成六千円剪個髮, 真係肉痛死...

其實我本來都無諗住係日本剪頭髮架, 之前11月一時歸國果陣返香港剪佐, 諗住到4月返香港果陣先再剪架麻...

 

點知前排同事問我係日本有無去過美容院(唔係指做facial果D, 係指hair salon), 我話日本剪髮咁貴(唔洗 only齌剪約二千円, 洗剪吹要五千幾円), 於是我話諗住4月返香港先剪.

 

不過我同事話到4月返香港仲有成兩個月咁長, 佢話咁啱果排都會去salon, 話不如一齊去啦.

 

於是我就同同事去佐佢去開果間美容院啦, 無印任何coupon...

 

間舖頭係銀座, 係日本剪髮同香港都無咩分別, 唔同既地方有:

 

1. 洗頭張櫈好似牙醫櫈咁, 係自動升降的, 唔駛好似香港咁自己訓個人落去.

2. 有好舒服既大咕0臣放係大脾, 原來咁樣晾住對手係上面睇雜誌係舒服好多的.

3. 有糖食

4. 係香港剪完髮, 髮型師會拎起塊大鏡係你身後照下髮尾比你睇; 係日本, 髮型師係拎塊大鏡比你手執住, 然後將你張櫈轉180度背住牆鏡, 然後你用自己手上既鏡去睇自己既髮尾.

 

不過原來2同3唔係間間salon都有架喎, 咕0臣係近呢一兩年先開始出現喎. 

 

剪完出黎既效果我覺得OK啦, 唔係太老土核突其實我都接受架啦.

 

埋單盛惠5,775円, 真係超超超肉痛...

 

我以前一直係尖咀剪開頭髮, 都唔駛五舊水咁貴. 況且我又唔會電唔會染(唔駛理佢D藥水係咪high quality), 普通剪一個髮的話, 我屋企樓下$98剪既款同我出尖咀幾舊水剪既款, 我唔覺得有咩分別囉...

 

所以整整吓我都係求其幫襯番屋企附近果D 100蚊有找既hair salon.

 

係日本普通剪個頭都成6,000円, 真係超貴呀...