫我地望右手邊, 西班牙橋, 無咩特別, 開車走人.
第三站: 色堤灣觀景台 (Cetti Bay Overlook)
(5分鐘)
行百零級樓梯上去, 上到去可以望遠D咁囉.
(5分鐘)
無咩特別, 唔睇番D旅遊書我都唔知D相係咩地方.第五站: 索勒戴堡壘 (Fort Soledad)
(5分鐘)
又係有幾碌炮咁, 貓貓都成為景點. 佢好得意, 唔怕人, 任人地摸.
第六站: 傑弗海盜灣 (Jeff's Pirates Cove)
(10分鐘)
呢度有間餐廳, 有D紀念品手信賣. 行出D係個沙灘. 你可以選擇係呢度逗留食飯, 然後搭下一班一小時後開出既巴士離開.
2007年2月10日星期六
關島結婚之旅 Day 4, part 3 -- 夜晚去Hyatt食buffet, 之後行Micronesia Mall
2006年12月28日(四)
玩到差唔多時間我地就上房沖涼換衫, 因為六點半要去Hyatt食buffet, WB送佐兩位buffet比新人, 親友們就要自己出錢勒, 我地through吉多book, 每位US$35. 阿Bill六點三黎Hilton lobby接我地過Hyatt, 今日星期四係海鮮BBQ buffet, 餐廳環境好好, 不過香港係美食天堂, 所以無論去到邊度食野都唔及得香港好, 所以盡可能都唔好將外國既buffet同香港比, 否則你一定會失望而回. 說實在食物款式少, 所謂既海鮮BBQ都只係得D大蝦, 蟹同埋魷魚咁, 唔係好好食, 好淡. 但係甜品算多款, 同埋都算幾好食.
我地(其實淨係我, 流沙包都無買野)瘋狂咁行均Macy's, 呢度幾得意, 明明關九點, 商場都已經落閘關門, 但係九點幾仲有人(當然係遊客)係裏面好悠閒咁行緊, 又唔會廣播話關門時間到, 歡迎下次光臨之類. D店員又唔會叫人離開喎.
之後阿Bill就車我地返酒店, 我地要執行李, 聽日要返香港了, 嗚~~~
2007年2月7日星期三
關島結婚之旅 Day 4, part 2 -- Jamacia Grill食飯, 跟住返酒店泳池游水
2006年12月28日(四)
出完海, 阿Bill係碼頭接返我地, 我地問佢有咩好食, 佢就介紹佐 Jamacia Grill, 係食查莫洛野, 紅米飯呀, 燒烤呀之類. 我地叫佐個family set, 超大碟呀, 顛架~~ 食完飯導遊帶我地入佐D實彈射擊場睇下, 但係我地無幫襯. 之後阿Bill就車我地返酒店.係房休息一陣我地就落泳池玩, Hilton Hotel有三個泳池: 一個主池, 一個細池面向個海, 另一個細池有水上排球同籃球玩. 其實即使係個主池都係好細個, 不過黎到關島點都要落酒店泳池玩下. 係泳池玩佐陣我地就落佐沙灘, D海水好鬼鹹, 不過D水好清, 同埋即使D水只係去到心口咁淺水, 都已經有魚係度游黎游去, 好正呀~ 
2007年1月24日星期三
關島結婚之旅 Day 4, part 1 -- 美人魚號出海睇海豚+潛水
2006年12月28日(四)
我地尋日through吉多book佐美人魚號出海, 每人US$65(睇海豚+浮潛+釣魚), 如果加埋潛水就要US$95. 我知道如果出發前用e-mail同Judy兩公婆book應該會平D, 不過我地黎之前都未決定出唔出海好, 所以無book到. 八點半吉多導遊阿Bill黎酒店接我地去碼頭, 大約半小時船程就去到睇海豚既地方, 好多海豚呀~~ 同埋D海水真係好清呀, 可以望到海底架~ 跟住我地就準備潛水勒, 教練應該係香港人, 講廣東話的, 佢教我地點做反壓, 教佐D水底溝通既簡單手勢, 我地就開始著潛水衣, 戴面罩準備揹樽落水勒.因為我之前有跟流沙包出海玩wakeboard, 同埋都剛剛學識佐游水(雖然潛水唔駛識游水), 所以跳落海果下都唔驚lu, 反而我個妹就係度嗌, 哈哈~ 首先我地要捉住船尾條梯, 浸個頭入水, 練習下呼吸(呢個時候流沙包已經自己落佐海底). 之後就有人帶你出去遠D既浮波度再做呼吸練習. 跟住教練就叫你捉住條繩, 帶你潛落海勒. 初初隻耳仔真係幾痛, 要不停做反壓動作, 但係適應佐之後就無問題. 落到海底我坐佐係D珊瑚上面, 想起身又起唔到, 想企起身又企唔到, 好狠狽耶~ 仲比D珊瑚「界刂」到手添喎, 嗚嗚. 後尾終於識得浮下, 海裏面好多魚呀, 跟住教練派佐D腸仔比我地餵魚, 好多魚游埋黎食呀, 好得意!! 
八爪魚出現...
我見流沙包同阿偉都來去自如咁, 我就一直捉住條繩, 我嘗試下放開條繩自己游下, 點知又飄走佐, 浮番上水面, 好彩教練捉番我落去. 係下面大約半小時左右就要上番水面lu. 流沙包好勁呀, 一上水個staff就問佢係咪已經有牌架啦? 原來流沙包以前做救生員果陣已經試過潛水啦喎. 
全部人上水之後我地就要回航啦, 咁快既...?? 成程大約兩小時左右.
訂閱：
文章 (Atom)