公司養廢人!!

等佐好耐好耐, 今日終於出晒summer term既成績:

Accounting for managerial decision making  A+
Managing organizational behaviour  A+

Overall GPA: 3.9

但唔知點解我無咩開心既感覺, 因為成績好又唔代表出到黎做野會搵到高薪厚職. 其實呢排係公事上有D唔開心(正確D講係度做咁耐根本都無開心過), 事緣係有一日我收到個同事既mail, 佢問我可唔可以share佢部份工作, 因為佢負責既野越黎越多, 其實我都知佢好忙, 晚晚都OT到八九點. 佢話好想同老細講, 但佢知佢地都無能為力(個日本人太忙, 而個PK死肥佬就無能), 所以想問佐我意見先, 因為佢知道如果佢同死肥佬講, 條PK就一定會搵我.

我唔開心既原因唔係因為我會多佐野做, 呢個同事同我都熟, 見佢日日咁忙我幫下手唔係問題. 問題係: 我係公司完全係一個打雜囉, 邊個有起咩事上黎都會關我事既? 大肚個同事請病假成個星期唔返又係我一個人自己死頂晒佢所有既jobs... 總之好似係其他同事有咩野要搵人幫手都係我去頂. 我係呢度比人既感覺真係咁清閒咁隨時stand-by咁既咩?? 我感覺到自己既地位好低微, 所以我好唔開心, 更加更加想快D離開呢度, 唔想再係度做埋晒D無需技能無需專長, 阿豬阿狗中五畢業既都識得做既job.

其次係上星期五無啦啦收到駐廠日本人既mail:

お世話様です。
事務所からメール流すだけでなく、少しは工場へ来て担当者と確認、調整、打ち合わせしたらいかがですか？
現場に来てコミニュケーションも必要です。あなたも以前はＴＭＨ採用であることを忘れないでください。

事緣係我一向都會於工場出貨前一日提醒佢地出貨當天應承過出乜野貨, 如果出唔到要預先通知我, 等我可以盡快通知個客. 點知今朝無啦啦收到一個咁既e-mail, 大致內容係話淨係send mail係唔足夠, 要我親自上工場開下會同負責人溝通下, 本來呢D內容都無乜野(雖然我知即使我日日上去開會都好, 大陸班PK出唔到貨就係出唔到貨, 開會黎都無用, 白痴!). 最谷氣係佢最後果句「唔好唔記得你以前都係TMH既僱員」, 呢句先令我眼火爆. 話說我公司係香港有兩間分公司, 一間叫TMH, 一間就係而家我係尖沙咀做緊呢間, 2年前TMH要搬上大陸, 所以TMH既員工有部份就跟埋間廠上佐大陸做野, 一部份就轉佐黎尖沙咀既公司, 但其實都係under同一間日本總公司. 佢果句什麼「唔好唔記得你以前都係TMH既僱員」話比我知原來呢個日本人都係痴痴地, 一來TMH已經執佐兩年啦, 二來我而家已經係尖沙咀既人啦, 三來佢地上面班PK加人工加咁多, 又唔見念下我係前TMH人都一樣加咁多比我?!! 四來佢地上面班人搞食飯從來有無叫過我去食呀(雖然佢地請到我都唔會到)?!! 有麻煩事果陣就話你係TMH人, 有著數果陣又唔見佢當我係TMH人?!!! 正一XYZ&^%$@##!!! 同埋唔駛問, 大陸班PK一定係日本人面前唔知篤我咩背脊啦, 將出唔切貨既責任推係我身上啦!! 否則個白痴日本人點會無啦啦出個咁既mail. 班白痴無腦架, 今日送貨落黎香港 成日要求今日飛, 係啦公司就黎買架專機隨時等你地幾時落貨黎香港就可以即刻飛啦, 低能!! 唔駛問 大陸班PK肯定賴我安排唔到飛機所以D貨遲佐比客啦!!! 成班正廢物黎架!! 出唔到貨又唔預先通知, 問佢地又推三推四, 問原因又餐餐都係品質問題, 覆完D納期又永遠跟唔到, 成班都係垃圾!!! 另外個個月都出錯貨, 唔係錯數量就係錯品名一係錯part#. 日日對住班淨係識卸膊, 自己做錯野就將責任推比人, 賴呢樣賴果樣, 做佐幾廿年都無進步, 日日返工遊雲等出糧, 放工就賴死呃OT又做唔到野出黎, 白痴無腦低能既PK, 我日日嘔幾桶血~~!

我之前辭職成日話想轉field, 唔想再做我而家呢類工作, 我果陣就唔知自己究竟想做咩. 而家我知道啦, 我想轉去做EC & FINANCE, 或者係ACCOUNTING, 我要成為專業人員呀~!! 可能我而家先起步實在遲佐D, 但我覺得總好過日日做埋晒D無聊野, 對住班低能既, 再係咁落去我既競爭力會越黎越低, 到時人工年年加越黎越高, 年紀越黎越大, 但所謂既工作經驗就根本唔值錢, 到時公司嫌你人工太高炒佐你, 我唔想到三, 四十歳先比人淘汰. 星期一上果堂financial systems, markets and instruments, 個阿sir係SHK做唔知乜野director, 佢有三個master係手, 但佢既1st degree係BU讀chemistry(唔知同民民係咪同學呢?), 然後做佐四年IT, 之後先轉做finance. 佢話佢見過好多三, 四十歳既男人, 只係搵緊萬二, 三蚊一個月, 但都比公司淘汰, 因為佢地本身個career唔好(其中一個例子話係道亨銀行做teller喎). 我唔想好似佢地咁, 過多十年八年後比人淘汰呀~~