北海道之旅開始... 未開始就要訓機場...

2006年1月26日(四)

今日係我地出發往北海道既日子, 我地搭09:45 UA852班機出發, 日本時間下午兩點幾到達東京成田機場, 然後我地再坐機場巴士由成田去羽田機場轉內陸機上札幌. 機場巴士好貴, 由成田去羽田要成3000YEN. 我地去札幌班機原定係18:00, 去到發覺班機取消佐, 提前佐去17:30果班, 本來仲以為可以快D去到北海道, 點知...

我地六點左右起飛, 我一上到機就訓到死佐, 紮醒望下錶已經係八點鐘, 心諗由羽田去千歳機場照計都係個零鐘頭既啫, 點會搭兩個鐘都未到架?! 後尾我用有限既日文同埋佢好難聽得明既英文聽飛機廣播, 原來千歳機場因為太大雪關閉佐, 我地要折返羽田機場, 我地當堂晴天PIG PIG~(但唔知點解D日本人好似若無其事咁照樣係座位度悠然自得咁...). 返到羽田機場後, 個空姐淨係每人派張咩野轉乘劵同一張預約機位既聯絡方法比我地, 由於我同男友都未試過搭飛機折返, 我日文又唔係好掂, 兩個人係機場非常之無助, 我地嘗試過打果個預約電話, 但又打唔通; 問空姐, 佢地又唔多識英文, 我用日文問, 佢地都淨係答要跟住果個電話去預約機票. 後尾有空姐話可以去60號counter預約, 於是我地就去拎返行李先, 然後再去60號counter預約(途中我地盲樁樁都唔知佢講既60號counter係邊, 周圍問空姐)

好辛苦咁去到60號counter, 當然是非常之多人, 當差唔多排到我地既時候, 先發覺原來個counter唔可以即場預約, 要打電話去confirm佐機位先, 然後先可以去拎機票既counter黎既. 最後好彩有第二個空姐出現, 可能佢見我地唔係日本人, 所以都安排職員幫我地即場confirm機位, 但最快都要第二日17:30既班機. 後尾幾經辛苦(我日文唔掂D空姐英文唔得)我先明白如果之前既班機有機位我地可以點樣提早上機, 原來要先去check-in counter做stand-by, 取得一個類似輪籌號碼, 然後就可以入閘, 跟住係每一班機既登機位置死等, 如果果班機有空席就會叫number, 咁就可以提早上機.

明白佐呢點之後, 我地再盤算今晚訓邊, 好彩我地係託男友個細佬買保險, 我地即刻打返香港問, 知道原來我地今晚可以每人有HK$5000既budget租酒店, 但無奈既係空姐幫我地check過係機場附近既酒店已經full晒, 得番橫濱果頭D酒店, 果陣都已經成十點幾十一點, 如果租酒店又唔知可以搭咩車, 車費又貴, 而且我地打算聽日一早等counter開就去做stand-by, 所以我地最後決定訓機場!

嗚嗚, 好慘呀, 搞清楚晒所有野之後我地先食晚飯, 由於太夜既關係, 無咩餐廳開門, 我地去佐間得番D齋面供應既地方, 我叫佐個唔知咩名堂既冷面, 好難食

. 食完飯之後就係機場揀個「好位置」訓覺, 嗚嗚, 好可憐呀~~