日本做facial

繼前幾日剪佐個髮, 我pat pat痕仲係日本做佐第一次facial.

 

我係香港一直都有keep開facial架, 下至百零蚊一次, 上至幾萬蚊一個course果D我都有做過. (但就算幾萬蚊果D爛鬼"醫學美容", 都係完全無效果既...)

 

但黎到日本, 我就無做過facial啦, 淨係喺屋企自己清吓黑頭敷下mask咁.

 

前幾日收到樂天寄黎既生日祝賀信, 裏面有張美容coupon, 可以平一萬円去試做, 於是我咪八卦去試吓囉.

 

唓, 點知我上網check下間美容院係咩料果陣, 見到原來只要係第一次去試做, 阿豬阿狗都可以平一萬円.

 

我今次揀佐個原價13,500円既毛穴清潔同改善鬆弛既facial, 原價咁鬼屎貴, 我諗住應該有D料到啦...

 

上到去, 例牌又係填D資料同問卷, 然後帶你入房幫你做個"皮膚分析", 再帶你去換衫, 入房, 程序同香港差唔多.

 

我話我最想改善毛孔粗大同黑頭問題, 佢話清黑頭要比水份D污糟野, 令佢軟化, 然後先容易清走佢喎...

 

咁入到房佢幫我洗完面之後, 就搵部機蒸面啦. 我心諗:"吓? 蒸面? 同我香港做果D有咩分別呀?"

 

係香港, 蒸完面會針清黑頭, 修眉, 按肩頸咁架麻...

 

但係日本, 佢搵部機蒸完面之後, 再敷D野上塊面, 按一陣, 然後就敷mask啦喎... 我心諗:"吓? 完架啦, 咁D黑頭點清呀?"

 

做完facial換番衫之後, 循例佢又會sell吓我啦, 佢比佐頭先facial前Vs facial後影既相我睇, 話塊面乾淨佐好多喎, 問我覺得點, 我心諗:"洗完面唔多唔少梗係乾淨佐啦, 唔通會污糟佐咩. 我真係唔覺得呢個facial好有效喎", 而且我試做既呢個facial, 同我香港做開果D普通百零蚊facial無咩分別咋喎, 仲做少佐好多野添.

 

然後佢話:"你3月返香港前, 如果每個星期黎一次, 都可以做到五次吖, 我地正價係13,500円, 你覺得點吖?" 我心諗:"都痴線架, 成千蚊一個facial, 只係蒸面? 我係香港蒸面+修眉+按面+按肩頸+倒模面膜都唔駛兩舊水呀. 千幾蚊港紙我係香港做既係醫學美容囉(雖然我上文提過係一D效用都無)

 

於是我老實不客氣話你呢個facial, 我係香港都做唔少啦, 我唔覺得好大效果囉...

 

佢見我都無心join, 於是就放我走啦.

 

埋單要3,500円, 話就話減佐1萬円, 但如果正價13,500円做個咁既facial, 我覺得真係搵笨囉. 而家就算係3,500円我都覺得掠水呀.

 

都係唔好再試啦, 返到香港先勤力D去做番facial啦...