薯仔沙律+芝士焗長通粉 (附食譜)

薯仔沙律

材料:
1.薯仔2個
2.青瓜1條 $2
3.沙律醬適量



步驟:
1.薯仔去皮, 青瓜切片
2.薯仔放入熱水煮至變淋
3.將薯仔壓爛成薯蓉, 加入青瓜片
4.加入鹽調味, 再加入沙律醬拌勻, 即成

 

芝士焗長通粉

成本: 約$30 (2人份)

材料:
1.長通粉250g $7.5
2.剝殼蝦肉 $20.8
3.洋葱半個 (切條)
4.芝士碎適量

白汁
1.牛油30g
2.麵粉30g
3.牛奶250ml



步驟:
白汁
1.鍋中放牛油, 加入麵粉炒勻
2.逐少加入牛奶拌勻, 加入少許鹽及胡椒粉

1.長通粉煮淋
2.熱鑊下油, 加入洋葱炒香
3.加入蝦略炒, 放少許鹽及胡椒粉
4.加入長通粉, 再加入白汁拌勻
5.將長通粉放入碟中, 灑上芝士碎, 入爐200度焗30分鐘

 

第2次考QP, 成績公佈

話說6月尾考完兩科QP, 上星期公佈成績, 結果係:

MD (taxation): 1 take pass
MC (auditing): 第2次肥

我以前有做過tax, 所以對MD呢科都有D信心, 同埋人地話MD係咁多科之中最易既一科, 所以我都唔太擔心呢科, 驚只係驚自己time management做得唔好, 做唔晒D題目 (我有題成20分無做到呀~~).

至於MC auditing, 我完全無信心. 一來我無做過audit, 二來我一向唔識吹水... 你一大堆數字叫我計數, 我唔驚. 但你比個case我叫我作野, 係我既弱項.

MC呢科, 有朋友已經借佢補習既NOTES比我溫 (我窮, 到而家為止都無去補習, 好彩有好朋友借我notes), 又有補習社既MOCK卷, 但我真係溫極都無把握. 有時連題目問咩, 到底佢想要咩, 我都唔知...

我身邊一同考MC既2個朋友都肥咗, MC既pass rate好似越黎越低, 今次既pass rate好似係40%. 其實今次唔合格我無唔開心, 因為都預咗, 我只係唔知應該點樣溫呢一科, 如上所述, 我連題目想要咩答案都唔知, 已經死咗一半...

黎緊12月, 我應該只會報番MC呢科, 一次過take兩科我真係應付唔到...

馬蹄荔枝湯 (附食譜)

 

食譜參考: 港式滋潤糖水 王偉誠著

成本: 約$22 (兩大碗水)

材料:
1.去皮馬蹄70g
2.新鮮荔枝10粒
3.砂糖少許

呢度27粒糯米糍, 其實大約街價應該幾錢左右? 硬係覺得好似比人呃咗咁...:



步驟:
1.荔枝去殼去核
2.清水1000cc倒入鍋中, 放入馬蹄, 荔枝肉及砂糖, 小火煮半小時, 即成

 

檢討:
1.呢個糖水無咩特別, 無下次

HELLO KITTY@朗豪坊

8月14日, 本來流沙包請咗假, 我地原本一朝早可以去街街.

點知... 八號風球, 頂!

人地要返工果陣, 又唔見D八號風球會喺日間掛咁耐 可以比我偷到一日假.

到流沙包同我都齊齊放假果日先黎掛八號風球. (繼續我D死人性格, 賴得就賴 ) 

結果果日喺屋企呆咗成朝, 無無聊聊唯有整吓甜品, 又會無啦啦整親手指搞到D血流到巴巴聲.

最後等落咗八號先出街, 勉為其難去咗旺角行.

雖然我唔係HELLO KITTY粉絲, 不過既然黎到旺角就去朗豪坊睇吓~

竹蔗茅根水 (附食譜)

食譜參考: 港式滋潤糖水 王偉誠著

材料:
1.竹蔗200g
2.茅根50g
3.馬蹄100g
4.紅蘿蔔1條
5.冰糖70g

步驟:
1.竹蔗洗淨, 切片
2.茅根洗淨
3.紅蘿蔔, 馬蹄切細塊
4.取鍋放1500cc清水, 大火煮開後, 放入竹蔗, 茅根, 馬蹄, 紅蘿蔔以小火煮約30分鐘
5.放冰糖, 待冰糖溶化後即成

我終於終於終於都考到車牌啦~ 哈哈哈~~

我唔記得有無喺BLOG講過我學緊車.

我考咗3次先合格.

我係駕駛學院學的, 人地話合格率高, 好多人都一TAKE PASS. 但我係例外, 仲要考足三次先合格.

為咗考呢個車牌, 學費+路票+租車費+補鐘錢, 差唔多用咗兩萬蚊. (駕駛學院十五堂學費+學牌+租車+路票已經萬一蚊; 唔合格一次, 補鐘+路票+租車又三千幾)

第一次考係今年既年初五, 仲諗住新正頭, 無咩車喺街, 應該唔難. 不過我唔知原來考朝早的話, 學神唔可以揸一轉出街練習(禁區時間), 所以喺某一個位, 入咗個左彎之後有架死車係路邊, 我發瘟處理不當, 好近架死車先扭軚出(其實我一直扭緊, 不過扭極都未夠), 結果比考官踩停咗, 即肥啦... (第一次考我行水邊圍村)

第二次係今年五月, 下午兩點考宏業東街, 我行緊一條雙程路, 我喺兩邊有死車既情況下見到有對頭車(仲要係貨櫃/拖頭呢D大車), 於是咪停車, 比對頭車過咗之後先再開車囉. 點知當我停第三次既時候(當然唔係連續停啦, 係三個唔同位置, 但情況都係兩邊泊晒死車+迎面有對頭車), 考官出聲話"同學你做咩停咁多次呀? 你停第三次啦喎!". 我果刻呆咗, 我唔明點解咁既情況唔應該停車. 結果當然係又肥啦!

第三次考, 係尋日. 考之前幾日我已經開始坐立不安, 連飯都食唔落(星期日晚同考果日既朝早都只係食咗幾塊消化餅+豆漿).  我考下午兩點廿五分, 其實我考之前都有揸一轉出街, 但係仍然揸得超核突. 到最後我竟然揸到喊... (無鬼用!) 喊唔係因為比師傅鬧到喊, 而係我忟自己, 點解揸咗咁多次, 師傅又講過九萬幾次, 但有D野我依然做漏. 加上有一個位, 我判斷錯咗, 搞到後面架巴士差D撞埋黎, 果吓我突然覺得自己判斷力咁弱, 根本係唔適合揸車, 諗吓諗吓就喊咗出黎了...

到真正考果陣, 我諗過"反正自己唔係揸車既材料, 今次考唔到的話, 或者就算數了..." 反而又好似豁咗出去咁. 到考官上車, 我專心開車, 當喺路口位考官話轉左既時候, 我個心即刻定咗一半, 因為轉左即表示, 一係考水邊圍村, 一係考元朗村. 避開了最難的宏業東街~

到下一個路口, 考官話直去, 我果刻喺內心大叫咗聲"YEAH!!!", 直去即係考最容易最短路程既元朗村, 我心諗"YEAH!, 終於到我考元朗村了!", 當時個心又定咗一大半. 只要唔犯上嚴重錯誤, 無理由唔合格的.

結果, 總算係無驚無險咁返到學院, 我落車果刻舒咗口氣, 心諗"今次應該掂啦掛?". 但入去等成績果陣, 仲驚過未考之前, 個心勁跳, 雙手勁震, 因為唔知會否遇上地獄考官.  

到最後拎到成績喺手, 我仲懷疑自己睇錯, 唔敢相信自己能夠合格. 終於PASS, 我真係開心到喊呀! 就算知道PASS咗之後, 我對手仲繼續喺度震緊, 可想而知我心情有幾咁激動.

總結, 第一次考有14個剔; 第二次考有16個剔; 第三次考有7個剔 (我明明係自動波, 根本唔駛入咩1波2波, 唔知點解考官會喺"44. 未能選用適當波檔"果格剔咗, 然後佢圈住個剔寫番"DELETED"再喺隔離簽名. 佢又唔係剔錯咗上一格/下一格喎, 因為果個錯剔既上幾格都下幾格佢都無剔到. 人地話考官係唔係都會求其搵D野剔吓你, 我本來都唔信, 但而家我開始信囉, 哈哈)

我係小忌廉@藍灣廣場

小忌廉, 可以講係我兒時第一個偶像, 所以得知小西灣既藍灣廣場有小忌廉30週年既活動, 我即使住喺元朗都一定要入去睇吓.

我咁大個女, 其實連柴灣都未踏足過, 更加唔好話小西灣... (就正如住港島既人話自己從來未入過元朗一樣啫), 由元朗出發先搭968去到灣仔, 再搭788城巴去到總站落車, 估唔到又唔係想像中咁遠.

去到灣仔, 先喺稅局隔離既Delifrance食個悠閒早餐:

去到藍灣廣場了, 其實個展覽好細, 一眼睇晒:

 

離開小西灣, 搭番788, 去到中環落車, 目的地係豚王~

我係D唔鍾意同人地逼新C坑既人, 所以今時今日先第一次食豚王, 不過試過之後都係覺得不外如是啫, 唔係唔好食, 但唔算好好食囉, 只是不過不失罷了...

紅酒煮牛肉+金銀蛋菠菜湯 (附食譜)

紅酒煮牛肉

食譜參考: 新手下廚 高木八江著

成本: 約$50

材料:
1.牛肉 (我買咗牛展) $34
2.洋葱半個
3.番茄2個
4.黃椒1個
5.番茄醬3大匙
6.紅酒1/3杯



步驟:
1.洋葱切條, 黃椒, 番茄切塊
2.鍋中燒熱油, 放入洋葱略炒
3.加入黃椒及番茄, 再炒
4.加入牛肉, 炒至微微轉色

5.炒香材料後, 加入2杯水, 紅酒, 蓋上鍋蓋, 燜煮10分鐘
6.將番茄醬倒入, 再次煮沸後轉小火, 再煮約30分鐘, 最後撒上少許鹽及胡椒粉調味

 

金銀蛋菠菜湯

成本: 約$20

材料:
1.菠菜1斤
2.蒜頭4瓣
3.鹹蛋1隻
4.皮蛋1隻
5.清雞湯250亳升
6.清水適量



步驟:
1.蒜頭略拍
2.鹹蛋黃壓碎, 蛋白保留待用
3.皮蛋切粒
4.菠菜洗淨
5.清雞湯加入清水煮滾, 加入蒜頭, 菠菜, 皮蛋粒及鹹蛋黃, 滾約15~20分鐘
6.加入鹹蛋蛋白, 下鹽調味, 即成

 

是日晚餐約$128.

又食Sunday brunch@The Lounge -- JW Marriott Hotel

為慶祝墨魚媽既生日, 黎JW Marriott既The Lounge食Sunday brunch已經成為咗指定動作.

舊年因為book唔到7月, 同墨魚媽提議不如試吓第二間, 點知墨魚媽既反應係寧願唔食. 所以今年不敢鬆懈, 早個幾月前就打去酒店訂定位. 價錢已經加到$710/位(包酒精飲品) or $610/位(唔包酒精飲品), HSBC白金卡有8折.

食咗幾年, 其實都無咩想再講, 可能大家都食到無咩驚喜, 所以我地提議下年不如試吓第二度啦, 墨魚媽似乎無咩異議, 所以短期內應該都唔會再黎幫襯了.

另外今年見到王馨平同佢老公+兩位老人家坐喺對面枱.

 

食完個brunch就行咗陣PP, 經過我既賣飛弗朱古力店, 忍唔住入去睇咗陣, 其實就算去到歐洲我都唔捨得買黎食. 不過今次呢盒係流沙包送, 嘻嘻~

10粒裝盛惠$260:

糖醋豬肉片+照燒豬肉餅

食譜參考: 新手下廚 高木八江著

糖醋豬肉片

成本: 約$24

材料:
1.豬肉片 $9
2.三色椒2個 $14.9
3.醬油1小匙
4.酒1/2小匙
5.生粉1小匙



調味料:
1.熱水1/4杯
2.黑醋1又1/3大匙
3.砂糖3/4大匙
4.醬油2小匙
5.鹽少許

步驟:
1.豬肉片加入醬油及酒先醃
2.三色椒切粒
3.熱鑊下油, 加入豬肉片拌炒至變色
4.加入三色椒炒勻
5.加入調味料, 待煮沸後, 加入生粉水勻芡, 即成

檢討: 雖然我覺得味道唔錯, 但人地食譜張相, D汁係掛喺D餸上面; 但我就總是整到D汁水汪汪咁…

照燒豬肉餅

成本: $14

材料:
1.免治雞肉 (我買咗免治豬肉) $14
2.薑汁1/2小匙
3.酒1/2大匙
4.生粉1/2大匙
5.醬油1小匙



調味料:
1.酒1/2大匙
2.味醂1大匙
3.醬油1大匙
4.砂糖1/2大匙

步驟:
1.將免治豬肉加入薑汁, 酒, 生粉及醬油先醃
2.將材料用手捏成楕圓形肉餅
3.熱鑊下油, 先煎兩面
4.加入調味料, 蓋上鍋蓋, 以小火燜煮2分鐘
5.打開鍋蓋, 轉中火, 邊搖晃鑊邊熬煮至收汁, 即成

檢討: 用豬肉整, 出黎口感好乾, 無肉汁. 其實我買咗麵包糠諗住撈落去, 但唔記得咗



是日晚餐盛惠: $60 (仲有個木瓜瘦肉雞腳湯無影相)