繼上次去買面包比少錢同唔記得找錢之後, 今次又有新野.
說話前日我又如常咁去Panash買面包, 今次出佐門口, 個staff走出黎叫住我, 大家估下我今次又衰咩?? 遲D開估.
2006年11月30日星期四
公司旅行... 去澳門?!! 無野呀? 低能架?!!
話說我轉佐黎尖沙咀office做佐兩年左右, 第一年入到黎剛剛可以join到公司旅行, 地點係北京或泰國任揀, 我果年就揀佐去北京. 上年說話要將D錢留黎同要退休既社長搞farewell party, 所以上年無公司旅行. 到今年, 收風番黎話management方面同老細deal緊到底今年有無公司旅行, 因為而家轉佐新老細(由以往既日本人社長轉佐做香港人社長, 你可以想像公司福利唔慌好得過以前), D風傳佐一陣又無影, 以為今年應該都唔會有公司旅行, 點知星期一收到個咁既e-mail:
Dear XXX members,
The management of company is pleased to inform you that XXX has achieved a
new sales record in Oct/2006 of HK$ 401,924,000.
To celebrate the achievement of this record and to appreciate your dedicated effort,
the company is decided to organize a leisure trip to Macau.
Date: 16(Sat)-17(Sun) Dec 2006, 2 day and 1 night (星期三收到e-mail又話改期去1月喎, 日子未知)
All XXX office members are eligible to join.
We shall send details and itinerary of this trip later this week.
Its a good chance for us to enjoy, relex and reunion during this season.
Please mark your schedule and participate.
我睇到之後第一個反應係點?? 先係錯愕, 然後火滾, 跟住得啖笑. 真係發夢都無諗過公司旅行會去澳門, 哈哈哈~ 索性唔好搞算數啦. 下午流沙包打黎, 我即刻同佢「分享」, 我一路講一路笑, 好似講緊個笑話咁, 我都唔怕其他同事聽到我咁既反應, 反正我根本已經對呢間公司死心, 出年畢業之時就係我離開呢間公司之日. 我夜晚講比阿媽知公司旅行去澳門, 佢聽完之後笑佐幾耐呀~ 
我會唔會去?? 梗係唔會啦, 唔好嘥我時間, 去澳門自己去都得啦, 駛唔駛跟公司團去呀? 你想像一下個個去澳門都係自由行, 忽然見到有架旅遊車駛黎, 有一堆鴨仔團落車聽導遊講解, 然後影完相上返車, 但你聽到班團友係講廣東話應該唔係大陸人, 車頭仲要貼住公司名, 團友仲要掛住個旅行社襟章... 嘩, 就咁諗我都覺得核突老土啦. 好心啦, 公司旅行去澳門都有既?? 講出黎怕唔怕比人恥笑呀? 怕唔怕比其他公司鄙視呀?
我識既人, 貴婦同我個妹既公司旅行都去泰國啦, 湯米好似去日本, 糯米雞佢兩年既公司旅行都係去歐洲添呀~ 澳門?? 唔知下年係咪去海洋公園呢? 不如去彭福公園呀笨~
2006年11月29日星期三
去佐雅麗拎男裝恤衫, 仲hold多兩套衫添, 哈哈~~
星期日去完潮館飲茶之後, 我地就去佐雅麗, 因為星期五要去羅浮宮影婚紗相, 但流沙包未有恤衫, 咁啱上次去試擺酒租既衫, 個女仔話送件男裝恤衫比我地, 所以我地就星期日去拎. 去到見到剛剛有人還衫, 比我見到件幾靚幾特別喎, 我即刻同君君講話件衫好靚, 佢就幫我hold佐件衫. 然後臨走果陣又見到件婚紗都靚喎, 本來都無諗住hold, 但君君見我企係件婚紗前面望佐咁耐, 佢話幫我hold埋呢件, 真係好醒目呀~ 
既然佢地服務咁好, 我都唔怕係度同佢地賣下廣告, 佢地既衫其實幾唔錯 (因為我知佢地既衫款都係抄番黎). 同埋真係平囉, 價錢如下:
5件--$1998
6件--$2380
7件--$2680
8件--$2980
9件--$3338
10件--$3698
仲包埋頭飾, 首飾, 頭紗, 披肩, 底裙, 手套.
只要打個電話同佢地講想約試衫, 就可以任試, 唔駛試衫費, 唔限試幾多件. 試到啱既先落訂, 唔啱既你都可以就咁走, 不另收費.
雅麗婚紗晚裝屋
地址: 元朗教育路兆豐樓68號I地下 (近舊B仔, 7-11對面)
電話: 2474-7137
如果你地去幫襯, 可以話係出年4月7號結婚既Chloe介紹, 佢可能有free gift如恤衫, 紅傘送比你. 街客可能就無禮物送. 因為之前介紹我去既洪太都好似無傘送既??
潮館 -- 去佐飲茶, 無咩特別
地址: 元朗廣場3樓333號舖
電話: 2478-0628
星期日流沙包唔駛一早起身出去做野, 於是我地起身之後就去潮館飲茶, 因為我地願意搭枱, 所以好快就有位, 我地點佐叉燒腸粉, 紫菜花枝餅, 馬拉糕, 海蜇+腎, 三色燒賣, 蝦餃拼粉果, 共六樣野. 食物就普普通通啦, 服務就麻麻啦, 無咩特別.
是次每人消費約$55
2006年11月28日星期二
2006年11月23日(四) -- Presentation
今日上果堂Financial Statement Analysis要present, 我今日遲到成7點先返到去, 第一組剛剛present完, miss佐鬼仔present果part添!! 聽人講佢地果組做得好好. 今日個鬼仔仲著晒恤衫西褲返黎present添喎~
我地第三組present, 限時25分鐘, 但我地18分鐘左右就講完. 估唔到鬼仔好認真聽, 真係問問題, 好彩我地解到圍, 又過一關~ 交埋分peer review commentary就搞掂等考試. 但係呢科真係好難喎, 點算... 
婚前恍惚症??
話說我每晚返學前我都會去買面包當dinner, 而我每次都會袋定幾蚊大餅同毫子係褲袋度, 唔駛比錢果陣先摷銀包攞錢. 上兩個星期我一如以往又去買面包, 個面包$5.7, 我記得我褲袋有一個五蚊大餅+共一蚊既亳子, 於是我就數佐7亳子出黎比錢, 轉身諗住走, 點知收銀阿姐好大聲咁叫: 「小姐!」我回頭睇下做咩事, 原來我只係比佐7亳子佢, 個五蚊大餅仲係我手上, 好白痴, 咪即刻講唔好意思, 比番個五蚊佢就即走. 比少佐錢我係唔啱, 但係個阿姐既語氣態度, 好似係我係度搏矇比少錢咁囉, 好瘀呀! 下次唔去漢口道間凱施餅店買面包呀!! 
又話說, 自從我話短期內唔去凱施餅店買面包之後, 而家轉去Panash買, 雖然行遠佐, 價錢又貴D, 但款式特別又可以試下新口味. 我今次買佐個蜜瓜包, 比完錢轉身又比人嗌住, 嗚, 今次又衰咩?? 原來今次係唔記得找錢. 哎呀, 搞咩鬼呀, 接二連三咁唔係比少錢就係唔記得找錢...
2006年11月27日星期一
2006年11月20日(一) -- 失眠?!
星期日晚去完羅浮宮試衫, 明明好攰, 但係攤上床又碌黎碌去都訓唔著, 好擔心揀果兩件衫係咪真係靚, 係咪真係襯我, 唔知有無揀錯; 擔心果日化妝唔靚, 因為我知自己面肥眼細, 化妝都補救唔到幾多; 又擔心果日唔識點笑, 笑得唔靚; 又擔心D相唔知影得靚唔靚; 又擔心果日唔知會唔會落雨, 唔知會唔會好凍. 到最後唔知幾多點先訓到, 但係第二朝早實在起唔到身, 於是又偷懶放病假, 今晚連學都無返, 我死得架啦~
麗新美食坊 -- 幾抵架~
地址: 元朗教育路
上星期日去完羅浮宮試衫鬼咁攰, 試完衫就返佐屋企. 夜晚我地去佐教育路算係新開既麗新美食坊食飯. 佢今晚既set dinner唔係魚就係牛, 兩樣野我都唔食, 加上下午飲茶仲飽緊, 我又要節食, 所以我只係叫佐個雞絲湯檬粉, 流沙包就好似叫佐個T骨扒, 佢個set dinner又前菜又甜品, 都係四十蚊左右, 好似幾抵喎.
是次每人消費約$30
2006年11月24日星期五
八月花 -- 舒服地飲茶
地址: 九龍塘又一城G25店
電話: 2333-0222
星期日去羅浮宮試衫之前去佐八月花飲茶, 我地叫佐個名為心心相印既花茶, 叫佐個雀籠點心, 一個奶黃流沙包, 同一個檸香叉燒酥. 雀龍點心包括水晶鮮蝦餃, 鮑魚滑燒賣, 瑤柱翠苗餃, 黃金蘿蔔酥, 特大鮮蝦露筍春卷和燕窩蛋撻.
但係離晒大譜流沙包食果舊燒賣裏面竟然有大塊骨係度, 好彩無整親啫. 流沙包呢D咁溫文爾雅既人有咩事都唔會追究, 就咁就算. 我就唔係D咁既人, 有問題有不滿我一定會出聲投訴. 於是我叫個經理過黎, 個經理就話free番個點心比我地, 任我地揀咩都得. 但個鮑魚燒賣已經算係最貴果樣點心, 我地求求其其要佐個XO醬炒蘿蔔糕. 呢餐食到好飽~
我投訴完無幾耐, 再有另一個應該係經理既人埋黎再道歉, 同埋解釋番點解會有舊骨係燒賣裏面既可能性. 但講真我做佐廿幾年人飲茶飲過無數次, 從來未試過食燒賣會有舊咁大既骨係裏面囉, 你話係屋村酒樓都算啦, 話晒呢度都算係sell高格調喎...
是次每人消費約$115
2006年11月23日星期四
去羅浮宮揀衫, 途中見到房祖明~?
星期日先出佐金都睇鞋, 最後流沙包都訂造埋鞋啦~ 之後落又一城既八月花飲茶, 然後三點半去羅浮宮試衫, 途中經過成蟲間屋, 竟然見到房祖明剛剛返到黎落車開閘門, 感覺上真人比上鏡靚仔喎.
我地準時去到羅浮宮, 個staff先比佐四本晚裝相簿, 五本婚紗相簿我揀(雖然話有五本婚紗相簿, 但最後果本得幾張係度, 而且D相仲係同之前本相簿重覆既添, 所以嚴格黎講都係得四本婚紗相簿), 可以各揀五件黎試. 我用佐四十分鐘先揀到total十件出黎. 但係試上身發覺好多都唔啱自己, 後尾個staff再拎佐D佢認為適合我既衫比我再試, 大約試佐廿件左右, 到最後揀既果件婚紗同晚裝, 都唔係我當初睇相簿所揀既, 係個staff自己拎比我試既, 早知就唔嘥咁耐時間睇相簿啦, 哈哈~~ 因為個staff對慣咁多人, 佢一眼就會知道邊D款襯你多D, 邊D款唔啱你著, 所以有時佢地幫你揀好過你自己睇相簿揀. 因為一來睇相簿唔夠真實, 二來影出黎靚唔代表你著上身都一樣咁靚.
另外有樣野一定要講, 話說上星期日上Global Wedding試帶去關島既婚紗, 我咪好猶豫究竟揀第一件好定第二件好既, 點知去到羅浮宮睇相簿, 竟然比我發現羅浮宮有條一模一樣既第一件蝴蝶款. 羅浮宮既衫款果然成日比人抄襲. 於是我就好振奮咁睇下會唔會有埋第二件成熟款, 但係就搵唔到...
新寶粥麵茶餐廳 -- 貨真對版喎~
地址: 元朗教育路50號兆明樓地下
電話: 2475-2566
星期六流沙包要朝十晚十工作, 一朝早出去(義務)教波, 之後去浸大吹大專盃, 夜晚返朗屏又(義務)教波. 之前講好等埋流沙包教完波返黎先一齊食飯, 等到十一點都未收到電話, 好肚餓呀, 谷鬼氣!! 十一點幾先一齊出去食飯, 我地去佐新寶茶餐廳, 叫佐個揚州窩伊面, 估唔到佢實際同影出黎張相幾對版喎, 算幾大碗同幾多料, 可能因為肚餓啦, 所以覺得好食.
買佐絲花球, 拎佐婚紗鞋~~
星期五去元綠食完飯落佐金都, 因為要買絲花球for12月1號影相用, 同埋順便去拎婚紗鞋, 流沙包亦要去造鞋. 行均成個金都, 都唔係好多間賣絲花球, 有D閒閒地嗱起手都話要$350個, 好似貴佐D喎. 最後去佐一樓既藝苑花店買, 圓形絲花球連新郎襟花共$238(拖尾款就$268). 果度擺出黎既款唔算太多, 不過本相簿就有好多款式. 最後我係太陽花與香檳色玫瑰襯紫色花花下作出決擇. 其實想揀太陽花, 因為幾sharp, 但係我唔知影婚紗相究竟揀個咩花球先適當, 同埋又驚唔襯件婚紗, 所以最後都係大路咁揀番玫塊.
然後再落地庫甜蜜蜜拎我早前訂造好既婚紗鞋, 價值$338. 本來流沙包打算訂造埋鞋, 但老闆話有款好正既boot款聽日會返, 極力推介, 所以我地決定星期日再黎睇過.
之後再去朗豪坊食Pappagallo, 因為之前買雪糕月餅送佐張買一送一雪糕coupon, 要今個月內用佐佢. 之後就行去搭車勒.
元綠壽司 -- 久唔久去試新野
地址: 旺角西洋菜南街138號
電話: 23967288
星期五落佐旺角食飯, 因為又要去金都, 唔想食得太濟, 所以去佐元綠食. 我地主要係試新野, 好似豚肉芝士卷, 軟殼蟹pizza, 燒凡立貝串, 鮮芒三文魚壽司等等, 樣樣野都好好食.
其實我以前鍾意去元氣多過去元綠, 但而家就鍾意去元綠多D. 因為元綠既食物種類多D, 唔似元氣咁主要都係食壽司, 同埋元綠時不時會有新野出, 可以吸引到我久唔久就去幫襯. 但元氣就要隔好耐先有興致再去.
2006年11月22日星期三
銀行服務
某日下午趁有空檔, 鼠佐落去HSBC同恒生拎信用卡, HSBC就係自己張信用卡到期去拎張新卡(我想轉做金卡呀, 但銀行話無得咁樣轉, 一係就再申請多張卡). 恒生就係拎流沙包申請比我既中大platinum附屬卡. 先去到HSBC, 我記得以前係按button攞飛等叫籌, 唔同既戶口按唔同既button, 當然如果係普通紅簿仔戶口既籌應該就要等耐D. 自從海港城間HSBC裝修完之後我都無去過用teller服務, 裝修完細佐, 無佐按button攞籌, 要自己排隊. 我記得以前好似有一個counter係專for拎卡唔駛排人龍架麻...?? 而家無佐都唔知排邊, 好彩我係運籌理財, 唔駛排主人龍, 長到死...
拎完再去恒生銀行, 今次無辦法要排果條長人龍, 鬼死咁耐先輪到我. 講真我去拎張卡都要排餐矇真係嘥時間, 既然銀行都減少緊呢類non-value added既服務, 點解唔好似AE咁直頭寄張卡去你屋企啫?? 搞佐大半個鐘先返到公司.
2006年11月17日星期五
La Brasserie -- 好味好味, 但冷氣勁凍
地址: Gateway, Marco Polo Hotel
電話: 2113-7925
星期日試完衫去佐SOGO行街買野, 買佐好多Keroppi呀, 多謝老公~~ 跟住去佐尖沙咀Marco Polo Hotel既La Brasserie食法國菜, 我地叫佐個Oyster plate, 頭盤要佐鴨肝, 主菜要白鴿, 甜品要佐個chocolate pudding with ice-cream. 樣樣都好味呀, 睇相啦, 正~~
是次每人消費約$624 (流沙包join佐Marco Polo Club所以半價, 埋單total $624即每人約$315)
2006年11月16日星期四
南京小廚 -- 下次去番北京水餃店好過
地址: 元朗擊壤路金寶大廈地下7號舖
電話: 2478-3813
星期日約佐兩點鐘上Global Wedding試衫, 出去前去佐南京小廚食lunch, 我叫佐個排骨雞絲担担面, 流沙包叫佐個燻魚雲吞担担面. 比起隔離間北京水餃店, 呢間南京小廚真係差幾皮. 首先D排骨似豬扒多D, 又靱; D所謂既担担面得D湯底有D花生醬味, 但你搵唔到一粒肉碎, 咁都算担担面??? 流沙包碗面D雲吞... 唔, 下次去番北京水餃店好過.
是次每人消費約$26
2006年11月15日星期三
2006年11月11日(六) -- 德國啤酒節
星期六晚同流沙包屋企人一齊去佐德國啤酒節, 裏面既食物種類唔多, 都係牛扒, 排骨, 豬手, 春雞, 腸之類... 但價錢唔平囉, $98份, 豬手要$108一份. 甜品就有黑森林蛋糕, 士多啤梨撻, cheese cake, 蘋果卷之類, $38份. 飲品當然有啤酒, 仲有橙汁, 汽水. 橙汁比啤酒貴, 啤酒好似三十零蚊杯, 橙汁要$55杯.
因為帳幕裏面無晒位, 所以我地係用餐區度食野, 但食完野我地都無乜入去裏面睇表演, D表演主要都係有隊鬼佬band係度唱歌跳舞咁. 不過裏面好焗, 我又唔鍾意D人多又嘈既地方, 所以食完飯都只係喺用餐區度繼續呆坐, 我未來姨仔帶佐佢意大利個老細黎, 食完飯大家呆坐既時候係度吹下水, 跟住入一入去帳幕裏面睇下show, 講真我唔係果D會好投入去玩好投入去睇表演既人, 見人地睇show睇得好開心, 手舞足蹈, 打晒拍子, un身un勢. 我就係果D碌木企係度齋睇表演既人囉.
到佐十點幾左右我地就走勒, 拎住兩個水杯番去, 我同流沙包又無帶大袋, 好論盡.
2006年11月13日星期一
揀邊件婚紗去關島好呀~? 好煩惱, 比D意見我呀~~
今日上佐Global Wedding試婚紗, 用黎帶過關島行chapel同埋係關島影婚紗相用, 以下兩件我都好鍾意, 唔知揀邊件好, 大家不如比D意見我, 覺得我著邊件好睇D?? 佢幫我暫時hold起呢兩件先, 但聽日一定要比答覆啦~~~ (由於兩件婚紗都未改, 唔係完全啱身, 所以睇落腰好粗胸位太怪. 但淨係睇款你地覺得邊件好??)
第一件: (由於size未改, 所以膊頭條帶短得濟, 唯有放住手臂兩邊先...)
第二件:
2006年11月11日星期六
Rice Paper -- 貴到嘔!
地址: 尖沙咀海港城海威商場3樓3319號舖
電話: 3151-7801
祝幸福少婦生日快樂~
今日lunch同少婦去佐Rice Paper食lunch, 雖然我都知尖沙咀消費係貴, 但係無理由佢set lunch裏面既雞絲湯河都要$58一碗囉, 識飛架? 其它既如香茅豬肉撈檬要成$95個, 有D仲要百幾蚊添, 痴線咩. 於是叫佐個最平既雞絲湯河, 配青檬香薑蜜. 個湯河係幾大碗既, 但係味道無咩特別喎, 人地廿幾蚊一碗果D差唔多啫; 個薑蜜好難飲.
貴唔係問題, 問題係你貴得黎要比人覺得你係值囉!!
下次唔會再黎, lunch唔會, dinner都唔會.
是次每人消費約$64
2006年11月9日星期四
Savour Cafe 品味 -- 元朗區黎講貴佐D
地址: 元朗達輝徑3號華健大廈地下
電話: 2442-2111
今日都仍然疴, 下午食佐個叮叮粥, 但夜晚死唔戒口, 去佐新開果間餐廳食飯, 我地叫佐個意大利海鮮意粉同黑豚肉既main course, 兩個都加佐廿蚊轉做餐, 有沙律, 餐湯同餐飲. 個沙律幾OK, 有幾片鴨胸(我食到係鴨胸, 流沙包覺得係火腿, 所以唔confirm係咪鴨胸). 餐湯跟蒜蓉包, 唔錯. 但個餐湯味道就怪怪地, 佢應該係什菜湯, 但唔多啱我口味, 我覺得唔好飲. 個意粉OK, 有魷魚, 青口, 蝦, 帶子. 個黑豚肉都幾好, 但幾多肥膏.
餐飲我加五蚊要焦糖朱古力, 我次次都係落完order先記得自己減緊肥, 仲叫焦糖朱古力真係想肥死?! 但係個朱古力好好飲啊, 如果冬天飲就勁正. 不過比我揀我都係去番利華麗餐廳, 一來多D選擇, 二來味道好似好食D, 三來呢間品味餐廳, 係元朗區黎講價錢真係貴, 同係出面尖沙咀食既價錢好似無咩分別.
是次每人消費約$165
2006年11月8日星期三
金泰村泰國餐廳 -- 病都唔肯戒口
地址: 元朗西菁街好順泰大廈28-29號舖
電話: 2478-9808
唔知係咪關打邊爐事, 星期六勁胃痛, 疴佐好幾次. 本來打算努力溫書, 結果溫得少少. 夜晚流沙包屋企人話去MISS度食飯, 本來我咁既款唔應該去, 但係我唔去的話流沙包又唔去, 同埋我呢挺人病都唔戒口, 結果照去食泰國菜. 我地叫佐:
蝦刺身--勁好食, 每次黎都必叫
咖喱炒蟹--好味道~
薄餅--又係必叫, 好味!
蒜蓉包--今日唔知做咩, 硬掘掘好似隔夜咁...
一隻新出既唔知咩雞--我覺得麻麻地, 淡佐DD, 但肉地好滑
炸蜜汁蠔--好味好味, D蠔超大隻, 啖啖肉, 好食~
(好似係)馬拉盞通菜--OK
原來今晚食飯係慶祝阿偉升職, 恭喜恭喜~~
2006年11月7日星期二
有骨氣火鍋專門店 -- 我覺得好過小肥羊
地址: 尖沙咀堪富利士道11號地下
電話: 2312-1616
上星期五同流沙包同佢班同事去打邊爐, 果度D野都OK好食, 起碼我覺得好過小肥羊, 同埋有D食物都幾特別, 好似水晶叉燒包, 竹笙蝦卷咁. 價錢都唔算貴, 埋單每人都係百幾蚊, OK啦.
是次每人消費約$130
2006年11月4日星期六
2006年11月2日星期四
上莊唔係日日係條街度亂嗌就有人投你票架...?!! 知唔知自己又阻街又嘈呀??
呢排返學, 成個校園都嘈喧巴閉, 因為又係搞上莊既日子, 成班人係電梯位, 通道度係咁嗌, 但係嗌既通常都係「XXX 2號同你講拜拜, 拜拜, 拜拜」. 講真我覺得好白痴, 日日係返放學高峰時間係校園裏面嗌埋D咁既無聊野, 噪音污染, 好煩呀!! 可唔可以諗D有建設性D實際D既宣傳方法呀?!! 年年都係咁, 搵D新意得唔得??
想當年我都有玩上莊, 但我地當年無咁白痴通街係度亂嗌囉. 我果陣係城大管弦樂團既secretary, 唔駛同人爭, 根本唔需要係度嗌埋D無聊口號. 你地搞上莊搞宣傳唔係唔得, 但唔該唔好日日阻晒成條街同日日係度製造噪音呀!! 
2006年11月1日星期三
2006年10月29日(日)
星期日流沙包出去大長征, 先去藍田南帶隊, 再去西區公園做球証. 我就當然係屋企閉關溫書啦. 夜晚同成班元朗人去佐陸記食飯, 其實佢地一早話過今晚去唱K, 所以唱K之前一齊食飯, 大班人無咩idea, 最後有人話去陸記. 其實我唔多想去陸記, 因為我食過一次, 覺得唔係太好食. 同埋成班人食飯點解會去呢D咁既地方食飯既?? 不過我知佢地部份人經濟能力有限, 所以我諗佢地唔會去D貴地方. 我叫佐個咖喱雞翼撈河粉, 無湯既, D咖喱汁就加係D河粉上面, 感覺怪怪地, 味道唔差既, 不過我覺得咁既食法好古怪, 同埋好少雞翼, 佢D雞翼砍開佐一半, 仲要得幾舊仔...
流沙包叫佐個咖喱牛腩飯有水晶涼粉送, 聽講水晶涼粉係呢度既招牌喎, 但係我聽都未聽過... 講真到底有咩咁特別有咩咁招牌呢? 我唔覺得特別好食喎, 仲要時不時有D昆蟲仔係裏面添, 睇見都唔開胃...
是次每人消費約$26
食完飯流沙包同佢地去唱K, 我就自己返屋企, 其實我唔係唔鍾意唱K, 只不過知道自己五音不全, 費事一開口嚇親人啦, 所以獻醜不如藏拙. 加上我又唔多識猜枚又唔飲得酒, 同班勁飲酒既friends去唱K好蝕(唔通話我唔飲酒可唔可以比少份錢?), 呢期要慳D所以都係返屋企溫書比較有建設性.
關島結婚之旅終於confirm好晒機票酒店~~
上星期五終於收到機票酒店package(雖然其實係電子機票), 即係關島之旅可以confirmed到啦, 安樂晒~ 而家鐵定係12月25日乘搭23:30班機前往關島, 於12月29日返香港. 因為我地一行八人去, 跟據CO-HOLIDAYS做緊既promotion, 我同流沙包去程可以坐商務客位(但細機既B-class會唔會同E-class無咩分別架?). 但係由於所有人既機票酒店錢都係我地出(我只係出番自己屋企人果份, 流沙包甘D佢有四個屋企人一齊去, 全部流沙包出錢), total要$43428, 好肉痛, 我地兩個人去轉歐洲都得啦~~ 不過我見咁大個人都未請過阿媽去旅行(唔計佢去日本我贊助機票錢之外), 無所謂啦唯有自己再死慳死抵D. 希望過到果邊佢地會出番自己食飯/娛樂/消遣既費用, 唔好咩都旨意晒我地比, 果邊既消費實在好貴呀!! 我同流沙包其實已經好窮啦... 
而家要做既就係好好plan下係關島既行程, 我想多D二人世界呀... 本來好想玩水上活動想去睇海豚, 但我呢D麻煩人曬一陣就會變黑, 黑佐就唔會變番白, 我仲要為出年四月擺酒而keep靚靚, 我唔想到時影出黎既結婚相變佐做賓賓, 所以睇怕我去到關島都唔會同陽光玩遊戲...
2006年10月27日(五) -- OT到00:30, 勁呀!!
今日星期五, 流沙包要帶班學生入天文營, 得番我一個, 約佐放工去做facial. 近月尾我本身負責既job其實已經做晒, 四點幾已經叫做等收工, 不過隔離同事K突然問我得唔得閒, 佢負責間廠仲好好多野未做好, 我見橫掂得閒, 所以就幫佢手入數. 但係要搵番扣邊條數既過程好漫長, 要對兩個files先知應該扣邊條數. 由於我本身約佐六點做facial, 所以五點半就先離開公司去做facial, 做完之後八點返番公司繼續做. 我由八點幾做到差唔多十點幾先做完果一少疊, 我十點半都未食飯, 好彩仲有舖頭送外賣, 係公司食埋個米線, send埋D files, 執埋D手尾, 要凌晨十二點半先走得, 又再一次打破自己OT既紀錄~~
一點幾返到屋企, 仲可以溫陣書添, 勁呀!!
(但我發覺倉班人仲勁, 我星期二返公司check mail, 發覺佢地星期五果晚凌晨一點幾都仲未走仲reply mail比我. 佢地晚晚十點幾十一點都未放工, 假期前後同月尾仲特別忙, 咁都捱得住, 勁呀!)
裕滿人家 -- 晚飯都唔錯, 飲茶就好唔掂...
地址: 屯門石排路一號卓爾居地下G1號舖
電話: 2461-9138
上星期三返屯門食飯, 但係伯母無煮飯, 於是出街食. 由於美心約滿執佐, 所以得番樓下既裕滿人家可以揀. 我本來唔想去呢間, 因為之前去過飲茶, 超唔掂, D枱擺到密質質, 座位窄, 又污糟, 試過杯底仲可以黐住舊鳳爪骨, 恐怖到你唔信, 嗱渣到暈. 但係無得選擇, 所以最後都去佐食飯.
我地叫佐個求其一餐, 可以揀六款餸, $198. 雖然我地三個人去食, 但因為預埋第二日lunch帶飯, 所以三個人仍然叫六個餸, 我地叫佐:
咕嚕肉--OK
豆腐斑腩--幾好
焗蠔砵--好食喎
九菜菜甫蜆肉炒蛋--好食, D蜆肉好大隻
鎮江排骨--味道OK, 不過每一粒排骨好似骰仔咁細...
芝士焗四蔬--好味
酒樓仲送佐碟燒肉, 但奇怪在有D皮好脆, 有D好淋. 呢餐飯其實幾好食, 樣樣餸都幾得, 晚飯都食得過. (但如果去飲茶我仍然有保留)
是次每人消費約$100
訂閱：
文章 (Atom)