關島結婚之旅 Day 4, part 3 -- 夜晚去Hyatt食buffet, 之後行Micronesia Mall

2006年12月28日(四)

玩到差唔多時間我地就上房沖涼換衫, 因為六點半要去Hyatt食buffet, WB送佐兩位buffet比新人, 親友們就要自己出錢勒, 我地through吉多book, 每位US$35. 阿Bill六點三黎Hilton lobby接我地過Hyatt, 今日星期四係海鮮BBQ buffet, 餐廳環境好好, 不過香港係美食天堂, 所以無論去到邊度食野都唔及得香港好, 所以盡可能都唔好將外國既buffet同香港比, 否則你一定會失望而回. 說實在食物款式少, 所謂既海鮮BBQ都只係得D大蝦, 蟹同埋魷魚咁, 唔係好好食, 好淡. 但係甜品算多款, 同埋都算幾好食.

食完飯阿Bill接我地走, 時間尚早我地問阿Bill有咩地方好行, 阿Bill就車佐我地去Micronesia Mall, 由於果度九點鐘關門, 我地去到已經八點幾, 所以我同流沙包好快咁行佐地下果層, 行佐Macy's, 果度有Levi's賣, 嘩超抵呀US$29.99起呀, 我係度狂摷, 因為呢度D size九成九都係三十腰以上, 好難先搵到D廿幾腰既, 不過我鍾意Macy's呢度夠free, 你自己任揀, 揀好拎入fitting room自己試身, 試啱比錢, 試唔啱放番原位. 我買佐兩條, 而家Macy's做緊promotion, 凡買任何牛仔褲都可以每條減US$10, 即係每條牛仔褲都只係百零蚊港幣, 開心死呀~~

我地(其實淨係我, 流沙包都無買野)瘋狂咁行均Macy's, 呢度幾得意, 明明關九點, 商場都已經落閘關門, 但係九點幾仲有人(當然係遊客)係裏面好悠閒咁行緊, 又唔會廣播話關門時間到, 歡迎下次光臨之類. D店員又唔會叫人離開喎. 

之後阿Bill就車我地返酒店, 我地要執行李, 聽日要返香港了, 嗚~~~