雲南小鍋米線 -- 幾好呀~

地址: 荃灣兆和街32號地下
電話: 240-99522

星期日晚碌完ling黎佐呢度食米線, 我地全部人都叫小鍋米線再加兩個餸. 呢度一個小鍋米線$18蚊, 有芽菜, 炸菜, 肉碎咁, 我再加佐水餃同雞翼. 整體上我覺得幾好食, 個湯唔錯, 幾濃味幾好飲, 不過D水餃唔知係乜野平價牌子(我斷估佢唔係自己包掛?), 好難食耶~

是次每人消費約$30元

安娜餐廳 -- 上菜超快...

地址: 元朗仁樂坊5號地下
電話: 2479-5555

星期日難得男友有時間陪我, 我地行遠D去佐安娜餐廳食lunch, 之前有人介紹我話呢間餐廳都係老字號, 我之前都食過一次, 見好耐都無黎過, 於是提議黎呢度食lunch. 我地去到應該大約點幾兩點, 但都仲係好多人, 我叫佐個全餐, 有多士, 羅宋湯, 腸仔+薯條, 洋葱豬扒飯, 雪糕同餐飲. 你估下咁多野要幾多錢? 都只係$33一個set咋, 我覺得幾抵. 男友叫佐個豉椒排骨炒河, D排骨好腍, 一篤就可以散開咁. 至於我個洋葱豬扒飯, 我就覺得淡佐少少囉...

其實我上次黎果陣, 唔係好明呢間餐廳有乜吸引力可以有咁多人幫襯, 好食又唔算好好食, 平又唔算非常平, 服務一般而已. 不過可取既應該就係佢上菜超快, 呢頭落單轉過頭已經成枱都係食物, 勝在唔駛等囉. 不過我覺得佢上菜上得太快反而唔係太好, 令我食得好辛苦, 因為成日驚住D野會凍晒, 所以要好快咁飲晒碗湯, 要好快咁食晒D前菜...

間唔中黎食下都OK既.

是次每人消費約$35元

嵐翠餐廳 -- 凍冰冰既...

地址: 元朗阜財街光華中心46號地下
電話: 2473-9933

星期六傻下傻下搞錯佐做facial時間, 於是唯有一個人去食個早餐先, 是但入佐黎呢間, 叫佐個雞翼米線, 拼牛油餐包, 午餐肉同煎蛋. D野上得幾快, 但原來好多野都係整定擺晒係度, 因為我塊午餐肉係凍既, 隻煎蛋只係微溫, 個餐飽我懷疑係隔夜既, 凍冰冰又硬繃繃咁, 無食.

下次唔會再黎.

是次消費$19元

Oriental Curry Shop -- 咖喱好味~~

地址: 尖沙咀廣東道30號新港中心地庫 'Cooked Deli' B9號鋪
電話: 2272-0828

因為我自己星期五會放假, 所以星期四晚又OT到十二點. 今晚心血來潮想食咖喱, 於是去佐新港地庫City Super間Oriental Curry Shop買咖喱食, 我叫佐個set B, 係雞扒拼炸蝦, 可能因為係公司加班到就黎死既關係, 我覺得個咖喱好好食, D咖喱汁夠香又夠多, 可以撈晒D飯食.

是次消費約$45元

2006年8月27日(日)

今日男友推晒D jobs陪我, 我地先去佐食lunch, 然後返屋企hea一陣就落去游水, 游水好玩, 不過好攰呀~ 之後再搭車出美孚, 因為約佐阿文同一個叫B女既女仔碌ling, 去到美孚果間見到價錢唔平, 阿文佢地話大窩口果間平D, 於是我地就搭的士再落大窩口, 點知落到去有D球隊包佐大半球道係度自己玩聯賽, 我地七點九去到, 要等到八點半先至有得玩, 等到好忟憎呀! 雖然話呢度應該平D啫, 但時間都係金錢黎架麻...

我地碌佐兩局, 我成績好差, 第一局110分, 第二局得八十幾... 然後我地先去食飯, 去佐食米線, 跟住就返屋企勒, 好鬼攰呀~~

2006年8月26日(六)

今日約佐十點半做facial, 於是八點幾就起佐身, 然後落圖書館還書, 遲還書罰款總共$82.5, 好甘呀! 但總好過買新書呀~ 讀書呢兩年幾以黎, 我通常都只會去圖書館借書用, 只係試過有兩次圖書館都無得借我先買佐一本二手書同一本新書, 本新書亦已經成功轉手, 我覺得都算慳唔少啦~~ 還完書上去美容院, 點知佢話我應該係約佐十二點半, 咁我唯有他他條條去食下早餐, 無無聊聊周圍行下, 同埋終於都去佐間漫畫店入會借漫畫睇, 呢間漫畫店其實都開佐好耐, 所以都舊舊地, 但係附近好似就得佢呢一間, 無辦法啦. 以前係天水圍借開果間好勁架麻, 全店電腦化, 好似去圖書館借書咁用bar code "do"既~

個美容師話我黑佐呀, 唉~~~ 做完facial我返去換件衫就落去做gym, 平時我做gym一個人都無, 今次落去竟然見到已經有人係度做緊, 真難得, 我都希望個健身室多D人用, 否則使用率咁低既話, D機壞佐都未必會再買新既返黎. 我帶埋D雜誌, 漫畫落去一路踩單車一路睇, 不經不覺做佐45分鐘, 於是就返上樓吸塵.

夜晚約埋阿媽去佐元氣食壽司, 然後去豐澤睇電視, 跟住就返屋企勒.

2006年8月25日(五) -- 終於考完試啦~!!

今個月因為要去做美國簽證同考試既關係, 8月內總共請佐6日假, 分別係4日SL同2日AL. 很老土地女排大奬賽竟然撞正我考試前果個禮拜, 本來我想三日都去睇晒, 但最後作出「犠牲」下只係去佐星期五. 本來都唔想請咁多假, 但真係溫唔切書, 所以唯有請假係屋企溫書.

係呢間公司做做下都已經「本pair」咁, 6月我原來遲到佐11次, 勁呀! 好想轉行好想轉行好想轉行!!! 我想轉去做會計, 一係就唔做, 一做就要做考牌果隻, 但而家先起步會唔會太遲呢??

今晚九點鐘考完試即刻出旺角join佢地食飯, 喂ii我都唔記得恭喜你添~~

利華麗意大利餐廳 -- 甜品好食, 服務唔錯!

地址: 元朗馬田路38號怡豐花園66號地舖
電話: 2473-9786

星期三晚同男友去佐呢度食飯, 間餐廳唔算好大, 但感覺上情調都唔錯. 我地叫佐個芝士焗蠔, 醬燒豬仔骨, 同一個菠菜乜乜意大利雲吞. 我個set dinner跟龍蝦湯, 配既係蒜蓉包, 味道唔錯. 個芝士焗蠔幾好, $58有六隻. 醬燒豬仔骨我就覺得個醬既味道怪怪地, 唔多啱我口味. 個意大利雲吞唔好食, D雲吞裏面唔知係乜野料, 總之咬落去無論口感同味道都唔得.

跟住上甜品, 佢似係tiramisu, 但就無中間咖啡味果層, 我反而覺得好好食喎, 好想再去食呀~

餐飲我叫凍mocha, 佢本來話因為無晒雪糕所以唔供應, 佢問我無雪糕既話介唔介意, 我就無所謂叫佢照上. 因為我今晚要繼續溫書所以諗住飲杯咖啡提下神無咁易眼訓, 點知呢杯咖啡真係勁, 我成晚眼光光碌黎碌去都訓唔著, 碌到五點幾先訓到, 結果成晚訓得一個鐘... 

是次每人消費約$160元

和民居食屋 -- 就腳囉...

地址: 尖沙咀廣東道新太陽廣場B09
電話: 3156-2567

上星期五lunch同男友同埋佢表妹去佐和民食飯, 我地叫佐個焗海鮮飯, 雞肉碢飯, 煎餃子, 炸雞軟骨同燒鰻魚飯糰. 本來表妹想叫芒果汁, 但點知話芒果汁未來貨, 後尾叫佐橙汁, 我就叫佐個奇異果汁, 好難飲.

個焗海鮮飯麻麻地, 反而個雞肉碢飯好食D, 餃子, 雞軟骨同飯糰就普普通通啦.

一向都覺得和民既質素麻麻地, 但近我公司所以間唔中都會去食下既...

2006年8月18日(五) -- 世界女排大奬賽, 勁開心!! 同孫玥合照~

一年一度既世界女排大奬賽又黎, 我當然要捧場啦~!! 本來預算五點半準時放工然後去都會商場食D野就過紅館睇波, 點知最後都要六點三先走得. 跟住飛的士過都會商場, 去到果陣男友同佢屋企人都差唔多食晒野咁濟, 我都嗱嗱臨快手買個面快手食完就過紅館.

去到坐係VIP席, 好近球場, 好開心. 我睇到俄羅斯對阿塞拜疆第二局完佐就趁機會去toilet, 係toilet裏面聽到大會安排特別嘉賓同現場觀眾玩遊戲, 我聽到嘉賓係孫玥? 唔係掛, 唔通我聽錯? 後尾聽清楚證實自己無搞錯, 真係孫玥黎架, 我即刻走出toilet返埋位, 見到有個好高既女仔, 好長頭髮, 佢就係孫玥啦~~ 好開心呀!! 我好鍾意佢架, 佢係我偶像黎架, 我細細個就睇佢打波, 以前每年大奬賽我都一定會係電視前追看, 咁多個球員之中我最鍾意既就係孫玥. 估唔到竟然有機會見到佢真人, 真係開心死呀

~~~ 我即刻拎部相機出黎影相, 但可惜zoom到盡都影得唔係太清楚, 始終都有一大段距離.

玩完遊戲後賽事繼續, 後尾見到孫玥係VIP席度出現, 大會有D嘉賓定工作人員開始向孫玥互相介紹寒暄問好, 然後就合照. 見到咁我都好想同佢影相呀!! 唔影就無機會架啦, 於是我膽粗粗走落去希望佢肯同我影相, 我見佢地寒暄完孫玥差唔多想轉身走果陣我即刻嗌住佢, 佢似乎以為我係咪邊個嘉賓, 望下我個牌, 我聽到佢好似問我係邊一位, 我就問佢可唔可以同我影張相, 佢知道我係普通fans之後都無拒絕, 肯同我合照呀,  好開心呀!!!

  (多謝Clara肯幫我揸機~~)

之後孫玥就消失佐, 我地就繼續睇波. 後尾孫玥又出現番, 因為大會又將第二D嘉賓介紹比孫玥識, 孫玥越行越近, 因為D嘉賓坐佐係我地後面果行, 孫玥就正正企佐係我後面咋! 後尾介紹完畢, 工作人員就安排孫玥坐係我地後面果行, 同我好近呀, 佢坐佐係我後面果行同我隔兩個位, 我心情好興奮呀!

後尾終於等到中國對泰國開波, 男友進場果陣好型呀!! 我愛你!!

  又可以睇到中國女排, 又可以見到男友做野, 又可以同孫玥影相, 今晚真係好開心呀!!!

 

開幕儀式:

中國對泰國:

五十嵐日本料理

地址: 天水圍天頌苑頌富商場一期201舖
電話: 2253-0678

星期四請佐病假諗住留係屋企溫書, 下午約佐朋友去天水圍食飯, 因為應承佐比世界女排大奬賽既飛比佢. 我地去佐五十嵐食飯, 因為近佢學校. 我叫佐個豬軟骨鍋飯, 我朋友叫佐個豬軟骨拉面+小食(咖喱角).

個豬軟骨真係幾好食, 佢整得好腍, D汁又好味, 價錢又唔貴, 都係30蚊左右. 我地出示學生証(雖然係PT既)仲可以有學生價, 仲可以平多幾蚊, 勁抵!!

是次每人消費約$30元

批佐簽証啦~~

2006年8月12日(六)

今日約佐十一點去做facial, 下午收到伯母電話, 話收到晒我地六個人既passport, 我地既美國簽証全部批佐十年, yeah yeah! 但講真你比我都唔多敢去美國旅行, 好似賭命咁... 我諗關島應該唔會成為目標住掛? 啋啋啋~~~

做完facial去佐雅麗攞租衫既資料, 果度租十套都係$3698, 不過衰在無相簿睇, 同埋聽人講試衫係唔比影相. 如果唔比影相, 咁我點知套衫係鏡頭影出黎係咩效果呀? 同埋MUA都叫我試衫果陣影D相比佢睇, 等佢睇下點幫我化妝set頭襯埋套衫. 另外我都有上網睇過無盡感激(以前叫恩悅), 果度租十套要$6800, 價錢比雅麗貴好多, 但聽人講恩悅既衫靚D喎... 睇黎我都要搵日分別去試下衫先得, 但要揀平日二, 三, 四去...  

許願樹 -- 心太軟好食!

地址: 元朗教育路87-99號鴻發樓地下E舖
電話: 2442-1811

星期六晚去佐許願樹食飯, 我地叫佐個焗田螺, 咖喱龍蝦脆面, 燒雞扒, 同埋心太軟, 我地加廿五蚊轉佐其中一個做餐, 另外我仲叫佐杯朱古力雪香.

餐湯我地揀佐意大利菜湯, 我覺得淡佐D.

焗田螺我覺得麻麻地, 無咩焗既感覺.

個龍蝦脆面好大堆頭, 好多雜菜係裏面, 都算幾好食.

個燒雞扒, 普普通通啦.

最後壓軸既心太軟, 果然好好味呀, 拼埋個雪糕, 完全係我既至愛甜品類型, 好食到連碟都想舐埋...

不過最大問題係呢間餐廳好鬼多蟻, 我地一路食D蟻一路係枱面爬, 後尾我地頂唔順向waiter反映, 佢地幫我地換過張枱, 但仍然都係有蟻係枱面度爬黎爬去. 而且係換枱既過程中, 我明明碟野都未食晒, 仲有舊西蘭花同一舊龍蝦係個碟度架, 點知佢收晒D碟, 激死我! 我會將最鍾意食既野留到最後先食架麻, 有咩理由見到我個碟仲有野都收佐佢架, 嗚嗚~~ 

是次每人消費約$160元

都靈Twrin Cafe -- 超抵食~~

地址: 元朗西裕街17號民康大廈地下4-5號
電話: 3126-5066

星期五晚同男友係元朗食飯, 諗極都諗唔到去邊度食好, 到最後終於諗到黎呢度. 我叫佐個蜜汁豬肋骨, 男友知我鍾意食意大利雲吞, 專登叫佐個焗蜜桃意大利雲吞. 呢度真係幾抵, 一百蚊唔駛有頭盤, 餐湯, 沙律, 主菜, 甜品同餐飲, 真係抵到爛. 我頭盤本來想要焗釀菇, 但八點幾就已經話賣晒, 於是轉做巴拿馬火腿伴蜜瓜, 上菜果陣都嚇佐我一跳, 原來只係一舊蜜瓜仔, 外面包住塊火腿而已, 不過諗番佢咁既價錢, 算係咁啦. 個餐湯(好似係南瓜湯)值得一讚, 好好飲, 唔駛再飲埋晒D羅宋湯同忌廉湯. 我個主菜豬肋骨+意粉都好好味. 不過我覺得男友個意大利雲吞就麻麻地. 甜品我要佐個焦糖布甸, 好好味! 但男友個茶凍就麻麻地. 餐飲我要佐杯熱mocha, 味道麻麻.

我應該會keep住幫襯~

是次每人消費約$100元

維苑餐廳 -- 一分錢一分貨...

地址: 元朗青山公路249-251號元朗廣場一樓146-149及161號
電話: 2418-9777

星期四偷懶放佐日病假, 五點幾同男友黎呢度食飯, 食完各自都要出去上堂. 我叫佐個焗釀蟹蓋拼豬扒, 男友叫佐個「大洋洲炒飯」, 當初我聽男友話食呢個飯, 我以為係「大。楊州炒飯」, 睇清楚餐牌原來係寫住「大洋洲炒飯」, 我同男友都講笑 話呢碟飯要有袋鼠肉同樹熊肉, 我地都想知究竟呢個係乜東東炒飯, 點知到上菜發現原來咪又係楊州炒飯, 我個人認為仲要係阿伯版楊州炒飯, 因為佢落埋蝦米同類似D炸菜既物體, 感覺上碟飯好娘, 都唔知點解要改個咁既名...

至於我個焗釀蟹蓋拼豬扒, 隻蟹蓋好細呀, 隻蟹好可憐, 咁細隻就比人劏佐... 塊豬扒就細舊到死, 果然係一分錢一分貨...

是次每人消費約$50元

去做美國簽証

2006年8月9日(三)

今日預約佐去攞簽証, 我地預約佐一點九. 所以我地先上佐Global Wedding比多三千蚊deposit, 順便攞埋張正式收據. 上到去覺得果度都幾亂, 尤其是佢地既工作枱, 文件亂放, D拆開佐既零食又亂放...

之後我地一行六人一點半去到領事館, 係出面門口排隊交表都排佐半個鐘, 要兩點先入到去見領事. 見我地既領事係亞洲人, 但我地都用英文對答, 佢淨係問佐D好簡單既問題, 知道我地去關島係註冊結婚果陣, 佢仲恭喜我地. 最後佢話會批晒我地, 仲叫我地過到去玩得開心D, 真係幾好人. 令我對佢地既印象好佐D.

因為其實十年前我都去過美國領事館一次, 我去既原因並唔係去攞簽証, 而係果陣我有老友打算去美國讀書, 已經有學校收佐佢, 只欠一張美國簽証, 所以佢要去申請, 但佢果陣爭份文件, 所以由我拎入去比佢, 點知呢份文件都幫唔到佢D咩, 因為個領事睇完我朋友D會考成績之後, 話我朋友係香港成績都咁差, 過到美國都唔慌會好, 叫我朋友留番係香港讀算, 唔肯批簽証比佢. 再加上入去領事館又要搜身又要摷袋又要放低電話(當然我知佢地點解要咁做), 令我真係好討厭呢個地方, 亦都對美國無咩好感. 但今次申請簽証既過程非常順利, 個領事又好人, 令我改觀不少.

2006年8月9日(三)

今日請佐假去攞簽証, 我地朝早先去屯門同兩老飲茶. 係搭輕鐵去到兆康站果陣, 有個婆婆唔小心跌低佐, 後尾我地知佢去屯門醫院覆診, 就陪佢搭一個站, 婆婆話本來佢個仔話陪佢去覆診, 但後尾又話黎唔到. 婆婆話佢有個仔係機場做看更, 有個係中環返銀行, 有個就住天水圍... 我心諗, 婆婆有咁多仔女, 點解仲要孤零零一個人去覆診呢? 仲要係輕鐵度跌倒. 令到我結佐婚都唔會生既決定更加強烈, 因為我覺得生出黎又點呀, 又要花錢養, 又要花精神湊, 到仔大女大既時候, 自己到頭來咪又係孤零零一個人生活, 咁點解仲要花幾百萬 花咁多時間心血去養育一個小朋友呢? 我閒時自己去下旅行, 想做咩就做咩, 無束縛, 自由自在, 咁唔係仲好咩? 花幾百萬係仔女身上, D錢我自己可以留黎慢慢養老啦~

攞完簽証之後我同男友去佐銅鑼灣行街, 我買佐D新衫新裙, 好開心~ 最近為佐儲錢交學費同結婚, 都好耐好耐無行過街買過新衫, 今次都係見特價平咁多先買, 但真係幾靚幾抵~~ 

味千拉麵 -- 毫無驚喜

地址: 銅鑼灣駱克道508號
電話: 2891-5205

今日黎佐呢度食dinner, 我叫佐個蒜片豬軟骨拉面, 男友叫佐個烏賊拉面, 另再叫多個明太子雞翼.

其實味千拉面我真係有幾年無幫襯過, 因為覺得我要食拉面都一定唔會揀味千. 但見咁耐無試過, 睇下而家會唔會有咩唔同. 結果都係同以前一樣, 想食好吃的拉面我絕對唔會黎味千. 無論面, 湯底同服務都係太一般.

首先唔知點解我地兩碗面咁遲黎, 等到我地吽晒, 搞到某waitress主動行埋黎問我地叫佐d咩, 話幫我地催下. 眼見遲黎過我地既人都己經食緊勒.

果個烏賊拉面, 原來只係好普通既墨魚餅, 食果刻我只係諗到「咁似酒樓果d墨魚餅既?」

睇怕我又有排都唔會再幫襯.

是次每人消費約$50元

Cafe Royce -- 普普通通

地址: 銅鑼灣崇光百貨公司B1-6 號鋪
電話: 2831-8427

星期三攞完美國簽証去佐銅鑼灣行街, 攰攰地打算搵個地方坐下抖下食個tea, 所以黎佐呢度. 我叫佐個雲呢嗱milkshake同一個焗面包布甸; 男友叫佐個tiramisu. 個tiramisu認真麻麻, 又細件. 我個面包布甸都OK既. 不過開心既係杯milkshake有舊雪糕係裏面, 好開心~

是次每人消費約$60元

2006年8月6日(日) -- 終於學識游水啦~

今日下午第二次學游水, 我終於成功游到一個塘啦, 好開心呀~ 果然係金牌教練, 名師出高徒, 哈哈~ 但係游完返到去發覺已經曬黑佐, 有個泳衣印係度, 真係激死人! 今日已經陰天唔曬架啦, 更何況會所個泳池比D樓遮住佐, 根本都唔會直接曬到既, 咁樣都曬得黑, 真係討厭! 點解我咁易就曬黑架? 曬三分鐘就可以曬黑, 唔曬三年又唔見會白番, 我仲要影婚紗相架! 人都已經唔係生得靚架啦, 連一白遮三醜呢樣都無辦法做得到, XYZ@#$%&^+...

寶島茶居 -- 普普通通...

地址: 元朗千色廣場地下G23-24及59舖
電話: 2470-6011

星期日做完facial同男友黎食LUNCH, 我叫佐個酸辣手撕雞米線同一杯薑母奶茶; 男友叫佐個豬潤炒飯. 我個手撕雞米線D雞好靭, 奶茶一般. 但男友個豬潤炒飯好好味呀, 下次再黎我要叫炒飯食~

不過我覺得價錢貴佐少少囉, 都無加多幾蚊可以有埋餐飲咁既...

是次每人消費約$44元

紅樹林餐廳 -- 原來又係椰林閣集團...

地址: 天水圍銀座商場第二期2樓216號舖
電話: 2486-4310

星期六係銀座搵飯食, 黎佐呢度. 本來諗住試下D未試過既餐廳, 點知入到去坐底先發覺原來又係椰林閣集團既, 早知就唔入黎啦.

我叫佐個特價午餐 -- 炸魚柳豬扒, 可跟飯/意粉/薯菜, 有餐湯同餐飲, 加埋一都係廿二蚊. 真係抵到爛啦, 平過茶餐廳.

咁既價錢, 我都唔會理佢咩質素咩服務啦, OK啦.

(但我都係掛住以前南莊園囉...)

是次每人消費約$22元

姬子皇朝 -- 環境好, 食物正~

地址: 薄扶林數碼港商場102店
電話: 2989-9338

話說公司為佐慶祝1Q做到1億sales, 並讓公司同事來個reunion, 所以今晚搞佐個dinner party. 菜單如下:

阿拉斯加紅蟹
帶子珊瑚蚌
上湯焗龍蝦
大紅翅
孖寶片皮雞
腿茸燕皮餃
南瓜露
法式美點匯絮

唔記得仲有無. 整體來說食物不錯, 比我想像中好味; 而且果度環境幾好, 係果度擺酒都唔錯.

聽講今晚呢餐係$6800一圍全包, 個個都話抵, 梗係啦班日本人開佐好多支酒...

呢度食飯真係幾好, 衰就衰在地點太隔涉囉...

 

2006年8月3日(四) -- on Dean's List... 咁又點??

早幾日收到學校既mail:

Dear Students,

I am pleased that you were on the Dean's List in Sem B, 2005/06.  Only students with excellent performance are selected to be included in the Dean's List.  Your academic achievements are certainly commendable and I would like to wish you continued success in your academic and professional endeavours.

連續兩年都on Dean's List, 但對於PT student黎講, on Dean's List究竟又有咩作用呢??

繼巴士阿叔後又一巨獻!! -- 飛機阿姐

話說今日收到呢個MAIL:

話說出發果日7/ 7 C X504班機係09:10am起飛, 咁我08:45一上到機因為太疲倦就即刻訓著佐… 開頭都feel到架機開始行緊, 去到起飛跑道突然間又停佐大概成15分鐘, 跟住聽到有個空姐用廣東話, 國語同英語廣播:「請所有乘客將手上行李放回座位下, 多謝合作!」
當時周圍D人已經昅緊睇下邊條粉腸咁麻煩, 但都無發現...

再過多15分鐘(已經9:45am)又聽到廣播, 今次係機師(用英文, 內容大致上係):「而家因為經濟客艙有兩位乘客, 唔願意聽機組人員勸籲, 將手上行李放係適當位置, 所以我地起飛時間將會延遲, 如有不便, 敬請原諒!」

全機人即時起哄 + 粗口(我都有參與), 當大家好努力要搵出兇手時, 突然D空中小姐 + 少爺好緊張走來走去, 我聽到其中一個話:「開番道機門比佢地入黎...」
隔佐一陣就見到有3至4個機場保安同2個航空公司D大粒行去機尾右邊窗口位, 個兇手終於現身啦...

呢條友唔係亞伯亞婆或者國內同胞, 而係一名廿零三十歲, 個樣都OK既香港女子, 其實件事已經發展到要呢條X婆(請原諒我咁稱呼佢, 因為佢實在好不知所謂)落機, 佢地擾攘佐15分鐘, 佢都賴死唔走, 仲要同佢地拗點解要佢落機, 真係佢X味呀...

已經10:00am, 救星終於到勒~ 有3個警察黎到, 開頭都係勸果條女自己行落機, 但條女都係用拖字訣賴死唔走, 重同個幫辦講話搭開都唔駛將個袋放落地下, 點解今次又要... 連個幫辦都頂佢唔順話(都幾惡) :「嗱, 小姐, 我而家比最後一次機會你, 如果你再唔合作,地會立即採取拘捕行動!」

條女即刻「笠晒水」, 嗱嗱聲攞住佢個裝佐金銀珠寶, 價值$5,xxx既名貴GUCCI jolicoeur bag開始行出機艙, 咁我地全機人 都好 君子用熱烈既掌聲歡送佢(當中夾雜佐D英文粗口), 佢仲好串同我地話:「唔關我事架, 係佢地(機艙人員)太執著, 我個袋大佐兩吋, 係都要我放落椅底咋喎!」
真係佢X味呀 x 10000000...

重有同佢同行果兩個fd都同佢一齊落佐機, 真係累街坊. 最慘係D空中小姐同少爺, 又要由頭check過晒D行李艙... 攪到10:20am先可以起飛(足足遲佐成粒幾鐘, 真係X佢個肺)

有人搵到呢個女仔(人)寫番件事, 比我實殺死佢. 佢仲係覺得自己好啱. 一個人的低能, 浪費了全機人每人一小時, 而個理由係咁無聊, 真係完全生活係自我中心既港女.

fw>
今次搭飛機真係好激氣lor
無端端要落返機都有
架機都明明行緊架啦
行緊即係無事啦
做乜要人放個袋落地下o者
雖然個GUCCI係貴,
但我唔係矜貴到連放個袋落地下都唔肯果隻女仔黎
但係我D野放晒係個袋入面
成日要烏低身拎野, 好唔方便架嘛
咁我之前都試過咁啦, 又唔見人地話我
我點知間間航空公司都唔同規矩o者
開頭都好聲好氣同佢講, 點知唔知邊個咁麻煩
走去叫機師開咪
咁大間公司蝦我地幾個女仔, 都唔知知唔知醜
阿may叫我唔好同佢地嘈, 阻住班機走
我話又唔係我地錯, 就算阻住都係佢地阻住之嘛

咁, 我見佢地講極都唔明, 咪叫佢地個經理出黎同我講
點知真係激死我
一開門就幾個保安走過黎
有冇搞錯呀, 我地幾個女仔咋, 而家捉恐怖份子咩

我已經無心機同佢地嘈, 已經坐返係到
扣返好安全帶, 叫佢地唔駛理我, 唔好阻住其他人

點知又走幾個差人上黎
仲粗聲粗氣同我講話會拉我

算啦, 我都無晒mood, 咪即刻拎返晒D野走咯, 以後都唔搭呢間公司添呀

呢次我對香港D男人真係好失望lor
成個過程我地幾個女仔咁比人蝦法
都無人過黎同我地出聲
都唔知係咪男人黎架 ...
激鬼死我...

我的讀後感:
1. 呢單野簡直比巴士阿叔更傳奇, 如果巴士阿叔之前都咁紅, 呢位阿姐更加應該前途無可限量~
2. 咩將個袋放係櫈底真係咁麻煩既咩?
3. 係囉, 其他人都唔知係咪男人黎既, 如果係男人就應該幫拖講晒粗口趕你落機啦~
4. 呢個女仔第時應該可以做政府高官囉, 有晒D特質: 無腦, 歪理當真理, 死牛一邊頸唔識變通, 全界都認為你錯都仍然覺得自己啱
5. 呢個世界真係咩人都有…

流金歲月 -- 食物係OK, 但侍應唔得醒目.

地址: 屯門屯門巿廣場第一期2016-2017號舖
電話: 2613 0083

星期日晚黎呢度同阿媽慶祝生日, 因為佢聽同事話呢度幾好, 所以提議黎呢度. 當初打電話黎預約, 個staff竟然話只分三個時段, 分別係五點半, 七點同八點半, 同埋要限時食, 訂七點的話食到八點半就要走.

我地五個人叫佐十樣野, 分別係兩籠小籠包, 蒸銀絲卷, 紅油抄手, 松鼠桂魚, 土多啤梨骨, 西蘭花帶子, 蟹皇撈粉皮, 回窩肉, 一個特價既紅燒翅同埋佛跳牆.

D野都算幾好食, 至少我覺得好過附近果間金滬庭. 不過就落漏單, 明明叫佐紅油抄手, 佢明明都覆佐一次單, 但都係落漏, 不過大家食到一半都覺得飽飽地, 所以落漏佐都由得佢. 個蟹皇撈粉皮明明落佐單, 但係等佐成個鐘都未黎, 叫佢check又唔知有無check到, 後尾都費事等就叫佢cut單, 點知埋單check下條數發覺佢又計埋落去都無cut到, 好彩我地check下單啫!

是次每人消費約$120元

 

和庭 -- 食物都OK既, 但服務就唔掂囉...

地址: 旺角太子道西193號新世紀廣場3樓313-316號舖
電話: 2264-4881

星期日下午約佐大學同學出黎食飯, 我地叫佐個蟹子沙律, 三文魚刺身, 珍寶三文魚壽司, 什錦串燒, 蕃薯天婦羅, 軟殼蟹牛油果反卷, 椰汁帶子焗飯, 牛油炒什菇.

整體上味道都算唔錯, 三文魚刺身幾厚身大大件, 椰汁帶子焗飯比我想像中好食, 帶子都幾大粒.

但係D waiters服務就唔得啦, 我地四個人入到去, 想坐卡位, 問waiter可唔可以轉去卡位, 個waiter就話果D係六人枱, 但係果陣都無乜人, D客都係坐到疏疏落落咁, 我地心諗都唔慌會有其他人坐架啦, 不過算數, 坐番普通枱算. 但係D waiters叫幾次都無反應, 叫到大大聲都聽唔到咁. 態度好似做又三十六, 唔做又三十六咁. 今時今日咁既服務態度...

是次每人消費約$75元

New York Cafe & Bar -- 好味, 抵食!

地址: 元朗鳳翔路2-6號交通廣場地下33-34號舖
電話: 2478-9638

星期五晚同男友黎呢度食飯, 我地叫佐個小食拼盤(炸洋葱圈, 薯角同雞塊), 豬肋骨同埋海鮮意大利飯.

小食拼盤: 有好多洋葱圈, 價錢唔算貴.
豬肋骨: 幾好味, 另外配菜既粟米粒好好味!
海鮮意大利飯: 海鮮有帶子, 蝦同青口, 樣樣都大大舊, 好好味~

呢度舖仔細細, 但係我覺得環境唔錯, 同埋D waiters服務都算幾好, 會間唔中行埋黎問你覺得點, 食物得唔得. 呢度真係幾唔錯~

是次每人消費約$150元

不知所謂的新巴巴士司機! 我差點被車撞倒!!

我昨天(2006年7月31日)晚上十時十五分左右於南昌巴士總站內, 正沿斑馬線橫過馬路往西鐵站. 當時我看到有一輛新巴剛剛於站頭開車, 但由於我是沿斑馬線橫過馬路, 而不是亂過馬路, 所以便繼續橫過馬路. 但是該輛新巴巴士卻繼續加速, 完全沒有減速的意圖, 轉眼便來到距離我約2米的位置, 而且還很大聲的響按警示我! 斑馬線的功用不是用來讓行人安全地先行橫過馬路的嗎? 我實在沒有想過遵守交通規則, 沿斑馬線橫過馬路, 竟然會被新巴該位巴士司機這樣無禮對待!! 假設我當時被該位司機這樣突然而來的響按而受嚇呆站當場, 而該巴士司機又沒有減速/停下來的意思, 我想可能已經被該輛巴士撞死了!!

由於事出突然, 我實在沒有時間留意該輛巴士的車牌號碼. 但是我清楚記得當時應該是十時十五分左右. 我實在氣憤難平, 我已經以電郵向新巴發出投訴, 亦致電運輸署的交通投訴組服務投訴熱線, 但是該熱線職員表示我沒有該輛巴士的車牌號碼, 所以他們不能向巴士公司作出投訴.

但是昨晚我差點被車撞倒, 我實在沒有辦法容忍該位司機的危險行為! 我想知道我還可以做些什麼呢? 我還可以向什麼部門反映或作出投訴呢??

開張大吉~~

恭喜恭喜! 可喜可賀!! 墨魚燒賣既新BLOG終於開張大吉啦, 呢幾日不停咁將舊BLOG D野搬過黎, 再做埋網誌分類, 整埋下D相, 比以前好似整齊D. 但舊果個BLOG又唔係完全唔用架喎, 因為YAHOO呢度麻煩在一定要登記BLOGGER先可以留言, 但我知我班friend都無開YAHOO BLOGGER, 所以舊BLOG我仍然會繼續用(即係我既日記將會係舊BLOG POST一次, 係YAHOO呢度亦會POST一次), 方便大家可以係舊BLOG繼續留言比我架~ 請多多支持!

另外要多謝知道我結婚而留言恭喜我既路過朋友, 雖然大家都係擦身而過, 但係你地都願意留下祝福, 真係好多謝你地~ (YAHOO呢度果然係人氣D, 舊BLOG果度都無幾可會有路過既人留言)