我在日本的工作

D friends睇我blog話我喺日本掛住去玩, 其實我都有努力工作架, 不過工作上無咩好講所以好少係blog提起, 寫親落blog既都係去旅行或者去shopping既內容, 所以大家先覺得我好似成日都去佐玩啫.

所以今次就寫吓我既工作啦, 唔好比大家錯覺我成日去玩唔做野咁...

我而家做野既地方係銀座區, 即係有Fancl House, 三越, 博品館果條大街返工, 或者大家會覺得好正喎, 日日放佐工都可以去shopping囉? 但說實在我係銀座返佐咁耐工, 只係行過吓博品館, 三越, 松屋一兩次而已. 就好似我以前係尖沙咀海港城返工, 放佐工我都好少會行海港城. 可能對得多無咩地方想行啦.

而家我係日本公司主要都係做會計既工作, 我而家主要做既客都係D飲食店, 可能一來D數比較簡單, 所以D同事比呢類客我做先; 二來銀座區最多就係D居酒屋, 料理店之類, 所以我做緊既九成公司都係飲食店. 我要做既就係對住大一堆領收書, 通帳, 給料等等既資料做入數既工作; 同埋對住一大堆売上伝票做集計既工作(即係將每一晚幫襯既客人既bill全部加埋晒得出果個月既生意額, 同埋分開客人係用現金/信用卡埋單, 還是"後數")

 

會計上黎講我自己就覺得同香港做既無咩分別, concept上都係咁既啫, 不過對我來說, 最大既困難係果堆國稅, 地稅/都稅, 住民稅, 社會保險料, 健康保險料, 厚生年金, 源泉所得稅, 法定福利費等等,  再加上消費稅又要分課稅, 非課稅, 不課稅咁去入數, 對住呢D我真係好頭痕. 遇到呢D我通常要花D時間睇番上個月既數點樣入,  然後跟住D credit debit咁去入番. 但實際上個數係點計出黎, 又或者個concept係點, 我就完全唔理解囉...