2006年1月30日(一)
今日我地拖喼上小樽, 我地先將兩個喼放係小樽JR既locker, 然後就向小樽運河進發. 但我地一落到小樽就遇到好大雪, 於是我地決定去食飯先. 今日定佐去魚真食壽司, 呢間舖頭係我睇烘燶面包果本北海道之旅, 當地既導遊推介既. 我地每人叫佐二千幾YEN一SET既壽司, D魚真係入口即溶咁架, 好好味好好食呀!!
食完飯好好彩停佐雪, 於是我地先去運河影相, 有非常之多旅行團, 又撞正有間學校黎旅行, 仲set晒櫈係度影班相. 之後我地去佐D去小樽必到既景點如音樂盒堂, 大正硝子館, 北一硝子, 銀之鐘, 夢之音, 浪漫館等等. 我地仲去佐雪印食雪糕, 同埋去佐銀之鐘食tea(所謂既tea其實係得一件餅一杯飲品, 個杯飲完你可以拎走), 因為我要拎佢個銀之鐘HELLO KITTY杯~~
搞笑既係男友係香港都成日係街撞到朋友或者學生, 估唔到黎到北海道, 都會係北一硝子館撞到佢既學生...
我地行到入黑就搭車去我地今晚住既溫泉酒店--小樽宏樂園. 點解要住呢度? 因為佢有D部屋係設有露天私人溫泉, 可以係房裏面浸溫泉. 去到酒店果然好正, 間房非常非常之大, 望住個露天溫泉, 未浸落去都覺得好開心. 我地今晚係喺房裏面食飯, 有D著晒和服既嬸嬸入黎幫我地捧餐set野, 我地就換埋浴衣享受呢一餐. D日本野睇落就真係好靚, 碟碟都好精緻, 但食落去... 真係唔係太好食, 尤其是當我食中一碟不知名前菜既時候, 果陣味道真係令我即刻吐番出黎, 好難食呀~~ 食完飯有人幫我地執野同埋舖床, 個感覺真係好正.
不過最衰就係房入面無得沖涼, 要出去大浴場度沖, 好緊張呀! 入到去見到有個婆婆係度抹緊身, 哎呀, 好唔慣呀~~ 好彩浴場裏面無人係度, 於是我好快手就沖完涼出番黎, 不過個感覺都唔錯. 沖完涼返房之後就開始浸溫泉啦, 好正呀, D雪係頭上飄落黎, 外面又有雪景, 好好情調呀. 但浸浸下就聽到廣東話, 好明顯係隔離房傳黎架啦, 唉, 香港人真係無處不在...
今晚我仲睇到一個我好耐好耐無睇過既節目, 就係TOKYO FRIEND PARK, 以前係JET TV成日追黎睇, 估唔到個節目而家都仲有做緊, 但係D遊戲咁多年黎都係果D既?? 真係好野!!
沒有留言:
發佈留言