別府駅前料理 -- 細碟到你唔信!

地址: 屯門市廣場第一期3樓3226舖
電話: 2907-0708

星期六約佐班中學同學出黎食飯, 一來派發關島手信, 二來開一開姊妹團. 我地係屯門別府食飯, 我地五個人, 叫佐加州卷, 三文魚刺身, 豬頸肉, 餃子串, 芝麻雞絲拉面, 一個唔記得咩飯, PIZZA同炒雜菜.

今次食飯係我約既, 地點都係我定既, 其實我唔想黎呢度的, 因為流沙包之前黎過別府食, 佢話D野全部細細碟, 完全食唔飽, 又唔係平, 唔會有下次果隻. 但係我搵均成個屯門市廣場, 其他食肆都限時(如流金歳月果D), 我知我地一定會坐得耐, 所以唯有局住黎別府. 所以我一早有心埋準備呢度D碟頭會好細, 但係... 估唔到真係細成咁囉, 個飯先精彩, 得果一碗仔飯, 賣成六十幾蚊, 離晒譜. 其實食物又唔係好好食, 真係無下次. 雖然除番開每人都係$60, 但我地五個人食飯只係叫佐好少野, 我一D都感覺唔到飽...

另外, 我都係決定唔搵嘉恩做姊妹啦, 點解每次約出黎食飯, 一係搵唔到佢, 一係就明明搵到佢, 但係到頭來又唔出現, 電話又無個... 唔黎都可以講聲掛? 每次都自動消失又唔接電話. 我怕佢應承佐我做姊妹, 到我結婚果日又玩失蹤. 所以我決定換人, 仍然維持四個姊妹, 不過嘉恩個位就換佐我細妹(本來我打算安排我細妹做雜務唔當係姊妹).

是次每人消費約$60