2006年1月28日(六)
今日我地去登別, 主要目的地係登別依達時代村, 熊牧場, 地獄谷. 我地搭JR去到登別, 然後再搭道南巴士往登別溫泉出發. 因為D巴士根本無每一個站既「站名一覽」可以參考, 上到車只能夠睇顯示牌先知道下一個站係咩. 我本來check好晒D巴士時間, 知道邊班巴士先會兜入時代村. 我見到顯示牌話下一站係時代村入口, 於是我地就係果個站落車, 但發覺果度人影都無個, 淨係得個時代村廣告指示牌指住條路上山, 於是我地都只有沿路行上去, 好彩到最後都無行錯路. 但後尾發覺原來我地落錯站, 我地落車果個「時代村入口」原來係指車輪進入時代村既入口, 而時代村門口其實仲有一個巴士站, 我比果個「時代村入口」既顯示呃佐, 搞到早佐落車, 唔怪得果個站得我地兩個人落車, 好傻瓜~!
入到時代村當然首先聽到廣東話, 跟住見到旅行團, 好彩個團之後就走佐, 佢地走晒之後成個時代村差唔多無晒人咁濟, 我地好似包場咁, 影D相係見唔到有其他遊人係度, 好正呀! 個時代村唔算好大, 好快就可以行晒. 不過我覺得裡面做野既staff都幾慘, 星期六成個時代村都無咩人既, 又凍又落雪, 係裡面做野都幾悶.
之後我地再去熊牧場, 搭纜車上到去之後, 發覺個場好細好細, 同埋冬天去既話好多小動物都無得睇, 真係淨係睇熊, 所以我奉勸大家如果去既話, 唔好揀冬天去呀, 真係好唔抵! 不過D熊好可愛, 隻隻都懶懶閒咁攤係度, 有D遊人買佐D食物餵佢地, 佢地竟然識揮手指示D人掟D食物比佢地, 真係好搞笑呀~ 好可愛~
之後我地就去地獄谷, 再行下溫泉街, 因為由登別溫泉返登別JR站既巴士都幾疏, 同埋D巴士落到JR站之後, 係要等好耐先有JR返札幌, 所以我地都覺得幾無奈. 但我地覺得咁樣係登別盪都唔係辦法, 所以我地決定搏一搏: 本來班巴士17:50先會落到JR登別站, 但17:48分架JR就會由登別開往札幌, 我地諗住差兩分鐘, 試下搏一搏, 希望架巴士可以早少少到, 可以趕到48分班JR. 但日本人實在非常準時, 我地落到JR登別站真係剛剛好17:50, 我知JR一向好準時, 但都行埋去JR站睇下班車係咪真係走佐. 去到見到個顯示牌仲顯示住17:48往札幌呢班車, 問下車站職員, 原來呢班列車delay佐, 個職員剛剛答完我地問題, 架列車就到勒, 估唔到JR咁準時, 都比我地遇到delay(果日無咩雪架喎), 真係估唔到我地可以趕到呢班車返札幌, 好開心!!
返到札幌後我地即刻追番之前因航機折返而無佐既一日行程, 我地嗱嗱臨去時計台影相, 去札幌電視塔, 去味之時計台食拉面, 終於都食到北海道既拉面啦, 好好食好感動呀~~ 之後都無咩地方好行, 所以好早就返酒店勒.
沒有留言:
發佈留言