2007年3月12日(一) -- 見工(下)

見完工無耐個agent就打黎問我頭先見工見成點, 我就話佢地好nice呀~ 個agent就話HR剛剛都打佐比佢, 佢話覺得我OK喎, 不過人工方面, agent話可能對方比唔到我個expected salary我, 問我底線係幾多, 我話呢個已經係我既底線啦喎, 佢話如果個basic salary少1K半K, 但佢地有traveling allowance, 可能會有幾百蚊, 最後total都應該會係我既expected salary, 問我點諗. 我話如果係咁都無所謂啦, 果舊錢叫做咩都唔重要. 之後佢就話覆番果邊HR先, 有消息再通知我.

下午我就返番公司啦(我帶埋套便服去見工, 見完工即刻換番普通衫, 費事比人知道我去佐見工, 你知我公司多八婆, 著到咁返工一定又成為人地茶餘飯後既話題), 一直等消息, 到五點幾個agent終於打黎, 佢話佢地大老板睇過我個file, 覺得我OK, 不過D日文同普通話都講得甩cut, (我知要壓我價),  同埋佢地呢個post本來預既budget都唔係我expected既咁高, 所以人工就真係比唔到我開既價. 到最後連埋traveling allowance, 比我原先expected既少$230...  唉, 是但啦, 反正我要搵工既原因唔係淨係為錢, 我希望可以試下唔同既野. 我問agent到底呢個post total in佐幾多人, 佢話總共in佐6個, 當然我知我唔係最好果個, 但佢地話我有potential喎, 如果有機會講得番, 應該會講得好好. 於是我就應承佐啦~ 因為可以係我結婚前離開舊公司, yeah!!

好多friends都話你見得一份咋喎, 咁就應承啦? 唔見多幾份工再睇下? 你而家in既呢間又係大公司, 可能同你而家一樣又係學唔到D咩野架咋喎... 不過我覺得, 你唔真正做過又點知份工學唔學到野喎, 同埋真係唔對路既, 到時先再搵過另一份囉. 我係而家呢間公司一拖拖佐四年, 到而家真係肯行出第一步搵工, 又比我第一份in就有人請, 點解唔試下啫? 我肯行得出第一步, 到做落真係覺得學唔到野, 我自然會再搵其他工架啦~~ 唔好下下睇死我先得架... 上個月meeting27號你地催我快D搵工, 到而家唔駛兩個星期就搵到工, 算係有交待啦~~

在此要多謝忠實讀者幸福少婦, 多得你介紹呢間agency比我, 搵日請你食飯~~