2006年1月27日(五)
今日五點幾起身, 發覺有D三文治同飲品放佐係個行李喼上面, 男友話原來係尋晚JAL既空姐派既, 都算係咁啦. 係toilet好簡單咁洗佐面就上去check-in, 我尋晚問佐空姐, 今日最早去札幌既機係朝早六點半, 大約半小時就有一班機. 我地六點上到去離境大堂, 發覺已經人頭湧湧, 我地個stand-by no.已經去到189同190號, 無奈地都要死死地氣入閘死等, 但班班機都已經滿晒, 去到八點幾既機, 都只係叫no.叫到3號, 於是我地諗住搵地方放低兩個喼再係機場裏面行下, 點知入閘後根本就無地方放喼, 航空公司又唔會同我地保管, 於是我地唯有拖住兩個喼走番出閘去番離境同到著大堂行下, 行行下我地見到JR車站路線圖, 又見到有coin locker, 於是便決定將D行李放係locker, 然後近近地去台場行下, 無謂係機場呆等.
去到台場, 其實都無咩特別, 因為我之前都有去過, 加上滯留東京, 根本上都無咩心情行街睇野, 心情跌到落谷底, 於是我地兩點幾就返番機場, 後尾發覺個輪籌號碼已經去到五百幾, D機都有番空席, 於是我地即刻搞手續登機. 上到飛機, 心情都仲好唔安樂, 因為一日未著陸, 真係驚又會因大雪而折返, 好彩最後終於都抵達千歳機場啦~
之後我地搭JR去札幌, 然後即刻去買JR PASS同預約埋全個旅程既指定席車票, 之後去到酒店第一件事就係沖涼, 然後先再出街. 我地今晚預約佐一間叫蝦蟹合戰既餐廳食蟹放題, 我已經一早係香港book佐枱. 但我地行行下盪失路, 越行越遠, 最後我地決定搭的士, 但我唔記得抄底舖頭地址, 淨係抄底佐個電話, 個司機又唔知間野係邊, 正當無奈之際, 個司機好好人咁幫我地打電話去間舖頭問地址, 最後我地都去到目的地(雖然比預約時間遲佐半個鐘).
入到餐廳, 終於都有啖好食啦, 我地叫佐4200YEN/人既放題, 有雪場蟹, 毛蟹同松葉蟹食, 另外仲有三款壽司, 三款天婦羅同蒸茶碗食, 但我未食夠一round就已經食唔到, 一來自己拆蟹實在拆到好攰, 同埋食食下都開始厭, 所以我地未夠90分鐘就埋單走人. 但真係好滿足, 係香港都食唔到啖啖肉既蟹, 好正呀~~
之後我地係薄野同大通果頭行下, 夾下公仔, 但係D夾公仔機呃人既, 我地一D收穫都無... 跟住就返酒店訓覺了. 好大雪, 好凍呀~~~
沒有留言:
發佈留言