2009年12月25日(五) -- 台場

星期五, 我地去佐台場.

 

台場我都唔記得黎過幾多次了, 如果唔係為佐黎睇light up, 我都無咩興趣再黎台場.

 

台場小香港, 我印象中最少黎過四次... 等我返去對比番D舊相, 玩吓photo hunt先:

 

狗屁不通的中文, 好明顯係網上果D翻譯網譯出黎既傑作啦:

由於今日係聖誕節既關係, 所以D餐廳勁多人, 我地六點幾打算食飯, 好多餐廳一係就已經唔接受walk-in客, 一係就收得勁貴, 一個普通爛鬼course, 收5,800円一位, 只係食埋D普通野, 我呢D慳家C奶, 梗係唔會比佢打劫啦.

但係間間餐廳都鬼咁多人, 我又唔想等, 於是去佐一間完全唔駛等位既餐廳食飯, 就係... 太陽樓啦~

呢度係中華料理放題, 任飲任食都只係2千円多D(平日既話好似2千円有找添喎), 當然食物種類唔算多, D飲品麻, 係D勁溝糖水既soft drink囉... 想飲酒? 要付錢!! (間餐廳真係喺wine corner大大隻字寫住"想飲酒? 要付錢!", 連語氣都非常"大陸"式)

 

唯一既可取係呢度可以對住彩虹橋食飯, 所以總括黎講, 2千幾円都算係咁啦~

不過聖誕節係日本食中華料理, 我硬係覺得怪怪咁囉...

 

同埋呢間太陽樓係香港旅行團黎食飯既熱點囉, 我地坐低食佐個零鐘頭飯, 已經先後見到四, 五團香港旅行團黎食飯(聖誕節我都知勁多香港人黎日本旅行既), 我仲聽到有D團友抱怨"吓? 黎到日本食中國野...?"

而咁啱各團既領隊就坐係我地後面, 我聽到其中一個領隊話"我果團, 黎過日本最少果個, 都黎過9次啦". 嘩, 最少果個都黎過九次? 但點解黎過咁多次都仲係跟團既? 同埋我奇怪點解黎過咁多次都仲係黎東京既...? 為佐黎掃貨only?

好勒, 講佐好多無謂野, 都係post番D燈飾相先.

 

 

 

 

 

呢位街頭表演者幾勁架, 而且好風趣搞笑, 所以表演完之後都好多人"打賞":

咁長要黎做咩野?:

哈哈, 原來係收二樓既錢:

咁三層點呢? 佢係跑上三層收錢架, 好搞笑.