2009年12月31日(四) -- 白川郷之旅 part 4: dinner@民宿 山本屋

係出面食佐一輪西北風, 跟住就返番民宿準備食晚餐啦.

晚餐係呢個應該係客廳既地方食.

我初初以為民宿應該都係普普通通既膳食, 估唔到比我想像中正N倍, 有牛, 有天婦羅, 有刺身, 有燒魚.

右面個牛真係非常好食呀, 好食過前日係藤屋果個尾花沢牛:

由於呢餐飯真係好好食, 所以我同流沙包都食佐兩碗飯~

食完飯我地同民宿對夫婦(我估佢地應該係夫婦掛)傾佐陣, 我問呢排係咪成日落住雪, 佢地話唔係呀, 尋日都仲係好天架, D雪係今朝早先開始落(嗚, 點解呀... 我仲諗住呢度無咩燈火, 打算夜晚睇星星架麻)

係室內影出去既景色:

然後我地奇怪點解今晚得我地呢pair客, 照計呢D假期應該好多人黎白川郷先係架... 對夫婦話本來呢晚有10個客架, 但因為大雪既關係, 所以佢地黎唔到啦, 取消晒booking. 所以我同流沙包就好似包場咁, 今晚包起佐成間民宿, 我地可以慢慢咁食飯, 慢慢咁沖涼都唔怕會阻到其他人.

然後對夫婦話當初白川鄉觀光協會問佢接唔接受我予約果陣, 對夫婦見我係東京在住中, 諗住我都應該識D日文掛, 所以先肯接受我既予約咋. 佢話佢地平時都收到好多香港send黎既予約fax, 但因為係英文寫既, 對夫婦完全睇唔明; 加上對夫婦唔想雞同鴨講, 所以佢地推晒呢D唔識日文既港人予約. 我之前上網搵資料果陣, 見港人通常都係住大田屋, 我就唔知有無港人住過山本屋. 但如果大家識日文又想book山本屋的話, 最好比對夫婦知道你識日文呀~~ 唔識日文的話佢地一律唔會招呼的.

之後我地一齊睇紅白歌合戰, 睇完子供司會之後, 我地就返房準備訓了.

由於無咩好做, 我今晚10點幾就訓佐, 2010年我係睡夢中渡過囉. 係流沙包好有心咁打機打到12點, 到佐12點就叫醒我同我講新年快樂, 我醒佐五秒之後又再訓過...