地址: 油麻地彌敦道348號大華酒店一樓
電話: 2781-1333 Ext2388
星期日晚同屋企人去佐大華酒店樂怡閣食buffet, 完全唔得, 食物種類少, 佢今期話係東南亞美食, 但就無咩款式囉. 生蠔就無擺出黎, 佢話係為佐食物新鮮喎, 只要叫waiter order就得, 咁都唔緊要. 但問題係, 乜D生蠔咁細隻既? 我真係未見過去食自助餐D生蠔係咁細隻, 係平時食開既一半, 甚至只係三分之一.
佢每人送一個所謂煲仔翅, 不知所謂, 水就好多囉, 仲好稀添, 翅就真係要尋寶先發現得到.
飲品就淨係得橙汁同酸梅湯任飲, 你估而家打邊爐咩, 少唔少D呀? 雪糕竟然係牛奶公司家庭裝雪糕, 噢~?! 有無搞錯呀? 我平時去食buffet通常都會食雪糕, 但今次係例外囉~
仲有D甜品, 不知所謂, 款式都唔係多架啦, 仲要樣樣都咁難食, 芒果布甸硬到呀, 勁多魚膠粉. 黑森林蛋糕仲難食過美心, 無cherry既都夠膽死叫做黑森林蛋糕? 係個燕窩燉蛋同個豆腐花叫做合格.
仲有呀, D枱鬼死咁密, 坐到鬼咁迫, 要出去攞野食既話要附近D人坐入D先有位行出去.
結論係完全唔掂呀, 仲要收$228一位, 雖然四位送一位, 但咁既價錢, 我駛鬼黎呢度食咩...
是次每人消費約$200元
3 則留言:
我公司樓下都有自助餐食, 仲做緊特價(其實都做左好耐下), 但我一直都冇去試, 因為搵唔到人陪我~~ 不過終於約左friend星期四去食(有2個係男仔, 感覺上抵d), 食完向你報告 點解你好似日日都出街食咁既? 我一星期至出去食1~2次咋
二家: 話時話你公司係邊架?? 因為我同男友一個星期得一, 兩晚會返伯母屋企食飯; 其他日子得我同男友兩個人食飯, 通常都會出街食, 好少自己係屋企煮飯囉~ 咁我又會時不時同d friends出黎食飯喎, 所以咪好似成日出街食飯咁囉~~
我公司起九龍灣國際展貿中心, 樓下久唔久就會有mini concert, 有線世盃都係樓下攪~
發佈留言