講真, 無論工作上學歷上, 我都係極度自卑. 很嬲自己A-LEVEL果陣唔知做咩hea hea下, 搞到成績不理想, 但是明明科科合格, 有B有D有E, 但是卻沒有大學收, 最後只有「淪落」去讀high dip, 果三年完全抬唔起頭做人(即使而家都係), 話比人聽自己係City讀書, 唔敢話比人聽其實只係讀緊HD. 畢業後入佐間叫做出名既日本公司, 但係就咩都學唔到, 跟埋D廢老細, 做埋D打雜野, 一點成就感也沒有, 完全係虛渡青春. 好了, 去讀part-time degree啦, 比著你GPA3.88又如何? 咪只係一個degree而己, 仲要係part-time. 我D中學同學, 好多都master畢業啦, 自己仲要bachelor degree都未畢業. 流沙包呢? 兩個bachelor degree一個master degree; 流沙包細妹呢? HKU會計畢業, 而家已經係會計經理, 揹個手袋係我成個月既人工; 佢妹夫呢? 某大德國公司經理; 流沙包細佬呢? wealth management既經理; 我呢? 每次人地問我做咩, 我都只會答: 我係一個打雜...
有人會話, 你都嫁佐啦, 有老公養, 唔駛做都得啦. 為什麼嫁佐就可以唔駛做? 嫁佐不可以擁有事業嗎? 我是那些嫁佐人就撓埋雙手係屋企做少奶奶既人嗎? 我希望成為一個在事業上有點成就的人呀! (我也不奢望有很大成就) 嫁給流沙包之前我都無諗過嫁佐唔駛做, 嫁給流沙包後, 佢屋企人個個都咁勁, 我就更加希望我可以職位高級D, 人工搵多D, 我不想被比下去呀! 雖然佢地無睇小我, 但是我自己會睇小自己呀!
但是, 我到底應該做D咩好呢? 我份人內向, 被動, 無口才, 寡言, 不善交際, 思想幼稚唔夠成熟, 唔鍾意打關係; 但是又好勝, 無耐性, 情緒化, 易忟憎. 要我想優點? 我諗極其量是斯文, 願意用心聆聽, 唔怕辛苦, 工作效率快吧...? 好了, 說來說去, 那即是向什麼發展好呢? 我有想過, 與其向自己不熟悉的行業亂碰亂撞, 不如還是向自己熟悉的地方繼續進發. 我熟悉的地方是什麼? 應該就是之前學過的三年日文吧? 雖然我有二級合格, 但是卻說不出一口流利日語, 我在想, 不如過日本進修一年日語好嗎? 錢不是問題, 十萬八萬我可以負擔, 但是, 用十幾萬過日文進修一年日文好, 還是用十萬八萬係香港讀一個master好呢? 如果去日本讀一年日文, 回來後我會在日本公司(或者同日本有業務來往的非日系公司也可)繼續工作, 可能會有更多發展機會? 我知道香港有很多人識日文, 到日本留過學的也不少; 但是去過日本留學同時又擁有大學學位的, 數量應該也不太多吧...? 如果選擇讀master, 又到底讀什麼好呢? 哪一條路對我的將來發展會更好呢? 過日本好還是讀master好? 還是先過日本讀日文, 回來後找一份更好的工作, 然後才開始讀master呢? 還是到日本讀master? 到底我可以怎樣呢? 最近不斷想想想, 卻沒有決定, 也不知如何決擇, 很煩很煩!!
13 則留言:
你有無同流沙包傾下呀,我諗佢應該俾到意見你既~~ 不過我想講就算做全職既家庭主婦都唔係一件易事,唔好睇少佢地呀 ...工作既野,你睇人好,人睇你好既o者~~唔好成日諗得咁負面啦~~不過我都希望你快d可以搵到你既斑想工作
係la, 同流沙包傾下la,我完全agree你講既嫁左都可以有自己既事業, 唔洗話好事業型, 但起碼個 title好聽d呀ma!!! 其實講自卑我就應該比你更自卑, 我讀完中五就走去讀兩年秘書課程, 之後一直都係度做d打雜工, 我真係名乎其實咩都冇...我而家都同你一樣煩緊轉工既問題...我想轉埋呢次工就唔轉, 想安定下來...(不過又好似唔得上進咁)想讀書又怕讀左唔係做個行就waste哂d $....十個煩
只想不做係無用架。無論你有多偉大，多完美的計劃，如果唔去實行，都只係空談咋。俗語有話：講多無謂，行動最實際。
吳家吾居, 三姑: 流沙包通常都係果句"你有咩決定我都支持你" 泰山不倒: 行動是遲早既事, 不過行動之前, 我希望可以諗清楚. 我唔想揀錯佐又行條錯既路. 我年紀唔細, 無咩時間/機會比我行得唔啱又行番轉頭再起步...
哈哈, 你同流沙包講你要既唔係支持係意見呀...哈哈 你都講得對, 唸清楚先好行, 我都後悔之前整係得個唸, 不經不覺就二十有多了....
呵呵! 好耐無上黎, 唔見一排果然大個女左bor, 識得唸下自己既問題, 畢竟而家女仔結左婚都應該經濟獨立, 唔係下下都要問老公攞既. 不過而家先唸好似遲左d wor, 最寶貴果段吸收經驗同上位既時間已經響tmh同thk白過左 (雖然我都係), 而家先想轉行似乎太遲lu, 當然遲比人起步唔代表不能成功, 但你要付出既時間同承受既壓力會俾一般人多, 同埋要有心理準備你既上司可能仲要比你年紀細幾年, 即係上位機會更微, mind 唔mind就要睇你點唸. 雖然學歷都好重要, 但要上位除學歷外經驗亦係一個因素, 所以你決定離開thk前真係要唸清楚, 自己係未有心理準備所有野重頭黎過(唔好忘記自己既年齡). 我既advice係你應該先做好而家既工作, 再train up 你既日文, 再留意相關既公司請人既情況, 好似sumida同toko都經常請人(之前sumida請左我做sale. eng, 但我reject左因為佢地公司響太古, 你知我住邊架啦! 最近我睇到佢仲請緊sales), 搵番同thk相關既公司會較易上位. 其實無論做咩決定都好, 先要衡量自己既能力同意向, 唔好一時衝動, 唔係樣樣野都可以番轉頭架(2.6 b wor, 無咩邊幾間公司有, 仲未計你7月果份)
我覺得一個人既性格決定前途. 以前我都有過你咁既問題. 我既性格同你好似, " 內向, 被動, 無口才, 寡言, 不善交際, 思想幼稚唔夠成熟, 唔鍾意打關係; 但是又好勝, 無耐性, 情緒化, 易忟憎. " 我通通有齊. 你既然做到間大公司, 你睇下真正上到位, 真正位高權重既人丫 (我指唔係靠擦而升職個d). 佢地唔止有個學位而做到高層, 最重要係個人性格問題. 要我撫心自問, 如果比我做佢個位我都做唔黎, 會唔自在囉. 我個人咁憂柔寡斷, 怕做決定, 實左唔係做大事既人. 舉個example, 如果你想做明星, 靚仔靚女唔係重點, 有就當然好啦. 最重要都係當事人enjoy, 鐘意成為焦點. 如果怕present, 唔鐘意出風頭唔鐘意做指揮既話, 不如安安份份做返個觀眾會岩d囉. 我建議你去進修日文好d, 日本公司福利會比較好. 搵個翻譯做下人工又高, 又穩定. 你覺得自己係唔係老細樣呢? 如果想發展事業, management既技巧會重要過知識.
你既 BLOG友都講得好正確, 搵工真係要睇性格, 我開始都有D開竅....
你al可能揀d科太高要求啦~~~ 我當年仲衰, 得CDE, 最後入中大讀PHYSICS咪OK囉~~~ 不過唔駛灰, 出到黎讀書同業事又未必成正比既, 後來進修仲緊要
學歷其實只是次要, 在歐美等地, 都不是著重看學歷的, 只是香港的環境怪怪吧。最緊要唔好自己睇少自己, 要對自己有信心, 這樣才是積極的人生觀, 努力, 加油, 一定有達成理想的一天 ~~!!
三姑: 流沙包都支持我過日本進修喎~ 蕭公子: 我之前都見到TOKO請人呀, 但問題係我唔想做番呢行喎... 我而家(暫時)決定去日本進修呀. 橄欖人: 我公司D所謂老細都係行行企企食飯幾味得閒上網日日HIGH TEA. 我做既呢間日本公司都係年功序列, 無論有無料到, 只要踎得係度有番咁上下日子, 公司就會升你職. 豬豬俠: 我揀D科都係要求DDEE咋麻, 唉~ 金城: 多謝來訪呀~
流沙包真係偉, 剛剛新婚都贊成你去, 咁你開始籌備未呀?
三姑: 我而家上網搵緊d大學別科既資料呀~
發佈留言