2006年6月10日(六)
今日去佐高登打算換con, 佢今次比佐Johnson果隻我試, 仲比多對我番去試多日, 如果OK既就換過盒con. 今次戴呢隻係舒服, 無上次果隻咁「銀」住對眼, 又無上次咁乾. 但係我就覺得好頭暈, 睇野好矇. 唔知係咪我本身副眼鏡比我本身度數多佐成百度, 再加上對con無散光, 所以我覺得睇野都係好辛苦, D字遠小小細粒小小我已經睇唔到, 同埋真係戴得好暈睇野好累, 所以又係戴唔夠兩個鐘就要除番落黎.
我咁樣真係唔係辦法喎, 以前我戴傳統果種都唔會戴到又頭暈又累, 以前我都係照咁全日戴返工都無問題. 我諗緊駛唔駛都係配番D有散光既con, 但要有我咁深度數既散光鏡片就一定要配2-week既先有喎. 價錢當然又再貴D... 都唔知點好~
夜晚落屯門同男友屋企人食飯. 搞搞下我真係唔想過關島結婚...
2006年6月3日(六)
今日約佐試妝, 試佐三個鐘, 總共試佐三個妝四個髮型, 我比較鍾意第二同第四個造型~~ 我都有自知之明, 我都唔要求化得我好靚, 因為我知就算點化我都唔會叫做靚, 我只要求唔好太豬扒樣都已經OK啦. 辛苦晒男友同細妹呆等佐三個鐘陪我試妝.
第一個造型:
妝是淡妝, 淺綠色眼影, 不是太粗的眼線, 沒有黐假眼睫毛. 髮型是兩邊留少少頭髮下來.
第二個造型:
濃妝, 紫色眼影, 粗眼線, 黐佐假眼睫毛. 髮型是淨係右邊dum少少頭髮落黎.
第三個造型:
化妝同第二個造型一樣. 髮型是後面dum好多頭髮落黎, 前面D陰有夾住少少.
第四個造型:
著褂既造型, 好似係紅色眼影, 都係粗眼線同有假眼睫毛. 髮型是鬢辮束起, 有少少毛仔dum落黎.
試完妝我地落尖沙咀太子酒店食tea buffet, 然後去打佐陣機, 跟住去睇達文西密碼. 節目很豐富的一天.
但是今天的問題是副CON好唔掂, 我只是戴佐幾個鐘, 已經覺得很辛苦, 覺得對眼好「澀」, 戴佐幾個鐘已經覺得對眼好累. 頂唔順去到太子酒店嗱嗱臨入toilet除佐副CON(好彩我都醒目帶埋副眼鏡出黎). 我個妹話照計眼鏡舖會比幾隻唔同牌子既CON比你試, 而且會叫你戴住半個鐘出去行下試下有無問題. 但我去高登配, 竟然無比幾隻唔同牌子我試, 同埋我戴上一陣再驗下眼無耐佢就叫我除番落黎, 都無半個鐘, 又無比我揀牌子同價錢. 同埋我返去睇清楚我盒CON既牌子, 竟然唔係JOHNSON, 係唔知乜鬼野牌子!?
2005年5月27日(六)
今日去佐配CON, 因為我終於約佐6月3日早上十一時去試妝啦(係太子), 所以嗱嗱臨去配CON先. 去佐高登配, 諗住佢地應該專業D, 驗眼等各方面會準D, 咁我第時就可以去第二度買CON麻. 去到佢話我散光度數太勁, ONE-DAY果D最多都係去到75度散光, 如果以我既度數, 只有兩星期果隻CON先啱我. 之後再驗眼, 佢話我而家戴緊副眼鏡度數, 比我本身既正確度數多佐一百度喎?!!(所以我以後都唔會再去A-LOOK配眼鏡, 當初都知佢地唔多專業, 但就諗住平D, 但結果我呢副眼鏡都唔平). 驗完就試戴CON, 佢話有散光果D要訂番黎, 所以比佐ONE-DAY無散光既我試戴下, 我同佢講我係諗住結婚所以先配CON, 都唔係諗住長戴, 視光師就話如果你戴佐ONE-DAY無散光呢隻都覺得睇野OK既話, 咁你都可以買ONE-DAY. 最後我當然選擇ONE-DAY啦, 價錢平D麻, 同埋我真係有特別場合先戴, 所以梗係揀隻平D啦~
高登買要$150一set, 我因為左右眼度數唔同, 所以要買兩set唔同度數既, 盛惠$300, 佢叫我星期二/三再去多次正式學試戴同試除. 但係… 我都係覺得自己唔戴眼鏡個樣好醜樣, 面肥眼細, 睇見自己個樣都想打爆塊鏡. 即使我結婚化晒妝SET晒頭都唔慌會靚得去邊… 只希望到時唔好太醜嚇親人…
2006年4月2日(日)
今日要出去拜山, 好耐未試過咁齊人, 一次過見番咁多親戚, 因為平時拜山都係得姑媽, 大伯娘, 三伯同幾個表姐. 估唔到今日會咁齊人, 除佐有大伯娘, 姑媽, 兩個表姐之外, 仲有表弟, 好耐無見既明哥哥同良哥哥, 明哥哥既老婆HELEN(堂嫂?), 大家姐同二家姐, 同埋大家姐個鬼佬老公STEVEN(我都係第一次見佢, 佢地結佐婚都唔係香港住), 好多親戚真係好耐無見.
拜完山我地過灣仔探阿嫲, 一行十五人去飲茶, 三家姐都黎佐, 良哥哥仲帶埋佢女朋友黎, 因為想齊齊整整比阿嫲見下. D親戚都知道我結婚, 佢地個個都好愕然, 話我咁細個就結婚, 佢地睇我個樣, 個個都話我得廿一, 二歳, 仲咩咁快結婚咁話. 然後我講我既真實年齡, 佢地都話唔信, 睇我個樣咁細個. 其實我覺得係大家太耐無見啦, 對我既記憶仲維持係細細個學生妹果個IMAGE, 明哥哥竟然第一句見到我就問我畢業未, 我話我都出佐黎做佐三, 四年野囉~~
同埋明哥哥知道我結婚, 即場同我傾生意, 因為原來佢地兩公婆同人夾份開佐間digital media既公司, 做graphic design, video production, advertising. 佢話計番親戚價比我. 佢仲話可以介紹D相熟既化妝比我添喎~
飲完茶送佐阿嫲返老人院, 我地就搭車返天水圍. 我地今晚約佐雙方家長見面, 我真係擔心到時傾唔掂數大家會面阻阻. 最慘係臨出門口出發去食飯之前, 阿媽又發晒脾氣, 老豆就例牌唔出聲, 真係搵著我黎搞, 好煩呀~ 我覺得自己成日係屋企都係見人講人話, 見鬼講鬼話, 佢地兩個搭車果陣分開企, 我就一時走埋阿爸度話阿媽又真係惡佐D既, 成日動不動就發脾氣, 一句說話唔啱聽就黑晒口面(其實我自己性格都係咁...), 我都知你捱佐幾十年架啦; 跟住我又走埋阿媽度話老豆一向性格都係咁架啦, 你都知佢份人一舊木又唔識溫柔唔識甜言密語, 我仲話口花花D男人先信唔過, 老豆把口唔識講野都係好事黎架~ 唉, 其實我做佐佢地個女廿幾年, 點會唔知佢地兩個D性格呀, 其實無話邊個啱邊個錯, 係大家成日口硬又唔肯妥協, 包拗頸咁, 餐餐都要冷戰下先安樂咁. 老豆仲語重心長咁同我講, 叫我第時結佐婚記住要對個老公溫柔D...
好辛苦咁勸老豆氹番阿媽, 我再加多兩錢肉緊, 終於係踏入酒樓前勉強和好如初, 一路食飯我仲要一路提醒老豆夾菜比阿媽, 真係... 除此之外我就低頭掛住食, 因為呢D場合我覺得有D唔自然, 話晒係雙方家長出黎講數, 好彩佢地都算傾得談笑風生, 不過我地要去到食晒飯上糖水果陣先正式入正題, 好彩氣氛都OK, 終於又過佐一關啦~~
2006年3月20日(一)
因為訂唔到翠亨村, 所以今日放工去佐聘珍樓睇睇, 點知4月8日呢日都一樣係有人落佐訂了, 正當我心灰意冷之際, 男友話原來4月7日都可以(不過呢日唔夠4月8日好), 佢即刻打電話返屋企問, 4月7日確定佐OK無問題. 原本4月7日都有人HOLD住佐, 但係果對新人過佐限期都未落訂, 所以我地即場落訂, 要佐4月7日呢日. 我同男友都好開心, 因為4月7日係星期六, 仲好哩~~ 而家暫定18~20圍, 落佐$9000訂. 咁啱今日有人擺酒, 我地仲可以睇埋個場既佈置係點樣, 感覺都唔錯, 不過我始終都係覺得細佐少少, 同埋D柱遮住佐幾張枱, 但唔緊要啦, 因為我上網睇過新婚生活易果個留言廣場, 聘珍樓既口碑係幾好, 聽講D野係幾好食, 希望到時大家都可以開開心心啦~~
2006年3月19日(日)
今日同男友又去婚紗展, 我地終於決定幫襯GLOBAL WEDDING去關島結婚, 而家暫定06年12月27日下午四點係CRYSTAL CHAPEL行禮, 費用$38380(未計high season既附加費, 到時可能係四萬幾蚊埋單), 係EXPO join可以減一千蚊, 同埋送VHS轉DVD, dinner同埋油畫, 都算係咁, 至少好過WEDDING ABROAD, 減得五百蚊又咩都無得送, 又唔包VIDEO, 價錢又貴過人~
婚禮教堂套餐:
酒店接送 Transportation
公証行公証 Notary Public
政府牌照 Marriage License
牧師証婚 Marriage ceremony by minister
租用教堂 Chapel rental
真人彈奏及高音獻唱 Wedding live music
証婚人 Two witnesses
結婚証書 Marriage certificate
新娘花球及新郎襟花 Bouquet & Boutonniere
新娘髮型及化妝 Bridal hair and make up
婚紗及禮服租借各一套 Wedding Gown & Tuxedo Rental
專業攝影 Digital snap (100張連光碟)
所有底片燒CD (jpeg) All netgative return in CD (jpeg)
錄影連影帶 Video taking (edited 30min. video covering chapel ceremony)
專貴相簿連21張相[8x12] Elegant Album with 21(8x12)
雙人直航來回機票及酒店 Round trip air-ticket & Hotel stay accommodation
跟住我地打算睇埋翠亨村訂埋酒席, 因為今朝男家果邊揀到日子, 係07年4月8日, 但係出年4月既酒席都好full下, 4月8日已經有人訂佐添, 所以我地都仲未訂到酒樓, 我覺得好鬼煩呀~ 都唔知點好...
現時為止去關島既人數應該有十個人(計埋我地自己), 全部都要老公包埋機票酒店, 好嗱利呀~~
2006年3月12日(日)
今日一朝早出佐旺角既MP17做水晶磨皮, 話說因為早前會展既婚紗展我地落佐疊, 比佐$168做佢話原價要七百幾蚊既水晶磨皮(我就唔信呢個係原價啦~), 我見百幾蚊咁平, 我做次FACIAL都係咁上下啦, 咪去試下囉. 所以就BOOK佐今日做, 但講真如果佢原價七百幾蚊就超唔值啦, 淨係幫你洗佐面, 跟住有支棒係你塊面度磨下磨下咁, 然後敷番個MASK就搞掂啦, 做完之後睇下塊面, 咪好似白佐D囉, 但皮膚好似無咩分別咋喎...
做完之後去簽名, 佢當然就開始SELL我其他野啦, 佢SELL我做彩光, 佢話我面色偏黃, 毛孔粗大, 話做彩光可以減退面色不均, 可以收細毛孔, 總之就皮膚靚靚啦~ 佢話做6次就得, 可以KEEP到十年八年喎, 佢話而家優惠價$15732, 包6次彩光($2760一次, 六次=$16560, 再九五折所以係$15732), 另外仲送多3次水晶磨皮, 2次氧氣噴射再生療程, 1次燕窩補濕療程, 1次DNA基因沖激美療, 一次黑光機(佢講完我都唔記得有咩效用), 另加兩套MP17既護膚品. 我有無落疊?? 緊係有啦~ 否則我點會寫到咁詳細呀... 我見有D朋友幫襯D唔知咩美容院都要萬幾蚊一個彩光COURSE, 咁我諗MP17都好似叫有D名掛?? 結婚真係要付出好大代價, 男家要付出酒席, 禮金禮餅, 過大禮之類既開支; 女方都要付出美容, 修甲, 做SPY, 新娘化妝SET頭, 租禮服, 束衣GIRDLE, 頭飾, 首飾, 鞋... 我諗夾夾埋埋都要預幾萬蚊?!
跟住我地去佐九展個結婚節, 果度又細又搵笨, 九成都係台灣婚紗攝影, 都唔係我地需要既野, 我地行唔夠半個鐘就離開, 白白浪費佐$30同寶貴既時間. 好彩後尾係德福撞到男友既舊同事, 佢地又係一陣打算去結婚節, 我地即刻比佐兩張飛佢地.
諗諗下而家姊妺團夾埋伴娘有成十個美女, 唔知男友搵唔搵到咁多兄弟應付呢? 兄弟人數可唔可以少過姊妹既人數架?
2006年3月6日(一)
今日放佐工一齊同男友去睇下D酒樓, 我地先睇佐聘珍樓, 果度個場幾細, 好似好焗促咁, 感覺麻麻. 但佢既PACKAGE卻唔錯, 包括好多比較實際D既野, 價錢就四千到抆加一另計(即差唔多五千五蚊一圍). 跟住我地去佐北京道一號帝廷酒家, 今日都竟然有人擺酒, 我地於是係門口裝下, 又問下D資料, 但兩個STAFF都有嚴重既鄉音既... 跟住拎佐D酒席資料, 呢間酒樓出年三, 四月既星期六日都差唔多FULL晒咁濟, 原來果度三千幾蚊起又有海景, 咁鬼平唔怪得咁FULL啦. 但我揭下份資料, 原來佢係屬於皇上皇集團架?! 我即刻將本野掉佐落垃圾筒, 呢間完全唔駛諗~
總括而言, 而家我地會考慮既只有美麗華商場既翠亨村, 同埋新太陽廣場既聘珍樓.
地址: 元朗西菁街9號富盛大廈地下
電話: 2477-9775
今日同男友黎食lunch, 我叫佐個酸辣香酥雞翼面加一杯薑母奶茶; 男友叫佐個香酥雞扒面加一杯薄荷綠茶.
雞翼同雞扒都好淡, 無咩味道, 但D雞扒就真係好大份好多舊.
男友話杯薄荷綠茶好難飲, 我杯薑母奶茶就唔多似薑母奶茶, 都無辣口既感覺既?!
非常一般既台灣面, 水準之下.
是次每人消費約$35元
地址: 元朗西菁街好順泰大廈28-29號舖
電話: 2478-9808
星期三同男友黎呢度食飯, 由於男友識餐廳老闆, 佢介紹佐好多菜色比我地, 我地叫佐個蝦刺身, 炒什菜, 扇貝, 椰盅焗咖喱雞, 烤餅, 炸芝士雲吞, 豬頸肉蝦片, 我叫佐個椰青添.
我覺得最正係個蝦刺身, 好新鮮好彈牙爽口, 勁好食.
個扇貝都唔錯, 好大粒~
豬頸肉蝦片, 好好味!!
炒什菜我覺得就麻麻地, D芥蘭好苦呀~
椰盅焗咖喱雞都幾好, D薯仔勁好味, 但面頭D咖喱雞就好少焗到乾佐少少.
烤餅整得好好味, 一定要試下!
炸芝士雲吞, 唔錯, 熱辣辣.
值得一讚既係呢度既服務好好, 好細心. 如果係元朗食開D貼錢買難受既日本料理, 可以介紹你地黎呢度試下, 服務態度簡直係天淵之別.
地址: 元朗青山公路元朗段123號開心廣場6字樓
電話: 2442-9990
壽司亭我幫襯過尖沙咀, 同幫襯過元朗兩次. 結論係我唔會再去幫襯壽司亭. 最後一次幫襯係上個月係元朗, 一入到去已經覺得超級凍, 我披住條披肩都仍然是凍到死, 我諗溫度應該得十零廿度, 痴痴地, 我淨係想快D食完快D走, 咁凍冷氣簡直就係趕客!
我地叫佐個五色刺身, 一個炸魷魚餅, 一個豆腐, 一個芝士乜乜卷(唔記得個名). 果個乜乜卷, 細舊到死, 仲要係卷爛佐既, 離晒譜呀!!
一句講晒以後都唔會再去壽司亭.
是次每人消費約$150元
地址: 九龍塘達之路80號又一城G-23號舖
電話: 3105-5055
某日同中學同學黎呢度食晚飯, 我地五個人叫佐六樣野, 其中包括一個飯一個炒河. 呢度樣樣野都細細碟, 根本完全食唔飽, 同埋味道只係一般, 我相信唔會再黎幫襯...
是次每人消費約$80元
地址: 元朗教育路29號地下C舖
電話: 35210387
唔知點解元朗咁鬼多日本料理, 咁多競爭下有D舖頭仲可以大排長龍, 於是我同男友都跟風走去排餐矇試下係咪真係咁抵食.
裏面當然好細好迫唔會坐得舒服, 張枱都放唔晒我地order既食物咁濟. 不過講真真係幾抵食, 同埋我覺得味道都唔錯. 我最鍾意叫芝士豬扒卷, 雞軟骨串同埋炒蜆(不過D蜆其實幾多沙下)
黎呢度千祈唔好叫壽司(除非你想淨食壽司塞飽自己), 係得舊飯大, 其實都唔抵食.
同埋元朗D日本料理多數就係人齊先比你入架, 同埋都會限時食, 真係無情講架. 因為日日都大排長龍, 佢地根本都唔休做. 如果你係接受唔到佢地既「規 矩」, 咁奉勸大家都係唔好幫襯元朗既日本料理, 因為真係貼錢買難受~ 又或者你可以比每人$100既最低消費(即係兩個人要食夠$200, 五個人要食夠$500), 咁就可以唔駛排隊攞籌又唔駛限時咁入去食.
是次每人消費約$70元
地址: 元朗洪水橋
電話: 2473-0168
其實幫襯香辣屋都幫襯佐好多年, 但感覺就係越黎越差, 無論係服務同食物都差. 對上一次係今年母親節黎食過, 本來都唔係想黎呢度食, 係想去泰馨食. 但後尾話無位所以先退而求其次揀香辣屋. 評價就係價錢貴, D野又唔好食, 無水準.
再上一次同男朋友屋企人一齊黎, 我地仲因為優惠問題同個經理嘈佐好耐. 個經理比番張優惠卡我地果陣仲夠膽死話我地張卡下年過期. 我男友細佬即刻話: 「我呢張卡係永久架(佢細佬識得個director, 所以有張永久優惠卡), 你無野呀麻? 不過我地都唔會再黎食架啦!」. 跟住就好谷氣咁走佐.
是次每人消費約$80元
地址: 元朗豐年路寶城洋樓地下
我本身住元朗 , 雖然已經久仰呢間舖頭既大名, 但咁多年黎都無幫襯過. 某日終於行過買佐碗外賣返屋企食.
感覺上淨係得個辣字, 又唔係特別好食/特別難食. 如果要食車仔面, 我寧願幫襯元朗廣場巴士總站隔離果間(唔記得叫咩名~~)
是次每人消費約$20元
地址: 灣仔港灣道30號新鴻基中心二樓
電話: 2827-7777
7月21日晚同男友行完書展, 於是就黎呢度食dinner, 我地叫佐個乜野奶酪雞, 一個大蝦, 同埋一個芝士菠菜.
講真我都唔係第一次食印度菜, 但可能我之前食果D餐廳就番少少香港人口味, 所以覺得OK. 但今次呢餐印度菜我真係接受唔到. D味道太複雜, 又唔算好食, 但又唔係難食. 我一向食量驚人, 但今餐食佐一隻蝦, 一舊雞, 少少菠菜就已經覺得飽. (都唔想食落去)
D waiters都係印度人, 但可能我英文唔好, 真係唔係好明佢地講緊乜...
地址: 尖沙咀彌敦道26 號東企業廣場4-5樓
電話: 2368-2800
某個星期五晚男友話想去食西餐据下扒, 本來我打算去Dan Ryan's, 但例牌FULL晒. 所以退而求其次去佐FRIDAY.
食物方面都算OK, 我地叫佐一個套餐, 再加一個什麼蕃茄雞意粉.
套餐方面, 我地小食要佐雞翼, 主菜要豬肋骨+蝦, 甜品要佐Brownie. 我覺得呢度既brownie好好食, 係我黎呢度必叫既甜品.
是次每人消費約$200元
地址: 尖沙咀廣東道5號海運大廈3樓LCX
電話: 2730-4866
某日同班大學同學出黎食LUNCH, 我地五個人叫佐個四人套餐, 另外仲叫佐樣什麼辣炒雞. 因為我遲黎, 所以佢地已經叫晒野, 我就淨係食, 唔清楚個套餐裏面既食物名堂.
個湯OK好飲, 用料都幾足.
黑椒牛柳炒雜菌: 我唔食牛所以淨食雜菇, 但都覺得好好味好入味.
四式拼盤: 串燒好一般, 春卷唔好食, 札肉普普通通 , 蝦丸OK.
南乳雞: 隻雞好鬼肥, D肥膏黃色一舊舊, 好恐怖.
炒檬粉: 味道一般.
辣炒雞: 唔算好辣, 都算幾好食.
仲有一碟係炸蕃薯同埋白色一舊應該係蝦球既物體, 上面有D蟹子, 我覺得呢個最好食.
甜品: 類似綠豆沙咁, 但唔啱我口味, 我唔鍾意食.
雖然我地五個人叫四人餐, 但係都食唔晒(可能女仔細食), 個個都食得好飽. 但埋單就勁貴, 夾埋茶, 餐前果D呃錢既酸蘿蔔, 埋單要$1109.
是次每人消費約$220元
地址: 元朗阜財街14號地下
電話: 2476-7885
尋晚去佐呢度食飯, 其實年幾兩年前都黎過一次, 覺得好抵食. 所以今次同男友黎試下, 我地叫佐個1號set, 有個什錦燒烤, 咖喱雞, 什菜, 飯, 烤餅. 兩個人食食到好飽, 味道都唔錯. 幾值得一試!!
是次每人消費約$80元
地址: 尖沙咀廣東道馬可勃羅香港酒店6樓
電話: 2376 3322
自己部門某日要同個日本人farewell, 去佐夜上海食飯, 果度D野食麻麻地, 但係收得勁貴, 菜單如下(一人份):
花雕醉雞+鎮江肴肉+涼伴海參+十八鮮+青瓜海蜇拌粉皮(一個碟裏面有齊咁多野, 每款少少咁)
砂窩雲吞雞煲翅(D雲吞唔好食)
龍井蝦仁(細隻到死...)
崧子黃魚(好細舊)
稻草札肉(唔知咩黎, 好難食)
金華火腿津白
陽春面(無咩特別)
蟹粉小籠包(每人一粒)
香米布甸伴茉莉茶雪糕(淡淡地但都幾好食)
本來收每位$350, 但好似bargain到$300一位, 另外包一杯飲品(有豆漿, 蔗汁同薏米水揀)
講真食物又唔係話好好食, 但係價錢就貴過出面多多聲, 好唔抵食囉. 好彩公司比錢啫...
是次每人消費約$300元
地址: 尖沙咀梳士巴利道18號洲際酒店Lobby Level
電話: 2313-2256
男友生日當天我book佐洲際既SPOON食法國菜, 我叫佐個6-course sexy spoon, 男友就淨係叫佐個龍蝦main course. 果然係米芝蓮三星級餐廳, 係非常非常好味呀! 仲有無敵海景 , 正呀~~
六道菜包括:
蟹肉燉蛋: 好味道, D蛋好滑呀~
帶子: 帶子面頭D配菜同帶子既味道好配合呀, 勁好味.
tasting soup: 分別係牛肉清湯, 蕃茄湯同菠菜湯, 好濃好味道!!
龍蝦肉同pasta: 呢個好好味呀, 正正正!!
主菜sea bass: 要趁熱食先好味.
甜品: 大份D就好勒...
是次每人消費約$700元
地址: 深水步西九龍中心七字樓711室
電話: 2360-2883
黎食過幾次, 覺得D野真係好好食. 尤其是鹹蛋炒南瓜同埋紅油抄手是必吃的!! 每次去都會叫呢兩樣野食. 而且價錢又唔貴, 最好就係星期日去都唔駛等位.
不過服務就麻麻地啦, 有一次去到我明明睇緊MENU, 個阿姐擺位果陣竟然拉開佐我睇緊既MENU就佢自己SET位. 果刻真係火都黎, 邊有人會咁白痴架?? 佢條友仲要唔係拉開少少, 係將個MENU拉到另一邊, 佢個 腦都唔知諗咩架!!
是次每人消費約$100元
地址: 元朗馬田路80號御庭居商場2號舖
電話: 31934732
我屋企樓下就係呢間糖水舖, 由鴻記幫襯到變佐表姐, 其實我覺得佢好似好多新款糖水咁, 什麼火舞黃沙, 金翡翠豆腐花, 麥提莎糯米糍... 但講真我覺得一點也不吸引, 所以都無叫過呢D新野食. 其他款式說實在也不是非常好吃. 如果不是近屋企, 才不會常幫襯它.
不過我覺得佢既腸粉不錯, 應該是即叫即整, 唔會焗到好難食. 我食腸粉最鍾意有醬比我任吱, 所以我最BUY呢度既腸粉~
由於係旅遊旺季, 度度都係旅行團, 撞口撞面唔係香港人就係台灣人, 尤其是當你去到D景點發覺已經有幾團人係度, 人又多, 香港人又出名嘈, 未見其人先聞其聲, 真係幾掃興. 同埋我地以為去到一D無咁出名既地方會遇唔到香港人, 但點知都係遇到. 好似我地係由網走既女滿別機場返番落東京, 以為應該遇唔到自由行架啦, 點知搭去機場同車已經有一家四口自由行香港人. 另一點就係好佩服唔識日文都選擇自由行既人, 即使我識日文都好, 係某D方面有時都好難同D日本人溝通, 尤其是飛機折返果晚, D空姐又唔識英文乜濟, 如果我唔係識D日文, 真係唔知應該要去邊度做D咩. 真係唔明D自由行唔識日文既話, 真係漢字同身體語言就可以搭夠?? 最佩服係果D一家大細, D仔女仲係小學生既家庭都選擇自由行, 唔會覺得麻煩既咩?
另外可能日本人本身自律, 好多景點好似唔買飛入去都得既. 好似時代村咁, 售票處同大門口約數十步路程, 但大門口果度無人查飛, 售票處D人又唔會坐係度昅實入場既人, 所以我覺得唔買飛就咁行入去都無人理. 網走監獄博物館就出口度無人睇無野欄, 真係可以係出口度入去唔買飛都得.
食方面, 我去到北海道最捨得花費既就係食, 係北海道既食飯地方都係我係香港既時候就search佐: 蝦蟹合戰食蟹放題, 二条市場既茶屋食魚生飯, 小樽既魚真食壽司, 甚至係東京食既串家物語, 都係我一早定佐去到一定要食既野. 唔駛講樣樣野都真係好正好好味~~
住方面, 我地係札幌住KEIO PLAZA HOTEL, 間酒店D房好細呀, 同埋呢間酒店比我既感覺麻麻, 下次再有機會去的話都唔好book呢間酒店. 小樽既宏樂園真係好正, 最正既係房裏面既私人露天溫泉, D雪一路係頭頂落落黎, 一路浸溫泉, 一路欣賞房外面既雪景, 真係好正呀. 同埋真係好抵, 又有溫泉又可以係房裏面食飯, 間和室又大, 都係港幣大約$1400/人左右, 真係好值得去呀, 本人極力推介, 有機會既話我想再去住下. 層雲峽我地住層雲閣, 間酒店都OK, 但可惜我果晚無出去浸溫泉. 上到網走我地住D平價酒店, 8000YEN一間twins room, 房間非常細, 但咁既價錢算係咁啦. 落到東京我地就住池袋既HOTEL THEATRE, 價錢都唔平, 我地屈蛇book佐間single room, 但都要8千幾YEN一晚. 但因為係日本屈蛇係犯法, 我又未係日本屈過蛇, 所以都好驚. 雖然我知酒店即使知道你屈蛇都未必會採取咩行動, 但我覺得屈蛇始終都好似唔係咁好哩. 另外最想講既就係間間酒店既房都係非常之熱, 我地已經將房裏面既溫度較到最低(但其實可能根本上就係中央空調, 較唔較都係咁), 但都係非常之熱, 訓覺都唔駛蓋被. 同埋房裏面非常之乾, 每朝起身都覺得喉嚨不適, 好乾涸.
今次去日本都夾到公仔, 但表現就無我以往咁顛咁變態啦, 以前我好多時三次之內就一定將景品到手, 但今次我既功力已經無晒, 好多時都係男友幫我夾上黎既. 同埋我覺得日本既夾公仔機都無以前咁「忠誠」, D鉗都無以前咁好力夾得咁實, 有好多都好似香港咁呃人既, 鉗啱個位但根本唔夠力鉗到上黎, 好失望.
仲有就係行李同手信既問題, 下次去日本我決定唔再幫人買野, 亦都唔會再買咩手信比大家. 今次我地去十一日, 其實淨係自己野都佔佐好多行李箱既空間, 仲要幫其他人買野, 搞到我地返黎除佐每人一個行李喼之外, 仲每人揹住一個大袋, 再手挽住幾個細袋, 非常之狼狽. 兩個喼夾埋差唔多成50KG, 我地個喼仲被繫上「HEAVY」既label, 好彩佢無罰我地超重咋. 同埋旅途之中, 成日要掛住幫人買呢樣買果樣, 都唔可以完全專心去玩去睇自己野; 二來幫人買完野我地又一抽二lung咁挽住D野繼續行程, 都唔可以輕裝上路. 而且買下買下, 發覺幫人買既野同手信仲多過真係屬於自己既東西, 真係覺得有點無奈, 所以我決定下次去日本唔再幫人買野啦!
最後一定要多謝男友送佐好多野比我啦, 有BURBERRY裙啦, 兩個ANGES B袋啦, outlet買既衫啦, KEROPPI啦... 等等. 總括我地既package費用同住宿費膳食費駛費車費旅費, 兩個人十一日大約用佐四萬蚊港幣左右(但未計男友簽卡買野果D數喎~). 咁計法我又覺得唔係太貴咋喎, 因為跟旅行團七日都要萬幾蚊團費一位啦(旺季麻), 我地去十一日每人大約都係花費二萬蚊咋喎, 我覺得幾OK. 不過下個月收到既月結單一定比旅行更加「精彩」...
我此行既日本之旅大約就係咁, 下一次既旅行目的地應該就係年尾既關島.
以下就係我地旅行買既戰利品同手信:
1. 男友買既運動服同埋幫佢班0靚妹買既波襪
今次係我咁大個女第一次睇雪, 其實之前都有朋友約我去北海道玩, 但我無答應, 一來無錢, 二來北海道其實係我一直好憬憧想去睇雪既地方, 之前我既心願係希望同自己最鍾意既人一齊去北海道睇雪, 過一個浪漫既白色聖誕/新年. 男友自從知道我呢個願望之後, 已經好早計劃今年農曆年同我過黎北海道, 而且咁啱今年新年係我生日附近, 所以我可以係北海道過生日.
未黎北海道之前, 周不時上網check天氣睇下有無落雪, 知道無雪落我會好失望, 因為我好想感受下落雪既情景係點樣既. 但去到札幌之後, 我發覺落雪原來唔係我想像中咁浪漫, 實在係非常之凍! 未黎北海道前好希望黎到可以落雪; 但黎到之後就日日都望佢唔好落雪, 哈哈, 好白痴~ 有時因為太大雪或者太凍, 我竟然嚷著要返香港, 真係無用.
先講景點, 我覺得白之戀人真係幾值得去, 成個館都好靚, 一塵不染, 佈置華麗, 比我既感覺非常之好~ 時計台同北海道廳真係喺門口影張相紀念就得, 我地都無入到去. 電視塔就無咩特別, 上到去好細, 如果東京電視塔你都覺得唔值得去, 咁札幌呢個你更加可以唔駛上去, 又係離遠影張相就得. 登別依達時代村都有D野睇既, 不過可能係我自己本身鍾意去睇呢D仿古環境建設既遊園地, 所以我會想去; 但熊牧場真係唔好冬天去, 極度唔抵! 若下次再有機會去登別, 我想夏天再去一次熊牧場同去登別海洋世界.
旭山動物園都幾值得去, 入場費唔貴, 只係580YEN, 離札幌都只係個零鐘頭車程. 最重要係去睇企鵝巡遊, 好可愛, 肥嘟嘟咁~ 最衰係無時間, 否則我想試下旭川既山頭火拉面, 聽講係好出名的.
層雲峽冰瀑祭真係令人失望, 講真我覺得無咩野睇, 係夜晚去D燈光打得幾靚咁囉, 但其實根本係無咩睇既, 又無冰雕, 只係有幾個雪洞, 真係唔多值得黎. 最慘係呢度好隔涉, 夜晚無車出番去, 一定要係度stay一晚, 但呢頭又無咩特別野睇喎...
跟住上到網走, 真係好可惜無流冰睇, 我地一心上網走就係為佐坐破冰船, 但無流冰齋搭船真係好似搭新渡輪過澳門咁, 好唔抵! 網走又係一個無咩野行既地方, 係網走果晚係我地咁多日之中最早返酒店既一晚. 如果無破冰船坐, 真係唔好上去好過.
總開支: $40,906
2006年2月5日(日)
今日終於都要離開日本了, 嗚嗚. 朝早我地先去佐上野買SKYLINER, 順便係車站locker放低埋個喼, 然後係附近食迴轉壽司. 跟住我地就去淺草寺, 講真我黎第五次東京先踏足呢度... 可能今日係星期日既關係? 所以好熱鬧好多人. 跟住我地就途經三越諗住行下, 因為我仲未掃到貨呀, 但係三越都無咩特別野行, 好失望呀.
2006年2月4日(六)
由於尋日去唔成PUROLAND, 男友唔想我失望, 所以今朝早再去過, 去到當然大部份都係HELLO KITTY既世界, 但好彩我都掃到唔少KEROPPI貨. 不過最遺憾既就係我夾唔到果個HELLO KITTY 30週年復古時計, 因為有個死八婆係度狂鉗走晒D景品. 好難得D職員先擺番D景品上部機, 但擺法已經唔同佐, 又無撕開果個盒位, 咁既款根本上就無可能夾得到, 好失望呀... 但好彩男友用佐個好醒目既方法去搞掂佐另一部金幣機, 我地拎走佐成八十幾個coins呀, 好開心~ 早知有呢個方法, 之前就唔駛嘥佐成二千YEN去夾啦~
2006年2月3日(五)
朝早我地先去上野既AME橫丁買平手信, 然後再落銀座, 激氣地搵唔到間ANGES B, 明明睇地圖係果個位, 但去到根本就搵唔到, 唔通成幢野拆佐? 於是我地就行其他地方, 我去佐BURBERRY買佐條裙, 退稅後24000YEN, 又去佐FANCL HOUSE幫阿娟買野, 去佐博品館, 跟住去不二家食飯. 然後就去PUROLAND, 點知我白痴記錯開放時間, 今日唔係週末, 17:00就關門, 但我地六點幾先去到, 好白痴! 但去到果度一間好大既運動用品專門店, 男友又掃佐D貨.
2006年2月2日(四)
今日我地終於要離開北海道啦~ 我地朝早先去佐流冰館, 見到D好得意既魚魚同埋好出名既天使魚. 跟住就搭巴士去女滿別機場落東京, 去到機場見到有個溫度牌, 係零下八點六度呀~! 但可能我地係網走呢兩日都陽光普照, 又無咩風, 所以又唔係想像中咁凍喎...
2006年2月1日(三)
今日我地要上網走, 我地先搭返巴士去上川, 然後再搭3小時JR去網走. 網走係一個唔算熱鬧既地方, 但一出JR就見到好多酒店. 我地先去酒店放低D行李, 然後就去網走監獄博物館, 跟住再搭巴士去坐破冰船.
2006年1月31日(二)
朝早係酒店食早餐, 以我觀察所得, 其他食客唔係香港人就係台灣人, 係我地差唔多食完先有班日本人入黎食早餐.
2006年1月30日(一)
今日我地拖喼上小樽, 我地先將兩個喼放係小樽JR既locker, 然後就向小樽運河進發. 但我地一落到小樽就遇到好大雪, 於是我地決定去食飯先. 今日定佐去魚真食壽司, 呢間舖頭係我睇烘燶面包果本北海道之旅, 當地既導遊推介既. 我地每人叫佐二千幾YEN一SET既壽司, D魚真係入口即溶咁架, 好好味好好食呀!!
不過最衰就係房入面無得沖涼, 要出去大浴場度沖, 好緊張呀! 入到去見到有個婆婆係度抹緊身, 哎呀, 好唔慣呀~~ 好彩浴場裏面無人係度, 於是我好快手就沖完涼出番黎, 不過個感覺都唔錯. 沖完涼返房之後就開始浸溫泉啦, 好正呀, D雪係頭上飄落黎, 外面又有雪景, 好好情調呀. 但浸浸下就聽到廣東話, 好明顯係隔離房傳黎架啦, 唉, 香港人真係無處不在...
今晚我仲睇到一個我好耐好耐無睇過既節目, 就係TOKYO FRIEND PARK, 以前係JET TV成日追黎睇, 估唔到個節目而家都仲有做緊, 但係D遊戲咁多年黎都係果D既?? 真係好野!!
2006年1月29日(日)
今日我地上旭川去旭山動物園, 最主要目的係睇企鵝巡遊, D企鵝真係好可愛, 肥嘟嘟咁. 我地仲睇佐好多動物, 例如海獅, 北極熊, 大象, 豹, 狸貓, 獅子老虎, 熊, 鷹, 馬騮, 免仔, 鴨, 羊, 鹿等等.
