再去雅麗試衫

之前係街撞到君君, 知佢搵到份工, 唔會成日係雅麗, 本來約佐佢星期五七點半試衫, 點知佢記錯佐日子, 於是就搵其他人serve我啦. 今次我淨係同流沙包去睇, 而我之前hold起佐既衫淨係留番兩件, 其他全部揀過. 我心目中自己要五套衫, 分別係褂, 婚紗, 三套晚裝. 晚裝我揀佐一套胭脂紅(打算敬酒用), 一套青綠色(打算送客用). 本來想揀套金色, 但係試佐一套啡金色之後覺得唔啱自己, 之後個肥女人就係咁介紹其他我唔多鍾意既顏色比我, 我開到口話想要金色, 佢都好似get唔到咁. 最後介紹佐套深紫色比我, 我其實唔係太鍾意, 但肥女人又講得啱, 我揀既衫真係太類似, 又係膊頭有花花, 鮮艷顏色, 下身好多花花咁. 佢話著番D深色D既衫款, 分別大D, 好明顯你係換佐衫喎. 雖然我唔係100%認同佢既說話, 不過我都怕我揀既衫款太相似, 所以聽肥女人講就揀埋呢套深紫色.

本來我打算一套開席前影相, 婚紗就進場著, 胭脂紅果套就敬酒著, 青綠色果套就送客著. 但肥女人話而家都無咁分喎, 會開席前著晒咁多套衫出黎影相喎. 乜真係可以有咁多時間換衫咩? 換衫就要換埋髮型轉埋妝, 手飾又要轉. 假設我到時淨係換衫都唔轉妝勒, 但到時一定忙到死, 可唔可能開席前換到咁多套(褂, 婚紗, 三套晚裝)衫出黎影相呢...?

褂, 流沙包既禮服, 屋企人同伴娘既衫都仲未揀, 睇下新年果排佢地幾時得閒一齊去.