我要做賢妻~~

星期六好唔應該咁發佐流沙包脾氣, 可能我想做番少少野作補償, 所以我星期日晚決定親自下廚. 星期日流沙包又出佐去帶隊, 我就落樓下百佳買齊所有材料, 由下午五點係廚房準備, 搞到七點幾流沙包返黎先煮好成餐飯, 以下為大家介紹當晚既三餸一湯, 白飯任裝: (但原則上我係唔識煮飯的, 所以有咩做錯做漏請多多包涵, 如果我有咩錯漏做法, 請不要介意即管糾正我, 咁我先可以有改善有進步架麻~~) 

1. 蒜蓉西芹雞柳($20.8)

其實今日諗唔到煮咩餸好, 上網睇佐大少奶個BLOG, 見到XO醬西芹雞柳, 心諗可以試下整喎. 我買晒野返到屋企先發覺原來屋企都無XO醬, 得樽海鮮醬同樽蒜蓉, 本來諗住就整海鮮醬西芹雞柳啦, 開佐個獻出黎, 但聞下陣味覺得唔對路, 根本同個餸都唔夾既, 唔敢搏於是倒佐個獻佢. 到最後求其有咩落咩, 結果就整佐個蒜蓉西芹雞柳, 但出黎既效果比我想像中好喎. 通常我炒菜都會炒到D菜水汪汪淋pat pat咁, 同埋我都唔知炒幾耐先至熟, 成日都炒到過佐籠搞到D菜老晒, 但今次炒完D西芹都總算仲幾嫰綠, 同D蒜蓉味又幾夾, 比我想像中滿意.

材料:
西芹 $7.9
雞柳 $12.9

做法:
a) 將雞柳洗淨切細, 加入糖, 鹽, 生抽各適量調味
b) 將西芹洗淨切細, 拖水
c) 先將雞柳落鑊, 炒至半熟後, 再放入西芹一齊炒
d) 加入少許鹽, 雞粉調味, 上碟, 完成

2. 粟米龍脷柳($29)

我一向都有將報紙雜誌見到啱既食譜剪低, 呢個粟米龍脷柳係我N年前係報紙剪低, 今日拎D食譜出黎研究今晚食乜餸果陣見到就決定整呢樣. 其實我一向都好怕海鮮類, 尤其是生勾勾未死果D, 我掂都唔夠膽掂, 所以我整魚多數都係買銀鱈魚, 上次試過買紅衫魚要戴住手套先夠膽整. 唔知點解我成日整魚都整到好腥咁, 今次呢個龍脷柳都唔例外, 流沙包話要煎之前落D蒜頭, 薑, 葱爆一爆個鑊先, 但我成日都唔記得, 餐餐煮D咩都唔會落葱同蒜頭, 咩都就咁落鑊煮. 況且我係屋企十年先煮一次飯, 屋企買定既蒜頭同薑都乾晒變晒做「標本」. 但我覺得個粟米獻汁出奇地好, 無論味道同質地都似番D樣, 入到口, 我好滿意個獻汁.

材料:
龍利柳   $22.1
忌廉粟米 $5.9
雞蛋    $1

做法:
a) 將龍脷柳洗淨切細, 加適量鹽調味
b) 將龍脷柳落鑊煎
c) 忌廉粟米加入雞蛋, 小半罐開水, 攪勻
d) 龍脷柳煎熟後上碟
e) 將剛才的忌廉粟米倒入鑊中, 加入少許鹽調味, 煮至杰杰地
f) 將忌廉粟米直接倒上龍脷柳面, 完成

3. 香煎豬扒 ($15.9)

諗黎諗去都唔知第三個餸煮咩好, 即管落佐百佳睇睇有咩買先算, 見到D豬扒就決定整豬扒啦. 其實我都唔知點整好, 豬扒可以有好多名堂, 什麼香茅豬扒, 香橙豬扒, 洋葱豬扒... 但我屋企咩調味都無. 本來有支瑞士汁, 但用黎煮豬扒我又驚怪佐D, 見到支蠔油諗住不如用蠔油做個獻, 但又好似唔多match, 結果溝佐個獻出黎都係倒佐無落鑊. 到最後好簡單咁求其用老抽, 生粉, 鹽, 糖同麻油做個獻, 整出黎又幾好食喎~

材料:
急凍無骨豬扒 $15.9

做法:
a) 將豬扒用刀背剁鬆
b) 加入適量鹽, 糖, 生抽調味
c) 將豬扒放入鑊煎
d) 將老抽, 生粉, 鹽, 糖, 麻油, 水各少許做獻汁
e) 豬扒煎熟後, 埋獻, 完成

4. 椰子竹絲雞 ($37)

之前試過煲青紅蘿蔔湯, 冬瓜湯, 粟米魚肚羮, 今次決定試下煲雞湯. 點解買竹絲雞? 因為百佳得番竹絲雞賣, 求其啦... 原來開椰青係咁鬼難, 我仲買佐果D平時食泰國菜飲果D椰青, 而唔係買細細個圓形果D. 我用佐兩把鉸剪兩把刀去開個椰青, 好鬼硬, 好辛苦先開到一個窿仔, 勉強塞隻匙羮入去刮D肉出黎, 救命~~ 同埋D湯好多油呀, 我一路煲一路將D油「筆」出黎, 係咪因為我無將隻雞拖水先呢??

材料:
竹絲雞 $26.9
椰青 $5.5
粟米兩枝 $4.6

做法:
a) 將雞洗淨, 切開雞翼, 雞脾, 剪去腳趾(其實我都唔知係咪咁做)
b) 洗淨粟米
c) 開半煲水燒滾, 將雞, 粟米放入
d) 破開椰青, 椰子水留用, 將椰子肉刮出
e) 將椰子肉及椰子水放入湯中
f) 慢火煲, 完成

我煮既份量係預多佐, 可以每人都帶到飯聽日食. 今次餐飯我比自己60分, 合格多少少啦~

同場加映 -- 煮完餐飯後七國咁亂既廚房: