排球

星期日去佐睇流沙包佢地打比賽, 記得初初識流沙包果陣, 咁啱佢地(佢地我指元朗, 唔係流沙包帶既女仔球隊)有好多賽事要參加, 我果陣成日都去睇佢地比賽, 果陣佢地好勁, 場場波都嬴咁濟. 但自從佢地升佐上乙組, 球員又有多少變動之後, 比賽就成日都輸既多, 已經不復當年勇, 更加上流沙包帶佐佢地上乙組之後就唔再做隊波既教練, 搞搞下我都無咩興趣去睇佢地比賽. 星期日因為流沙包有份出場比賽, 所以我就去捧下場, 好耐無睇過D咁精彩既比賽, 更開心既係佢地嬴佐, 哈哈哈, 好開心~~ 好耐無睇過佢地嬴啦~~~

其實我小學開始就好鍾意排球, 原因係果陣係亞視播既一套卡通片, 我好記得個片名好鬼娘, 叫「衝出世界」, 我記得個女主角叫原桂芝, 成日紮住馬尾, 綁住條黃色絲帶. 另外有一個金色頭髮既有錢女, 妒忌女主角, 成日做埋D野陷害佢. 果陣因為呢套卡通片我就愛上佐排球, 我仲專登買佐個排球返黎, 有時學校旅行會拎去打. 可惜既係我間小學無排球校隊, 淨係著重籃球, 我一向生得高, 如果學校有排球隊, 我諗我都可能有一番「成就」, 哈哈~

上到中學我有參加排球學會, 但係佢既活動就只係放學係操場幾個人圍埋搓下波, 又唔教你野又唔理你. 我中學當然有校隊, 但係你小學都唔係校隊又無受過訓練, 都唔會比你加入啦. 所以我根本無正式學過打排球, 頂多只係有時小息或放學係操場搓下波, 打下社際排球比賽, 就此而已...

當然一直我都好鍾意排球, 無得自己打就唯有睇囉, 每年既世界女排大奬賽我都一定會睇(當然只係電視睇), 果陣我好鍾意孫玥, 生得靚打波又勁. 對排球的接觸就僅此而已. (所以上年大奬賽有機會同孫玥合照, 真係開心到暈~~)

後來, 遇上佐流沙包, 佢中學開始已經打排球, 而家仍然有keep住打, 佢係排球球証, 排球教練, 又要帶隊, 又要教波. 排球簡直係佢第二生命, 佢係體育館既時間仲多過係屋企既時間. 因為流沙包既關係我對排球既認識比以前加深, 亦周不時會去睇佢地比賽, 或者睇佢做球証. 因為流沙包既關係, 所以我可以入紅館坐係VIP席欣賞世界女排大奬賽... 雖然而家既我仍然都係唔識打排球, 但係我覺得流沙包既出現, 好似彌補番我無機會去學打排球既遺憾.

不過, 可能命運就係要我無機會可以打排球, 就係因為要令我遇上流沙包. 因為流沙包講過, 佢唔會係球場上搵女朋友, 佢會搵一個唔係打排球既人做女朋友, 因為佢唔想做野又係球場, 拍拖又係球場. 流沙包又係球証同教練, 更加唔希望同班球員有咩特別關係. 排球圈子好細, 而流沙包係「排球界」都可以講係無人唔識, 我唔記得邊個開玩笑講過, 打排球既唔識流沙包都唔可以算叫做打排球. 如果我當初有機會打排球, 我一定很早就已經認識到流沙包, 咁既話我地應該唔可能發展成男女朋友; 到時我可能只係佢球隊其中一個球員, 或者我只認識到佢係某某排球隊既教練, 認識到佢係黎吹波既球証, 僅此而已.

我以前成日諗, 細個無機會學打排球真係好可惜, 因為我真係鍾意呢項運動, 只係苦無機會. 但係我而家已經無再覺得可惜了, 因為正正我唔係排球人先能夠同流沙包結到婚, 比我再選擇的話, 我也寧願細個唔打排球, 令我可以同流沙包成為一對~~ (好肉麻添~~)

所以我想講, 呢個世界似乎有好多野都係整定的, 塞翁失馬, 焉知非福. 當你成日抱怨個天唔比機會你, 對你唔公平. 可能係因為佢安排緊將來要給你一些更好的東西. 所以, 凡事也不要灰心啊~~ (好長氣...)