2009年10月24日(六) -- 河口湖之旅 Day 1 (part 7) -- 酒店既勁正晚餐

今次黎溫泉酒店, 我終於成功地衝破佐我既心理關口, 就係去佐露天風呂同其他人一齊赤條條咁浸溫泉.

我以前黎日本, 一定book露天風呂付客室(今次都一樣係風呂付客室), 因為始終唔想剝晒衫同其他人一齊浸(如果我身材正D怕咩剝呀~). 所以我從來都未試過去浸酒店既露天溫泉.

但今次黎到突然豁佐出去, 竟然肯除晒衫同其他人肉帛相見, 我都估自己唔到. 其實我又唔識其他人, 人地又唔識我, 大家都係女人, 怕咩啫. 係香港人唔習慣, 扭扭擰擰搞到尷尷尬尬咋麻, 只要唔好覺得尷尬, 唔好閃閃縮縮咁, 其實根本就無咩野. 不過當然今次係因為無熟人一齊浸我先夠膽啦, 你話如果下次同朋友/屋企人一齊黎, 我都係死都唔會一齊去浸架. (都係果句, 如果我身材fit D怕咩比朋友見呀)

浸完溫泉, 我地6點就去食晚飯. 呢間酒店真係服務一流, 我地一出餐廳果層既lift口, 就已經見到有人企正係lift口迎接. 然後帶到你入餐廳, 又見到四, 五個侍應一字排開咁恭迎你入座, 勁!~

上次公司旅行食果餐我已經覺得好正, 估唔到今晚呢餐仲要正好多倍, 唔講咁多啦, 睇相啦~~

龍蝦刺身, 好味好味~:

無錯, 我係左手揸筷子的:

 

 

 

 

 

 

 

 

 

 

食完飯就返房睇電視, 嘆吓張按摩椅.

有字幕顯示既電視機呀~ 日本電視唔似香港咁, D節目本身就已經連埋字幕, 日本呢度出唔出到字幕要視乎電視機既功能. 如果宿舍果部電視都出到字幕就好啦, 我日文一定進步神速:

唉, 成晚都落住雨...

 

浸完溫泉又食飽飽, 實在太舒服, 我明明係床度睇緊電視, 但都同流沙包一樣不知不覺咁就訓著佐.