我係關島返黎囉~~

我返黎啦, 尋晚落機. 日記同相要用D時間先可以整理好post上黎, 大家拭目以待啦~

祝大家新年快樂呀~~

出發關島啦~~

我地今晚就出發關島啦, 夜晚十一點半機. 要12月29日晚先返黎香港. 返黎之後我就正式成為劉師奶囉~

祝各位聖誕同新年快樂呀!!

麗都總廚 -- 超抵!

地址: 屯門石排頭徑1號卓爾廣場3樓
電話: 2456-4888

今晚我地就出發飛關島, 下午我地去佐屯門飲茶, 今次去佐新開既麗都總廚, 食物就來來去去都係果D野啦, 但係價錢超抵, 我地八個人飲茶, 叫佐十幾碟野, 埋單都只係$305, 傻架, 好鬼平.

是次每人消費約$40

美麗都 -- 聖誕大餐

地址: 元朗馬田路80號御庭居商場1號舖
電話: 2442-4887

星期日晚因為要趕功課, 所似求其落佐樓下食飯, 我地去佐美麗都食聖誕大餐, 有南瓜魚翅湯, 有個頭盤, 有火雞, 主菜我叫佐個黑豚肉, 有甜品同餐飲, 未計加一$168.

個南瓜魚翅湯麻麻地, 以我既經驗果D應該唔係真魚翅. 頭盤同個火雞都普普通通. 個主菜佢放埋D古靈精怪既配菜落去, 同埋佢係半個薯仔咁上, 我想食薯條呀... 個甜品唔知係咩名堂, 一舊好硬既蛋糕, 唔好食.

是次每人消費約$180

 

2006年12月24日-- 做功課日

今日係大好既平安夜, 理應好好地出去玩下開心下, 但係... 我份assignment仲未做完喎, 所以今日都係留番係屋企做埋份功課.

我朝早先去佐做facial, 然後同流沙包去佐元氣壽司食lunch, 食完就番屋企開工做功課, 一直做到夜晚落街食飯, 我地去佐美麗都食聖誕大餐. 之後返屋企繼續做功課, 嗚...

今晚流沙包送佐份聖誕禮物比我呀, 多謝你呀! 但因為我呢排太忙, 完全無時間物色聖誕禮物, 同埋流沙包咩都有了, 都唔知買咩比佢好, 所以我今年無聖誕禮物送比流沙包呀~ (我答應嫁比你算唔算係最好既聖誕禮物呀? 哈哈~~)

甘潮潮式甜品焗飯專門店 -- 幾好食, 但座位超窄!

地址: 尖沙咀亞士厘道

星期六晚聽完音樂會打算搵野食, 都唔知食咩好, 平時lunch食飯成日都係附近食飯, 唔想放假出到黎又係食番果D野, 我話去亞士厘道, 但黎到又唔知食咩好. 見到呢間野新開, 於是是是但但就入佐去, 我地叫佐個蜆肉意粉, XO醬蝦球菠菜面, 馬碲沙清心丸, 同芒果奶皇丸.

呢度D野真係幾好食, 食完之後心情都好番少少. 尤其是個芒果奶皇丸好好食, 雖然好貴, $21得三小粒, 但食過之後好似上癮咁, 想心思思返黎再食過.

不過呢度既服務有待改善囉, 淨係叫斟水都要叫四次先至真係有人埋黎斟, 真係完全唔掂. 同埋D座位鬼咁窄, 行都行唔到咁濟. 雖然呢度D野係好食, 但如果服務質素同環境唔改善下既話, 就算幾好食D人都未必會返黎幫襯.

是次每人消費約$90

2006年12月23日 -- 返公司OT, 夜晚聽音樂會

今日下午返佐公司執埋放假前D手尾, 然後去佐做facial, 跟住就去佐文化中心聽港樂聖誕夜, 係由香港管弦樂團同香港兒童合唱團合作搞既音樂會. 講真真係好耐無去聽過concert, 一路聽腰骨一路痛, 好忟憎. 聽完音樂會之後心情越黎越差, 一來腰骨又痛, 二來返工又係尖沙咀, 放假又係尖沙咀, 係極度極度悶呀!! 我地連燈飾都無睇到, 求其食D野就搭車返屋企, 我超級黑面, 心情極差.

裕滿人家 -- 今餐好不知所謂!!

地址: 屯門石排路一號卓爾居地下G1號鋪
電話: 2461-9138

星期五晚返屯門做節食飯, 無錯, 又係裕滿人家, 唉... 今日冬至當然無佐果個好抵食既「求其一餐」, 我地叫佐個$288既翅, 西蘭花花枝片, 斑腩煲, 上湯龍蝦伊面, 賽螃蟹, 燒味拼盤. 個翅真係完全唔掂, 又淡又稀, 好似飲水咁. 西蘭花花枝片又係好淡, 又無鑊氣, 唔好食. 斑腩煲都還可以. 賽螃蟹普普通通. 個燒味拼盤D鴨鬼死咁肥, 果層脂肪仲厚身過D肉, 最離譜既係佢將D頭頭尾尾, 無肉既骨墊係底, 表面上睇好似好大碟咁, 但其實根本係無咩肉食, 離晒譜.

最離譜既係明明叫佐個上湯龍蝦伊面, 鬼咁耐都未黎, 催單先發覺佢地原來漏佐單, 之後上既又上錯, 黎佐個芝士龍蝦伊面, 我地唔想要芝士, D阿姐仲要話「芝士咪仲好食~」, 今時今日咁既服務態度?? 我地咪索性唔要叫佢cut單囉, 阿姐當然面口都變埋, 後尾我地連糖水都唔敢要, 費事佢加料報仇, 不過其實都唔知當晚有無糖水送, 因為我地話埋單佢地都無話送糖水. 總之呢餐完全係不知所謂啦~

是次每人消費約$100元

2006年12月22日(五) -- 工展會, 攞婚紗, 做冬

尋日考晒試, 今日係公司假期, 終於可以訓餐飽, 起身之後約佐流沙包係銅鑼灣等, 我地去工展會, 我都係第一次去工展會, 其實無咩特別野行, 係買佐D野食返黎, 同埋係會場食佐個燕窩流沙包, 蟹粉小籠包, 炸雪糕糯米糍, 同XO醬魷魚鬚, 仲買佐兩支豆漿添.

之後就上Global Wedding攞帶去關島行禮既婚紗同禮服, 然後就返屯門做節食飯.

 

2006年12月21日(四) -- 最後一科: Financial System, Markets & Instruments

今日考埋最後呢科, MC部份有D答案唔肯定, long Q我已經盡我所能答得幾多得幾多. 考埋最後呢科終於都考晒試啦, yeah!! (但仲有份assignment要交喎...)

出B仔, yeah!!

本來星期四考試我正常黎講都一定會請假準備, 但由於星期五係公司假期, 之後我就放大假到出年1月2號先會返, 所以好難星期四都可以放假; 同埋因為公司返埋星期四就放假既關係, 所以知道尋日會係出B仔既大日子, 咁重要點都要返公司聽下佢今年既B仔點計出黎.

轉佐新老細之後本來都無咩期望, 仲怕佢會cut B仔添, 點知今次年終花紅反而多過上年喎, 有2.6倍喎, yeah! 無期待果然係一件好事, 反而有驚喜~ 加埋公司之前比我果$1000結婚利是, 終於有錢還比流沙包, 有錢交下期學費, 有錢過關島玩啦, yeah~~

上午嗱嗱臨做晒D野, 下午偷少少時間出黎溫書, 總算溫得七七八八啦, 考埋星期四呢科就考完試啦, yeah! 

 

利華麗意大利餐廳 -- 正啦, 我的推介!

地址: 元朗馬田路38號怡豐花園66號地舖
電話: 2473-9786

星期三下午請佐半日假返屋企溫書, 流沙包放工返黎陪我出街食飯, 行均教育路都唔知食咩好, 因為我之前話好掛住利華麗既tiramisu, 所以今晚黎番呢度食飯. 我地叫佐個帶子幼意粉, 意大利海鮮飯. 呢度既食物質素真係幾唔錯, 服務又好, 人唔又多唔會好嘈, 餐飯可以食得好舒服. 最最重要既係呢度既tiramisu真係好好食, 我都專登叫D有甜品送既餐, 雖然舊tiramisu只係好細舊, 但真係好好食, 吸引到我心思思要再返黎幫襯.

同埋呢度D咖啡真係勁, 因為我預佐今晚又要溫書溫到好夜, 所以專登叫杯mocha飲, 雖然味道麻麻, 但係可以幫我溫書溫到半夜三點半都未覺太眼訓, 勁呀! 可以捱到睇晒咁多課notes.

 

2006年12月19日(二) -- Financial Statement Analysis

今日係考第二科既日子, 三科裏面我最緊張就係呢科, 因為呢科真係好鬼難, 又唔夠時間溫得晒咁多課(隔日就要考一科, 都唔知溫得邊一科好), 好彩阿sir份卷都唔算出得好深, 但我一向唔係追求合格既人, 我係追求攞A既人, 不過今個Sem考三科, 三科考試時間又咁密, 仲要搞聖誕過關島結婚D野, 真係無信心今個Sem既科可以A到... 唉, 我想試下三年都上Dean's list呀...  

2006年12月17日(日) -- 第一科考試: Business Strategy

今日終於要考第一科, Business Strategy, MC我有信心可以啱八成以上, 因為我真係睇晒咁多個chapter; 但係果兩條吹水essay就吹得麻麻地... 唉, 呢科如果有B+都好囉, 一向最憎呢D要做group project又要吹水既科, A唔A到要睇吹既野啱唔啱阿sir口味, 煩!!

Oriental Curry Shop

地址: 尖沙咀廣東道30號新港中心地庫 'Cooked Deli' B9號鋪
電話: 2272-0828

上星期五流沙包要上堂, 但係上堂前我地都有D時間食個飯, 快捷起見當然係去新港個food court. 我突然好想食咖哩飯, 叫佐個芝士雞肉咖喱飯, 味道一般啦, 可能唔係好肚餓住.

呢D天氣凍冰冰, 如果個餐飲可以有熱野揀會好D囉...

 

又返大陸...

話說13號果日我又要上大陸開會, 事緣係大陸班人過佐馬拉開會傾完D野返黎, 但係佢地傾既野有部份係我地呢邊香港office負責既工作, 佢地去馬拉之前又無同我地先開會, 傾完之後好似連我地負責既工作都由佢地話事應承埋對方做得到咁, 加上又好似有少少將遲出貨既問題推係我地身上咁. 我老細睇完佢地個report覺得有問題, 於是就話要上去大陸廠再傾番D工作流程喎...

其實我唔係抗拒返大陸既, 即日來回都有$100 allowance, 同埋如果我要返大陸開會, 我通常都係將個會定做1:30pm, 咁我果日就唔會返公司, 直接由屋企出發. 好似今次咁, 我約佐老細十一點三係皇崗等, 我可以十點先起身, 十點八出門口, 話咁快十一點三就去到皇崗囉. 去到開完會又只係三點鐘, call車三點半離開廠, 五點幾就返到入元朗, 其實都幾爽架, 可以遲D起身, 又可以早D返到屋企.

不過今日我又做佐樣白痴野, 我用e道過關, 咦? 點解佢話我張卡無效既?? 睇真D, 我個白痴婆竟然插佐張回鄉卡入部機度, "火羅"爆呀...

 

2006年12月12日(二) -- 睇第二次醫生

上個星期五發病之後, 星期六朝早已經即刻睇李君, 兩日藥$180, 無好轉過都算, 喉嚨仲越黎越痛, 不知所謂. 平時我唔係D亂轉醫生既人, 通常睇開一個就會繼續睇, 因為可以keep番D record, 醫生可以知道你以往有D咩病, 食咩藥會對你有效等等. 但呢個李君真係好唔掂, 所以我決定轉醫生. 洪太介紹佐個佢話幾好既醫生比我, 本來尋日打算去睇, 點知個醫生收七點, 唯有今日放工即刻仆返黎元朗睇. 呢個醫生$160有三日藥, 希望快D好啦~

(寫呢篇日記果陣我當然好番晒, 呢個醫生似乎幾掂喎, 食佐日藥喉嚨已經無咁痛, 第三日都仲有少少痛, 食完晒三日藥第四日起身, 真係咩喉嚨痛都無晒, 真係三日藥好番晒, 勁呀!)

景福軒海鮮酒家 -- 唔掂, 尤其是D服務

地址: 元朗朗日路8號新元朗中心2樓262~269號
電話: 2618-9098

上個再上個星期日同流沙包同振宇去飲茶, 黎呢度飲因為近番振宇. 呢度食物就普普通通啦, 都係飲茶果D野. 但服務就超唔掂, D阿姐真係不知所謂. 首先係我食食下野無啦啦有個阿姐成個人撞埋黎, 我以為做乜事, 原來佢係行埋黎執走食完既碟. 離晒譜, 撞到人唔好意思都無句. 跟住就係捧餐阿姐拎住個盤撞埋黎, 表示佢有野要放低黎我地呢枱, 又係唔該借借都無句, 仲要發覺原來D野都唔係我地呢枱, 不知所謂.

不如下次約振宇飲茶去第二間啦...

千之壽 -- 唔掂呀~~

我講既係御庭居果度間分店, 唔係舊B仔附近果間.

呢間野係樓下開佐咁耐終於都有機會去試下, 呢度既食物款式好少, 我地叫佐個三文魚, 鰻魚同帶子壽司, 一個燒雞中翼拉面, 一個辣味螺肉. 辣味螺肉好大兜, 但可惜得個大字, 食落去無咩味, 同埋感覺佢係雪佐好耐先賣得出咁囉... 壽司就不過不失啦, 又係大大舊果隻. 個拉面麻麻地, 個雞翼味道怪怪地, 唔知果D係咩醬汁, 又唔鹹又唔甜咁, 有D難食.

結論就係呢間野唔多掂. 一番都好過佢.

是次每人消費約$50

2006年12月9日 -- 病佐

黑仔! 無啦啦尋晚喉嚨又痕又痛又鼻塞都知今次嗱野, 今朝起身喉嚨超痛, 即刻去睇醫生. 好鬼老土, 我大大話話都三, 四年無咩咩過啦(唔講得架會烏鴉口), 竟然臨考試同結婚前先走黎感冒, 無野呀? 仲要呢個星期日日都廿幾度鬼咁暖, 咁都可以病得, 火都黎!!

流沙包陪我睇完醫生又要出去做野, 我就係屋企溫書, 下星期日要考第一科啦, 呢個時候休息係極度奢侈既行為, 點都迫自己要溫書. 夜晚流沙包返黎陪我食日本野. 

維記咖啡粉麵 -- 好懷念既豬潤面呀~

地址: 深水埗福榮街62號及66號地下及北河街165-167號地下D號
電話: 2387-6515

上星期五終於食到掛住佐好耐既豬潤面啦~ 本來流沙包提議去深井食飯, 不過最後改變計劃去佐深水埗食豬潤面, yeah yeah! 好掛住呀~~ 豬潤面又係唔駛多講啦, 正!!

北區醫院覆診

覆診時間改完又改之下, 終於都可以係星期四去覆診. 本來約佐三點九, 但係太耐無去過覆診, 唔記得要預幾耐時間搭車, 結果兩點九離開公司, 三點九先去到上水火車站. 等小巴都等佐三個字, 去到北區醫院已經四點三, 期間當然有人打電話黎催我.

去到見到有個以前從來未見過既醫生出現, 佢問counter係咪就係呢位 (意思佢應該係等緊我最後呢個病人呀?). 我當堂晴天pig pig~ 下? 周醫生調佐去第二間醫院呀? 嗚~ 我好仰慕周醫生架喎, 人又好, 又細心, 又有耐性, 外型仲同流沙包有D相近添喎, 鮑魚刷, 黑黑實實好sporty咁. 見唔到周醫生啦?! 嗚嗚, 好失落呀.

入到房檢查, 四號房個名牌仲係周醫生個名喎, 原來周醫生今日有事無返, 啊~ 嚇得我呀~ 今日睇我呢個醫生好搞笑, 不過因為佢唔係follow開我, 所以幫我睇完, 無大問題, 好快就走得勒. 再約半年後再番黎覆診.

不過今次黎覆診唔係見主診醫生, 其實根本follow up唔到D咩, 算係白行一趟, 同埋浪費佐$60覆診費.

Dan Ryan's Chicago Grill -- 唔駛多講

地址: 九龍塘達之路80號又一城L2-28
電話: 2265-8811

上星期三揀完相都九點幾餓到死, 去佐又一城食飯. 我, 流沙包, 同埋我個妹三個人食飯, 我地叫佐個小食拼盤, 有薯皮, 洋葱圈同雞翼, 同埋叫佐個雞肉長通粉同豬肋骨拼雞.

質素就唔駛多講, 夠份量又幾好食, 一定要讚下個雞, 勁好食, D肉鮮嫩又唔靭, 唔會好似平時食到成口渣又難0趙. 我地三個人食唔晒D野, 好彩咁啱有帶飯盒係身, 於是將食剩D野包埋屋企食, 幾環保~

不過我想講個肥仔侍應好唔掂, 又無笑容, 招呼又求其.

是次每人消費約$130(學生証有九折)

羅浮宮揀相, 令人失望...

唉, 等到頸都長埋終於都等到星期三晚去羅浮宮揀相, 見之前幾張數碼相都幾滿意, 仲滿心歡喜諗住其他正式既菲林相會仲靚. 點知睇到D相, 好令人失望, 可能我當初期望太高啦, 出黎既相唔係我想像中咁靚, 男友笑得唔自然, 我塊面都係好肥. 同埋D post同角度都好似麻麻地咁, 我地揀既都係D最最common同普通既post囉, 其他叫做特別少少有D搞野既post大部份都比我地out晒. 

我去到佢先比雙人相, 跟住比單人相, 再比對相, 然後再比effect相我地睇. 我揀相果陣分佐三parts, 第一係一眼就唔鍾意即out既相, 第二係一眼就好鍾意一定會要既相, 第三就係未決定要唔要, 暫時hold起既相. 成批相我諗大約有百幾張. 我地第一眼就鍾意既相只係得四相, out晒第一眼就唔鍾意既相之後, 淨低要與唔要之間既相就得番四十幾張. 咁我見通常D人都係揀四十張左右, 咁我地最後都懶得再揀, 就要晒42張相勒~~

即我地揀多佐22張相, total 42張相(其中8張是effect相), 本身個plan A包括:
-20X24"油畫1幅連相架(C+)
-10X12"相片1張
-5X7"相片2張
-4X5"相片6張
-8X12"相片20張 連
-銀裝系列套裝相簿連相簿盒一套
-(奉送選晒底片20款)

最後加佐$8088變為:
-20X24"油畫1幅連相架(C+) -->變佐做B+
-10X12"相片1張-->取消
-5X7"相片2張-->取消
-4X5"相片6張-->取消 (取消散相因為佢話係coating度可以再平D比我地喎...)
-8X12"相片20張 連
-銀裝系列套裝相簿連相簿盒一套-->變佐兩本大相簿, 一本20張(原來既銀裝相簿), 一本22張(佢話既雜誌款相簿), 入晒我地42張相, 全部實景, 無電腦效果.
-(奉送選晒底片20款) -->而家有42張底片

-另外仲有4張2X3"相.
-兩本相簿做晒coating.

無其他啦, 無細相簿, 無簽名布(我傾到後尾都無心情再問簽名布). 總之而家有既得一幅B+油畫, 兩大相簿包coating, 4張2R相, 共42張底片.

老實講到今日星期一寫呢篇blog果陣都仲係好唔開心, 甚至有少少抑鬱啦, 每次諗番起個心就嗱住嗱住好唔舒服...

聘珍樓 (尖沙咀) -- 而家先試菜??

地址: 尖沙咀廣東道28號新太陽廣場2樓
電話: 23757123

其實我之前唔知咩叫試菜, 我曾經以為試菜係你決定係某間酒樓落訂之前, 去試下擺酒果陣會有既菜式, 睇下味道得唔得再決定book唔ook果間酒樓. 當然而家先知所謂既「試菜」, 其實只係指你普通去幫襯食餐飯試下果度D水準.

話說數月前我未來姨仔話民民(我未來叔仔?)簽佐張百萬大單, 於是佢地打算不如12月民民生日去聘珍樓食飯慶祝順便試菜. 後尾雖然張單就未簽得成, 但我地都照原定計劃去食飯. 我打電話去訂枱食飯都表明我出年會係度擺酒, 問佢我地黎食飯會唔會有咩special discount, 條友竟然反問咩野special discount... 我頂! 佢話用Marco Polo卡會有九折喎...

我地叫佐個每位$288既套餐, 有頭盤, 桂花蚌+蝦炒芥蘭, 翅, 海參鮑魚, 明太子炒飯同甜品.

頭盤: 有叉燒, 唔知咩菜類同牛展, 叉燒好好味, 好腍好軟, 口感完全唔同平時街買果D又靭又肥.

桂花蚌+蝦炒芥蘭: 桂花蚌非常爽口, 好食~

翅: 勁掂, 好足料好有份量, 一D都唔稀. 阿娟佢地尋晚飲完, 佢地話呢個翅好過佢地尋晚去飲個翅多多聲. (如果我地出年擺酒果陣個翅都係咁就好囉, 至少唔會比姨媽姑姐唱)

海參鮑魚: 好腍好入味呀~

明太子炒飯: 好特別, 味道幾好.

甜品: 有芒果布甸, 楊枝甘露同紫米露(好似係)揀. 我揀佐楊枝甘露, 但我覺得麻麻地好食. 反而個芒果布甸夠特別, 佢唔似人地勁開粉果D無味布甸, 佢果層唔知似係豆漿定咩野做成既布甸好好味好特別.

成餐飯我地都好滿意(梗係啦大佬成3百蚊一位喎), 不過最衰今晚無人彈琴又無人表演拉面. 最後埋單8個人共二千四百幾蚊, 我阿媽爭埋單出佐二千蚊(其餘果D又係流沙包比?). 希望出年擺酒果陣D野都係咁好食啦~~

是次每人消費約$300

攞結婚戒指

對結婚戒指訂佐好耐, 一直都未去攞, 星期二終於去拎佐, 個盒好靚呀~

係VCA既戒指, total $15500.

西湖春天 -- 超抵食!!

地址: 佐敦彌敦道219號倫敦廣場11樓
電話: 3156-2198

揀黎呢度食飯果然無錯, 又抵食又好食. 我地叫佐個六人餐, 連湯連甜品都有九樣野, 但個餐都唔駛六百蚊(未計加一茶芥果D), 每樣野都好好食, 有兩個大男人係度都食唔晒, 仲淨底唔少野係度.

條魚好大條好好味; 個雞都唔錯, 唔係太肥味道幾好; 其他既我都唔記得咩名堂, 但無一樣野要彈囉, 下次有機會會再黎食.

本來諗住呢餐飯我請, 點知原來筆友個friend已經靜雞雞去櫃面埋佐單, 多謝晒~

我的外國筆友

話說係十幾年前, 當我仲係一個form 1仔既時候, 果陣好興交筆友, 我記得果陣有一個外國既筆友公司, 比少少錢, 你就可以識到世界各地既筆友, 我果陣識佐個係英國同係新加坡既同齡女仔(新加坡筆友佢識D中文, 但主要我地寫信都係用英文). 果陣我地都好熱衷咁信來信往, 但寫得兩, 三年, 可以寫既野都寫晒咁濟, 每年既傳統節日都形容得七七八八, 漸漸就開始少聯絡, 之後就直情無再來往.

幾年前, 突然收到新加坡筆友既來信, 佢話大家都好耐無聯絡過, 所以寫佐封信比我講下自己既近況, 佢而家已經做佐護士, 係當地既政府醫院工作. 我收到佢封信之後其實一直都諗住回信, 但係自己又懶, 拖拖下拖到今年先回番信比佢, 信裏面我寫佐自己既e-mail address同MSN, 就咁我地就由筆友變佐做網友勒.

上個月佢MSN話12月會黎香港旅行, 問我有無興趣見面, 我答佢當然有啦. 佢會先去澳門, 然後12月4日會由澳門搭船黎香港. 我12月4日臨放工收到佢電話, 佢剛剛落船, 於是我地就約今晚食飯, 臨急臨忙我都唔知去邊度食飯好, 佢話佢住係佐敦, 於是我就放佐工行落佐敦, 沿途睇下有咩野好食, 最後決定去西湖春天食京川滬菜.

筆友佢今次同埋3個朋友一齊黎香港, 我地total五個人一齊食飯, 成餐飯既氣氛好好, 我筆友同佢個女性朋友都識講廣東話, 所以我地成餐飯都用廣東話交談. 但另外兩個男性朋友就淨係識聽唔識講廣東話, 所以佢地大家溝通既時候就講英文. 我地成餐飯講佐好多野, 筆友個女性朋友又得意又健談, 成餐飯食得好開心~

餐飯由七點食到九點, 我問佢地之後想去邊, 佢地話想去廟街, 於是我就帶佢地行去廟街, 之後我就搭巴士返屋企.

好唏噓, 不經不覺就十幾年了...

裕滿人家 -- D野係好食好抵, 但唔好再黎得唔得...??

地址: 屯門石排路一號卓爾居地下G1號舖
電話: 2461-9138

星期日去親戚度睇完slideshow就要番屯門, 因為今日民民生日, 所以夜晚一齊食飯. (但點解生日正日唔同女朋友出去玩下慶祝下既?) 又係裕滿人家... 唔好啦...

我地又係叫佐求其一餐, 有六個餸, 有蠔仔砵, 韮菜炒蜆肉, 咕嚕肉, 鎮江排骨, 魚香茄子煲, (仲有個餸唔記得lu) 另外仲叫多個香煎銀鱈魚, 瑤柱肉環甫, 同一個響螺湯.

其實D餸菜係幾好食, 不過即使幾好食都好, 我都唔會亦唔鍾意去黎去去都係同一間食肆, 試下新野好唔好呀...?

 是次每人消費約$100 (點解又係流沙包埋單既?)

去睇婚禮攝影samples

星期日去意粉屋食完飯就上佐親戚度睇samples, 選擇幫襯親戚其中一個最大原因係我好鍾意佢地做既進場slideshow(即係show由細到大既相), 暫時為止我都未見過咁得意既slideshow, 我諗到時現場既氣氛一定好好, 雖然佢地收既價錢比金都貴一倍, 但我相信出黎既效果應該會好好.

意粉屋 -- 穩陣既選擇

地址: 鰂魚涌太古城中心二期1樓121號
電話: 2568-0770

星期日fitting完去佐太古, 因為要上我親戚度睇多D samples(我親戚part-time做婚禮攝影), 未上去之前去佐食飯先, 好肚餓. 唔知食咩之下去佐意粉屋, 我地叫佐個二人餐, 有露筍薯蓉湯, 豬肋骨同肉碎意粉. 個湯好杰, 但都好飲既, 豬肋骨唔錯, 但個意粉我就覺得麻麻地, 淡佐少少.

 是次每人消費約$120

Global Wedding 2nd fitting

星期日上佐Global Wedding 2nd fitting, 我就淨係著住girdle度身, 流沙包就揀男禮, 淨係試佐一套黑色閃閃, 都OK既. 

甜心鮮果園 -- 炒冰囉...

地址: 元朗安寧路紫荊樓二期138號地下
電話: 6309-2296

食完壽司流沙包話去食甜品, 我地黎佐呢度食炒冰, 我同流沙包share芒果香蕉炒冰, 味道OK. 阿媽叫佐個芒果布甸, 佢真係半個芒果舖佐係個布甸面, 賣相唔錯.

是次每人消費約$25

龍島迴轉壽司 -- 平平地一食無妨

地址: 元朗西裕街

星期六係元朗食飯, 大部份想去既食肆我地都去過晒, 之前成日經過呢間舖頭見到好似幾平咁, 成日話搵日黎試下, 今晚終於決定黎呢度食飯. 壽司款式都算多既, 味道都OK既, 最平既款式$6, 成晚我見到$6既壽司只有蟹柳壽司; 最貴既係花之戀, $30. 其他既都係十零廿蚊左右一碟啦. 咁既價錢同質素我覺得可以接受啦, 平平地食下壽司...

是次每人消費約$70

皇后飯店 -- 貴價花園餐廳?

地址: 九龍塘又一城L118
電話: 2265-8288

12月1日去完羅浮宮影相影到得番半條人命, 夜晚九點先離開羅浮宮, 即刻去又一城睇下有咩食, 因為我全日淨係九點幾食佐個早餐, 中間食佐三條百力滋就無食過其他野. 流沙包都唔好得我幾多, 佢雖然可以趁我轉妝時間食個杯面, 但係佢都只係食佐大半包百力滋同一條朱古力威化餅(等我仲帶晒杯面, 沖水薯蓉去 驚死餓親添...). 去到又一城度度都多人又要等位, 最後我地去佐皇后飯店. 我叫佐個大蝦豬扒餐, 流沙包要佐個玫瑰春雞餐. 今日剛剛影完相, 我仲唔大擦番餐先? 哈哈~~

個大蝦豬扒餐好大份量, 蝦真係好大隻, 豬扒有兩大塊, 仲有舊蕃薯, 好飽食唔晒. 流沙包果個玫瑰春雞就有D取巧, 首先我以為係成隻春雞上, 點知原來係雞扒. 同埋我地以為咩野「玫瑰」春雞, 原來係個碟度加個玫瑰花裝飾...

呢度既食物份量同質素都唔錯, 不過我覺得佢只不過係一間走高格調既花園餐廳囉...

勝在係度用AE簽帳有三倍積分, 同埋用學生証可以有9折~~

是次每人消費約$150

我的婚紗鞋同絲花球

呢對就係我係金都地庫甜蜜蜜訂鞋既婚紗鞋, 盛惠$338. 係羅浮宮影婚紗相果日都有帶埋去, 不過全日都係著波鞋影, 都無需要換過.

呢個就我係金都一樓既藝苑花店訂既絲花球, 連新郎襟花盛惠$238. 帶佐去羅浮宮影婚紗相.

去完羅浮宮影相, 成個人散晒...

終於到佐星期五, 係去羅浮宮影相既大日子. 今日11點3左右去到, 去到佢會問你有無食物帶黎, 佢會幫你keep住, 等你方便隨時拎黎食. 然後佢就比條locker鎖匙我地, 之後就上去準備換衫化妝.

今日幫我化妝既係阿Ling, 好開心, 因為之前上網睇人講佢好掂, 所以我一早就request佐佢, 佢個妝果然化得好掂呀, 化到我隻豆豉眼又圓佐又大佐, 好開心~~ 同埋佢set個頭都好靚呀, 完全係我想要果類型. 我望下前後左右其他新娘, 個髮型都麻麻地, 我仲心諗, 比著我我真係一定唔鍾意佢地果D髮型…

妝同set頭大約用佐兩個鐘, 係我化妝期間流沙包就揀禮服, 佢試佐三套, 最後要佐套黑色有D閃閃既. 之後就落去開始影相勒, 今日幫我地影相係既細Sam, 因為我之前request既大Sam比人book佐喎… 唔緊要啦, 應該都會影得靚靚既!!

細Sam先幫我地試影佐兩張相, 一張係微笑, 一張係露齒笑, 比我地睇覺得邊隻笑容好D. 我就似乎係露齒笑好D, 但流沙包就唔識笑, 佢平時影相都唔笑既. 跟住就開始正式影相勒, 初初影唔係好習慣, 因為會擺埋D平時你唔會擺既post, 要拗腰, 戚膊, 擰頸, 伸下巴… 有D難度, 擺好佐仲要定住一陣唔郁得, 都幾攰. 細Sam成日叫我笑得開心D, 燦爛D, 比多D笑容, 但我已經笑得好勁啦喎… 最痛苦係流沙包, 要個唔識笑既一日內不停咁笑, 但佢交唔足貨, 細Sam又係成日叫佢微笑, 比多D笑容. 哈哈, 好高難度.

影到大約五點就換晚裝同轉妝, 然後就集中影室內景, 呢個時候開始有D攰, 心諗想快D影完. 影到差唔多八點終於都影完啦, yeah~ 因為我地得兩套衫, 唔駛好似人地咁影咁耐, 我見其他新人仲要換民族服繼續影, 真係佩服佢地! 我地兩套衫, 唔計化妝時間都影佐七個鐘.

後尾我地就換番便服同落妝, 執齊D野就落去埋單同約揀相時間. 因為流沙包upgrade佐禮服$480, 我唔識分咩叫乾濕粉樸所以買少佐個乾粉樸, 要係佢地度買一個$15, 新郎化妝$90, 同埋我地要佐set可以即日拎走既數碼合成相, 一set兩款每款兩張共$198, 所以今日埋單都要$783. 我地約佐星期三黎揀相呀, 好緊張呀, 唔知影得靚唔靚呢??

總括黎講, 阿Ling化妝真係超掂, 細Sam幾好人, 會講好多野引我地笑, 同埋我見佢都好比心機影, 每個景都起碼影六, 七張, 雙人影幾張, 我單人又影幾張, 流沙包單人又影幾張. 同埋數碼合成相本來得四張相, 但細Sam free多一張單人相比我, yeah~ (雖然張單人相影到我塊面腫佐… 無辦法我一笑得勁就係咁, 但細Sam每次都叫我笑得再燦爛D, 好擔心其他影出黎果D都係肥面…)

係羅浮宮total九個鐘, 影完出黎成個人散晒…

婚前恍惚症 -- 第二回

繼上次去買面包比少錢同唔記得找錢之後, 今次又有新野.

說話前日我又如常咁去Panash買面包, 今次出佐門口, 個staff走出黎叫住我, 大家估下我今次又衰咩?? 遲D開估.

公司旅行... 去澳門?!! 無野呀? 低能架?!!

話說我轉佐黎尖沙咀office做佐兩年左右, 第一年入到黎剛剛可以join到公司旅行, 地點係北京或泰國任揀, 我果年就揀佐去北京. 上年說話要將D錢留黎同要退休既社長搞farewell party, 所以上年無公司旅行. 到今年, 收風番黎話management方面同老細deal緊到底今年有無公司旅行, 因為而家轉佐新老細(由以往既日本人社長轉佐做香港人社長, 你可以想像公司福利唔慌好得過以前), D風傳佐一陣又無影, 以為今年應該都唔會有公司旅行, 點知星期一收到個咁既e-mail:

Dear XXX members,

The management of company is pleased to inform you that XXX has achieved a
new sales record in Oct/2006 of HK$ 401,924,000.
To celebrate the achievement of this record and to appreciate your dedicated effort,
the company is decided to organize a leisure trip to Macau.

Date: 16(Sat)-17(Sun) Dec 2006,   2 day and 1 night (星期三收到e-mail又話改期去1月喎, 日子未知)

All XXX office members are eligible to join.
We shall send details and itinerary of this trip later this week. 
Its a good chance for us to enjoy, relex and reunion during this season. 
Please mark your schedule and participate.

我睇到之後第一個反應係點?? 先係錯愕, 然後火滾, 跟住得啖笑. 真係發夢都無諗過公司旅行會去澳門, 哈哈哈~ 索性唔好搞算數啦. 下午流沙包打黎, 我即刻同佢「分享」, 我一路講一路笑, 好似講緊個笑話咁, 我都唔怕其他同事聽到我咁既反應, 反正我根本已經對呢間公司死心, 出年畢業之時就係我離開呢間公司之日. 我夜晚講比阿媽知公司旅行去澳門, 佢聽完之後笑佐幾耐呀~

我會唔會去?? 梗係唔會啦, 唔好嘥我時間, 去澳門自己去都得啦, 駛唔駛跟公司團去呀? 你想像一下個個去澳門都係自由行, 忽然見到有架旅遊車駛黎, 有一堆鴨仔團落車聽導遊講解, 然後影完相上返車, 但你聽到班團友係講廣東話應該唔係大陸人, 車頭仲要貼住公司名, 團友仲要掛住個旅行社襟章... 嘩, 就咁諗我都覺得核突老土啦. 好心啦, 公司旅行去澳門都有既?? 講出黎怕唔怕比人恥笑呀? 怕唔怕比其他公司鄙視呀?

我識既人, 貴婦同我個妹既公司旅行都去泰國啦, 湯米好似去日本, 糯米雞佢兩年既公司旅行都係去歐洲添呀~ 澳門?? 唔知下年係咪去海洋公園呢? 不如去彭福公園呀笨~

去佐雅麗拎男裝恤衫, 仲hold多兩套衫添, 哈哈~~

星期日去完潮館飲茶之後, 我地就去佐雅麗, 因為星期五要去羅浮宮影婚紗相, 但流沙包未有恤衫, 咁啱上次去試擺酒租既衫, 個女仔話送件男裝恤衫比我地, 所以我地就星期日去拎. 去到見到剛剛有人還衫, 比我見到件幾靚幾特別喎, 我即刻同君君講話件衫好靚, 佢就幫我hold佐件衫. 然後臨走果陣又見到件婚紗都靚喎, 本來都無諗住hold, 但君君見我企係件婚紗前面望佐咁耐, 佢話幫我hold埋呢件, 真係好醒目呀~

既然佢地服務咁好, 我都唔怕係度同佢地賣下廣告, 佢地既衫其實幾唔錯 (因為我知佢地既衫款都係抄番黎). 同埋真係平囉, 價錢如下:

5件--$1998
6件--$2380
7件--$2680
8件--$2980
9件--$3338
10件--$3698

仲包埋頭飾, 首飾, 頭紗, 披肩, 底裙, 手套.

只要打個電話同佢地講想約試衫, 就可以任試, 唔駛試衫費, 唔限試幾多件. 試到啱既先落訂, 唔啱既你都可以就咁走, 不另收費.

雅麗婚紗晚裝屋
地址: 元朗教育路兆豐樓68號I地下 (近舊B仔, 7-11對面)
電話: 2474-7137

如果你地去幫襯, 可以話係出年4月7號結婚既Chloe介紹, 佢可能有free gift如恤衫, 紅傘送比你. 街客可能就無禮物送. 因為之前介紹我去既洪太都好似無傘送既??

潮館 -- 去佐飲茶, 無咩特別

地址: 元朗廣場3樓333號舖
電話: 2478-0628

星期日流沙包唔駛一早起身出去做野, 於是我地起身之後就去潮館飲茶, 因為我地願意搭枱, 所以好快就有位, 我地點佐叉燒腸粉, 紫菜花枝餅, 馬拉糕, 海蜇+腎, 三色燒賣, 蝦餃拼粉果, 共六樣野. 食物就普普通通啦, 服務就麻麻啦, 無咩特別.

是次每人消費約$55

2006年11月23日(四) -- Presentation

今日上果堂Financial Statement Analysis要present, 我今日遲到成7點先返到去, 第一組剛剛present完, miss佐鬼仔present果part添!! 聽人講佢地果組做得好好. 今日個鬼仔仲著晒恤衫西褲返黎present添喎~

我地第三組present, 限時25分鐘, 但我地18分鐘左右就講完. 估唔到鬼仔好認真聽, 真係問問題, 好彩我地解到圍, 又過一關~ 交埋分peer review commentary就搞掂等考試. 但係呢科真係好難喎, 點算...

婚前恍惚症??

話說我每晚返學前我都會去買面包當dinner, 而我每次都會袋定幾蚊大餅同毫子係褲袋度, 唔駛比錢果陣先摷銀包攞錢. 上兩個星期我一如以往又去買面包, 個面包$5.7, 我記得我褲袋有一個五蚊大餅+共一蚊既亳子, 於是我就數佐7亳子出黎比錢, 轉身諗住走, 點知收銀阿姐好大聲咁叫: 「小姐!」我回頭睇下做咩事, 原來我只係比佐7亳子佢, 個五蚊大餅仲係我手上, 好白痴, 咪即刻講唔好意思, 比番個五蚊佢就即走. 比少佐錢我係唔啱, 但係個阿姐既語氣態度, 好似係我係度搏矇比少錢咁囉, 好瘀呀! 下次唔去漢口道間凱施餅店買面包呀!!

又話說, 自從我話短期內唔去凱施餅店買面包之後, 而家轉去Panash買, 雖然行遠佐, 價錢又貴D, 但款式特別又可以試下新口味. 我今次買佐個蜜瓜包, 比完錢轉身又比人嗌住, 嗚, 今次又衰咩?? 原來今次係唔記得找錢. 哎呀, 搞咩鬼呀, 接二連三咁唔係比少錢就係唔記得找錢...  

2006年11月20日(一) -- 失眠?!

星期日晚去完羅浮宮試衫, 明明好攰, 但係攤上床又碌黎碌去都訓唔著, 好擔心揀果兩件衫係咪真係靚, 係咪真係襯我, 唔知有無揀錯; 擔心果日化妝唔靚, 因為我知自己面肥眼細, 化妝都補救唔到幾多; 又擔心果日唔識點笑, 笑得唔靚; 又擔心D相唔知影得靚唔靚; 又擔心果日唔知會唔會落雨, 唔知會唔會好凍. 到最後唔知幾多點先訓到, 但係第二朝早實在起唔到身, 於是又偷懶放病假, 今晚連學都無返, 我死得架啦~

麗新美食坊 -- 幾抵架~

地址: 元朗教育路

上星期日去完羅浮宮試衫鬼咁攰, 試完衫就返佐屋企. 夜晚我地去佐教育路算係新開既麗新美食坊食飯. 佢今晚既set dinner唔係魚就係牛, 兩樣野我都唔食, 加上下午飲茶仲飽緊, 我又要節食, 所以我只係叫佐個雞絲湯檬粉, 流沙包就好似叫佐個T骨扒, 佢個set dinner又前菜又甜品, 都係四十蚊左右, 好似幾抵喎.

是次每人消費約$30

八月花 -- 舒服地飲茶

地址: 九龍塘又一城G25店
電話: 2333-0222

星期日去羅浮宮試衫之前去佐八月花飲茶, 我地叫佐個名為心心相印既花茶, 叫佐個雀籠點心, 一個奶黃流沙包, 同一個檸香叉燒酥. 雀龍點心包括水晶鮮蝦餃, 鮑魚滑燒賣, 瑤柱翠苗餃, 黃金蘿蔔酥, 特大鮮蝦露筍春卷和燕窩蛋撻.

但係離晒大譜流沙包食果舊燒賣裏面竟然有大塊骨係度, 好彩無整親啫. 流沙包呢D咁溫文爾雅既人有咩事都唔會追究, 就咁就算. 我就唔係D咁既人, 有問題有不滿我一定會出聲投訴. 於是我叫個經理過黎, 個經理就話free番個點心比我地, 任我地揀咩都得. 但個鮑魚燒賣已經算係最貴果樣點心, 我地求求其其要佐個XO醬炒蘿蔔糕. 呢餐食到好飽~

我投訴完無幾耐, 再有另一個應該係經理既人埋黎再道歉, 同埋解釋番點解會有舊骨係燒賣裏面既可能性. 但講真我做佐廿幾年人飲茶飲過無數次, 從來未試過食燒賣會有舊咁大既骨係裏面囉, 你話係屋村酒樓都算啦, 話晒呢度都算係sell高格調喎...

是次每人消費約$115

去羅浮宮揀衫, 途中見到房祖明~?

星期日先出佐金都睇鞋, 最後流沙包都訂造埋鞋啦~ 之後落又一城既八月花飲茶, 然後三點半去羅浮宮試衫, 途中經過成蟲間屋, 竟然見到房祖明剛剛返到黎落車開閘門, 感覺上真人比上鏡靚仔喎.

我地準時去到羅浮宮, 個staff先比佐四本晚裝相簿, 五本婚紗相簿我揀(雖然話有五本婚紗相簿, 但最後果本得幾張係度, 而且D相仲係同之前本相簿重覆既添, 所以嚴格黎講都係得四本婚紗相簿), 可以各揀五件黎試. 我用佐四十分鐘先揀到total十件出黎. 但係試上身發覺好多都唔啱自己, 後尾個staff再拎佐D佢認為適合我既衫比我再試, 大約試佐廿件左右, 到最後揀既果件婚紗同晚裝, 都唔係我當初睇相簿所揀既, 係個staff自己拎比我試既, 早知就唔嘥咁耐時間睇相簿啦, 哈哈~~ 因為個staff對慣咁多人, 佢一眼就會知道邊D款襯你多D, 邊D款唔啱你著, 所以有時佢地幫你揀好過你自己睇相簿揀. 因為一來睇相簿唔夠真實, 二來影出黎靚唔代表你著上身都一樣咁靚.

另外有樣野一定要講, 話說上星期日上Global Wedding試帶去關島既婚紗, 我咪好猶豫究竟揀第一件好定第二件好既, 點知去到羅浮宮睇相簿, 竟然比我發現羅浮宮有條一模一樣既第一件蝴蝶款. 羅浮宮既衫款果然成日比人抄襲. 於是我就好振奮咁睇下會唔會有埋第二件成熟款, 但係就搵唔到...

新寶粥麵茶餐廳 -- 貨真對版喎~

地址: 元朗教育路50號兆明樓地下
電話: 2475-2566

星期六流沙包要朝十晚十工作, 一朝早出去(義務)教波, 之後去浸大吹大專盃, 夜晚返朗屏又(義務)教波. 之前講好等埋流沙包教完波返黎先一齊食飯, 等到十一點都未收到電話, 好肚餓呀, 谷鬼氣!! 十一點幾先一齊出去食飯, 我地去佐新寶茶餐廳, 叫佐個揚州窩伊面, 估唔到佢實際同影出黎張相幾對版喎, 算幾大碗同幾多料, 可能因為肚餓啦, 所以覺得好食.

買佐絲花球, 拎佐婚紗鞋~~

星期五去元綠食完飯落佐金都, 因為要買絲花球for12月1號影相用, 同埋順便去拎婚紗鞋, 流沙包亦要去造鞋. 行均成個金都, 都唔係好多間賣絲花球, 有D閒閒地嗱起手都話要$350個, 好似貴佐D喎. 最後去佐一樓既藝苑花店買, 圓形絲花球連新郎襟花共$238(拖尾款就$268). 果度擺出黎既款唔算太多, 不過本相簿就有好多款式. 最後我係太陽花與香檳色玫瑰襯紫色花花下作出決擇. 其實想揀太陽花, 因為幾sharp, 但係我唔知影婚紗相究竟揀個咩花球先適當, 同埋又驚唔襯件婚紗, 所以最後都係大路咁揀番玫塊.

然後再落地庫甜蜜蜜拎我早前訂造好既婚紗鞋, 價值$338. 本來流沙包打算訂造埋鞋, 但老闆話有款好正既boot款聽日會返, 極力推介, 所以我地決定星期日再黎睇過.

之後再去朗豪坊食Pappagallo, 因為之前買雪糕月餅送佐張買一送一雪糕coupon, 要今個月內用佐佢. 之後就行去搭車勒.

元綠壽司 -- 久唔久去試新野

地址: 旺角西洋菜南街138號
電話: 23967288

星期五落佐旺角食飯, 因為又要去金都, 唔想食得太濟, 所以去佐元綠食. 我地主要係試新野, 好似豚肉芝士卷, 軟殼蟹pizza, 燒凡立貝串, 鮮芒三文魚壽司等等, 樣樣野都好好食.

其實我以前鍾意去元氣多過去元綠, 但而家就鍾意去元綠多D. 因為元綠既食物種類多D, 唔似元氣咁主要都係食壽司, 同埋元綠時不時會有新野出, 可以吸引到我久唔久就去幫襯. 但元氣就要隔好耐先有興致再去.

銀行服務

某日下午趁有空檔, 鼠佐落去HSBC同恒生拎信用卡, HSBC就係自己張信用卡到期去拎張新卡(我想轉做金卡呀, 但銀行話無得咁樣轉, 一係就再申請多張卡). 恒生就係拎流沙包申請比我既中大platinum附屬卡. 先去到HSBC, 我記得以前係按button攞飛等叫籌, 唔同既戶口按唔同既button, 當然如果係普通紅簿仔戶口既籌應該就要等耐D. 自從海港城間HSBC裝修完之後我都無去過用teller服務, 裝修完細佐, 無佐按button攞籌, 要自己排隊. 我記得以前好似有一個counter係專for拎卡唔駛排人龍架麻...?? 而家無佐都唔知排邊, 好彩我係運籌理財, 唔駛排主人龍, 長到死...

拎完再去恒生銀行, 今次無辦法要排果條長人龍, 鬼死咁耐先輪到我. 講真我去拎張卡都要排餐矇真係嘥時間, 既然銀行都減少緊呢類non-value added既服務, 點解唔好似AE咁直頭寄張卡去你屋企啫??  搞佐大半個鐘先返到公司.

La Brasserie -- 好味好味, 但冷氣勁凍

地址: Gateway, Marco Polo Hotel
電話: 2113-7925

星期日試完衫去佐SOGO行街買野, 買佐好多Keroppi呀, 多謝老公~~ 跟住去佐尖沙咀Marco Polo Hotel既La Brasserie食法國菜, 我地叫佐個Oyster plate, 頭盤要佐鴨肝, 主菜要白鴿, 甜品要佐個chocolate pudding with ice-cream. 樣樣都好味呀, 睇相啦, 正~~

是次每人消費約$624 (流沙包join佐Marco Polo Club所以半價, 埋單total $624即每人約$315)

南京小廚 -- 下次去番北京水餃店好過

地址: 元朗擊壤路金寶大廈地下7號舖
電話: 2478-3813

星期日約佐兩點鐘上Global Wedding試衫, 出去前去佐南京小廚食lunch, 我叫佐個排骨雞絲担担面, 流沙包叫佐個燻魚雲吞担担面. 比起隔離間北京水餃店, 呢間南京小廚真係差幾皮. 首先D排骨似豬扒多D, 又靱; D所謂既担担面得D湯底有D花生醬味, 但你搵唔到一粒肉碎, 咁都算担担面??? 流沙包碗面D雲吞... 唔, 下次去番北京水餃店好過.

是次每人消費約$26

2006年11月11日(六) -- 德國啤酒節

星期六晚同流沙包屋企人一齊去佐德國啤酒節, 裏面既食物種類唔多, 都係牛扒, 排骨, 豬手, 春雞, 腸之類... 但價錢唔平囉, $98份, 豬手要$108一份. 甜品就有黑森林蛋糕, 士多啤梨撻, cheese cake, 蘋果卷之類, $38份. 飲品當然有啤酒, 仲有橙汁, 汽水. 橙汁比啤酒貴, 啤酒好似三十零蚊杯, 橙汁要$55杯.

因為帳幕裏面無晒位, 所以我地係用餐區度食野, 但食完野我地都無乜入去裏面睇表演, D表演主要都係有隊鬼佬band係度唱歌跳舞咁. 不過裏面好焗, 我又唔鍾意D人多又嘈既地方, 所以食完飯都只係喺用餐區度繼續呆坐, 我未來姨仔帶佐佢意大利個老細黎, 食完飯大家呆坐既時候係度吹下水, 跟住入一入去帳幕裏面睇下show, 講真我唔係果D會好投入去玩好投入去睇表演既人, 見人地睇show睇得好開心, 手舞足蹈, 打晒拍子, un身un勢. 我就係果D碌木企係度齋睇表演既人囉.

到佐十點幾左右我地就走勒, 拎住兩個水杯番去, 我同流沙包又無帶大袋, 好論盡.