2007年3月12日(一) -- 見工(上)

今日約佐11點上去某某日本公司見工, 地點係尖東, 尖東我真係唔多熟, 又係兜黎兜去先搵到地點, 又大風又凍, 嗚~~ agent話呢間公司唔會嘥時間2nd IN, 所以一次過見晒HR, 日本人, 同一個女人. 佢地個HR好勁呀, 日文好流利呀~ HR問我自我介紹用日文定英文, 我話兩樣都得, 於是就叫我用日文自我介紹. 明明段自我介紹我係背到滾瓜爛熟, 但係當時就講到甩甩cut cut, 於是我唯有用笑容搭夠. 個HR好好人, 佢用日文叫我唔駛咁緊張, 大家當傾下計. 跟住就由日本人先開始發問, 問我介唔介意出差同OT, 我而家公司有幾多日本人係度, 問我去過日本咩地方, D日文係香港學定日本學, 個日本人仲問佐好多野, 但我都唔係好記得勒. 跟住就到個女人用英文問我, 我已經唔記得佢當時問我咩, 跟住就用普通話問我家庭狀況係點, 我相信佢聽得出我D普通話... 唉~~ 然後佢地有問我係而家呢間公司做佐咁耐, 應該都有D野吸引到我, 佢地問我公司福利係咪好好, 我話係呀, 佢地問我公司有咩benefit, 我就如實講出黎, 跟住佢地問我bonus係點, 我就話我而家有16個月糧, 佢地聽到即刻話呢度無咁多喎, 我即刻話你地basic salary高呀麻, 哈哈, 我好白痴呀~~~

interview既過程我都好坦白講我而家呢份工無機會講日文, 所以想轉工搵份用到日文既; 我亦好坦白講我而家都無咩需要講普通話, 因為大陸D人識講廣東話; 我亦都話我主要負責既客係馬拉客同新加坡客, 我同佢地都係講廣東話, 因為佢地都係中國華僑. 所以結論就係我平時主要係講廣東話, 日文同普通話都講得好差. 但interviewer佢地都好好, 佢話只要平時有機會講番用番, 就會講得好好架啦.

成個interview大約係40分鐘左右, 其實我一直都好緊張, 我聽到個心係度猛咁跳, 因為我真係N年無見過工啦. 好彩成個過程都算順利, 我自問表現唔叫好好, 但總算大部份聽得明個日本人講D咩, 我聽唔明果D個HR都會幫下我.