九州之旅Day 3(part 2) -- 阿蘇, 大觀峰(熊本縣)

2010年4月2日(五)

上文題要, 話說我地上佐車之後, 突然發覺有D野未做. 有無聰明既觀眾已經估到?

 

無錯, 我地唔記得開locker攞番D行李呀!!

 

我地當然即刻落番車, 但開完locker之後已經趕唔切返上車啦, 唉...

我地本來係搭呢架11:37既九州橫斷特急架麻, 原定12:44就可以抵達阿蘇:

無辦法啦, 問吓車站職員下一班特急係幾點出發, 咩話? 下午兩點幾??

 

嗚, 特急列車搭唔到, 職員教我地搭普通列車, 先搭11:57開出既車去肥後大津, 然後再轉車去阿蘇站.

 

張特急券用唔著唯有退票啦, 退票要扣幾百円手續費架麻, 激死人啦! 蝕佐錢又蝕佐時間, 點解我地會咁白痴唔記得開locker架? 我淨係掛住食啦, 淨係掛住去MOS BURGER買包啦!!!

明明我地應該搭特急架麻, 而家要搭呢條普通既豊肥本線:

死死地氣上到車, 即刻打電話比租車公司, 因為我地本來book佐1點鐘去到拎車架麻, 而家無可能一點鐘去到啦, 唯有同租車公司講我地miss佐班特急, 而家搭緊普通列車, 要遲D先到.

 

好彩原來搭普通列車都唔係太耐(好彩熊本至阿蘇距離唔係太遠咋, 如果miss既係車程幾小時既新幹線, 我地真係呆佐係度), 我地比原定時間只係遲佐半個鐘左右, 去到租車公司只係一點半.

 

 

係租車公司辦佐手續, 然後租車公司既staff會同你一齊check車, 我地要望清楚車身有無刮花同損傷, 就算只係小小花, 我地都有同職員講聲, 然後佢會mark低, 以免還車時大家拗數(但我之後去到其他租車公司, 又唔會同你一齊check車架喎, 唔係間間租車公司都咁認真) .

我地呢架戰車會租三日架:

搞佐一大輪, 終於可以開車出發啦.

 

我地今晚既目的地係黑川溫泉,睇番順路, 我地決定去佐大觀峰先. 熊本呢間租車公司好好架, 佢將附近景點既電話號碼列晒出黎, 我地只需要將電話號碼輸入GPS, 然後個系統就會顯示到你想去既目的地名同埋地址架啦.

 

 

 

GPS唔難用, 有圖逐個step教你, 就算唔識日文都唔係問題, 因為大家睇漢字應該都會明白個大概:

雖然我唔識揸車, 但我感覺係日本郊外揸車應該係幾愉快既事, 今次係我同流沙包第一次係日本自駕遊, 心情真係好興奮呀!!

 

自駕遊真係好free呀, 想去邊就去邊, 想停低就停低. 同埋有D地方, 唔揸車的話怕且都好難可以去到.

 

我地兩條友其實只係揸住一本九州guide book同埋依靠住個GPS, 老實講我唔係好知大觀峰既確實位置係邊, 甚至乎我唔知大觀峰到底係離遠睇就算, 定係真係可以親身上到大觀峰. 因為GPS只係輸入佐大觀峰茶店既電話(係租車公司比我地果張電話list搵到既電話), 而本guide book又無好詳細咁寫到明大觀峰果度有咩特別景點, 我地於是一面睇住GPS, 一路望吓D路牌, 終於去到大觀峰啦!!

 

 

 

 

 

 

 

離開大觀峰時係茶店買佐呢支野:

跟住出發往黑川溫泉啦, 今晚我地會住全個trip之中最貴既旅館.