地址: 土瓜灣北帝街32號地舖
電話: 2715-2889
終於都知道點解流沙包星期五晚話黎土瓜灣食飯, 原來佢睇星期五既AM730介紹呢間糖水舖, 於是一心諗住同我黎試下, 咁啱間大漠就係正呢間甜品舖對面, 所以就去佐食新疆野. 我地七點幾已經食完飯, 但係見對面間家甜屋潤落佐半閘仲未開, 走去對面睇下先知佢地今日有設備到, 所以要延遲開門, 哈, 又會咁唔啱時候既, 報紙呢日介紹, 佢呢日咁啱送設備黎, 真係倒米, 我見隔離有好多人都講緊睇佐AM730所以專登黎試下. 舖頭外張告示話八點會開, 到八點佢又話要再遲多半個鐘, 咁好啦我地周圍行一陣, 八點半再番去, 佢又話再等多十分鐘, 咁即係幾點開呀? 等到差唔多八點九, 門口都鬼咁多人等緊, 終於都開門.
我地叫佐個報紙有講既鮮果凍丸, 一個痴心太軟, 同一個南瓜棉花糖, 點知後尾話無晒南瓜喎, 又一項唔識做生意, 明知報紙登既話會吸引到人黎, 好心你就做定D準備工夫啦(唔好話我知佢地唔知報紙會今日登佢地間舖呀~!?), 於是我地改薰衣草梳乎里. 個鮮果凍丸先上, 唓... 無咩特別咋喎, 粒丸就大大粒, 但裏面粒生果就骰仔咁細, 味道又無咩特別, 有咩咁大賣點呀?
到個心太軟先精彩, 一上碟, 個心太軟已經爆佐, D朱古力醬流緊出黎, 個阿姐仲話: 「小心呀爆緊啦」. 好野喎, 爆佐既都可以攞出黎賣, 咩賣相都無晒啦! 之後仲成個塌佐落黎, 扁晒, 我當堂黑面. 第一, 你知唔知食心太軟其中一樣開心既就係你親手篤穿佢睇住D朱古力醬流出黎果種感覺呀? 第二, 大佬你仲吹捧自己間舖係乜野曾任職五星級酒店既名廚主理, 你整個心太軟你都預唔啱份量同時間既咩?!! 竟然可以焗爆佢既? 第三, 你焗爆佐都拎得出黎賣, 我完全覺得佢係唔尊重食客囉, 佢過到自己果關又好野喎, 完全係不知所謂!!! 我面黑唔肯食, 流沙包好無奈咁叫人換過. 好啦又再等一輪, 再上另一個心太軟, 我頂呀, 阿姐又係果句: 「小心呀佢爆啦」, 然後D朱古力已經流緊出黎... 唉, 唔止佢爆呀, 我都比你激爆啦! 我都無佢咁好氣, 我「得」佐句話:「是但啦原來呢度D質素係咁架」, 食落, 唔夠好食, D朱古力醬味道唔好. 我樓下許願樹都好食過佢多多聲, 至少唔會爆囉. 我真係第一次見識到D咁既所謂甜品舖. 
係呢度要同流沙包講句對唔住, 我知流沙包知我每日返工都唔開心, 抱住過得一日得一日既心態, 所以我知佢每個星期五都想陪我搵D好野食, 可以做完成個星期既工作好好地咁食餐好既. 我知流沙包同我黎呢度係想氹我開心, 但係就遇著一間咁既黑店. 其實個心太軟一上果陣我已經條氣唔順, 變晒形既心太軟都可以攞黎serve客? 我知我一黑面就會破壞晒流沙包為我安排呢一餐既心意, 我有想過就咁算數, 反正佢塌唔塌, 味道都係一樣. 但係我食野出名奄尖, 如果我真係算數食佐舊咁既心太軟, 我絕對係會背脊骨落囉. 所以... 對唔住呀流沙包, 我無用, 我唔識隱藏我既不滿, 令到你一番心機白費了, sorry呀!!!
呢間咁不知所謂既糖水舖, 你快D執笠啦, 唔好再係度昆人啦, 五星級酒店名廚? 我屁~~!!
9 則留言:
個阿姐都幾攪野, 好 like佢那句小心會爆...哈哈
d阿姐無論服務同態度都係麻麻.
我今日唔知睇咩又見到介紹呢間野喎...仲諗住去開土瓜灣去試下添...睇完你呢篇已經打消念頭啦~~
好多時報章上講嘅都係吹牛架。我都試過中招，去到啲話點正點好嘅，食落不外如是，
好邪呀!!!周圍行, 唔覺意入左去 http://hk.myblog.yahoo.com/jw!khR26aSZCRyNT_4nbYUHUw--/article?mid=393 不過我覺得佢係冇食過...好似雜誌咁
上次有一次特登去 土瓜灣北帝街 一間打邊爐 又好似你禁
吳家吾居: 去到既話會大開眼界... 泰山不倒, 三姑: 呢D鱔稿真係信一成都死~ 小熊子: 呢D野真係講彩數~~
當天真是有設備搬來，要將設備安裝好才能讓客人入座，否則誰願一邊吃東西，一邊聽著嘈吵拆天的設備安裝噪音。 許多事情都不是自己可以控制的，就正如設備要在晚上才運到以趕及產品製作的需要。同時，由於我是做傳媒的，更明白 AM730 要在甚麼時候刊登介紹，更不是店東可以話事。我知道《飲食男女》、《蘋果日報》的介紹，都是要編輯要改期才刊登。而且許多時候，新一代的記者不知道甚麼是真的好，所以造成「介紹」只是一篇虛有其表的文字。 另外，報章雜誌刊出的不是「鱔稿」，因為店東沒給錢刊登，或邀請報章雜誌試食然後來「介紹」，除非在報道中有「特刊」、「特輯」或「廣告專輯」等字眼，那就是店舖給錢做「鱔稿」的。 當然，食品賣相不好，食客絕對有權向店主投訴、反映，但請問「癡心太軟」的味道如何？ 我都試過您所要的三款食品，「癡心太軟」整體上可以，水晶凍丸沒甚麼，而薰衣草梳乎里，我和朋友吃過多次，也是他們覺得很不錯的一款甜品，所以口味這東西是見人見智的。 最後，要人家快D 執笠，似乎「惡毒」了一點吧！
真係多謝Lulu 大王有不同的意見. 首先, 個心太軟爆開佐都可以拎得出黎賣, 個阿姐仲要叫我地小心佢爆啦. 而我要求更換, 佢地一句道歉說話都無, 仲黑口黑面咁, 似乎心太軟焗到爆係佢地舖頭已經係家常便飯, 所以佢地一d都唔覺得有問題, 我要求更換仲好似係我有問題咁. 當然我都講就算佢有無爆, 味道都係一樣. 而家問題係: 如果佢本身係一間地踎舖, 無自吹自擂, 佢焗爆佐我唔會投訴, 因為你唔會要求一間地踎舖會有咩水準可言. 但佢呢間咁既所謂甜品舖, 舖頭出面都貼晒話自己係五星級出黎既人主理, 你自然會對佢有期望, 我無諗過自吹自擂到自己係五星級酒店出黎既人主理, 會拎d咁既賣相既甜品出黎賣囉. 真係好想知佢之前服務邊間五星級酒店, 原來爆佐既心太軟都可以拎得出黎賣. 比著d對食無要求既人, 可能唔覺得係問題; 但我就接受唔到, 可能佢之前既顧客大多數都係對食無咩所謂無咩要求既人, 所以佢就可以得過且過. 係佢唔好彩囉果日遇著我幫襯. 但我都講過, 你講得自己咁有經驗, 有咩理由份量時間都控制得唔好, 會焗到佢爆, 然後仲可以拎得出黎賣? 我之前食過咁多次心太軟, 真係未遇過d咁既質素+賣相既甜品囉. 我屋企樓下間餐廳並無標榜自己既廚師係五星級出黎既, 但係個心太軟無論賣相同味道都好過佢多多聲囉. 我個blog都寫佐: 「食落, 唔夠好食, D朱古力醬味道唔好. 我樓下許願樹都好食過佢多多聲, 至少唔會爆囉.」 仲要問我味道如何? 另外個梳乎里, 我亦都講佐: 「仲有個薰衣草梳乎里, 可能唔關個甜品事既, 係我食唔慣董衣草既味道掛」, 已經表達佐呢個係我個人口味問題. blog係一個可以隨意發表自己意見感想既地方, 我覺得難食, 你覺得好食. 無問題呀~~ 咁我係覺得難食喎~~ 同埋我真係好想佢快d執呀, 我係想香港可以少d呢類虛有其表, 誇大其辭, 混水摸魚既餐廳食肆囉. 唔知係一d希望呢類無質素又要死撐既餐廳快d消失既人惡毒d呀, 定係呢d無料扮有料繼續搵顧客笨既餐廳惡毒d呢?? 我個blog大大話話寫佐百幾篇食評, 試問我有無曾經批評過一間餐廳去到咁一文不值? 我有無叫過其他餐廳快d執笠? 而我竟然會叫呢間甜品舖快d執笠, 可想而知我覺得佢係幾咁差.
發佈留言