星期三果日要返大陸, 因為上次大陸班人又出錯貨, 所以肥佬老細問我駛唔駛上去同佢地開一次會, 否則佢地餐餐出錯貨之後咁就寫番個report落黎就算, 又無改善又無進步. 雖然我覺得大陸班人做野已經有佢地既「風格」, 我覺得即使開D咩野會都無咩用, 但既然老細開到口, 唔通我say no咩. 由於我一, 二, 四晚都要返學, 星期五又多人過關, 所以我只可以揀星期三上去. 不過返大陸有$100 allowance, 同埋我直接係屋企出發唔返公司, 所以可以遲D先起身, 叫做都有D著數既...
我同採購同事一齊上去, 約佐十點係落馬洲等. 我九點半出門口, 九點七去到元朗大馬路, 等佐陣就有77小巴, 九點十就去到落馬洲, 好快呀~~ 換佐智能身份證之後我第一次返大陸, 今次第一次用e-道, 果然好快好方便. 十點三就過到皇崗, 今次同採購一齊上, 佢call佐架叫做靚小小既7人車, 坐都坐得舒服D. 車程無塞車好暢順, 大約十一點三左右就去到長安. 我地先去華美酒店食飯, 我叫佐個三杯鴨飯, 因為好似好新奇咁, 點知原來只係一碟豉油鴨飯咁樣, D菜仲要係苦既, 食佐兩條就無食. 採購叫佐碟葱油雞飯, 佢D雞皮好黃呀, 同埋仲有D血水, 好似唔多熟咁... 個湯應該勁多味精, 因為我覺得好飲就好飲, 但味道就好強烈. 佢送既生果係西瓜, 但當然我無食到啦, 係大陸我真係唔敢亂食野, 點知呢碟西瓜切佐出黎有幾耐架...
我約佐一點半開會, 食完飯都只係十二點半左右, 不過都過佐廠果邊坐下, 過到去無無聊聊同D人吹下水打下招呼, 佢地又話我瘦佐, SOSO仲話我皮膚靚佐添喎, 哈哈~~ 開個會叫呢個call齊果個, 正式兩點先開始, 三點鐘開完. 本來正常開完會就走得架啦, 點知班人又有貨要出, 於是唯有等佢地出埋單我係上面做完先可以番落黎香港. 由三點鐘一路等到佢地四點三先有單比我, 我嗱嗱臨借老細部電腦黎安排出貨. 本來約佐司機四點半, 點知我快手極都要成五點先走得. 好彩無塞車啫, 大約六點三就返到皇崗, 七點就返到元朗.
本來採購叫我同佢一齊係上面stay一日, 星期四先走, 但叫我住大陸D cheap cheap酒店我真係唔制, 佢地之前住開果間長安國際酒店又鬧鬼喎, 我寧願辛苦D都要即日來回呀~~ 點知上到去採購先話我知佢地而家無住長安國際, 去佐住凱悅. 吓? 係咪真係Hyatt先? 採購話間酒店好靚架喎, 有泳池, 有gym房, 等我下次帶埋泳衣同運動衫先上去過夜啦, 當渡假都好...
返到屋企食飯盒果陣無無聊聊睇下電視, 做緊果套高朋滿座, 完全係一套垃圾, 擺明呢集什麼尋親記係為佐宣傳果個乜鬼大陸樓盤專登拍出黎架啦, 孫中山先生著過的布鞋,族譜只係一張咁既紙?!... oh my god, 咁既低能劇情都諗得出, 好野!! 伍詠薇發白日夢老公包二奶果段仲話自己三從四德, 連貞節牌坊都攞埋... 乜貞節牌坊唔係比D死佐老公既寡婦, 多年都無改嫁, 守寡守婦道到老既先有既咩?? 自己老公生勾勾係度都可以攞貞節牌坊? 唔係化? 唔好玩啦~~ 去讀多兩年書先做編劇啦~~
沒有留言:
發佈留言