旭山動物園

2006年1月29日(日)

今日我地上旭川去旭山動物園, 最主要目的係睇企鵝巡遊, D企鵝真係好可愛, 肥嘟嘟咁. 我地仲睇佐好多動物, 例如海獅, 北極熊, 大象, 豹, 狸貓, 獅子老虎, 熊, 鷹, 馬騮, 免仔, 鴨, 羊, 鹿等等.

之後我地就返番札幌, 因為我地打算去白之戀人, 但又想去二条市場食魚生飯, 於是我地一落JR就決定搭的士去二条市場. 日本既的士真係好貴, 我地車程好似大約十分鐘左右, 但已經要1000YEN, 好貴呀! 但為佐爭取時間都無辦法, 去到二条市場總算好順利咁搵到我之前決定佐要去食魚生飯既舖頭--DONBURI茶屋, 我叫佐個丸鮮丼, 2079YEN, 好好食好滿足~

之後我地就趕去白之戀人, 果度六點鐘關門, 我地五點左右去到, 好快咁行一轉, 裏面真係好靚呀, 布置同裝飾都美侖美奐. 我仲係裏面試玩滑雪梯添, 但係我對鞋太「扇」, 自己又論盡, 搞到PK撞親個膝頭, 好痛呀~ 幾經辛苦先至躝到上去, 好辛苦好累呀~~ 之後我地係附近既超市買佐盒士多啤梨上車食, 好好味呀~ 好食過香港果D好多好多倍.

返到大通站之後, 首先去佐PARCO幫男友個細妹去TSUMORI CHISATO買衫, 呢間舖頭D衫真係超貴, 佢細妹話係日本買已經比香港平一半, 但我拎起手件件都成千幾蚊港幣, 最搞笑係當我地係舖頭裏面幫阿妹揀緊衫既時候, 剛剛出面有班香港人經過, 其中一個女人話: 「呢間舖頭D衫超貴架, 我係香港都唔會入去睇」. 但講真我好唔明點解佢D衫賣到咁貴既? 個款真係好普通, 有D甚至我覺得好老土好師奶下咋喎...

跟住我地行佐100YEN店CAN DO, 然後去佐狸小路買手信, 係果頭食埋咖喱飯就返酒店勒.