小花身世之謎

睇開我個blog既人, 應該都知小花係邊個 同埋對我有幾重要.

之前我講過, 小花係我喺冒險樂園玩掟彩虹贏番黎既公仔.

我一直都唔知小花既"身世", 亦一直當佢係狗仔.

前排, 流沙包有個學生send咗張相比佢, 佢話係旺角潮流特區見到"小花"既蹤影呀!!

我即刻去旺角睇吓, 真係"小花"喎!! (好鬼"橋"呀, "小花"竟然同PIPI放埋一齊喎):

我即刻入舖頭問店員拎黎睇吓, 隻"小花"大隻D, 毛色無咁鮮橙色, 同埋D毛長D, 我睇埋個招牌, 原來係SUN ARROW出品??!! (我之前喺日本做野果陣, 曾經幫個朋友喺SUN ARROW訂過公仔返黎架!!)

之後我即刻上SUN ARROW個網站搵, 但係搵極都搵唔到"小花"既資料.

於是我嘗試喺D日本網站去搵, 但係漫無目的咁去搵, 又點會搵得到吖... (我連"小花"條line叫咩名我都唔知, 當時係舖頭又無記實個名, 一見到係SUN ARROW出品, 就諗住上到佢website就會搵到...)

後尾我把心一橫, send e-mail過去SUN ARROW問清楚, 我半夜send個e-mail去, 估唔到第二朝10點已經收到回覆:

お問い合わせの商品ですが、弊社で2003年頃発売しておりました「おとぼけアーニー」という商品のクマではないかと思います。
添付画像で当時のカタログ写真をお付けしましたのでご参照ください。

尚、現在は生産終了しておりまして、在庫がございません。
また、次回入荷も今のところ未定となっております。

(相片轉載自shopmaster@sun-arrow-giftshop.com回覆給我的e-mail)

(內容大致上係話呢個公仔係2003年發賣, 條line叫做"おとぼけアーニー", 而家已經無生產, 亦無庫存, 亦未知會唔會返貨)

小花身世之謎終於解開咗啦... 原來小花係熊, 唔係狗呀.

同埋... 原來小花係一隻"番梘"貨...

不過, 無論係點, 我都一樣係咁錫小花, 我反而覺得正版0既唔夠我0既小花咁可愛.

而我依然會當小花係狗狗, 因為小花還小花, おとぼけアーニー還おとぼけアーニー麻. 小花係我心目中係獨一無二, 不可取替的.