Monster Sushi

話說之前我同流沙包去咗”爭鮮迴轉壽司”食咗D假壽司, 今次我決定食番D好少少既壽司, 於是去咗Monster Sushi.

 

我星期五晚大約六點十去到, 已經有人喺門口等緊位, 好彩流沙包早我少少去到已經攞咗位, 否則真係有排等.

 

我地叫咗個串燒拼盤, 海膽壽司, 龍蝦沙律壽司, 鰻魚玉子等等. 味道梗係唔錯啦, 總之唔好再叫我食番D $8一碟既就得.

卓韻芝棟篤笑 – 又悶又無聊, 勁想中途走

3月18日, 我同流沙包去咗會展睇卓韻芝棟篤笑, 我真係非常非常之後悔買咗飛黎睇.

 

我未試過睇棟篤笑係成晚都無笑過架囉, 內容勁膚淺勁無聊, 係度扮同性戀人士既動靜, 扮俞琤, 連自己阿婆都搬埋出黎, 我真係完全唔覺得有趣囉.

 

尤其是嘉賓環節, 我地果場既嘉賓係黃德斌, 我根本都唔睇香港既垃圾電視劇集, 對於黃生我真係一D興趣都無, 加上阿芝同佢既對話都唔知up乜, 講埋D咩野點樣搽cream, 又話咩自拍, 嘉賓要被阿芝摸胸… 做咩啫? 用黎攝時間呀!!?? 悶到我打住喊露咁去咗個toilet.

 

去完toilet返黎, 我同流沙包講不如走囉, 反而係流沙包話既然都買咗飛, 咪睇埋佢囉.

 

我唯有拎部iphone出黎自娛… 好辛苦捱到完場, 都未等到阿芝謝完幕, 我已經急急腳鬆人.

 

今晚真係嘥錢嘥時間, 仲要門票係$380咁貴, 早知攞D錢去睇多套舞台劇好過!!

爭鮮迴轉壽司 – 偽壽司, 我接受唔到囉…

上一篇blog話我同流沙包去咗The One睇大追捕, 睇完之後我地四圍搵野食, 見The One後面有間叫”爭鮮迴轉壽司”, 於是就試吓幫襯.

 

佢標榜碟碟8蚊, 我都知唔可以有任何要求, 但係… 我真係接受唔到呢D咁既”偽壽司”囉…

 

好難得見到D壽司, 上面舊肉係細舊到cover唔晒舊飯架囉… 都唔緊要, 8蚊呀嘛, 係咁上下, 我明白.

 

當我將舊”壽司”放入口之後, 我無辦法控制到自己, 不停喺度傻笑. “吓? 呢舊咩黎架? 壽司? 唔係掛? 咁既味道既? 我真係完全接受唔到呀!”

 

估勿論佢D飯唔係珍珠米, $8一碟我都唔認為會食到珍珠米. 不過你D壽司醋落多少少都唔怕死呀?? 我只係覺得我係放緊D味道古怪而又被捏成一舊既白飯入口, 呢舊野根本完全唔可以叫做壽司囉!

 

$8一碟真係好平, 但我真係接受唔到囉, sorry.

 

題外話, 當我地十點幾食完埋單後, 喺樓梯撞到王祖藍行緊上黎, 佢望住我地笑一笑, 我都禮貌地向佢報以微笑.

 

之後我同流沙包講:”尖沙咀咁多好野食, 點解王祖藍會選擇黎食D 咁cheap既壽司既?”

2012年3月17日(六) – 香港花卉展覽2012

星期六, 我地去咗維園既香港花展.

 

我地果日好鬼死hea, 朝早起身先去咗飲茶, 磨吓磨吓已經三點幾, 出到去銅鑼灣已經四點.

 

今日既天氣好好, 又熱又曬, 好彩我帶埋把防UV遮去, 如果唔係實曬死, 流沙包一路影相一路勁標汗. 我地馬後炮話好彩咁晏先出黎, 如果早少少
點幾兩點黎到, 真係曬到人都癲.

 

唔駛問成個維園一定係人山人海, 勁多龍友, 要攝埋去影相都唔係咁易. 不過D花真係好靚, 我最鍾意係菠蘿同埋火龍果造型, 非常可愛~~

 

呢班模特兒係國際學校既學生, 展示出唔同國家風格既花飾服裝設計:

 

我黎緊會去左手面果個十年一度Floriade荷蘭花展:

我買咗盆小花花, 叫做家樂花, 盛惠$12:

 

行完花展, 我地過海去咗The One睇大追捕, 始終覺得杜緻朗呢個編劇寫既劇本唔夠劇力, 依然好幼嫩, 成個故事既大概, 我睇咗開頭無耐就已經隱約估到, 成套戲彷彿只係靠張家輝既精湛演技去搭夠而已. 不過叫做好過上次果部完全唔掂既殺人犯囉, 果部戲不知所謂到, 令人睇完之後忍唔住爆粗.

2012年3月3日(六) – 香港海防博物館

呢個星期六, 難得流沙包又唔駛出去做野, 所以我地又可以出去拍拖.

 

我地拍拖好鍾意去D博物館, 因為我唔鍾意行商場, 行山我又驚太辛苦, 所以行博物館係我地拍拖既好去處.

 

今次呢個海防博物館喺筲箕灣, 對我地黎講好遠, 我地要先喺元朗搭巴士出天后巴士總站, 再轉地鐵去筲箕灣, 出咗地鐵站要再行十至十五分鐘先到達呢個博物館.

http://hk.coastaldefence.museum/

 

海防博物館出面有D坦克車, 大炮, 呢個area係唔駛入場費都可以參觀到.

 

佢真正既展館喺山上面, 比咗十蚊入場費之後, 要搭lift按8樓, 先去到展覽廳果層. 上到去居高臨下, 環境清幽恬靜, 又望到海, 景色真係一流.

 

山上面都有D大炮, 軍事設備之類. 而展館裏面就有展廳講述明/清代海防, 鴉片戰爭, 日佔時期等等既歷史, 亦有D紀錄片既播放.

 

我地行咗差唔多三, 四個鐘, 行到佢關門而無奈咁離開, 因為行到差唔多夠鐘果陣, 我地已經快睇快行, 唔能夠慢慢咁細閱D歷史.

 

行完博物館, 我地行返去地鐵站, 途中會經過東大街, 其中有一檔係賣雞蛋仔, 叫”低調高手”, 我見勁多人排隊, 於是八八卦卦咁走去排埋一份.

 

我地買咗一底雞蛋仔, 估唔到又真係幾好食喎, 外皮好脆, 但裏面仍然保持軟綿綿, 唔錯唔錯~~

 

夜晚我地過咗太古城食飯, 食完飯又山長水遠搭車返屋企了.

 

愛上黃豆粉(きなこ)食品

因為我平時食飯食好晏(約兩點), 間唔中又要OT, 所以我平時會買好多零食放定喺公司, 以應付不時之需. 而我買零食既地點通常都係零食物語同埋無印良品.

 

 

呢排唔知點解愛上咗きなこ(我唔知係咪應該譯做黃豆粉??)既食物, 狂買咗好多きなこ既零食. 喺街見到きなこ既產品亦諗都唔諗就會買.

 

 

呢個係同事喺日本買番黎既, 非常非常好食, 大家如果去日本見到既話, 記得買黎試吓啦~:

 

呢個係無印買既, 我自己幾鍾意, 佢仲有一個長條形既, 叫做きなこ棒, 都一樣係咁好食:

 

呢個係零食物語買既, 我就覺得普通啦:

 

 

 大家有無其他きなこ既好味推介??

元朗雞煲

好耐之前興過豬骨煲, 唔知幾時開始興起雞煲, 而元朗區亦有好多間食肆有賣緊雞煲. 不過要算最最出名既, 應該係來來食坊(而家改咗名叫長來食坊), 佢每晚都勁多人, 舖頭外面排滿晒摺枱.

 

元朗區既雞煲我有食過幾間, 包括渝家風, 正品小廚等等. 但係我覺得來來去去咪又係差唔多, 唔覺得有咩特別咁好味. 就算係呢間叫做好出名既長來食坊, 我都唔覺得話特別好食.

 

大家有無食過邊間雞煲, 係覺得真係非常好食的? 我真係想去試吓~~

 

 

Ruby Tuesday半價下午茶, 日日狂食

前排大老闆返咗黎香港, 所以我地都遲咗出去食lunch, 有一日我地見都咁晏咯, 不如就等到3點食Ruby Tuesday既下午茶啦.

 

食完埋單果陣waiter問我地有無恒生信用卡, 原來果期做緊優惠, 只要用恒生信用卡簽賬, 就可以享有下午茶買一送一優惠, 於是乎平時埋單要成$50既tea set, 而家只係$25就食到, 仲抵過去茶餐廳, 真係開心死~~

 

我地知道呢個優惠既時候已經係2月尾既事, 而呢個信用卡優惠只係做到2月29日為止, 於是我地一有機會就日日都去幫襯咁濟, 搞到差唔多日日都食~~

 

平時我地多數叫Ruby Minis, 但由於日日都去既關係, 所以我地都試咗其他tea set, 例如熱狗啦, 窩夫啦. 不過我都係覺得迷你漢堡最好食~~

2012年2月25日(六) -- 荃灣三棟屋博物館

流沙包難得星期六唔駛出去做野, 有時間同我去拍拖, 於是我地今日去咗荃灣既三棟屋博物館行吓.

 

博物館位置幾方便, 喺荃灣地鐵站綠楊新村出口出咗之後, 行五分鐘左右就到. 而且三棟屋博物館係免費入場架.

 

個博物館有介紹三棟屋既歷史, 介紹以前農民點樣種植稻米, 有介紹荃灣區既發展等等.

 

睇番以前既相片同埋廿幾三十年前所拍既影片, 真係好慨嘆香港發展之迅速. 原來八十年代仲有人喺當時未發展既東涌種植稻米架喎, 真係滄海桑田…

 

行完博物館 我地就去咗南豐中心既旅行社問歐洲團, 三年前我同流沙包去過歐洲蜜月; 今年就打算做孝順女, 同埋細妹妹夫 帶埋墨魚媽墨魚爸去歐洲玩吓, 睇順便睇十年一度既荷蘭花展.

 

行完旅行社之後, 我地就行過去如心廣場, 因為今晚約咗CityU班同學喺漁屋食日式放題.

 

今次揀既呢間放題都算幾好, 價錢唔算太貴, 加埋一 大約二百蚊一位, 食物款式都算多, 質素亦唔差, 上菜既速度亦都幾快.

 

不過到我地落幾二, 三輪單果陣, 上菜既速度就慢咗落黎, 而且仲間中會漏單添.

 

但總括黎講我覺得幾抵食, 所以當晚都非常多人等位, 到我地九點幾埋單果陣, 門口仍然有人等緊位.