台北三天之旅 -- 後記

其實台北呢個地方, 我幾年前已經去過, 亦都覺得無咩特別野值得再去.

 

不過因為呢一次係同一大班朋友去, 所以近近地就去台北. 主要目的都係想一大班friends一齊去旅行玩幾日, 所以去既地點都變得唔重要.

 

我覺得饒河街夜市值得去多D, 食物種類多過士林夜市好多. 不過士林夜市有好多舖頭仔行下, 如果唔係淨係為食野, 就士林夜市可以行耐D囉. 

 

聽人講阿婆鐵蛋好出名, 於是專登買D返黎香港, 點知我覺得好難食, 個皮好韌呀, 勁難先咬得開, 千祈唔好比老人家食. 反而我覺得醍醐大師鐵蛋好食好多.

 

係港鐵月台, 無論係年青力壯定健步如飛既都會湧去搭lift(即使隔離就係escalator). 但係台灣捷運, 唔係老弱傷殘都唔會搭lift, 同香港好唔同.

 

有個男性團友話係台灣好少見到肥婆喎, 我又無留意呀, 唔知係咪真既呢?

 

 

我好欣賞佢個idea:

 

2008年10月7日(二) -- 台北之旅 Day 3

今日試下食中式早餐, 但原來都係西式早餐好食D.

 

今日第一站去買出名既鳯梨酥, 旅遊書話10點開門, 但係原來10點半先開, 於是我地係M記坐下先(因為有團友未食早餐). 買完野先返酒店check out, 然後再去中正紀念堂.

 

今日仍然有落雨, 好討厭. 中正紀念堂我之前已經黎過了, 唯一唔同既係而家改佐名叫自由廣場囉, 我地影下相, 逗留佐一陣就走勒.

 

台灣行程既最後一站係西門町, 我係果度食佐排骨面,阿宗面線, 同超熱氣點醬薯條, 跟住就周圍行下. 我覺得西門町其實無咩特別野好行, 我地大約點幾鐘去到西門町, 跟住大家約實三點半集合. 我同流沙包係西門町係咁漫無目的地行黎行去, 我地又無咩野要買, D 0靚妹仔飾物衣著又唔啱我睇,  結果有時候一條街來回行幾次, 最後攰到頂唔順索性係M記坐到夠鐘算數.

 

之後我地就返酒店出發去機場(因為我地人多, 所以book佐酒店車直接去機場, share番都唔係好貴, 唔駛煩).

 

係機場食下野, 行下, 打下機, 咁就完佐3日既台北之旅lu...

 

第二日仲要返工返學呀, shxt!!

 

 

2008年10月6日(一) -- 台北之旅 Day 2

朝早起身先係酒店食早餐, 然後首站就去士林官邸, 果度係一個大花園, 個官邸就係花園裏面, 不過維修中哩...

 

之後我地就去佐便所餐廳(係呀, 我知香港都有), 我地叫佐馬桶甜品, 估唔到原來係咁大個架, 一大堆刨冰, 上面加D糖漿, 肚臍餅之類, 四個人share都未必食得晒. 不過D野上得好慢呀, 果陣人又唔係多, 但係D野等成大半個鐘先上, 嘥晒D時間.

 

然後我地去佐點水樓食小籠包, 不過我覺得味道都係不外如是. 呢個時候開始落雨啦, 討厭!!

 

食完飯我地打算行去維格拎紀念品(我地有幾張vouchers係手), 但係我地行錯路, 所以就放棄無去到. 直接搭車去北投啦~

 

去到北投無咩好行, 因為好多地方係星期一休館(係呀, 我地明知休館都照去), 結果行佐陣就走勒. 下一站去淡水, 我地去到已經天黑啦, 又落雨, 麻鬼煩. 我地沿住老街行下, 行上去買阿婆鐵蛋, 跟住就搭車走勒.

 

之後我地去士林夜市, 都係食下野行下街, 都無咩買到. 我覺得士林夜市無咁多野食啫, 好似饒河街多D野食喎...

 

去完夜市我地就返酒店, 果陣已經11點幾, 但我地唔係返去休息喎, 我地放低D野又出過去,  目的地係錢櫃. 台灣人唱K原來好鬼正經, 佢地無骰盅架, 真係唱歌就唱歌. 不過我覺得台灣既Karaoka比香港落後, 例如佢地仲用緊有線咪, 仲有歌書用歌號揀歌. 雖然果度都有個mon比你用歌星/歌曲分類去揀歌, 但我覺得系統落後, 又唔user friendly囉. 同埋D日文歌少過香港Neway... 不過佢地好在無果D呃人既花生果盤, 只有飲品既最低消費, 每位既飲品最低消費都只係廿零蚊港幣左右.

 

我地唱佐兩個鐘, 埋單每人百零蚊港幣(因為佢地有叫到啤酒同叫佐D野食), 唱到點零鐘就埋單返酒店訓覺.

 

2008年10月5日(日) -- 台北之旅 Day 1

早前班friends話唔知幾時有機會可以一齊出國旅行, 估唔到講下講下呢次台灣之旅竟然成行, 仲要一行8人添, 勁呀~

 

我地係自由行唔係跟團, 5號朝早機出發, 由於我地好遲先買package, 所以搭唔到國泰機, 唯有局住搭華航.

 

個飛機餐有小籠包, 燒賣, 同一個豆沙餡既包包, 再加件cheese cake, 比想像中好啦~

 

去到台灣後到酒店放低D行李, 第一站就去Hello Kitty Sweets, 點知full booking, 我地四點幾去到, 佢話要七點先有位, 於是我地係門口影幾張相就走勒.

 

之後我地就拎住旅遊書周圍行下, 首先去佐食頂好哨子面, 經過餅舖又買下曲奇餅, 有friends話想去睇Converse, 於是就去佐睇.  

 

然後搭車去101, 去到原來又唔係上去, 只係行佐陣, 逗留佐半個鐘就搭的士去夜市勒.

 

今晚最後一站係饒河街夜市, 好多野食呀, 我地食佐雞排, 胡椒餅, 花枝丸, 臭豆腐, 蚵仔煎, 腸腸等等, 當然唔少得滷味啦~

 

之後我地就返酒店勒. 我地住果間酒店叫微風商務酒店, 因為我地遲book, 所以要住D貴價D既房, 估唔到間房竟然有按摩浴缸喎??! 不過我地覺得呢間酒店可能亦都做埋love hotel, 因為房裏面竟然有condom提供...

 

 

第一日已經攰到死, 都係早D訓先. (早極都成點幾鐘先訓...)