我公司有個低能同事, 我真係超級頂佢唔順.
我可以算係同佢同期入黎公司, 我只係比佢早兩, 三個月左右, 佢係company secretary部門既人, 而我雖然唔係com sec既人, 但我係公司要學晒com sec, tax同埋accounting既野, 所以剛入職果陣, 我同佢係同時接受com sec阿頭既training.
但時間過去, 有好多我已經知點做既野, 果條友仍然係唔識點做, 成日聽佢阿頭鬧佢"你到底有無帶腦返工架? 同你講佐幾廿百次架啦, 你都係唔識既? 你唔記得就搵支筆抄低啦!" "你呢個job都做過好多次架啦, 點解都會做錯晒架?!!"漸漸大家同事都知佢既工作能力係點, 連我阿頭都兜口兜面話佢上一手既工作能力係佢既三倍.
好啦, com sec既野佢做唔掂, 都唔可以日日比佢坐係度無野做架, 於是叫部分同事比D accounting jobs佢做, 比得佢做既accounting jobs已經係超簡單, 並唔係D太複雜既公司黎, 但佢都係做到一塌糊塗囉, 唔識又唔問, 自己求其做到錯晒, 難為幫佢執手尾果個同事, 真係寧願自己一手一腳做仲快.
我地成日都要幫客人打電話去銀行問呢樣問果樣(因為我地D客都係日本人, 好多都唔識英文), 有一次個日本同事叫佢打電話去銀行幫我地既日本客人X先生問D野, 條白痴問完返黎, 只係寫佐張字條放係日本同事枱面, 張字條寫住:"銀行職員話叫X先生打電話去觀塘分行搵陳經理", OMG, 你係唔係白痴呀? 個日本同事都無佢咁好氣, 費事叫佢再打電話, 於是叫佐我幫手再打去銀行問.
有一次, 我地深圳有同事要黎香港training 3個月, 我地要搵D可以月租既酒店比佢住, 於是我叫位白痴同事幫手上網搵吓啦, 我講到明budget係8千蚊, 叫佢幫我搵一堆有月租服務, 果3月個內仍然有房未full既, 月租又唔超過8千蚊既hotel list比我, 我到時再係個list裏面篩選啦. 點知佢求其搵佐幾間比我就算, 有D所謂既"資料", 係求其印酒店網頁既資料出黎, 然後highlight住"本酒店設有月租服務"果一句, 見到咁樣我已經想爆炸, 我再望一望係咩酒店, 其中一間係紅磡都會海逸囉, 你白痴都知果間酒店即使有月租都無可能under 8千蚊呀? 另一D資料, 佢求其印個酒店電話比我就算, 吓? 你即係要我自己再打電話去問呀? 到最後我都係自己搵番就算, 都無條白痴咁好氣.
太"複雜"既野我唔會再搵佢做啦, 唯有比D簡單架啦, 前日, 有客上黎開會, 我明知呢個客每次上黎開完會, 我都要陪佢去銀行攞錢(一攞就十幾萬, 用唔到ATM), 由於之前次次都要陪個客係銀行排成大半個鐘頭隊, 於是我今次叫個白痴同事幫我落去排定隊啦, 我講到明希望佢幫我排定隊, 咁我同個客落到黎, 佢就已經排到去第一個, 咁我地即刻就可以去counter辦手續啦. 我叫佢10點4落去排隊, 我同個客半個鐘頭之後落到去, 我見到… 我見到佢排尾二囉!! 佢前面仲有成七, 八個人, 我果刻按捺住我既怒火, 同個客排係隊尾, 問佢"乜好多人咩?"(其實係明知故問啦, 如果真係多人, 佢前面除佐有七, 八個人之外, 佢後面應該仲有一條龍尾啦!!) 佢回應"唔係呀, 頭先無咩人架, 所以我係出面等(佢指一指門口方向)", 唉, 我真係比佢吹脹, 佢排尾二同我而家排第尾有咩分別啫?! 佢仲要話"你地係出面等得啦, 我排住隊咪得囉". 我真係好想斬鬼死佢呀!!!
沒有留言:
發佈留言