星期六完全係日夜顛倒, 訓到下午三點半先起身, 食完個tea同流沙包行佐陣元朗, 諗住物色下結婚鞋, 係元朗廣場又走佐去買Keroppi, 買和菓子玩具同去佐扭蛋, 完全係尋日既翻版. 但我地今日仲去埋冒險樂園玩添, 攞佐五十個coins去掟彩虹, 都幾好運, 我掟佐幾次就掟中佐綠色, 有500票. 我同流沙包就各人都掟中一次黃色, 而紅色就掟中佐N次, 所以呢五十蚊都算掟得「物有所值」架啦~
返到屋企都八點幾, 我提議去游水, 因為天氣都開始轉涼, 落水果下真係好鬼凍. 今日都算無間斷咁係咁游, 無再好似前一兩次咁游一陣就索晒氣要抖一陣, 但始終都係游得好慢, 我仲未掌握到去水果下.
游完水返上樓叮埋上星期飲剩既雞湯同湯渣黎食, 然後hea一陣睇下電視上下網, 十二點左右再落去食糖水. 因為我今日好晏先起身未眼訓, 所以食完糖水就上陣網睇下D結婚既資料, 睇睇下睇到好唔開心, 因為見人地都係四月結婚既都book晒所有野, 但自己就咩都仲未搵仲未book, 其實好擔心. 本來之前都有催過流沙包要做D咩, 但佢個款成日唔緊唔緊咁, 咩都大安旨意, 成日反問返我駛唔駛咁快. 問得多我自己都無癮, 心諗既然流沙包唔急唔緊唔理咁我都唔理啦, 到時迫到埋黎再話之佢死, 但諗諗下如果到時真係咩都安排唔好, 咁我既婚禮就會咁樣糟蹋佐架啦喎?!!! 越諗越唔忿氣, 一路喊一路諗點解自己要咁可憐, 四月結婚到而家都未book影婚紗相, 攝影又未book, 租衫又未試, 流沙包要返工又唔可以隨便請假, 得番星期六日可以去做又一定人多到死… 結果到星期日朝早七點幾先正式訓覺.
沒有留言:
發佈留言