我中四開始就已經做兼職, 果陣係一間琴行仔學琴, 個miss兼老細就叫我星期六, 日落去做睇舖. 當然中五既暑期工亦都係果間琴行度做啦, 我仲好記得當時既時薪係$18.
入U前果年我又做過輕鐵既臨時調查員, 即係企係車卡門口位置, 不停遊車河到每個站數下有幾多人上車落車咁.
然後我又係女青年會做過鋼琴教師, 不過佢呢份係超剝削兼刻薄既廉價勞工, 通常你去琴行教, 學生既學費係同琴行一人一半, 老師唔需要操心學生有無交學費, 去邊度買書呢D事. 但係女青教, 佢唔會幫你睇下個學生有無交學費, 試過有學生上完堂, 個staff先話個學生無交學費, 個學生又死都話交佐. OK咁算囉, 我當free果堂唔收錢勒. 點知女青佢PK到話唔會出果堂人工比我不特止, 仲要扣我人工, 因為佢話D學生既學費仲包括租用琴室既費用, 所以即使我唔收果堂人工, 佢都要我嘔番果堂既「琴室租用費」出黎, 離晒譜!! 
你請我黎教咩都唔包, 唔負責追學費唔包買書, 咁我搵D學生上自己屋企教都得啦, 我做咩仲要同你對分學生D學費呀!! 我果陣連琴書都要幫學生去買呀! (其實我可以不負責任地寫個書名叫D家長自己去買, 但黎得女青學琴既仔女家長都係D屋村師奶, 咩都唔識, 英文又唔識多個(琴書全部都係英文名), 我當好心幫手買埋)
然後我又做過源吉兆庵既禮盒包裝員, 果陣係新年前, 係賣禮盒既高峰期, 你知日本D禮盒包裝得幾咁精美架啦, 款款都有唔同包裝, 唔同既包裝紙, 包完又要係外面加條繩縛蝴蝶果隻. 果陣工作地點係SOGO地庫, 類似貨倉既地方. 果陣公司都算係咁, 如果果日生意額超過唔知幾多十萬, 就會派$50利是, 都幾和味架.
當然我仲有做過補習啦, 上門同D小學生補習, 呢個最好搵, 因為小一都最少收$50/hr, 小六就好似收$70~80/hr. 我果陣同時有補屋村既學生同住私人樓既學生. 私人樓學生真係補得輕鬆D, 因為佢地通常自己一間房, 我地就係房入面補習, 所以我可以同學生傾下計, relax D. 但係同屋村學生補, 佢地唔會有房, 要係廳補, 個阿媽就坐正係隔離, 我就覺得好大壓迫感, 同埋個阿媽又成日出聲, 又話佢個仔咁又咁, 過晒鐘都無意思停口比我走, 餐餐都補突一個鐘(我補私人樓學生都唔會準時一個鐘即走咁肉酸, 都會補多五至十分鐘先走, 但呢個係我自願囉), 又唔補水, 所以我好憎補屋村學生.
你地又做過咩兼職?
5 則留言:
我又係中四開始做 part time, 係一間速遞公司做蛋散野,之後中五後, 就係 pizza hut 做聽電話都做左年幾ga!!之後就因為係補習社做左 miss一年, 轉工後索性一放工就去help 人補習, 不過就冇你咁多$$, 因為佢地住公屋, 唔係d咩有錢人, 都唔敢收咁多錢, 最高峰補四個, 那時候個樣幾殘 , 又 thin , 一返到屋企就死左係張床到了 , 仲要唱k都冇哂氣, 真係教小朋友真係命都短幾年 , 佢地做野又慢吞吞, 有時等佢地做 homework等到 sleep左, 幾驚俾人發現 原來你識彈琴ga??好勁呀 , 我覺得女仔識彈琴, 好吸引
如果唔影嚮份正職，做下part time 都幾好呀！可以揾D外快使下。我都做緊架
三姑: 補習社人工好低既. 讀U果陣我上樓學過素描, 佢果度又有閞補習班, 個老細都有搵我教補習, 補中學生, 我問佢幾錢人工, 佢篤完一輪計數機話有四十幾蚊/HR. 我差D噴飯, 我私人補小一都收$50/HR啦. 你等小朋友做功課都算幾好啦, 我補習都未試過係教佢做功課. 我補習係教佢地新野架, 我自己會自訂教材同出埋卷比佢地試做. 琴我都好耐無彈囉, 如果遲D有時間我想學番長笛呀~
我做個d多數都係help 佢地睇 hw同默下書咁...點會教野, 攬掂自己d hw都偷笑, 教到我嘔血
Hello, welcome to my blog 歡迎來臨我們的工作日誌 http://hk.myblog.yahoo.com /grouptutors07/ xanga.com/tutors07 也可加我們的MSN/寄e-mail: tutors07@gmail.com
發佈留言