大榮華酒樓 -- 等位...

地址: 元朗安寧路2-6 號2樓
電話: 2476 9888

老豆終於返番黎香港, 於是某個星期日同佐屋企人去大榮華食晚飯.

 

我地六點鬆D去到, 已經超多人等緊位, 我地四個人等佐一粒鐘先有位.

 

我地叫佐以下幾樣菜, 菜名我已經唔多記得.

 

D野上得好快, 我地約一粒鐘就食完埋單走人勒.

 

井上日本料理 -- 辣到痴線...

地址: 元朗西菁街10號好順泰大廈35號地舖
電話: 2477-6138

上星期二晚放佐工同個friend係元朗食飯, 我地叫佐個地獄拉面(唔係我食), 韓式餃子鍋, 汁燒雞串, 串燒牛舌, 串燒雞軟骨, 鰻魚壽司等.

 

食物質素一般, 我最想講係佢個韓式餃子鍋, 痴X線, 我都知韓式既會係辣, 個waitress都強調呢個係辣既, 我亦都要求小辣. 點知... 係超辣囉, 變態架, 駛唔駛咁辣呀? 低能咩!! 我頂唔順要求佢地比碗熱水我, 我要用水過下D野先食得, 仲要過佐水都仲要係好辣果隻, 顛架!!

 

跟住D串燒又全部漏晒單喎, 唉, 真係... 好彩我地唔趕時間啫.

 

是次消費每人$100

 

三上日本料理 -- 都算幾好既

地址: 元朗大棠路紅棉大廈B-C舖
電話: 2411-1807

上個再上個星期五晚約佐個舊同事食飯, 元朗最多日本料理, 所以我地都去佐食日本野. 我地叫佐個蟹籽沙律, 鐵板帶子, 幾件壽司, 三文魚軟殼蟹卷同一個豬軟骨拉面.

呢度既食物質素都OK, 我覺得個鐵板帶子幾抵食, 用鐵板上大約有6粒帶子, size都唔算細.

是次消費每人約$90

 

 

元朗鄉村小廚 -- 不倫不類

地址: 元朗西菁街9號富盛大廈12-13A號地舖
電話: 2473-3966

 

星期日我地同阿媽去佐呢度食飯, 睇個名以為食小炒小菜啦, 點知入到去發覺無咩野好食, menu D選擇少到暈, 同埋好九唔搭八咁有好多泰式食品, 如泰式湯粉, 泰式咖喱, 珍多冰三色冰之類. 然後又有海南雞飯, 又有湯飯, 又有D小菜咁, 完全唔知呢間野想點.

 

食物方面, 我地叫佐瓜粒什錦湯飯, 蠔仔湯飯, 一個蜜桃骨, 一個窩貼小棠菜, 味道都OK既, 不過最最奇怪係果個窩貼小棠菜, 我地以為佢上錯菜添喎, 完全估唔到竟然會係咁樣...

 

是次消費每人約$50

喜尚海鮮酒家 -- 乜而家D酒樓成個food court咁...

地址: 元朗西菁街10號好順泰大廈一樓全層
電話: 2479 3003

端午節假期, 流沙包竟然唔使做野, 於是我地去佐新開果間喜尚酒樓飲茶. 而家D酒樓越黎越「多元化」, 除佐點心之外, 仲有京川滬點心如小籠包, 紅油抄手之類; 仲有泰式食物如泰式湯河, 泰式鳳爪; 同埋有壽司, 刺身及日式拉面添喎... 唔知幾時可以order埋牛扒, 焗田螺等等呢???

 

我地叫佐5個點心, 主要叫大點以下, 無叫特點頂點果D. 我地叫佐芝士長春卷, 紅油抄手, 小籠包, 餃子拼盤, 炸饅頭, 味道OK啦.

 

是次每人消費約$45

堂記辣蟹餐廳小廚 -- 無咩特別...

地址: 元朗水車館街榮興閣90號A-B舖
電話: 2479-6639

6月2號果日行完旺角(其實未行完, 不過已經好攰, 下次再繼續), 我地就返番元朗同阿媽食飯, 地方係阿媽提議. 呢度既招牌菜當然係炒辣蟹啦, 我地都叫佐碟, 我覺得味道就普普通通啦, 無咩特別. 我地仲叫佐個乜鬼炒米粉, 一個菜, 一個士多啤梨肉排, 一個粟米羹. 結論都係無咩特別囉...

龍島迴轉壽司 -- 平平地一食無妨

地址: 元朗西裕街

星期六係元朗食飯, 大部份想去既食肆我地都去過晒, 之前成日經過呢間舖頭見到好似幾平咁, 成日話搵日黎試下, 今晚終於決定黎呢度食飯. 壽司款式都算多既, 味道都OK既, 最平既款式$6, 成晚我見到$6既壽司只有蟹柳壽司; 最貴既係花之戀, $30. 其他既都係十零廿蚊左右一碟啦. 咁既價錢同質素我覺得可以接受啦, 平平地食下壽司...

是次每人消費約$70

新寶粥麵茶餐廳 -- 貨真對版喎~

地址: 元朗教育路50號兆明樓地下
電話: 2475-2566

星期六流沙包要朝十晚十工作, 一朝早出去(義務)教波, 之後去浸大吹大專盃, 夜晚返朗屏又(義務)教波. 之前講好等埋流沙包教完波返黎先一齊食飯, 等到十一點都未收到電話, 好肚餓呀, 谷鬼氣!! 十一點幾先一齊出去食飯, 我地去佐新寶茶餐廳, 叫佐個揚州窩伊面, 估唔到佢實際同影出黎張相幾對版喎, 算幾大碗同幾多料, 可能因為肚餓啦, 所以覺得好食.

Savour Cafe 品味 -- 元朗區黎講貴佐D

地址: 元朗達輝徑3號華健大廈地下
電話: 2442-2111

今日都仍然疴, 下午食佐個叮叮粥, 但夜晚死唔戒口, 去佐新開果間餐廳食飯, 我地叫佐個意大利海鮮意粉同黑豚肉既main course, 兩個都加佐廿蚊轉做餐, 有沙律, 餐湯同餐飲. 個沙律幾OK, 有幾片鴨胸(我食到係鴨胸, 流沙包覺得係火腿, 所以唔confirm係咪鴨胸). 餐湯跟蒜蓉包, 唔錯. 但個餐湯味道就怪怪地, 佢應該係什菜湯, 但唔多啱我口味, 我覺得唔好飲. 個意粉OK, 有魷魚, 青口, 蝦, 帶子. 個黑豚肉都幾好, 但幾多肥膏.

餐飲我加五蚊要焦糖朱古力, 我次次都係落完order先記得自己減緊肥, 仲叫焦糖朱古力真係想肥死?! 但係個朱古力好好飲啊, 如果冬天飲就勁正. 不過比我揀我都係去番利華麗餐廳, 一來多D選擇, 二來味道好似好食D, 三來呢間品味餐廳, 係元朗區黎講價錢真係貴, 同係出面尖沙咀食既價錢好似無咩分別.

是次每人消費約$165

佳記甜品 -- 元朗人唔會幫襯B仔, 但流沙包屋企人係屯門人...

地址: 元朗教育路大坑渠側
電話: 2473-3148

食完飯我地去佐舊B仔食糖水, 我同流沙包叫佐個B仔船, 有香蕉, 西瓜, 哈蜜瓜, 大樹菠蘿, 椰果, 桃, 同埋雪糕球. 無咩特別, 出面既糖水越黎越出色, 變相B仔就已經無咩特別啦~ 以前都仲會聽講有人專登揸車入黎食B仔, 我諗而家應該唔會架啦? 比我有車我調番轉出松記好過~~

是次每人消費約$20

生記山西刀削面 -- 唔係好好食...

地址: 元朗大馬路212號華昌樓地下D舖
電話: 2479-8033

上星期六晚黎佐呢度食飯, 今次係第二次黎食, 我叫佐個餃子紅燒肉手拉面, 流沙包叫佐個餃子鹵肉刀削面. 講真我覺得呢度D面麻麻, 餃子唔太好食, 紅燒肉都唔好食. 搞到我好懷念巴士總站果間北京水餃店...

是次每人消費約$29

嘉麗園潮州粉麵餐廳 -- 污糟到死, 又唔係好好食, 唔明點解咁多人幫襯

地址: 元朗康景街利景樓5號地下
電話: 2476-6882

星期一同流沙包去佐嘉麗園食tea, 聽講呢間野好出名, 而且咩時候都鬼咁多人, 諗住去試下啦, 我叫佐碗十寶河粉, 流沙包要佐碗水餃米. 十寶即係有十種唔同既丸同餃係裏面, 我數得出既有雲吞, 水餃, 魚皮餃, 豬肉丸, 扎肉丸, 兩款牛丸, 墨魚丸, 白魚蛋, 仲有一款我都唔記得, 另外仲有紫菜添. 但我覺得都唔係特別好食啫, 又唔係特別大粒, 講真$26一碗我覺得貴囉.

講真下次唔會再黎, 一來坐到鬼咁迫, 要七個人迫埋一張枱, 我隔離果個仲係肥師奶, 我又左手揸筷子喎, 食到我鬼死咁辛苦. 而且佢果度既衞生差到痺, 滿地都係垃圾同伙記落單果D紙仔, 執枱D阿姐佢唔係執枱架, 佢係將枱面上既垃圾同食物殘渣全部撥落地下架咋, 好恐怖呀~~ 都唔明點解會咁多人黎幫襯架!!

是次每人消費約$25

西鐵燒烤樂園 -- 唔好食, 去唔過. (+通宵麻雀)

國慶日流沙包好有興致咁入佐大嶼山銀礦灣參加沙排比賽, 我本來就諗住係屋企繼續閉關溫書, 傍晚流沙包打黎話元朗佢地今晚會去BBQ, 然後上振宇度打麻雀, 於是我就係屋企一路溫書一路等流沙包比完賽返入黎元朗. 結婚我地九點鐘先去到西鐵燒烤樂園, 呢個係新既燒烤場, 星期六先剛剛開張, $68位, 但係D食物唔得囉, 食物種類少, 得D好普通既腸仔, 紅腸, 丸丸(味道仲要麻麻), 雞豬牛扒雞翼(醃得麻麻), 金沙骨, 多春魚, 同埋有粟米, 方包同D茄子青椒. 飲品就每人包一支水一罐汽水或啤酒, 汽水又無得揀得百事. 炭就每個爐包兩包only, 唔夠用就要買, $15一包. 振宇佢話而家全元朗屯門都係做緊$68, 人地都不知幾多野食, 所以結論係呢個燒烤場完全唔得.

不過呢度有個無敵大銀幕可以睇波, 都總算有D賣點啦...

是次每人消費約$68

十一點幾燒完就上振宇屋企打麻雀, 今晚手風麻麻, 但都總算嬴百幾蚊, 但實際落袋既只有三十幾蚊, 因為輸家輸到唔夠錢比. 我凌晨四點打完八圈麻雀諗住返屋企, 但隔離枱玩緊一種好似叫「雀九」既遊戲, 玩都個個鬼咁投入, 然後又轉玩啤牌廿一點, 玩到天光六點幾先走. 本來大家話去飲埋早茶添, 但係早茶要七點先有得飲, 太眼訓所以大家都返屋企訓覺.

寶島茶居 -- 普普通通...

地址: 元朗千色廣場地下G23-24及59舖
電話: 2470-6011

星期日做完facial同男友黎食LUNCH, 我叫佐個酸辣手撕雞米線同一杯薑母奶茶; 男友叫佐個豬潤炒飯. 我個手撕雞米線D雞好靭, 奶茶一般. 但男友個豬潤炒飯好好味呀, 下次再黎我要叫炒飯食~

不過我覺得價錢貴佐少少囉, 都無加多幾蚊可以有埋餐飲咁既...

是次每人消費約$44元

New York Cafe & Bar -- 好味, 抵食!

地址: 元朗鳳翔路2-6號交通廣場地下33-34號舖
電話: 2478-9638

星期五晚同男友黎呢度食飯, 我地叫佐個小食拼盤(炸洋葱圈, 薯角同雞塊), 豬肋骨同埋海鮮意大利飯.

小食拼盤: 有好多洋葱圈, 價錢唔算貴.
豬肋骨: 幾好味, 另外配菜既粟米粒好好味!
海鮮意大利飯: 海鮮有帶子, 蝦同青口, 樣樣都大大舊, 好好味~

呢度舖仔細細, 但係我覺得環境唔錯, 同埋D waiters服務都算幾好, 會間唔中行埋黎問你覺得點, 食物得唔得. 呢度真係幾唔錯~

是次每人消費約$150元

一番 -- 環境差, 但抵食~!

地址: 元朗教育路29號地下C舖
電話: 35210387

唔知點解元朗咁鬼多日本料理, 咁多競爭下有D舖頭仲可以大排長龍, 於是我同男友都跟風走去排餐矇試下係咪真係咁抵食.

裏面當然好細好迫唔會坐得舒服, 張枱都放唔晒我地order既食物咁濟. 不過講真真係幾抵食, 同埋我覺得味道都唔錯. 我最鍾意叫芝士豬扒卷, 雞軟骨串同埋炒蜆(不過D蜆其實幾多沙下)

黎呢度千祈唔好叫壽司(除非你想淨食壽司塞飽自己), 係得舊飯大, 其實都唔抵食.

同埋元朗D日本料理多數就係人齊先比你入架, 同埋都會限時食, 真係無情講架. 因為日日都大排長龍, 佢地根本都唔休做. 如果你係接受唔到佢地既「規 矩」, 咁奉勸大家都係唔好幫襯元朗既日本料理, 因為真係貼錢買難受~ 又或者你可以比每人$100既最低消費(即係兩個人要食夠$200, 五個人要食夠$500), 咁就可以唔駛排隊攞籌又唔駛限時咁入去食.

是次每人消費約$70元

石崗咖喱屋 -- 抵食~

地址: 元朗阜財街14號地下
電話: 2476-7885

尋晚去佐呢度食飯, 其實年幾兩年前都黎過一次, 覺得好抵食. 所以今次同男友黎試下, 我地叫佐個1號set, 有個什錦燒烤, 咖喱雞, 什菜, 飯, 烤餅. 兩個人食食到好飽, 味道都唔錯. 幾值得一試!!

是次每人消費約$80元