層雲峽冰瀑祭

2006年1月31日(二)

朝早係酒店食早餐, 以我觀察所得, 其他食客唔係香港人就係台灣人, 係我地差唔多食完先有班日本人入黎食早餐.

食完早餐我地再浸多陣溫泉, 跟住就check out去小樽築港shopping, 但個商場無咩特別, 我地都係去狂鉗公仔, 收穫都唔錯. 之後我地就返札幌轉車, 因為今日要去層雲峽, 我地先搭兩個幾鐘頭JR去上川, 然後再係上川搭半小時道北巴士入層雲峽. 入到層雲峽鬼死咁凍, 又大風又落雪, 救命呀!

好艱辛咁由男友一個人由車站拖兩個喼返酒店, 呢間酒店都唔錯, 我地住既都係和室, 但當然無尋晚宏樂園間房咁大. 之後我地落餐廳食飯, 又係D日式course, 但我覺得今日呢餐就好食過尋晚果餐啦, 今晚我地仲有SHABU SHABU食, 我地都係第一次用清水打邊爐... 我覺得全晚最好食既係個甜品--牛奶布甸~

食完飯即刻向冰瀑祭會場進發, 我係呢個重要時刻竟然漏佐對手套係酒店唔記得拎, 好凍呀, 凍到對手好似唔係自己咁. 講真我覺得個冰瀑祭真係無咩特別, 又無冰雕睇, 只係砌幾個雪洞, 打D好靚好色彩既燈, 原來根本都唔係好靚, 我認為一D都唔值得去.