最近做野做得好唔開心

最近係公司好唔開心, 唔開心既原因唔係因為忙, 而係有時自己忙到連去斟水/去toilet既時間都沒有既同時, 卻眼見有同事每日都行行企企無所事事(下一篇blog再講).

講真, 我EQ唔高亦都無咁豁達, 我忙到隻狗, 其他人就他他條條, 而我又知道自己既人工唔係高佢地好多, 我真係覺得條氣好唔順. 如果我人工高D, 我真係唔介意我繼續有我既忙; 佢地有佢地繼續渾渾噩噩.

我人工唔係好高架咋, 我一直以黎都覺得自己係underpaid, 但一路以黎我都當公司比機會我學野, 所以人工低D我都唔介意. 但我係公司已經三年啦, 做既野越黎越多, 要負既責任越黎越重, 但人工卻沒有相應既調整, 我真係覺得好唔開心.

其實我既title變過一次, 話說舊年公司要搬, 卡片要改, 果陣我既卡片title無啦啦由Japanese Coordinator變佐做Senior Consultant, D同事以為我升佐職, 但我人工完全無加過, 根本就唔算升職, 果陣我真係好唔開心架(我當然有問過我阿頭, 但個答案…), 但果陣仲係keep住個心態喺公司學野, 而且公司話經濟唔好麻, 所以我都無追問落去.

自從我係日本返黎之後, 工作越黎越多, 我阿頭叫我遲D睇埋某某部門, 連某某部門既負責人都係我control之下. 但某某部門負責人個title係比我高級架喎?? 雖然呢D細公司, title唔代表D咩, 但係如果我睇埋某某部門, 我既責任亦越黎越大, 但係我既人工始終都無加過(當然全公司既每年加薪都會有, 但個幅度我每年都係唔滿意架囉).

講真呀, 如果我而家要出去搵工, 我ask for既人工會比我而家高3, 4千蚊, 我亦相信自己應該會搵到. 如果繼續留係而家呢間公司, 每年只係加得果幾百蚊, 福利又唔夠一般日系公司好, 老實講, 而家呢度可以講係一D福利都無, 無OT, 無交通津貼, 返大陸無allowances, 無公司旅行, 無body check(唔好鬧我發夢, 我講既係日系公司, 唔係果D刻薄到死既local公司, 我有做過D公司有齊以上所有野, 而且仲有16個月糧).

但我又諗緊, 我係咪要為佐果幾千蚊既加幅而離開而家既公司, 離開一個好好既上司哩? 但如果繼續留低, 我又做得好唔開心, 每朝起身返工果陣都問自己可唔可以唔返工, 有時甚至乎一路換衫一路唔開心到喊.

我知自己咁樣好低能, 但我真係頂唔順啦, 以上既野我兩日前好坦白咁寫佐個e-mail同我阿頭講(我份人好變態架, 一きれた既時候我就會遞辭職信, 今次叫做無咁”衝動”, 但我寫得個咁既e-mail比阿頭, 我已經做佐唔撈既心理準備架啦), 但我阿頭呢兩日可能太忙掛, 完全無比咩野反應我.

其實辭職信我已經打定佐, 如果公司比唔到我想要既水平(其實我覺得公司唔會比得到我), 我真係想唔做野抖吓先, 我真係覺得好辛苦呀!!