去羅浮宮揀衫, 途中見到房祖明~?

星期日先出佐金都睇鞋, 最後流沙包都訂造埋鞋啦~ 之後落又一城既八月花飲茶, 然後三點半去羅浮宮試衫, 途中經過成蟲間屋, 竟然見到房祖明剛剛返到黎落車開閘門, 感覺上真人比上鏡靚仔喎.

我地準時去到羅浮宮, 個staff先比佐四本晚裝相簿, 五本婚紗相簿我揀(雖然話有五本婚紗相簿, 但最後果本得幾張係度, 而且D相仲係同之前本相簿重覆既添, 所以嚴格黎講都係得四本婚紗相簿), 可以各揀五件黎試. 我用佐四十分鐘先揀到total十件出黎. 但係試上身發覺好多都唔啱自己, 後尾個staff再拎佐D佢認為適合我既衫比我再試, 大約試佐廿件左右, 到最後揀既果件婚紗同晚裝, 都唔係我當初睇相簿所揀既, 係個staff自己拎比我試既, 早知就唔嘥咁耐時間睇相簿啦, 哈哈~~ 因為個staff對慣咁多人, 佢一眼就會知道邊D款襯你多D, 邊D款唔啱你著, 所以有時佢地幫你揀好過你自己睇相簿揀. 因為一來睇相簿唔夠真實, 二來影出黎靚唔代表你著上身都一樣咁靚.

另外有樣野一定要講, 話說上星期日上Global Wedding試帶去關島既婚紗, 我咪好猶豫究竟揀第一件好定第二件好既, 點知去到羅浮宮睇相簿, 竟然比我發現羅浮宮有條一模一樣既第一件蝴蝶款. 羅浮宮既衫款果然成日比人抄襲. 於是我就好振奮咁睇下會唔會有埋第二件成熟款, 但係就搵唔到...